Génesis 6
6
Dá'maq se no'uen 'neetari' so qomyipi
1Ca co'na' so qomyipi neuagaxat taalgoto naua 'lauari, ca' mashic 'ue na llaallipi 'aallipi. 2Ca' so llaalqaipi ñi qota'olec ỹa'ajanac quiyim lo'yaxanaipi so 'aallipi. Ca' nca'agui sá'ogue, ca' icona quiyim loua acá'maq nqo'ta. 3Qam ñi qara'gaxala' qota'olec 'naaco': Sqai saxanegue na qom quiyim queeta nca'leetauec, ma' na'maxare chi la'at. Ca cá'maq laloqo' yi nachaalataxac qaiyauate' yaua ciento veinte ñaxari.
4Na qomyipi ladocaqaipi qai'neeta re'oq na'le quena 'laua na' so llaalqaipi ñi qota'olec viguit na llaallipi na qomyipi quiyim 'ue ca llaalec cana'maxare. Ca co'na' ime, ca' chaqaiso só'maq choxoraic 'ñaaxaiquipi queso 'auaxaic qomyipi.
5Ca ñi qara'gaxala' qota'olec co'na' ỹa'ajantac quiyim paguec se no'uen da loic na qomyipi quena 'laua, ma' na'maxare ỹaatqajam queetalec quiyim ỹa'deentaque ỹo'uet ná'maq se no'uen. 6Ca' ỹaatqajam netocteta'pegue quiyim ỹo'ueeto' na'le na qom, ca ỹaatqajam 'xoic da lqui'ic nqai'en. 7Ca 'naaco': Sapalaxat ná'maq ỹo'ueenatec qom quena 'laua, chaqai ná'ogue ná'maq nelo iseripi, chaqai ná'maq nqai'queetegueri', chaqai na ỹoipi. Ỹaatqajam 'xoic da ñitogotaxa, ma' so'ueeto' na'le.
8Qam ñi qara'gaxala' ỹaatqajam nqo'ta so Noé quena' ra'iita'a.
Aso lahi' so Noé naỹoxontashiguim quena huaxaỹaq
9Ca' dajo dá'maq na'qaataxac so Noé.
So Noé ỹaatqajam huagaxaraic chaqai ỹaatqajam na'xaỹaxane'ta ñi qota'olec, sqai 'nejem na liỹa qomyipi. Ỹaatqajam chaqaisoota na'xaỹaxane'ta ñi qota'olec. 10Ca' so Noé 'vio' saua tres llaalqa, ca saua'maxare leenqate' Sem, Cam chaqai so Jafet.
11Ca' quiñi qota'olec na 'laua no'qajlec quena se no'uen chaqai quena se ra'maqataxan, 12ma' ná'ogue na qomyipi ỹo'maac. Ca co'na' ñi qota'olec iuana quiyim 'xoic na se no'uen quena 'laua. 13Ca 'naaco' queso Noé: Mashic viichigui na iuel quiyim ime nqaishin ná'ogue na qomyipi, ma' sauaxat na'maxare quiyim 'xoic da neloquiaxac quena 'laua. Ca vichiguiño' sopoxoỹaxachigui na qomyipi chaqai ná'ogue na 'laua. 14'Viichi' aca rahichi' cá'maq naỹoxontashiguim ma'le quena huaxaỹaq, viise'e ana qo'paq 'ue na louaq. 'Viichi' caua nomaate' caca'maxare, chaqai po'iriguilo naua'que naua lconaxa' quena pa'aauec chaqai quena pa'aauo. Viise'e na qo'paq louaq, qaiyi se inoxono na huaxaỹaq. 15Nauajo nauá'maq laloqote' ma'le aca ro'ueenata'e': ciento treinta y cinco metros nqai'ñi' da ladogaxa, chaqai veintidos metros y medio da leca'gue, chaqai trece metros y medio da lishicshi'megue. 16Ca' da no'ueenataxac nqai'ñi', ca 'ec tres 'imqa nqai'ñi' qotesashiguim. Chaqai aca nqote ñi'ra'ñi quiyi ma' saqa'leca medio metro, ca' ỹovishiguim quena lelaq ca pa'aashiguim 'imec. Chaqai vite ca lasom quena lahi. 17Ma' ỹim ñila' ma'le ca ỹaxat, ca' i'paxanlec nqai'en na 'laua. Ca nomajñi ma'le ná'ogue ná'maq 'ue na lacat quenaua'que naua lahil na 'laua. Ca ná'ogue ná'maq hueetalec ana 'laua ileu ma'le. 18Qam caqami', ca' se'taxajñi ma'le da ña'maqataxac, chaqai cañi rahichi' naỹoxontashiguim, ca inoxondo ma'le naua qachaalaxahi', chaqai añi roua'e', chaqai naua rachilli', chaqai qami'. 19Chaqai 'xachi' cañi rahichi' naỹoxontashiguim ca 'óna loua' chaqai aca 'aalo quená'ogue na isecỹac, qaiyi nca'leuec 'nejem aqami'. 20Ma' noxoñiro cañi renotaxagui'i', ca' riỹa'isaho caua dooseta'pe quená'ogue na lashic na isecỹac: quena ỹo, chaqai na isecỹac nelo, chaqai ná'maq nqai'queetegueri' quena 'laua, qaiyi queeta quiyim nca'leetauec. 21Chaqai lapooñi' ná'ogue nanchaqaina na'ic, ca 'maxachi', qaiyi 'ue ca qanoqe' chaqai na iseripi.
22Ca' so Noé ỹo'uet ná'ogue ná'maq qailarelec quiñi qota'olec.
Currently Selected:
Génesis 6: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.
