Luku 15
15
Sère mɛn bɛ́ á papaã á wusoo á yɛ
(MAT 18.12-14)
1 #
LUK 5.29-30. Wusuru-sili gigiã goã n mɔrɛ Yezu ganaa, ǹ nə́ n too koe a lon, ka min kɔsɔn dɔn nɛ, ǹ tɔ baraa n minin lɛ-n. 2*Fariziɛ̃n laanka landa sii-daraalin nə́ goã zùzùũ sii. Maǹ nə́ goã pii: Giĩ kɛ n lɛ koe sii baraa-zɛnaalin-a, a n màn dɔ din bii kunun ǹ ni.
3Yezu tɔ́n sii a kɔnboe kɛ nyaa ǹ nɛ: 4«Bɛ̀ min a sère n paabiɛ, yǎa a goon papaã, a na a pɔmanangɔrɔwenmanangɔrɔ kɛ toɛ walan don, a wo ga goon kɛ lɛ li yǎa a yii. Ka dinin die na a ba bɛ zɛnɛɛ wa? 5Bɛ̀ á bɛa goon kɛ lɛ yɛ, a n siɛ a da a kɔrɔn a foo n kɔɔ̃nɛ. 6Bɛ̀ á daa dɔ piɛ, a na a giaáran lɛ soekɔn ka ǹ miãkɛnɛn nɛ, a pɛ ǹ nɛ mà ǹ nə nyɛnyɛɛ kun asɛ nɛ, a giala mà asɛ a sère mɛn bɛ́ á papaã lɛn, mà asɛ wusoo á yɛ! 7Man pii ka nɛ, nyɛnyɛɛ n Lawa a piɛ bɛa yɔrɔ kɛ lɛ la, biikoo woo biikoo, bɛ̀ sii baraa-zɛnaali goon toto wusoo a sii baraan kio á golee Lawa li. Nyɛnyɛɛ tá Lawa a piɛ bɛa lɛa, á la din baa min pepere lɛa wole pɔmanangɔrɔwen manangɔrɔ nɛ, a giala bɛn man taasɛ, mà ǹsɛn laadoo ba a ganaa, ǹ wusoo ǹ sii baraan kio wa.
Wɔrɔ we mɛn bɛ́ á papaã á wusoo á yɛ
8«Bɛ̀ wɔrɔ we fù n lɔ lon, yǎa a goon papaã, a n bólon diɛ, a na a kion gɔ́ɔ̃ wɔraa a ga li ka tɛrɛɛ nɛ yǎa a yii. Lɔ mɛn na a ba bɛ zɛnɛɛ wa? 9Bɛ̀ á yɛ, a na a giaáran lɛ soekɔn ka ǹ miãkɛnɛn nɛ, a pɛ ǹ nɛ mà ǹ nə nyɛnyɛɛ kun asɛ nɛ, a giala mà asɛ a wɔrɔ we mɛn bɛ́ á papaã, mà asɛ wusoo á yɛ! 10Masɛ n pii ka nɛ, bɛ̀ sii baraa-zɛnaali goon toto wusoo a sii baraan kio á golee Lawa li, bɛa yɔrɔ kɛ lɛ la, nyɛnyɛɛ tá Lawa a dia dí-a wolen li lon, bɛa dɛnaa lɛ a lɛa.»
Nɛgiĩ mɛn bɛ́ á papaã á wusoo á yɛ
11Yezu pɛ doo:
– Giĩ goon ne, nɛgiĩ paa goã a lon. 12A boɛɛndɛnaa pɛ ǹ di ni: «Díi, kíɛ̃ mɛn doamaa bɛ́ nɛ a dɔ masɛ ganaa, bɛ kɔ.» Yǎa ǹ di lɛ na a gɔn màn tala kɔn ǹ bii. 13Lɛawaa dan kɔ́n bɛ kio, nɛgiĩ boɛɛndɛnaa lɛ ná a kíɛ̃ lɛ yii sã, á woo ka a wɔrɔ-n gána sɔsɔɔ kɔ́n nɛ. A ná a wɔrɔ lɛ yii ziziɛ̃ walan sii kooron zɛnaa ganaa. 14A bɛ́ a ná a wɔrɔ yii bii á nya, bòo gole wɔ gána lɛ nɛ. Á daa n giala kɔ a ganaa a doe a laadoo màn kɔ́n-a doo wa. 15Á woo ga dí li gána lɛ a min goon li, yǎa bɛa giĩ lɛ dia a wuru-n biriin lɛduĩ. 16A na á goã a gɔ́ɔ̃ nɛ, ǹ bɛ́ màn-bii mɛn koe biriin la, a bɛ sɔ̃, sɛnɛ, min kɔ́n goã koe la wa. 17Á tɔ́n golee á n taasɛ a din a sii ganaa, yǎa a pɛ a din ni mà dí-nyali á mɔnaa nɛ asɛ di lon, ǹ nə́ màn bii a giala n goɛ̃. A da yaa asɛ n giɛ̃ bòo-n kànaa. 18Mà asɛ n die wusii a wo ǹ di li asɛ pɛ nɛ: «Díi, masɛ wɔ Lawa lon, ma wɔ n dɔ lon. 19Masɛ din ba siĩn doo n ma bíi n nɛ wa. Ma kũ ka n dí-nyali goon bɛ́ lɔn.»
20Bɛ kio, á yoo á wusoo á woo ǹ di a piɛ. A bɛ́ tiãlɛa, ǹ di yɛ, a makara kũ. Á baa si á woo nɛ lɛ kũ, á n sɔɔ a nɛ. 21Nɛgiĩ lɛ pɛ: «Díi, masɛ wɔ Lawa lon, ma wɔ n dɔ lon. Masɛ din ba siĩn doo n ma bíi mà n nɛ wa.» 22Sɛnɛ, díi lɛ mà a dí-nyalin ganaa: «Ka da fufuu ka dɔnkɛ sonbore ne a wɔ. Ka kaaran kɔ la a wɔ a gòon-a, ka kɔsɔn kɔ la a ǹ wɔ. 23Ka da ka diin nɛ kurunkurun kɛ nɛ, ka dɛ, wɔ màn bii kun ka nyɛnyɛɛ nɛ. 24A giala a n goon ka maa nɛ kɛ na á gã, a yii wusoo á kaa. A na á papaã, á wusoo á yɛ.» Ǹ nə́ yoo ǹ tá zɔ́n zɛnɛɛ.
25Giĩ lɛ a nɛgiĩ goledɛnaa kɛ na á goã wuru-n. A bɛ́ boe don, á diri piɛ la, á maàn wuu ma ka bɛ̀-baan nɛ. 26Á lɛ dia dí-nyali goon la, á nɔ̀n da la mà wàa nɛ? 27Bɛ dɔ ná a lɛ si mà ǹ diɛ̃giĩ lɛ na á daa. Mà ǹ di diin nɛ kurunkurun kɛ lɛ dɛ, a giala mà á yɛ, nɛ lɛ wusoo á daa ka gɔ̀nɔn nyantoro ne. 28Nɛgiĩ goledɛnaa lɛ foo yoo, á n piã mà asɛ a we kion wa. Ǹ di soo a ná a nyankɔ. 29Sɛnɛ, nɛ lɛ mà ǹ di ganaa kaa mà a lɛ̀ damatan ke asɛ n dí nyɛɛ nɛ, mà asɛ bin ná a bɔlɔ tii duduu wa. Sɛnɛ, mà a bin bòe nɛ din kɔ asɛ la mà asɛ zɔ́n zɛnaa-n kun a giaáran nɛ wa. 30Sɛnɛ, mà a nɛ bɛ́ á daa kəni, mà a n diin nɛ kurunkurun dii. Mà nɛ mɛn ná a gɔn màn si á woo ziziɛ̃ kun ka lɔn nɛ. 31Díi lɛ tɔ́n pɛ nɛ: «Maa nɛ ganaa, táa n tá kun ka masɛ nɛ haalɛ bibi. Màn mɛn tumaa bɛ́ masɛ wɔ lɛa, táa n din wɔ nɛ. 32Sɛnɛ, n diɛ̃ ke, táa a n goon ka a na á gã a yii kaa, a na á papaã á wusoo á yɛ. Wɔsɛn doamaa nɛ wɔ zɔ́n zɛnaa bɛa lɛa.»
Currently Selected:
Luku 15: SCE2013
Highlight
Share
Copy
Want to have your highlights saved across all your devices? Sign up or sign in
San Catholic Edition Bible © Bible Society of Burkina Faso, 2013.
