Marki 15

Pilati nɔ̀n mɛn da Yezu la

(MAT 27.1-2,11-14; LUK 23.1-5; ZAÃ 18.28-38)

1Baayɛlɛ yiisoon ne, kiri-kurulin tumaa, Lawa a wúlu-bɔlen goledɛnan laanka landa sii-daraalin nə́ kɔn yɛ fufuu, ǹ nə́ n lɛ kaa kun boo goon ganaa. Ǹ nə́ Yezu yii ǹ nə́ woo kɔ gánadɛnaa Pilati la mà a kiri wɔ a ganaa. 2Pilati nɔ̀n da la kɛnɛn: «N din lɛ n Zuifun kii lɛa?»

Yezu tɔ́n pɛ nɛ mà a din nə bɛ pii.

3Lawa a wúlu-bɔlen goledɛnan nə́ zɛ̀rɛ gigiã da Yezu la. 4Pilati tɔ́n wusoo á nɔ̀n da la: «N ba boo kɔ́n diɛ wa? Ǹ bɛ́ zɛ̀rɛ gigiã mɛn diɛ la, táa n too tá a nɛ?»

5Sɛnɛ, Yezu boo kɔ́n da doo wa, bɛ lɛ na á Pilati tɔwaa.

Pilati n lɛ koe Yezu a gɛ̀ ganaa

(MAT 27.15-26; LUK 23.13-25; ZAÃ 18.39—19.16)

6Bɛ̀ *kiɛ̃mala ǹ zɔ́n dɔ lɔn, Pilati n kòso nɛ goon diɛ. Zaman bɛ́ giɛ li mà a min mɛn da, a n bɛ diɛ. 7Bɛ́ daa yaa giĩ goon nə kòso-n kun ka piã wolen ne, a tɔ n Barabaasi, bɛa minin lɛn man nə́ gɛ̀ dɛ ǹ piã biikoo li. 8Zaman kiɛ̃ á woo Pilati li, a bɛ́ sii mɛn zɛnɛɛ ǹ wɔ paǹ li lɛ̀ tunaa nɛ, ǹ nə́ bɛ lɛ nyankɔ a lon. 9Pilati tɔ́n nɔ̀n da ǹ la kɛnɛn: «Ka á li ma Zuifun kii lɛ da ya?»

10A giala Pilati dɔ̃ parsiini, mà foo a wuu pɛ na á toa, ǹ nə́ Yezu wɔ asɛ gɔn.

11Sɛnɛ, Lawa a wúlu-bɔlen goledɛnan nə́ zaman lɛ gòãn sɔmɔ mà ǹ Pilati nyankɔ a Barabaasi da. 12Pilati wusoo á nɔ̀n da zaman lɛ la doo: «Ka bɛ́ min mɛn lɛ bíi mà Zuifun kii, ka ǹ giɛ li masɛ wàa zɛnaa nɛ?»

13Ǹ nə́ wusoo ǹ nə́ n lɛn saa lon mà a dere gɔn ganaa!

14Pilati tɔ́n nɔ̀n da ǹ la mà wàa na á baa? Mà a na á wàa ǹ sii baraa zɛnaa?

Ǹ nə́ wusoo ǹ nə́ ǹ lɛn saa lon kɔsɛkɔsɛ mà a dere gɔn ganaa!

15Pilati bɛ́ li a zaman lɛ foo basã, á nɔmaa á Barabaasi bɔ á kɔ ǹ la. Bɛ kio, á minin kaa Yezu ganaa, ǹ nə́ duwəə ka sɔsɔrɔ nɛ, á tɔ́n kɔ sɔraasin la mà ǹ wo dere gɔn-lakerekaã ganaa.

Sɔraasin man yaa woe Yezu ganaa

(MAT 27.27-31; ZAÃ 19.2-3)

16Sɔraasin nə́ woo ka Yezu ni gánadɛnaa a sumu gɔ́ɔ̃ nɛ, ǹ nə́ lɛ dia ǹ miãn tumaa la. 17Ǹ nə́ dɔnkɛ tã wɔ a ganaa, ǹ nə́ nyan tã kii bafolo lɛa, ǹ nə́ wɔ a mìi ganaa, ka n pɛ mà maǹ koɛ kii lɛa. 18Bɛ kio, ǹ ná a giala kɔ ǹ nə́ fòo da nɛ: mà a foo le, Zuifun kii lɛ!

19Ǹ nə́ duwəə ka bàbàlan nɛ a mìi ganaa, ǹ nə́ sɛ̀ kaa a ganaa, bɛ̀ ǹ kaa tán a giulun ka maǹ a guguru koe. 20Ǹ bɛ́ ǹ nə́ yaa wɔ a ganaa ǹ nə́ nya ǹ mɛn waáraa, ǹ nə́ mɔnaa tã lɛ sɔlɔ ǹ nə́ bɔ a ganaa, ǹ ná a din a mɔnaan goa ǹ nə́ ǹ wɔ a ganaa. Bɛ kio, ǹ nə́ soo-n kanaa, mà maǹ woe dere gɔn ganaa.

Yezu a deree

(MAT 27.32-44; LUK 23.26-43; ZAÃ 19.17-27)

21 # RƆM 16.13. Sɔraasin lɛn bɛ́ woe, ǹ nə́ giĩ goon yɛ boe don die piɛ. Ǹ nə́ bɛ kũ ka pàã nɛ mà a Yezu a dere ǹ gɔn gũ. Giĩ lɛ tɔ n Simɔn, a n boe Sirɛni kiwi, a din a nɛnyaanan man Alɛksandrə laanka Rufusu ni. 22Ǹ nə́ woo ka Yezu-n bǎã kɔ́n nɛ, a tɔ mà "Mìi Pán Bǎã", ǹ dinin bɔlɔ nɛ, mà "Golgootaa". 23Ǹ nə́ duvɛ̃ lɔlɔkɔn-a ka nyɔɔ gìĩ kɔɔ̃n nɛ, a tɔ mà *miíri, mà maǹ koe la a mi, sɛnɛ, Yezu nə́ n piã a mi wa.

24 # LOE 22.18. Bɛ kio, ǹ nə́ dere gɔn ganaa, ǹ nə́ n pã a mɔnaan ganaa bɔrɔ, màn mɛn bɛ́ toɛ didie ná a wɔ gii dɔ̃, ǹ tɔ́n nə ǹ gii kɔn. 25Ǹ bɛ́ dere gɔn ganaa ǹ mɛn waáraa, bɛ̀ wasa dii. 26Ǹ dɔlɔ bɔ a ganaa boo mɛn taman yii, ǹ nə́ bɛ lɛ kiɛ̃ màn ganaa ǹ nə́ naa a mìi la: mà "Zuifun kii". 27Ǹ nə́ mɛnaa minin la wole min paa dɔ dere gɔnɔn ganaa Yezu li, goon ná a gusin, goon ná a gɔsɛ.

[ 28#IZA 53.12. Lawa a boo mɛn bɛ́ pii: mà «Ǹ nə́ da kun ka sii baraa-zɛnaalin ni», bɛ lɛ lɛ na á pã bɛa yɔrɔ kɛ lɛ la.]

29 # LOE 22.7; 109.25; MAR 14.58; ZAÃ 2.19. Min mɛnɛn bɛ́ ǹ nə́ goã kiɛ̃ walan, bɛn man nə́ goã sɔ kiɛ la, bɛ̀ ǹ nə n mìi papasa ǹ nə́ pii ni: «Ebe! N din mɛn bɛ́ mà nsɛ n die Lawa a kion lɛ wurii, n wusoo n kɔsɔ dɔ lɛawaa sɔɔ gɔ́ɔ̃ nɛ, 30bɛ̀ ń boe la, n din kirisibaa kəni, n gisĩ n nə n bɔ dere ǹ gɔn ganaa!»

31Lawa a wúlu-bɔlen goledɛnan laanka landa sii-daraalin dɔn nə́ yaa wɔ Yezu ganaa, bɛ̀ ǹ nə́ pii kɔn nɛ mà á min kɔsɔn kirisibaa, sɛnɛ, mà a boe la a tá n din kirisibiɛ wa! 32Bɛ̀ a n Izirayelin kii, Minin Nyin-sili lɛ lɛa sonbore, a gisĩ sisia kəni a n bɔ dere ǹ gɔn ganaa, wɔsɛn nə yɛ, wɔ tɔn golee li.

Ǹ min mɛnɛn dere gɔn ganaa a paran li, bɛn dɔn man nə́ goã sɔ kiɛ la.

Yezu a gɛ̀

(MAT 27.45-56; LUK 23.44-49; ZAÃ 19.28-30)

33Wasa bɛ́ á dɔ baã bii, wɔlɔ tii gána paǹ din tumaa ganaa yǎa biikoo sɔɔ, wasa lɛ kanɛɛ a biikoo li. 34#LOE 22.2. Wasa bɛ́ á n lɛ kanaa, Yezu nə́ n lɛ dɛ kɔsɛkɔsɛ á pɛ: «Maa Lawa, maa Lawa, wàa na á baa ń masɛ toa walan?» (ǹ dinin bɔlɔ nɛ: mà "Elowii, Elowii, lema sabakatanii?")

35Min mɛnɛn bɛ́ ǹ nə́ goã walan, bɛn tɛn bɛ́ ǹ ná a lɛ ma, ǹ nə́ tɔ́n pɛ mà ǹ nə n too kɔ, mà a n lɛ diɛ Yilii la!

36 # LOE 69.21. Ǹ goon baa si á woo màn sã duvɛ̃ pipiã li, á wɔ bàbàla ganaa á dia Yezu la, mà a na a mu piɛ̃. Á tɔ́n pɛ: «Ka toa dɛ! Bɛ̀ Yilii á re die n doe lɛ, a gisĩ a bɔ dere ǹ gɔn lɛ ganaa kəni, wɔ á re giɛ a ganaa!»

37Sɛnɛ, Yezu nə́ n lɛ dɛ ka kɔsɛkɔsɛ, a fɔfoã nya.

38 # BBN 26.31-33. Bɛa biikoo li, Lawa a kion bii kuru kɔn-a ǹ mɔnaa toɛ̃ kɔn màn paa, á saa a lon ganaa á daa a tán yaa. 39Sɔraasin goledɛnaa mɛn bɛ́ golee-n Yezu yɔrɔ-a, a ná a gã ǹ gɔn yɛ, bɛ́ tɔ́n pɛ: «Sonbore pɛ á pɛsã, giĩ kɛ n Lawa a Nɛ lɛa!»

40 # LUK 8.2-3. Lɔn kɔnɔn dɔn nə́ n toa tiãlɛa ǹ nə́ ga bɛa siin lɛn ganaa. Mariya mɛn bɛ́ boe Magadalaa kiwi, Zaaki boɛɛn laanka Zoze a náa Mariya nɛ, ka Salomee ne, bɛn nə́ goã kun ni. 41Yezu bɛ́ Galilee gána nɛ, bɛa lɔn kɛn lɛn man nə́ kɔ lɛ ǹ nə́ n dɔ lɛ. Lɔ gigiã kɔsɔn mɛnɛn dɔn nə da kun ka Yezu ni Zeruzalɛmu kiwi, bɛn dɔn tá walan.

Yezu gere biĩ boo

(MAT 27.57-61; LUK 23.50-56; ZAÃ 19.38-42)

42Wasa bɛ́ á mɛ, *susu ǹ pii dɔ na a lɛawaa, 43Arimateen Zozɛfu daa, á woo Pilati li ka foo tãbaa nɛ, á Yezu gere nyankɔ la. Bɛa Zozɛfu lɛ na á goã kiri-kurulin lɛn *min gole goon lɛa, a dɔ na á goã n yii diɛ Lawa a kiibaa ǹ dí kɛ lɛ a nya pinaa la. 44Yezu a gã fufuu kɛnɛn ke, bɛ́ Pilati tɔwaa. Á lɛ dia sɔraasin goledɛnaa lɛ la, á nɔ̀n da la, mà Yezu lɛ a gã waáraa belebɔ ya? 45A bɛ́ á boo ma á bɔ sɔraasin goledɛnaa lɛ lɛ-n, á tɔ́n lɛ kɔ mà Zozɛfu Yezu gere saa. 46Zozɛfu woo a bĩ ǹ mɔnaa pii, a ná a gere gisĩ á bɔ dere ǹ gɔn ganaa, á mɔnaa lɛ pɛnɛɛ a ganaa. Ǹ bɛ́ ǹ nə́ yala mɛn fɔ̃ kele kolo ganaa, á woo bĩ walan. Bɛ kio, á kɔlɔ kaara birikəə̃ á yala lɛ lɛ tã nɛ. 47Mariya mɛn bɛ́ boe Magadalaa kiwi, bɛ́ golee á ga a bĩ ǹ bǎã ganaa kun ka Zoze ǹ dan Mariya nɛ.

Currently Selected:

Marki 15: SCE2013

Highlight

Copy