Luku 9

Yezu dia dí-a wole fulupaa mɛn bɔ

(MAT 10.5-15; MAR 6.7-13)

1Yezu min fulupaa lɛ lɛsɔkɔn, á pàã laanka boo sii la kɔ ǹ la, mà ǹ nɔ̀ɔn tɔrɔ tumaa loo, ǹ busulən kaka kɔ. 2Yezu na á ǹ dia mà ǹ wo *Lawa a kiibaa ǹ dí nyɛɛ boo da, ǹ busulən kaka kɔ. 3#LUK 10.4-11. Á pɛ ǹ nɛ kɛnɛn dɔn: «Ka baran màn kɔ́n saa kaa zii tɔ we lɛ a lɛa wa. Ka baran bàlà saa wa, ka baran bɔnaa saa wa, ka baran màn-bii saa wa, ka baran wɔrɔ saa wa, ka kɔ́n baran wɔ ǹ dɔnkɛ màn paa saa wa. 4Bɛ̀ ka wɔ kion mɛn nɛ, yǎa ǹ ka kũ doɛ̃, ka goã walan yǎa kaa yoo doe ka woe nyɛɛnɛ. 5Bɛ̀ ka woo kiwi mɛn nɛ yǎa a minin nə n piã ka nɛ, ka n gòã gusuũ duduu bɛa kiwi lɛ-a, ka soo ka n bɔ a nɛ#9.5 Ka ga MAT 10.14 a boo yɔrɔ pɛ kɛ ganaa..»

6Yezu a kialandɛnan lɛn nə́ woo. Maǹ nə́ goã boe kiwi din tumaa nɛ, ǹ nə́ Boo Tii Kɔɔ̃n kɛ pii, ǹ nə́ minin busu nyɛɛ bǎã tumaa nɛ.

Erɔdi a gɔ́ɔ̃ bii ǹ sii

(MAT 14.1-12; MAR 6.14-29)

7 # MAT 16.14; MAR 8.28; LUK 9.19. Siin mɛnɛn tumaa bɛ́ n zɛnɛɛ, kii Erɔdi n bɛ yii boo miɛ. A yiri nə́ n lɔlɔkɔn parsiini, a giala min tɛnɛn man nə́ goã pii mà ZAÃ yii na á kaa á n bɔ geren bii.

8Ǹ tɛnɛn man nə́ goã pii mà Lawa a boo gii-dali Yilii na á bɔ lon á daa.

Gialakunun dɔn mà lɛlɛ a Lawa a boo gii-dali lɛ goon yii na á kaa á n bɔ geren bii.

9Erɔdi tɔ́n pɛ mà asɛ din bie á min da ZAÃ mìi kurii ganaa wa ya? Sɛnɛ, mà kɛ dɔ n die lɛa doo, ǹ nə́ boon kɛn diɛ a wɔ gɔn la?

Bɛ lɛ nɛ, Erɔdi goã giɛ li a Yezu yɛ a yii ni.

Yezu màn-bii kɔ minbuiin duu sooro (5 000) la

(MAT 14.13-21; MAR 6.30-44; ZAÃ 6.1-14)

10Dia dí-a wolen lɛn bɛ́ ǹ nə́ wusoo ǹ nə́ daa, ǹ nə́ ǹ nya ǹ dí yii laakalaa Yezu ni. Yezu nə́ ǹ kũ, á n zɔ̃ á woo ǹ ne tiãlɛa, dia-n woe Bɛtsayidaa kiwi la. 11Zaman lɛ bɛ́ á bɔ a woo siére-a, ǹ nə́ kɔ a kio lɛ. Yezu nə́ n da ǹ lɛ sɔnbɔraanɛ. A na á goã Lawa a kiibaa kɛ boo diɛ ǹ nɛ. Á goã busulən dɔn kaka koe.

12Wasa ná a giala kɔ á miɛ, dia dí-a wole fulupaa lɛ nə́ n zɔ̃ ǹ nə́ dɔ Yezu li, ǹ nə́ pɛ nɛ mà a zaman lɛ loo ǹ wo lɛ-a ǹ kiwin laanka ǹ zàãn nɛ, màn mɛn bɛ́ toɛ, ǹ waa ǹ bǎã yɛ, ǹ màn-bii dɔ yɛ ǹ bii. A giala mà ǹsɛn bɛ́ bǎã mɛn nɛ, mà don ne.

13Sɛnɛ, Yezu pɛ ǹ nɛ kɛnɛn: «Ka dininmaan nə màn-bii kɔ ǹ la.»

Dia dí-a wolen lɛn nə́ Yezu lɛ si: «Buuru sooro dinsɔɔ̃ n wɔsɛn lon ka zɔ̀ màn paa nɛ. Yǎa wɔ woe màn-bii pii kiwi gɔ́ɔ̃ nɛ bɛa min damata kɛ a lɛa goɛ̃ nɛ?»

14Sonbore, zaman lɛ na á goã giĩ duu sooro kɛ miã, lɔn laanka nɛnyaanan gòɛ̃ ná a ba a-n wa. Yezu pɛ a kialandɛnan lɛn manɛ: «Ka minin lɛn kaa tán-a kuru kuru, kuru gogoonmaa goã min posooro kɛ miã.»

15Ǹ nə́ minbuiin lɛ kaa tán, á kɔnpɛ ka Yezu a boo lɛ nɛ. 16Yezu buuru sooro lɛ saa ka zɔ̀ màn paa lɛ nɛ, á n yii saa lon, á Lawa nyankɔ mà a barka wɔ ǹ nɛ. Bɛ kio á ǹ yiyiɛ, á ǹ kɔ a kialandɛnan lɛn la, mà ǹ kɔ zaman lɛ la. 17Minbuiin lɛ màn bii yǎa ǹ tumaa kã. Màn-bii giala mɛn goã, kialandɛnan nə́ bɛ goa, ǹ nə́ woo ne kankaan fulupaa nɛ.

Piɛrɛ pɛ bǎã mɛn nɛ mà Yezu n Nyin-sili lɛa

(MAT 16.13-23; MAR 8.27-33)

18Ǹ kɔ́n pinaa Yezu bɛ́ Lawa nyankoe tiãlɛa, a kialandɛnan nə́ daa a li. Á nɔ̀n da ǹ la: «Minin man pii mà masɛ n die lɛa?»

19 # MAT 14.1-2; MAR 6.14-15; LUK 9.7-8. Ǹ ná a lɛ si: «Min tɛnɛn mà ZAÃ mɛn bɛ́ á goã *batɛmu diɛ minin ganaa. Gialakunun dɔn mà Lawa a boo gii-dali gole Yilii ni, kɔsɔn dɔn mà a n lɛlɛ a Lawa a boo gii-dali lɛ goon lɛa, a yii kaa á n bɔ geren bii.»

20 # ZAÃ 6.68-69. Yezu pɛ ǹ nɛ: «Ka dinin dɔn, ka n pii mà die n ka masɛ nɛ?»

Piɛrɛ boo saa a ná a lɛ si: «Ma n Minin Nyin-sili lɛa, Lawa bɛ́ mà asɛ á re ǹ mɛn diɛ.»

21Yezu nə́ n gɔn waa ǹ nɛ, mà ǹ baran a boo da min kɔ́n nɛ wa. 22Á pɛ ǹ nɛ mà Min a Nɛgiĩ doamaa nɛ a fuu yɛ parsiini. Mà Zuifun goledɛnan nɛ, ǹ Lawa a kion wúlu-bɔlen goledɛnan nɛ, ka ǹ landa sii-daraalin tá re n piɛ̃ asɛ nɛ, mà ǹ tá re asɛ dii asɛ gã, mà asɛ a gɛ̀ lɛawaa sɔɔ mà asɛ yii á re kiɛ.

Kɔ Yezu lɛ ǹ gɔn

(MAT 16.24-28; MAR 8.34—9.1)

23 # MAT 10.38; LUK 14.27. Bɛ kio Yezu pɛ ǹ tumaa nɛ: «Bɛ̀ min mɛn tá li a kɔ masɛ lɛ, bɛa dɛnaa nə n yii bɔ a din-a, a nɔmaa si a ganaa baraabaraa a kɔ masɛ lɛ, haalɛ ta a n giɛ̃ dere ǹ gɔn ganaa. 24#MAT 10.39; LUK 17.33; ZAÃ 12.25. A giala, min mɛn bɛ́ giɛ a din nyin li, bɛa dɛnaa nyin tá re nyɛɛ. Sɛnɛ, min mɛn nyin bɛ́ re nyɛɛ masɛ taman yii, bɛa dɛnaa nyin tá re goɛ̃. 25A là n ka wàa nɛ min kanaa gɔn màn tumaa yɛ, a din nyin wusoo a papaã a bɔ̀n baa? 26Bɛ lɛ nɛ, min mɛn bɛ́ sìi koe masɛ tɔ pɛ ganaa kanaa, a n sìi koe masɛ a boo kɛ lɛ dɔ a pɛ ganaa, Min a Nɛgiĩ bɛ́ re die ǹ mɛn pinaa, ma din laanka maa Díi a gugurubaa kɛ nɛ, kun ka lon a dia dí-a wole sonboren kɛn nɛ, ma dɔ á re sìi koe bɛa dɛnaa ganaa. 27Man pii ka nɛ sonbore, kasɛn mɛnɛn bɛ́ kànaa, ka tɛnɛn yii á die Lawa a kiibaa kɛ lɛ yii ka tɔn gã.»

Lawa a Nɛgiĩ na a din a gugurubaa nyɛɛ

(MAT 17.1-8; MAR 9.2-8)

28 # PIƐ2 1.17-18. Lɛawaa kiwisi kɛ miã bɛa boon kɛn lɛn diɛ kio, Yezu Piɛrɛ kũ ka ZAÃ nɛ ka Zaaki ni, á dii ǹ ni kele mìi ni, ǹ nə́ woo Lawa nyankɔ. 29A bɛ́ Lawa nyankoe, Yezu yɔrɔ gɔ́ɔ̃ nə́ n bɔyaa, a wɔ ǹ mɔnaa dɔ fu kɔ ka piepie, á n tɛ pii. 30Bǎã goon ne gɔrɔ min paa golee a li, ǹ nə́ boo diɛ kun ni. Bɛa min paa kɛ lɛ, Muizu ni, Muizu mɛn bɛ́ Lawa ná a dí-pɛn lɛn kɔ la, ka Lawa a boo gii-dali gole gole Yilii ni, 31ǹ nə́ golee a li ka Lawa a siĩnbaa nɛ. Maǹ nə́ goã boo diɛ ka Yezu ni a din wɔ gɔn la, a bɛ́ re giɛ̃ lɔn Zeruzalɛmu kiwi, a kɔnpɛ ka Lawa din a sii yɔrɔ boe kɛ nɛ. 32Piɛrɛ laanka ǹ miãn man nə́ goã nyuù we taãn-taãnɛ. Sɛnɛ, ǹ yii bɛ́ á kaa ǹ nə́ Yezu a siĩnbaa kɛ yɛ ka min paa lɛ nɛ a li. 33Bɛa min paa lɛ bɛ́ n boe Yezu li ǹ mɛn waáraa, Piɛrɛ pɛ nɛ: «Mìinaa ganaa, á siĩni wɔsɛn nə goã kànaa. Wɔ n die siã sɔɔ doe, goon nə goã n din wɔ lɛa, goon nə goã Muizu wɔ lɛa, goon nə goã Yilii wɔ lɛa.» (Piɛrɛ goã a din a boo kɛ lɛ giala miɛ wa).

34Piɛrɛ bɛ́ bɛa boo lɛ diɛ, labara daa n pɛnɛ ǹ ganaa. Nyɛ́ɛ Yezu a kialandɛnaa sɔɔ lɛ kũ bɛa labara kɛ lɛ a daa biikoo li. 35#IZA 42.1; LUK 3.22.Boo-diɛ bɔ bɛa labara lɛ-n kɛnɛn: «Kɛ n masɛ a Nɛgiĩ lɛa, ma bɛ́ má min mɛn yii gɔgɔɔ̃. Ka n too kɔ a lon.»

36Bɛa boo-diɛ lɛ bɛ́ á bɔ á nya lɔn gɔrɔ, Yezu dinsɔɔ̃ na á goã golee ne. Yezu a kialandɛnan lɛn nə́ n lɛ tã bɛa sii lɛ ganaa, ǹ yii màn mɛn yɛ, ǹ bɛ laakalaa min kɔ́n nɛ a waáraa wa.

Yezu nɔ̀ɔnɔn loo á ǹ bɔ nɛnyaan goon ganaa

(MAT 17.14-18; MAR 9.14-27)

37Bɛa sii kɛ lɛ a zɛnaa a lɛawaa, Yezu laanka a kialandɛnan lɛn bɛ́ boe kele lɛ la, zaman gole daa n da lɛ. 38Giĩ goon nə́ n toa zaman lɛ bii á lɛ dia Yezu la: «Mìinaa, ma nə n nyankoe máa n ga maa nɛ ganaa, bɛ lɛ n maa nɛ goon toto lɛa. 39Nɔ̀ɔn baraan man nɛn bɛ̀ ǹ kũ. A nə n lɛ dii bǎã goon ne, a bìn da a lɛ kàã bɔ. Nɔ̀ɔnɔn lɛn man nɛ lɛ nɔmiɛ, ǹ ba n boe-a fufuu wa. 40Má n kialandɛnan nyankɔ máa ǹ nɔ̀ɔnɔn lɛn loo, ǹ boo la wa.»

41Yezu boo saa á pɛ: «Ka tɔrɔ golee Lawa li baãnaa, tɔrɔ baraa kɛn Masɛ n die goɛ̃ ka li yǎa biĩ doo, ma kaa sii si ma ganaa? Da ka n nɛ lɛ nɛ kànaa.»

42Nɛ lɛ din dɔ a li taãn wa, yǎa nɔ̀ɔnɔn lɛn nə́ kũ ǹ nə́ zũ tán, ǹ nə́ bìn da a ganaa. Sɛnɛ, Yezu paraa nɔ̀ɔn baraan lɛn li, á ǹ loo, á nɛ lɛ kɔ ǹ di la. 43Min tumaa Lawa a golebaa lɛ dɔ̃, ǹ nə́ n kaãbaa a ganaa.

Yezu a gɛ̀ lɛ a boo diɛ paabaa ǹ wɔ

(MAT 17.22-23; MAR 9.30-32)

A sii zɛnaan bɛ́ kaãbaa diɛ min tumaa ganaa, Yezu pɛ a kialandɛnan lɛn manɛ: 44«Ma bɛ́ die màn mɛn pii ka nɛ, ka n too kɔ bɛ ganaa sɔnbɔraanɛ: Minin tá re Min a Nɛgiĩ we min baraan gɔn.»

45Sɛnɛ, a kialandɛnan lɛn nə bɛa boo kɛ lɛ giala ma wa. A na á goã boo-durii lɛa ǹ yɔrɔ-a, màn mɛn bɛ́ toɛ, ǹ baran a giala ma wa. Ka bɛ dɔ nɛ, nyɛ́ɛ na á goã ǹ-a ǹ nɔ̀n da Yezu la bɛa boo kɛ lɛ wɔ gɔn la.

Die n gole min tumaa nɛ?

(MAT 18.1-5; MAR 9.33-37)

46 # LUK 22.24. Nɔ̀n-diɛ kɔ́n wɔ ǹ yiri ni, mà ǹsɛn bii mà die n gole? 47Yezu bɛ́ á bɛa nɔ̀n-diɛ kɛ lɛ dɔ̃ n gɔ̀nɔn-a, á nɛnyaan goon kũ á da a din li, 48#MAT 10.40; LUK 10.16; ZAÃ 13.20. á pɛ ǹ nɛ: «Bɛ̀ min mɛn lɛ kɔ, á nɛnyaan kɛ miã kũ doɛ̃ masɛ tɔ taman yii, bɛa dɛnaa na á lɛ kɔ masɛ din ganaa. Bɛ̀ min dɔ lɛ kɔ masɛ-a, bɛa dɛnaa na á lɛ kɔ masɛ a dia wole ganaa. A giala min mɛn bɛ́ n din kiɛɛrɛ koe ka bii, bɛa dɛnaa lɛ n gole ka tumaa nɛ.»

Kialandɛnan lɛn dàã bɛ́ ka min mɛn nɛ

(MAR 9.38-40)

49ZAÃ boo saa á pɛ Yezu ni: Mìinaa, wɔsɛn nə́ min kɔ́n yɛ, á n nɔ̀ɔnɔn lui ka n din tɔ nɛ. Wɔ́ kurəə a ganaa, a giala bɛa dɛnaa lɛ ba koe wɔsɛn lɛ kunun n ni wa.

50Sɛnɛ, Yezu pɛ: «Ka baran kurəə wa, a giala bɛ̀ min mɛn nə yoo ka gialaa wa, ka dɔ̃ mà bɛa dɛnaa n kun ka nɛ.»

Samarii gána minin manə n piɛ̃ ka Yezu ni

51Yezu a woo a bɔ kanaa waáraa bɛ́ doe, á n foo taã á zii kũ á n woe Zeruzalɛmu. 52Á dia dí-a wolen dia a nyɛɛnɛ. Bɛn nə́ zii kũ ǹ nə́ woo. Ǹ nə́ wɔ Samarii gána kiwi goon ne, màn mɛn bɛ́ toɛ, ǹ Yezu a daa siin yɔrɔ bɔ. 53Sɛnɛ, kiwi lɛ a minin nə́ n piã ka Yezu ni, a giala a na á goã woe Zeruzalɛmu kiwi. 54#KIIN2 1.9-16. Kialandɛnaa Zaaki laanka ZAÃ bɛ́ ǹ nə́ bɛ yɛ, ǹ nə́ pɛ: «Dɛnaa, n tá li wɔsɛn nə pɛ wáa tɛ bɔ lon a kaa minin kɛn la a ǹ kũ?»

55Sɛnɛ, Yezu bɛ́ á n yɔrɔ bɔyaa, á sɛ̀ pɛ a din a kialandɛnan lɛn ganaa. 56Bɛ kio ǹ nə́ kiwi kɔsɔ zii kũ.

N màn tumaa toa walan n kɔ Yezu lɛ

(MAT 8.19-22)

57Ǹ bɛ́ zii la woe, min kɔ́n nə́ pɛ Yezu ni mà a bɛ́ re woe bǎã woo bǎã nɛ, mà asɛ n koe lɛ.

58Yezu pɛ nɛ: «Tolokan yala tan, bàanan kii tan, sɛnɛ, bǎã kɔ́n ba Min a Nɛgiĩ lon á n mìi susui a-n wa.»

59Yezu pɛ min goon kɔsɔ dɔ nɛ: «Kɔ masɛ kio lɛ.»

Bɛa dɛnaa ná a lɛ si mà a toa asɛ wo ǹ di gere bĩ bɔrɔ.

60Sɛnɛ, Yezu pɛ nɛ: «A toa geren nə ǹ gere bĩ. Sɛnɛ, nsɛ wo Lawa a kiibaa lɛ boo da.»

61 # KIIN1 19.20. Min goon kɔsɔ dɔ́ pɛ Yezu-n doo: «Dɛnaa ganaa, masɛ n die koe n lɛ, sɛnɛ, a toa masɛ wo sawaa kɔn-a ǹ fòo da maa kion minin man bɔrɔ.»

62Yezu pɛ nɛ: «Min woo min nə́ n gɔn da diin buu kɔsɔ ǹ kána-a, á wusoo á n yii bɔyaa á ga a kio, Lawa a boe la a na a kiibaa ǹ dí kɛ nya ka bɛa dɛnaa-n wa.»

Currently Selected:

Luku 9: SCE2013

Highlight

Copy