Marki 8
8
Yezu minbuiin duu sii too ka màn-bii ni
(MAT 15.32-39)
1A din waáraa kɛ lɛ nɛ, zaman gole wusoo á n lɛ sɔkɔn doo. Màn-bii bɛ́ a banban ǹ tá re bii wa, Yezu tɔ́n lɛ dia a kialandɛnan lɛn la, á pɛ ǹ nɛ: 2«Zaman kɛ lɛ makara á boe masɛ ganaa. A giala, ǹ lɛawaa sɔɔ n ke kun ka masɛ nɛ, sɛnɛ, màn kɔ́n banban doo ǹ tá re bii wa. 3Bɛ̀ masɛ nə́ ǹ toa ǹ nə́ woo piɛ ka bòo ne, ǹ tá re kerekaɛ̃ zii la, a giala, ǹ tɛn a bɔ ǹ bǎã á sɔsɔɔ.»
4A kialandɛnan lɛn nə́ tɔ́n pɛ nɛ: «Min nə die boe ka màn-bii-n maa don kɛ nɛ, a minbuiin kɛ din tumaa kã?»
5Yezu tɔ́n nɔ̀n da ǹ la: «Buuru mìi gia n ka lon?»
Ǹ dɔ́n mà sɔbaa.
6Yezu tɔ́n pɛ zaman lɛ nɛ, mà ǹ giã tán. Ǹ bɛ́ ǹ nə́ giã tán, á buuru sɔbaa lɛ goa, á barka da Lawa nɛ, á yiyiɛ kɔn, á kɔ a kialandɛnan la, mà ǹ gii zaman lɛ nɛ. Ǹ nə́ si, ǹ nə́ gii. 7Zɔ̀ bisin kɔ́n dɔ́ goã Yezu a kialandɛnan lɛn lon. Yezu barka da Lawa nɛ bɛa zɔ̀ bisin lɛ taman yii, á pɛ a kialandɛnan lɛn manɛ, mà ǹ na a dɔ gii. 8Zaman lɛ tumaa màn bii á kã. Màn-bii gialakun mɛn goã, a kialandɛnan nə́ goa ǹ nə́ kaa kankaan sɔbaa piɛ̃ ǹ nə́ woo ne, 9a da yaa zaman mɛn dɔ́ màn lɛ bii, ǹ nə́ dɔ minbuiin duu sii (4 000). Bɛ kio, Yezu tɔ́n pɛ ǹ nɛ mà ǹ wo piɛ. 10A din wɔ tà kuru ǹ goo-n gɔrɔ kun ka a kialandɛnan nɛ, ǹ nə́ woo Dalmanutaa gána nɛ.
Fariziɛ̃n nə́ nɔ̀n da Yezu la ka kaãbaa ǹ sii ni
(MAT 16.1-4)
11 #
MAT 12.38; LUK 11.16. *Fariziɛ̃n kɔnɔn nə́ daa ǹ ná a giala kɔ ǹ nə́ liere kɔ kɔn ka Yezu ni. Ǹ bɛ́ giɛ li mà ǹ nə n da a gɔ́ɔ̃ li, ǹ nə́ tɔ́n pɛ nɛ: «Bɛ̀ n pàã lɛ n boe Lawa li sonbore, kaãbaa ǹ sii zɛnaa n nyaa wɔsɛn manɛ.»
12 #
MAT 12.39; LUK 11.29. Yezu piɛ̃ gole baã ka fɔɔ, á pɛ ǹ nɛ: «Wàa na á baa sisia minin kɛn tá zoɛ̃ kaãbaa ǹ sii li? Masɛ n pii ka nɛ sonbore, kaãbaa ǹ sii kɔ́n din ba re n nyɛɛ ka-n wa!»
13Bɛ kio, Yezu kiɛ̃ á n bɔ ǹ li, á wusoo á wɔ goo ne, á woo tà kio.
Fariziɛ̃n laanka Erɔdi a minin da yiri baraa ganaa boo
(MAT 16.5-12)
14A kialandɛnan lɛn yiri bɔ ǹ màn-bii saa wa, buuru mìi goon dinsɔɔ̃ na á goã ǹ lon tà kuru ǹ goo lɛ gɔ́ɔ̃ nɛ. 15#LUK 12.1. Yezu tɔ́n nə n gɔn waa ǹ nɛ kɛnɛn: «Haya, ka n parabaa Fariziɛ̃n yɔ bù ni, ka n parabaa kii Erɔdi a yɔ bù ni.»
16A kialandɛnan lɛn nə́ tɔ́n pɛ kɔn nɛ: «Buuru bɛ́ a ba wɔsɛn lon wa, bɛ lɛ na á toa a tá bɛa boo kɛ diɛ.»
17Ǹ bɛ́ bɛa boo lɛ diɛ, Yezu bɔ a siére-a. Á tɔ́n nɔ̀n da ǹ la: «Wàa na á baa ka á pii, mà buuru bɛ́ a ba kasɛn lon wa, mà bɛ lɛ a lɛa nɛ masɛ pɛ miɛ̃? Haalɛ tɔn pelo, ka yiri n tɔn tiɛ̃ nɛ? Yiri bɛ́ ka lon, ka a boo giala miɛ wa? 18#ZER 5.21; EZE 12.2; MAR 4.12. Yiin bɛ́ ka lon, ǹ ba wɔlɔ yii wa? Toon bɛ́ ka lon, ǹ ba boo miɛ wa? 19Ma bɛ́ má buuru mìi sooro lɛ yiyiɛ kɔn má kɔ min duu sooro la, ka n ka a gialakun lɛ goa ka kankaan gia pã nɛ ka woo ne? Ka yiri ba a-n wa?»
Ǹ ná a lɛ si mà fulupaa.
20«Buuru mìi sɔbaa lɛ dɔ má yiyiɛ kɔn, má kɔ minbuiin duu sii la (4 000), ka n ká a gialakun lɛ goa ka kankaan gia pã nɛ ká woo ne?»
Ǹ ná a lɛ si mà Sɔbaa.
21Yezu tɔ́n pɛ ǹ nɛ: «Haalɛ tɔn pelo, ka a tɔn sii doɛ̃ wa?»
Yii tere-a goon yii-buĩ boo
22Ǹ nə́ dɔ Bɛtsayidaa kiwi. Minin nə́ daa yii tere-a goon kɔ Yezu la, ǹ ná a nyankɔ mà a n gɔn da la, a na a busu nya. 23Yezu yii tere-a lɛ kũ a gɔn ganaa, á soo á n bɔ nɛ kiwi gɔ́ɔ̃ nɛ. Bɛ kio, á sɛ̀ da giĩ lɛ yiin ganaa, á n gɔn da la, á nɔ̀n da la: «N yii tá màn ganaa?»
24Yii tere-a lɛ nə́ n yii saa lon, á pɛ nɛ: «Ma yii tá minin ganaa. Ma yii na a ba ǹ ganaa taãn wa. Maǹ ka dan bɛ́ lɔn bìn diɛ.»
25Yezu wusoo á n gɔn da giĩ lɛ yiin ganaa doo. Bɛ kio, giĩ lɛ ga doo, á tɔ́n dɔ̃ mà asɛ yiin nə́ n bũ, ǹ nə́ màn tumaa yii sɔnbɔraanɛ. 26Yezu tɔ́n dia á woo piɛ. Sɛnɛ, mà a nyan toa a wusoo a kanaa kiwi gɔ́ɔ̃-n wa.
Piɛrɛ Yezu dɔ̃ min mɛn lɛa
(MAT 16.13-20; LUK 9.18-21)
27Bɛ kio, Filipi bɛ́ á Sezaaree kiwi mɛn koa, Yezu laanka a kialandɛnan nə́ woo bɛa lɛkoro-a ǹ kiwin ni. Ǹ bɛ́ zii la woe, Yezu nɔ̀n da ǹ la kɛnɛn: «Minin man pii mà masɛ n die lɛa?»
28 #
MAR 6.14-15; LUK 9.7-8. Ǹ ná a lɛ si: «Min tɛn nə pii mà ma n ZAÃ lɛa, min mɛn bɛ́ á goã *batɛmu diɛ minin ganaa. Ǹ tɛn nə pii mà ma n Lawa a boo gii-dali gole Yilii lɛa. Ǹ tɛn dɔ n pii mà ma n Lawa a boo gii-dalin kɛn kɔ́n lɛa.»
29 #
ZAÃ 6.68-69. Yezu tɔ́n nɔ̀n da ǹ la: «Ka dininmaan kɛn lɛn man pii mà die n ka masɛ nɛ?»
Piɛrɛ tɔ́n pɛ nɛ: «Ma n Minin Nyin-sili lɛa, Lawa bɛ́ á pɛ mà asɛ á re ǹ mɛn lɛ diɛ.»
30Yezu tɔ́n nə n gɔn waa ǹ nɛ mà ǹ nyan toa ǹ na a boo da min kɔ́n yii-n wa.
Yezu a gɛ̀ laanka a yii kaa
(MAT 16.21-28; LUK 9.22-27)
31Bɛ kio, sii mɛn bɛ́ Yezu nyɛɛnɛ, a ná a giala kɔ á pɛ a kialandɛnan manɛ: «Min a Nɛgiĩ doamaa nɛ a nɔmaa parsiini, Zuifun sii yɔrɔ-bɔlen tumaa á re n piɛ̃ nɛ: Ǹ goledɛnan nɛ, ka ǹ Lawa a wúlu-bɔlen goledɛnan nɛ, ka ǹ landa sii-daraalin ni. Ǹ tá re dii, sɛnɛ, lɛawaa sɔɔ bɛ kio, a yii á die kiɛ.»
32A na á goã bɛ lɛ pii ǹ ni a foaãbaa yii li. Piɛrɛ tɔ́n kũ á soo-n tiãlɛa, á yoo a gialaa, á pɛ: «N nyan toa n bɛa boo kɛ tɔrɔ da wa!»
33Sɛnɛ, Yezu nə́ n bɔyaa, á ga a kialandɛnan lɛn ganaa, á yoo Piɛrɛ gialaa: «N *Sɛtaan kɛ nə n tan n nə n bɔ masɛ kio, a giala, n taasiɛ laanka Lawa wɔ a goon wa, minbuiinin taasiɛ nə n lon.»
34 #
MAT 10.38; LUK 14.27. Yezu tɔ́n zaman lɛ laanka a kialandɛnan lɛn bíi, á pɛ ǹ nɛ: «Bɛ̀ min mɛn tá li a kɔ masɛ lɛ, yǎa ǹ dɛnaa nə n yiri boe a din ganaa, a nɔmaa si a ganaa a kɔ masɛ lɛ, haalɛ ta a n giɛ̃ dere ǹ gɔn ganaa. 35#MAT 10.39; LUK 17.33; ZAÃ 12.25. A giala, min mɛn bɛ́ giɛ a din nyin li, bɛa dɛnaa nyin tá re nyɛɛ. Sɛnɛ, min mɛn nyin bɛ́ re nyɛɛ masɛ laanka Boo Tii Kɔɔ̃n kɛ taman yii, bɛa dɛnaa nyin tá re goɛ̃. 36A là n ka wàa nɛ, min kanaa gɔn màn tumaa yɛ, a din nyin wusoo a papaã? 37Bɛ̀ min mɛn nyin papaã, a n die wàa koe Lawa la, a tɔn wusoo a yɛ? 38Pelo minin mɛnɛn bɛ́ ǹ nə́ n piã ka Lawa nɛ, ǹ nə́ sii baraa zɛnɛɛ, bɛ̀ min mɛn sìi kɔ bɛn yɔrɔ-a a ná a masɛ boo da wa, a masɛ a boo kɛ lɛ dɔ pɛ wa, Min a Nɛgiĩ bɛ́ re boe lon ǹ mɛn pinaa a daa, kun ka lon a dia dí-a wole sonboren ne, ǹ Di a gugurubaa a siĩnbaa kɛ nɛ, a dɔ á die sìi koe a bɛa dɛnaa bíi mà asɛ a kialandɛnaa.»
Currently Selected:
Marki 8: SCE2013
Highlight
Share
Copy
Want to have your highlights saved across all your devices? Sign up or sign in
San Catholic Edition Bible © Bible Society of Burkina Faso, 2013.
