1 Coríntios 3
3
Hoyakalu Hikamrurewatanune Piranapni
1Ha, Cristo tshinanu nmoletanune, mitshikananu hi numukata hiynumsalethi Hoyakalu Hiwejikaluru himwatshine pixkalune. Seyni naluk-hiynumsalethi hixa hatatjewa xye tshijne pirana tsonu homkahitatshine pixkalunhi. Hatewa mturune pixkalunhi Cristo halixle tshinanuya.
2Hitnutshha pixkalutu nuthi. Hi nikkaluru pixkalutu nenekhi klu tshinanu hixa hi himukatawalu. Hi koxa xawakniko himukatawalu.
3Xye tshijne pirana tsonu homkahitatshine pixkalunhi. Klu tshinanu hix-yehi rawa hahxalu hiyrun-koxa yahotkaklu. Hi he xye pirana hekhitlu xye tshijne pirana tsonu homkahitatshine pixka hixatshinhi? Hiyrun-koxa hi he pimrine malixkane pixka hixjetatshinhi?
4Klu tshinanu wane htshininna satkaka yine: “Hitni Paulo-ymalutno.” Satuko wan-tshina: “Hitni Apolo-ymalutno.” Hi he wan-tshinatshine xye tshijne pirana homkahitatshine pixka hixatshinpothi?
5Klu tshinanu klunerni Apolo? Klunerni Paulo? Hixa Hoyakalu halujyawaka homkahitatshine tsonwu. Halikaka wunkakle tshinanu hixa halixlu Tsru Hixikatshriwa Cristo pirana. Hanuru kamrurtshiktako Hoyakalu henekanwu hixa satkaka wale wkamhanu.
6Hita hitaklewata. Apolo hihaklu. Seyni Hoyakalu tseruwnakaklu.
7Hiyáhoni hitaklu hitakatshri hikeni, hiyrunu hitaklu hihakatshri hikeni seyni Hoyakalu hitaklu tseruwnakakatshri wale halikaka potu hijhakalurni.
8Hitaklu hitakatshri pixkalutu pirana hiyrunu hihakatshri pixkalutu piranni satupkalutu. Satkaka yoptotanru hkamrure wenru Hoyakalu henekanna satkaka hkamrurna tshinanupa.
9Klu tshinanu Hoyakalu rikamrurewatwu. Hixni Hoyakalu hisanate pixkalunhi. Hoyakalu wane hkamrurewjexya. Hiyrun-koxa hixni Hoyakalupjinhi.
10Hiyáhoni halukkalurni Hoyakalu henekachaxyano pimrine nepixyawaka tshinanu kamhapjikleru pixkalutno kihle hislahlewleru. Hita halpokotlu pantshi hwiywakapa. Satu wane hoho kamhapjixya. Seyni satkaka hislahinwa hanu potu rixa panawlexika pantshi hwiywak-hoho.
11Klu tshinanu Hoyakalu mitshikawako hitakatkalu Jesus Cristo pantshi hwiywaka rixyawaka. Hi satukna Jesus Cristo kachrijru hitakko.
12Satkaka ho ouro ho prata ho sotlu kwenuru halpokoxikowaka hoho hpanawaxya. Seyni pimrine ho hahmuna ho kotshkawale ho kchan-sure hpanatna.
13Cristo jihyehrewaxini hohnepa rimathetpotutko hanu rixa kamruretatka satkaka yineru, ho kihleru hkamrure ho hektutla. Klu tshinanu tshitshmero waneklu hohne hakanhatshripa satkaka yineru kamrure hiphujetanu. Tshitshmero hekhitanru hiyrun-koxa retumhanru hanu potu rixatka satkaka yineru kamrure ho halikaklahe ho hike.
14Pantshi kamhakaluru malhaknuklunupa tshitshmeroya waneya pantshi kamhatshri wenutko, rumutko.
15Seyni hkamrure halhinipa ramtakanru hwenuxikolumkapa. Pantshi kamhatshri hiwekkakko wanepnawaka seyni hatatjewa tshitshmero hichpajikatshrini.
16Hix-hetko himatjempiranatlu Hoyakalupji hixyawaka hiyrun-koxa hixa himatlu Hoyakalu Hiwejikaluru hixa hitokote hwiywaka.
17Hiyahokni katukta himtukanru Hoyakalupji, Hoyakalu himtukanru wale. Klu tshinanu Hoyakalupji Hoyakalunni. Hiyrunu xye Hoyakalupji hixakni.
18Hike yokwijexinwa. Satkaka jimatkaleru rikahwajinipwa, yine himatkaleya rujhalu mimatkatu rixyawaka yineru himatkaleya halikaka jimatkaler-potu rixyawakapa.
19Klu tshinanu yine himatkale reyika Hoyakalu. Hiyáhoni wane htshina Hoyakalu tokanu yonatkaluru mitshikawlur-pirana: “Hoyakalu kachitna jimatkalerune hixacha himatkalewletatshine.”
20Wane htshinatnaka mitshikawlur-pirana: “Tsru Hixikatshriwa Hoyakalu himatahchinikanutna jimatkalerune mahijeru hchinikanutatshine.”
21Hiyáhoni hi satukna yineru halixkowatanu klu tshinanu ptowru potuko hixanni.
22Paulo, Apolo, Pedro, xye tshijne, hiweklu, hipuktshi, xye papko, hinatshripa, xye ptowruka hixanni.
23Cristo-nunhi hixa. Hiyrun-koxa Cristo Hoyakalunni.
Currently Selected:
1 Coríntios 3: mpdBiblia
Highlight
Copy
Compare
Share
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil