Marki 1

ZAÃ Boo Tii Kɔɔ̃n mɛn pɛ

(MAT 3.1-12; LUK 3.1-18; ZAÃ 1.19-28)

1Boo Tii Kɔɔ̃n mɛn bɛ́ boo diɛ Lawa a Nɛgiĩ Yezu *Krita wɔ gɔn la, bɛa giala koe n ka kɛ nɛ. 2#MAL 3.1. A kiɛ̃maa tá Lawa a boo gii-dali Izayii a sɛ́wɔ-n kɛnɛn:

«Á ke, masɛ Lawa n die

ma din a dia dí-a wole diɛ n nyɛɛnɛ,

a n zii zɛnaa.

3 # IZA 40.3. Lɛ-dɛ n boe diə ne:

Ka Dɛnaa a zii zɛnaa,

ka a ziin tele.»

4Bɛa yɔrɔ kɛ lɛ la, ZAÃ daa diə gole ne, á goã *batɛmu diɛ minin ganaa, á goã pii ǹ ni: «Ka n taasɛ ka wusoo kaa sii baraan kio, ma batɛmu da ka ganaa, màn mɛn bɛ́ toɛ, Lawa kaa sii baraan toa ka nɛ.»

5Zeruzalɛmu kiwi minin laanka Zudee gána min tumaa soo ǹ nə́ woo a li, ǹ nə́ golee ǹ sii baraan li min tumaa yɔrɔ-a, bɛ̀ ZAÃ tá bɛa batɛmu kɛ lɛ diɛ ǹ ganaa Zurdɛ̃ tà mu li.

6 # KIIN2 1.8. ZAÃ na á goã nyɔɔmaa ka dɔnkɛ we, a binbin kũ ǹ maabɛlɛ na á goã ki lɛa, a màn-bii na á goã bisin laanka zoo nyɔɔ nɛ. 7A na á goã pii zaman nɛ: «Min mɛn bɛ́ re die ma kio, bɛ pàã á gole á la masɛ wɔ nɛ, haalɛ ma n zuməə ma a kɔsɔ biɛn fore, ma mìi á kiɛɛrɛ bɛ ganaa. 8Masɛ n má batɛmu da ka ganaa mu li, sɛnɛ, bɛ n die ka kiɛ Lawa a zii ni ka Yiri Fu pàã nɛ.»

Yezu a batɛmu yɛ boo

(MAT 3.13—4.11; LUK 3.21-22; 4.1-13)

9Bɛa biikoo li Yezu bɔ Nazarɛti, Galilee gána nɛ á daa, ZAÃ batɛmu da a ganaa Zurdɛ̃ tà mu li. 10Bɛa bǎã-n gɔrɔ, Yezu a soomaa mu li, á lon yɛ n lɛ buĩ, á Yiri Fu yɛ gisĩ a din la ka zɛrɛkantoan bɛ́ lɔn. 11#SGK 22.2; LOE 2.7; IZA 42.1; MAT 12.18; MAR 9.7. Boo-diɛ lɛn bɔ lon á pɛ: «Ma n maa Nɛgiĩ lɛa, ma á n narɛ parsiini, masɛ din ni má n bɔ.»

Sɛtaan nə n diɛ Yezu gɔ́ɔ̃ li

12Bɛa bǎã-n gɔrɔ Yiri Fu Yezu nyɛɛnaan sabɔ á woo-n diə gole ne. 13Á lɛawaa pusi zɛnaa don bii, *Sɛtaan goã n diɛ a gɔ́ɔ̃ li, a n giɛ li a nyanaa a da sii baraa nɛ. A bɛ́ á goã bǎã mɛn nɛ, min kɔ́n banban, bɛ̀ á n bɔ don mànan nɛ. Sɛnɛ, lon a dia dí-a wolen man nə́ goã a laadoo bǐɛ̃ koe.

Yezu n zɔ̀-kũli min sii bíi

(MAT 4.12-22; LUK 4.14-15; 5.1-11)

14ZAÃ kũ a da kòso-n kio, Yezu woo Galilee gána nɛ, á goã Lawa a Boo Tii Kɔɔ̃n laakalɛɛ, 15#MAT 3.2. a na á goã pii: «Biikoo lɛ pã kəni, Lawa n die a kiibaa ǹ dí lɛ nyɛɛ wɔsɛn bii sisia. Ka n taasɛ, ka wusoo kaa sii baraan kio, ka lɛ kɔ Lawa a Boo Tii Kɔɔ̃n kɛ ganaa.»

16Yezu bɛ́ kiɛ̃ Galilee tà lɛ-a, á zɔ̀-kũli min paa yɛ, Simɔn laanka ǹ dɔɔ̃ngiĩ Andre ne, ǹ nə́ goã ǹ zɔ̀ɔ zuĩ tà mu li. 17Yezu pɛ ǹ nɛ: «Ka kɔ masɛ kio lɛ, ka á re n biɛ ga minin li wolen lɛa Lawa nɛ.»

18Bɛa bǎã-n gɔrɔ, ǹ nə́ ǹ zɔ̀ɔn lɛn toa walan, ǹ nə́ kɔ a kio lɛ.

19Á n zɔ̃ á woo nyɛɛn boɛɛn nɛ, á Zebedee a nɛgiĩ min paa yɛ, Zaaki laanka ǹ diɛ̃ ZAÃ nɛ, maǹ nə́ goã ǹ tà kuru ǹ goo ne, ǹ zɔ̀ɔn zɛnɛɛ. 20Bɛa bǎã-n gɔrɔ, Yezu lɛ dia ǹ la. Ǹ nə́ ǹ di Zebedee laanka a dí-nyalin toa tà kuru ǹ goo lɛ gɔ́ɔ̃ nɛ, ǹ nə́ kɔ lɛ.

Yezu n nɔ̀ɔnɔn lui boe giĩ goon ganaa

(LUK 4.31-37)

21Yezu laanka a kialandɛnan nə́ woo Kafaranaamu kiwi. *Susu ǹ pii pinaa Yezu woo Zuifun lɛsɔkɔn kion, a ná a giala kɔ á minin daraa. 22Min mɛnɛn bɛ́ ǹ too koe a boo ganaa, bɛn nə́ n kaãbaa a minin daraa ǹ gɔn ganaa parsiini, a giala, a bie ǹ darɛɛ ka landa sii-daraalin bɛ́ minin darɛɛ lɔn wa, sɛnɛ, pàã tá asɛ a boo lɛ nɛ.

23Á daa yaa giĩ goon ne lɛsɔkɔn kion, nɔ̀ɔnɔn manɛ a ganaa, ǹ nə́ n lɛ dɛ ǹ nə́ pɛ: 24«Nazarɛtin Yezu, n bɛ́ min mɛn lɛa, wɔsɛn tá doɛ̃, Lawa din a dia dí-a wole sonbore nə n ne. N wàa mɛn sii n wɔsɛn sii ni? Ma nə́ n daa wɔsɛn laadoo ziziɛ̃ gɔrɔ kən le?»

25Yezu yoo ǹ gialaa, á pɛ ǹ nɛ: «Ka n lɛ tã, ka n bɔ giĩ kɛ ganaa.»

26Nɔ̀ɔnɔn lɛn nə́ bìn da giĩ lɛ ganaa parsiini, ǹ nə́ n lɛ dɛ kɔsɛkɔsɛ, ǹ nə́ n bɔ a ganaa. 27Min tumaa nə́ n kaãbaa parsiini, yǎa ǹ nə́ nɔ̀n da kɔn la: «E, wàa sii dɔ n ke? Kɛ n Lawa a zii dii lɛa, á n minin darɛɛ a ganaa koe. A yii n we á sɛ̀ pii nɔ̀ɔnɔn ganaa, ǹ tá a bɔlɔ sii.»

28Bɛa siin kɛn lɛn zɛnaa gɔ́ɔ̃ nɛ, Yezu tɔ bɔ Galilee gána tumaa nɛ fufuu.

Yezu bɛ́ á dí mɛn nya busulən manɛ

(MAT 8.14-17; LUK 4.38-41)

29Yezu a soo kio Zuifun lɛsɔkɔn kion gɔrɔ, a laanka Zaaki ni ka ZAÃ nɛ, ǹ nə́ woo Simɔn laanka Andre a kion. 30Ǹ nə́ woo Simɔn dàãlɔ yaa gɔ̀nɔn-wɛ̃ kũ á waa-n tán. Yezu bɛ́ á dɔ gɔrɔ, ǹ nə́ bɛa boo lɛ saa ǹ nə́ pɛ nɛ. 31Á n zɔ̃ á dɔ a li, á kũ a gɔn-a, á saa á da a giala la. A gɔ̀nɔn-wɛ̃ lɛ nya, á yoo á màn-bii zɛnaa á kɔ ǹ la.

32Wasa yii a sã kio, minin nə́ daa Yezu li ka busulən tumaa nɛ ka nɔ̀ɔndɛnan nɛ. 33Kiwi minin tumaa dan ǹ lɛ sɔkɔn kiɛnlɛ-a. 34Min mɛnɛn bɛ́ nɔmaa-n busu tɔrɔ gigiã gɔn, Yezu bɛn tumaa a busu nya, á nɔ̀ɔnɔn loo á n bɔ min gigiã ganaa. A lɛ kɔ mà nɔ̀ɔnɔn lɛn nə boo da wa, a giala, Yezu bɛ́ min mɛn lɛa ǹ tá doɛ̃.

Yezu a bibiə̃ bibinaa Galilee gána nɛ

(LUK 4.42-44)

35Bɛ lɛ a lɛawaa, baayɛlɛ yiisoon ne, bɛ̀ wɔlɔ bɛ́ tɔn tì, Yezu yoo á woo Lawa nyankɔ don. 36Simɔn laanka ǹ miãn yii bɛ́ á kaa, ǹ nə́ woo ga li. 37Ǹ bɛ́ ǹ nə́ yɛ biikoo mɛn li, ǹ nə́ pɛ nɛ: «Min din tumaa tá giɛ n li.»

38Yezu tɔ́n pɛ ǹ nɛ: «Ka daa wɔ n ta lɛ-a ǹ kiwin dɔn nɛ. Masɛ doamaa nɛ ma Lawa a Boo Tii Kɔɔ̃n pɛ walan dɔn nɛ. A giala, masɛ a da kanaa mìi lɛ-n ka bɛ nɛ.»

39Bɛ lɛ taman yii, á n bibiə̃ Galilee gána din tumaa nɛ, á goã Lawa a boo pii Zuifun lɛsɔkɔn kionən ne, bɛ̀ a nɔ̀ɔnɔn loo a ǹ bɔ minin ganaa.

Yezu n giĩ goon a gɔ̀nɔn busu babaraa nyɛɛ

(MAT 8.1-4; LUK 5.12-16)

40Giĩ goon ne, gɔ̀nɔn busu babaraa goã a ganaa, á daa Yezu li, á kaa tán a giulun, a ná a nyankɔ parsiini á pɛ: «Bɛ̀ n tá li, n tá boe la n maa busu nya.»

41A makara Yezu kũ parsiini. Yezu nə́ n gɔn saa á da a ganaa, á pɛ nɛ: «Ma tá li, máa n busu nya.»

42Bɛa bǎã-n gɔrɔ, a busu babaraa lɛ nya, á kakabaa yɛ. 43Bɛ kio, Yezu pɛ-n ka a parsiini mà a woo. 44#LWS 14.1-32. Á tɔ́n pɛ nɛ: «N too kɔ doɛ̃. N nyan toa n kɛ laakalaa min kɔ́n yii-n wa. Sɛnɛ, wo n din nyaa Lawa a wúlu-bɔle ne. Bɛ kio, Lawa wúlu mɛn boo da Muizu ni, wo bɛ lɛ bɔ, n nyaa min din tumaa nɛ mà n busu nya.»

45Sɛnɛ, sii mɛn bɛ́ á n zɛnaa giĩ lɛ nɛ, a bɛ́ á woo, á bɔ á mɛ la a ná a laakalaa bǎã yii ni. Bɛ lɛ n ke Yezu boo la á wɔ kiwi kɔ́n nɛ doo wa, a na á goã giɛ̃ don. Minin nə́ bɔ bǎã yii ni, bɛ̀ ǹ wo a li walan.

Currently Selected:

Marki 1: SCE2013

Highlight

Copy