1 Coríntios 2
2
Jesus Cristo Cruz Hitakkaluru Piranapni
1Cristo tshinanu nmoletanune, hix-yehi nyinmitshi halikakalutu pirana, Hoyakalu pirana, yohimakanatkaluru pirana nunkakapyahmitshi, hi tokantshicha hihlenuyma nunkakhi, hi tokantshi himatkalewluymako.
2Klu tshinanu hike naluk-himatleta hixa tskalaya seyni Jesus Cristo piranapka, cruz rupniywaka piranapka nuchinikanreta.
3Hixa tskala nwakanaxini hihrokakanatatshrino hiyrun-koxa hitatakakanatatshrino npikle tshinanu.
4Nunkakle hiyrunu nasruklewle hi yine himatkale tokanuyma nasrukakanathi seyni hetkalurkakayma Hoyakalu Hiwejikaluru kamhanru hiyrun-koxa tsru pixkonuyma wunkaklewata.
5Hiyáhoni hixa halixle hi yine himatkalnu tshinanu rixinripni seyni Hoyakalu hiyákole tshinanni.
Hoyakalu Himatkale Piranapni
6Seyni halikaka himatkalewlu pirana wkochtshekleru waleni tsrune halixlewle tshinanu piranni. Hi xye tshiji hajene himatkale pirana wkochtsheka hi koxa yokanatkalune towuxikolu himatkalewle nikawnatshripa pirana wkochtsheka.
7Seyni Hoyakalu himatkale pirana Hoyakalu tsonu himukata hiphujetlepiranaxnawa wale piranakni wkochtsheka, yine mimatyehitanutu pirana wkochtsheka. Hoyakalu xye tshijne hma muyakotkanuklunuwa hnuretlu xye pirana hixa halixatshinwu Hoyakalu hoyaknu wyoptoxyawakapa.
8Hi satukna xye tshiji hajeru tsrukakalune himatlu xye pirana. Klu tshinanu rimatkamkaluna hi koxa cruz rutakanruna ptowru potuko Hixikatshriwa.
9Hiyáhoni wane htshina Hoyakalu tokanu yonatkaluru mitshikawlur-pirana: “Hi satukna yineru hetjejetlu, hi satukna jemjejetlu, hi waleko ruchinikanretjejeta yineru ptowru potuko Hoyakalu halpokoxyana ruchinikjene.”
10Hiyáhoni Hoyakalu hiphujetlu xye pirana Hoyakalu Hiwejikaluruya wimaxyawakaplu. Klu tshinanu Hoyakalu Hiwejikaluru ptowru potuko retjeta haté Hoyakalu tsonu himatanu hiyrunu Hoyakalu ralukleru rimata.
11Hixa yinwu, wiwejinri, wimane hitokote hwatshri tsonu himatjemlu ptowru potuko wihchinikanu. Waneko pixka rixa Hoyakalu. Waleko riwejinri tsonu himatlu ptowru potuko Hoyakalu hixahchinikanuxyawaka.
12Hixa hi xye tshiji hajeru hiwejikaluru wyoptota seyni wyoptotlu Hoyakalu Hiwejikaluru renekanwu. Waleko himatjemkakwu ptowru pirana potuko Hoyakalu hixa repixyawaka pirana.
13Hiyáhoni wasruklewaxinri, hi yine hasruklewle wasrukanna, hi yine himatkalewle pirana wasrukanna. Seyni wasrukanna Hoyakalu Hiwejikaluru hasruklewle. Hoyakalu Hiwejikaluru hchinikanu himwatshine yine Hoyakalu hchinikanu wunkaklexya.
Hoyakalu Hiwejikaluru Hetjerewle Piranapni
14Hoyakalu Hiwejikaluru mwikatu hi himukata yoptoletlu henekachalkaka Hoyakalu Hiwejikaluru henejyawu. Hi koxa psojikna rimatjemlu wan-hixatshri xye pirana. Halikaka pirana waleho jipukaleru piranni klu tshinanu Hoyakalu Hiwejikaluru tsonu hiphujetlu. Hoyakalu Hiwejikaluru himwatshri tsonu himukata himatjemletlu.
15Hoyakalu Hiwejikaluru himwatshri ptowru potuko rimatheta hiyrunu Hoyakalu Hiwejikaluru mwikatu hi himathetlu wale yineru.
16Hiyáhoni wane htshina Hoyakalu tokanu yonatkaluru mitshikawlur-pirana: “Kathe himatahchinikanutlu Tsru Hixikatshriwa Hoyakalu? Kathe hasruklu?” Seyni hixa Cristo hchinikanu wimwa.
Currently Selected:
1 Coríntios 2: mpdBiblia
Highlight
Copy
Compare
Share
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil