Juan 3

So Jesús chaqai so Nicodemo

1'Uo' so ỹale ỹalequetaugui na fariseoipi, leenaxat Nicodemo. La'gaxala' so'maxare na judioipi. 2Sojo Nicodemo 'uo' so pe ra'pichi'oga so Jesús, ca' 'naaco':

—Qami' napaxaguinataxanaq, qomi' sa'deenqata quiyim qanela' qami' quiñi qota'olec quiyim qarapaxaguiñi', ma' qaica ca ishit ỹo'uet ná'maq 'viichisac netanqaipi quiyim re'oq da rquesaxanaxa'e', qaicaata cá'maq hueeto'ot ñi qota'olec.

3Ca' so Jesús 'naaco' queso'maxare:

—Ỹaatqajam lliqueta dá'maq sa'xatem qami', quecá'maq sqo pilac liỹa ne'qaañi, ca' se iuana da lo'ueenataxanaxac ñi qota'a ma' ỹoiquentac ná'ogue najo.

4Ca renataxano' so Nicodemo:

—Qam ¿negue' queto' ca la'maqa' queca qom quiyim mashic ỹi, ca lotqai liỹa ne'qaañi? ¿Qa' ishit quet quiyim liỹa pilougui na lauel aca late'e, ca lotqai liỹa ne'qaañi?

5Ca' so Jesús 'naaco':

—Ỹaatqajam llic dá'maq sa'xatem qami', quiyim cá'maq se nañan quiyim qanachilaxan chaqai quiyim qaỹadalaxat queso Espíritu Santo, ca se inoxona'a da lo'ueenataxanaxac ñi qota'a ma' ỹoiquentac ná'ogue najo. 6Cá'maq chaqai llaalec cá'maq chaqai qom, ca' ca'maxare qom, qam cá'maq chicqaugui da ne'xaỹoqsoxoc so Espíritu Santo, ca' ca'maxare ỹantañi da no'ueenataxac só'maq Espíritu. 7'Neeto' re'laqaita dá'maq shinac caqami' quiyim “ná'ogue na qomyipi ỹouen quiyim liỹa ne'qaañi.” 8Na nonot quena' npe'taxanshiguim, qam chaqai ỹoiquentac cá'maq reloxoigue; ca 'qa'isaque na lelamaxa, qam sqa 'yiiñi' cá'maq chicqochi'ñi chaqai cá'maq taigue. Ca' chaqaida 'neeta ná'ogue ná'maq ne'xaỹaugui so Espíritu Santo.

9Ca' so Nicodemo lotqai liỹa renataxan, 'naaco':

—¿Negue' cá'maq 'neeto' ca leloxoỹaxac dajo?

10Ca' so Jesús 'naaco':

—Ỹaatqajam qami' napaxaguinataxanaq quena llaalqaipi so Israel, qam ¿sqa 'yiiñi'o' dajo? 11Ỹaatqajam llic dá'maq sa'xatem qami', ma' qomi' sa'xataq dá'maq sa'deenaq chaqai cá'maq sauanqachigui, qam qamiri sqai viilec dá'maq sa'xataq. 12No'm sqo viilec aỹim quena' sa'xate' naua hueralec na 'laua, ¡huose'quet viilec aỹim queta' sa'xatema qamiri cá'maq hueeta'gue da piguim!

13Ma' qaica ca taigue da piguim, ta'ta'a ná'maq nenojñi chicqashiguim queda piguim, ná'maq qohinac ỹale llaalec, chaqai'en neeta'gue da piguim. 14Ca' chaqaida dá'maq 'ne'teco' so Moisés na' nanojshiguim so nadenqatec nanaic quiyi 'laua qaica qom, ca qai'neeta najo ỹale llaalec ỹouen quiyim qananojshiguim, 15qaiyi se ileu ná'ogue ná'maq huelec so'maxare, ta'ta'a quiyim 'ue da lca'laxa sqaica lqodoc.

Da lqo'iichi ñi qota'a quená'maq hueetalec na 'laua

16Ma' ñi qota'olec ỹaatqajam 'xoico' da lauochaxa quena qomyipi, ca ỹaanec na 'oonoqui' llaalec, qaiyi se ileu cá'ogue cá'maq huelec na'maxare. Ta'ta'a quiyim 'ue da lca'laxa sqaica lqodoc. 17Ñi qota'olec se nelata na llaalec na 'laua quiyim ỹa'ue ca nouaxanaxaset na qomyipi. Ta'ta'a quiyim ỹahotaque nca'laxatec na'maxare.

18Cá'maq huelec na llaalec ñi qota'olec, ca' qaica ca nouaxanaxaset. Qam cá'maq sqai huelec, chaqa'ma' shi'gue 'ue da nouaxanaxaset nqohin, ma' sqai huelec na 'oonoqui' llaalec ñi qota'olec. 19Ná'maq sqai huelec, ca' 'ue ca nouaxanaxaset, ma' na' novita na 'laua so ncoỹeraxanaxat, ỹapacqajnauec da lqo'iichi quena napalaxa, ma' se no'uen ná'maq ỹo'ueetetac. 20Ma' ná'ogue ná'maq ỹo'ueetetac na se no'uen ỹaatqajam loquiiaxat so ncoỹeraxanaxat, chaqai se nqo'neu'a so'maxare, qaiyi se re'xoi' naua se no'viiñi ỹo'ueeteta'pe. 21Qam ná'maq natenta dá'maq ỹaatqajam lliqueta leloxoỹaxac, ca' nqo'neu'a so ncoỹeraxanaxat, qaiyi re'oq quiyim chicqo'ot ñi qota'olec ná'ogue ná'maq ỹo'ueetetac.

So Juan só'maq nachilaxanataxanaq lotqai liỹa ỹa'xatetac so Jesús

22Ca co'na' ime dajo, ca' so Jesús eec, liỹareta'pe saua lapaxaguinatqa, querepegue' yi 'laua Judea. Ca' 'vii saua na'xata' hueeta'anyi chaqai rachilaxanataxantac. 23So Juan qai'neeta rachilaxanataxantac hueeta'ñi yi Enón, yi'maxare sqoỹoqaque quiyi Salim, ma' 'xoic na huaxaỹaq quiyi'maxare. Ca' anac na qomyipi, ca' qanachilaxan. 24Ca' dajo 'neeto' na'le, na' saqa' qaicoñi' so Juan.

25Ca 'vio' saua lapaxaguinatqa so Juan nco'uaata'to saua judío lase' na' retaqasapigui da no'ueenataxac ca qom nco'taxateta. 26Querepegue' so Juan, ca' 'nerec:

—Qami' napaxaguinataxanaq, 'ajñi' dá'maq ỹovireta'a qami' na'le queda pa'ỹa'gue da lqodoigue caso lachiugue Jordán, dá'maq 'xachisac na'le coqomi', da'maxare nagui rachilaxanataxantac chaqai ná'ogue na qomyipi queeta'pegue'.

27Ca' so Juan 'naapegalo':

—Qaica ca qom quiyim chi nanoiquentac 'ue ca ỹo'uet, no'm sqo ỹaanem quiñi qota'olec cá'maq ỹo'uet. 28Qamiri nauá'maq ỹaatqajam 'xaichigui aỹim na' shinac mesqaỹim cajo nashi nca'laxaqui, ta'ta'a quiyim qayila' sa'aueta'gue cá'maq taata'gue ca'maxare. 29Quiyim 'ue ca shilaq, ca cá'maq ỹaatqajam shilliguit acá'maq nequetegaxai, ca' chaqaica cá'maq nauonaxaua. Qam cá'maq nauochaxaua cá'maq shilo hueetau'e na lahi, ca 'qaatapega. Ca 'xoic da netoonaxac quiyim 'qaatapega só'maq 'on. Ca' chaqaida dá'maq 'neeta caỹim quiyim 'xoic da ñitoonaxac. 30Ca'maxare cá'maq nqo'neetauec ma'le da lichoxoric, ca' ỹim nqo'neeta'ta' ma'le da ichoxoric.

Cá'maq chicqo'ot na piguim

31Cá'maq chicqa'gue da piguim, ca'maxare napacalec ná'ogue nanchaqaina; qam cá'maq hueetalec ana 'laua, ca'maxare 'lauasec, chaqai quena' retaqa, ca' ỹa'xatetac ná'maq huelec ana 'laua. Qam cá'maq chicqa'gue da piguim napacalec ná'ogue nanchaqaina, 32chaqai ỹa'xat ná'maq iuanchigui chaqai ná'maq 'xaỹa. Qam qaica cá'maq huelec dá'maq ỹa'xat. 33Qam no'm 'ue ca huelec da'maxare, ca' quedajo, ca' i'taxajñi quiyim ỹaatqajam llic da la'qaatec ñi qota'olec. 34Ma' cá'maq qaila' quiñi qota'olec, ca ỹa'xat da la'qaatec ñi'maxare, ma' ñi qota'olec se naloqojnañi quiyim ỹaanec so ne'Espíritu. 35Ma' ñi qota'olec ỹaatqajam ỹauotegue so llaalec, vichiguiño' ỹomato'ot ná'ogue ná'maq lalamqateripi. 36Cá'maq huelec so llaalec ñi qota'olec, ca' 'ue da lca'laxa sqaica lqodoc; qam cá'maq sqai huelec so llaalec, ca' sqaica da lca'laxa. Ta'ta'a quiyim hueetalec dá'maq chalego lecaic nouaxanaxaset quiñi qota'olec.

Currently Selected:

Juan 3: MCV91

Highlight

Copy