1 Coríntios 1
1
1Hita, Paulo-no, nuretkalurno Hoyakalu halujyawaka tshinanu, Cristo Jesus pirana nuphujexyawaka. Hita, Cristo tshinanu nmoletanruyma Sóstenes tshinkaluruyma,
2nyonatlo twu yonawahlo hixa Hoyakalu homkahitatshine hapatjetatshinhi, Corinto poktshi hajenhi nwaka. Hixa ptowrunekhi Cristo-ymalunhi hixa halixle tshinanu, Hoyakalu kotspalatanune nuretkalunhi. Hiyrun-koxa twu yonawahlo yonatka pimrine ptowruneka psoluchako hapatjexikatshine Wutsrukate Jesus Cristo hapohchinikanutatshine tshinanu. Jesus Cristo wanna Hitsrukatni hiyrun-koxa hixa Corinto poktshi hajenhi Hitsrukatni.
3Nanjitlu Hoyakalu, Wuru hiyrun-koxa Wutsrukate Jesus Cristo hiru renejyawakaphi Hoyakalu hihlenu renekachale hiyrun-koxa hapnanuhchinikanru Hoyakalu henekanwu.
Kihler-potuko Wyoptotanu Hoyakalu Henekle Cristo Tshinanu Piranapni
4Ptowru hohnekananuko npoyahnutlu Hoyakalu renekachale hixa tshinanu, waleni Hoyakalu hihlenu henekachaxikolu Jesus Cristo kamrure tshinanu.
5Klu tshinanu hixa Cristo-ymalunhi tshinanni ptowru potuko hepixika — hixa hepixka hyanumaxyawaka hiyrun-koxa himatjemle hepixika.
6Hinkaklewlu Cristo pirana homkahpotutatshinhi,
7haté hixa hi hmahaxyatka hi satukna kihler-potuko Hoyakalu henejyawu, hkahwakka pchiniklu hsatojyawaka Wutsrukate Jesus Cristo.
8Hoyakalu poyehitahchinikanutanhi haté hihohne nikawninri papko, hi psojikna hjihyehitko Hoyakaluya Wutsrukate Jesus Cristo hohne hapojinipa.
9Hoyakalu hi weyawata. Htshanixatkahi hituru Jesus Cristo Wutsrukateymalunhi hixyawakapa.
Hihjekaklu Cristo Halixatshine Hapatjetatshine Tskalaya Piranapni
10Hiyáhoni Cristo tshinanu nmoletanune, nuykothi pa hchinikanerune htshintokanutanu. Hi hkotspalahchinikankakanu hixkakluko. Pa hchinikanurunephi ptowru potuyako. Pa halukkalunephi.
11Cristo tshinanu nmoletanune, nunkakka hixa pirana. Cloé-ne tshinkalune hinkakle tshinanu hix-hima yahotkaka hixkakluko.
12Wane ntshinhi, hixa satkakhi pnuk-tshina hiyáhoni satuko wan-tshina: “Hitni Paulo-ymalutno.” Satuko wan-tshina: “Hitni Apolo-ymalutno.” Satu: “Hitni Pedro-ymalutno”, satu: “Hitni Cristo-ymalutno,” htshina.
13Cristo-lhe xawaka kanipretka? Paulo-klahe cruz hitakka hixa tshinanu? Ho Paulo hiwaka tshinanrahe h-batiza-tka?
14Hoyakalu npoyahnuta hi satuknahi hixa n-batiza-ta. Ha Crispo tshinkaluru hiyrun-koxa Gaio tshinkaluru tsonu n-batiza-ta.
15Hiyáhoni hi satuknahi hixa himukata wan-tshinretanu — Paulo hiwaka tshinanu n-batiza-tka.
16Ha hehe, Estéfanas-pji hajen-koxa n-batiza-ta. Seyni nimatlu pimrine hi satukna n-batiza-ta.
17Klu tshinanu Cristo hi yokanatno n-batiz-lewaxyawaka. Seyni hyokanatno kihle piranalu potuko hiwekkaklewatatshri pirana nunkaklexyawaka. Hiyrun-koxa hyokanatno nunkaklexyawaklu waleko hipirana hi yineru himatkalnu piranapni klu tshinanu kpixkonru Cristo cruz rupniywaka pirana. Wale pirana tsonni himukatatshri.
Cristo-kni Hoyakalu Pixkonu Hiyrun-koxa Hoyakalu Himatkalewle Piranapni
18Cristo cruz rupniywaka hinkaklexikolu pirana mahchinikanune hinkakle pirana rikahwakka hamhatshine tshinanu seyni hixa hiwekkakhohnekanatkalunetkawu tshinanu Cristo hinkakle pirana Hoyakalu pixkonni wale.
19Klu tshinanu Hoyakalu tokanu yonatkaluru mitshikawlur-pirana wan-tshina: “Hita nikatanru jimatkalerune himatkalewle. Nuknokanru kahchinikanurune hchinikanu.”
20Hanurhe jimatkaleru? Hanurhe ptowru pirana himatjematshri? Hanurhe jinkaklerune xye hohne hajene? Hi he Hoyakalu hekhitatkalu mahchinikanutni xye psol-tshijneko himatkalewle?
21Hoyakalu rimatkalnu tshinanu hi ritshitna yine Hoyakalu rimatyehixyawakna yine rimatkalnu tshinanna. Seyni Hoyakalu hikchikahchinikanuxnawa riwekkajyawakapna hiwekkaklewatatshri pirana halixatshine. Pimrine mahchinikannutshi pirana rikahwakluna hiwekkaklewatatshri pirana.
22Klu tshinanu judeu-ne hanjijetlu hetkalurkaka ralixyawakapna. Grego-nerune hijhalu himatkalewlu hiwekkaklewatatshrimka.
23Seyni hixa wunkakletjetlu Cristo cruz hitakkalurutka pirana. Xye piranak-koxa judeu-ne hitspekaka hiyrun-koxa judeu mixkane mahchinikannutshi pirana rikahwakluna hiwekkaklewatatshri pirana.
24Seyni ptowruneka Hoyakalu tshanixlene tshinanu, judeu-ne hiyrun-koxa judeu mixkane tshinanu Cristo-kni Hoyakalu pixkonu hiyrun-koxa Hoyakalu himatkalewle.
25Klu tshinanu ptowruka Hoyakalu mahchinikannu tshinkaluru yine hchinikanu pnuterutni. Yineho Hoyakalu ruhrokahotna, seyni yine mixkonu yohnikalutni wale.
Hiwekkakkalune Kamhanrupa Piranapni
26Hiyáhoni Cristo tshinanu nmoletanune, hichinikanretanru hanu hixahchinikanukanatatshinhi mitshikananu Hoyakalu tshanixinixkahi. Waneklu papko yine hetanuya hi hixo hixapa jimatkalerunhi, hi hixo himukata kamhaletatshinhi, hi hixo hixapa hijhakalunhi.
27Hiyáhoni yine jimatkalerune hpatetjexyawaka tshinanu, Hoyakalu nuretlu mahchinikannutshi pirana yineho xye tshiji hajeneya. Hiyrun-koxa himukatatshine hpatetjexyawaka tshinanu, Hoyakalu nuretlu malukkotu pirana yinehoya xye tshiji hajeneya.
28Yineho Hoyakalu nuretlu heyikkaluru. Wanna kahwaklu malukkotu piranni, mujhakotni. Hoyakalu wan-rixa ruknojyawakaplu xye tshijne hchinikanu hijhaleru.
29Hiyáhoni hi satukna yineru halixkoxikatshripwa Hoyakalu hetanuya.
30Klu tshinanu Hoyakaluko Cristo Jesus hipxakkakatkahi. Hiyáhoni walekni wimatkalewniya. Cristo tshinanu Hoyakalu potukatatkawu, Hoyakalunerune rixkakwu hiyrun-koxa Cristo tshinanu riwekkakwu.
31Hiyahokni Hoyakalu tokanu yonatkaluru mitshikawlur-pirana wan-tshina: “Kalixkotlewakleru, Hoyakalu kamrure pirana ralixkotanu.”
Currently Selected:
1 Coríntios 1: mpdBiblia
Highlight
Copy
Compare
Share
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil