1 Coríntios 4
4
Nuretkalune Cristo Pirana Hiphujetatshine Piranapni
1Hixa hijhalu Cristo-yma kamrurewatatshinwu hikahwajyawakwu. Hoyakalu pirana yohimakanatkaluru pirana hiphujetatshinwu.
2Xye pirana hislahatshine rujhaluna Royakalutna halujyawaka kamhatshine potuko rixyawakna.
3Halikaka ho hixa hexyawakno ho hapatjehchinikanutatshine hexyawakno hike rixa. Haté hi hitako jihyehixnawa.
4Klu tshinanu hikeni hektutu nuchinikanretleru nukolujnawakwa. Seyni hi koxa wane nma mixyawakanu tshinanu powrano. Nutakyahokjerni Tsru Hixikatshriwa Hoyakalu.
5Hiyáhoni xawakni hike hikolukanuwnanu hma mapokkanuko pchini hipapkolu. Hkahwakanu Wutsrukate Cristo hapojinipa papkopa waneya ptowru pirana potuko rutakyahokanu. Ruphujetanru ptowru pirana yohimatkaluru pirana, ruphujetanru ptowru yineru hichinikanretanru pirana. Waneklu satkaka halixkotko Hoyakalu tshinanu.
6Cristo tshinanu nmoletanune, hixa nasrujyawaka tshinanu xye hasruklewlukaka nutajnawa hiyrun-koxa Apolo. Hix-hepwu wyapkaklexnawa kajnakolune hixyawakapa yonatkaluru piranaya. Wane htshina: “Hixa hma malixkoxyawakanuplu satu yineru pimrine pnute.”
7Kathe wan-hixkakyi halukkaluru potu pixyawaka pimrine pnute? Hi he Hoyakaluko henekatkayi ptowru potuko pimwaleru? Hiyáhoni klu pimalixkoxinwa pma yoptotanutu pixka?
8Hixa ptowru potuko himwatshinetkahi! Phurunetkahi. Hixa phurunhi seyni hixa hike. Kihlemkahi phurune hixyawaka Hoyakalu yhaleya. Wan-hixatshinemkahi hixayma wpohirewatanumkatka.
9Klu tshinanu hitaho Hoyakalu hitakwu hixa nuretkalunwu Cristo pirana hiphujetatshinwu hapkatatatshine pot-wixyawakatka. Hixa hatatjewa hiylajixkalunepwu ptowru hetanuya, hiwejikalune Hoyakalu towrerune tenhohne hajene hetanuya hiyrun-koxa yine hetanuya.
10Cristo pirana tshinanu hike mimatkanwu seyni hixa jimatkalerunhi hixahoxnawa Cristo halixyawaka tshinanu. Hixni hihrokatshinwu seyni hixni hixkolunhi hkahwajnawa. Hixa kahwajnawa kahwakpiratkalunhi seyni hixa hike pikwu.
11Haté xawakni pa katkaka natshwu, wonunnahatewata. Mkatshri hiskatatshri wmakatjeta, kotshipjerunwu, pa pji pejnu wumkamxya.
12Wkamrurewpotuta. Wimyoko wkamrurewaxya. Yanhakkalunwu seyni wuhlewahchinikanyehlewata. Wyotnejetkamka seyni wakotachatlu.
13Pa katkaka hektuwaka wtshinka seyni wuykotna. Malukkotu hiknokkaluru xye tshijne hajeru pixka wixa. Kaptshowaka hajeru malukkotu wkahwakka haté xawakni potuko.
14Hi nyonanwakathi hixa nma patetjechaxyawakanuphi seyni nowhenene nalukanune pixka nixa hiykolethi.
15Klu tshinanu yahmaklu mil Cristo pirana hasruklewatatshine himwinimka seyni halikaka hi híxona hirune. Klu tshinanu kihle piranalu potuko hiwekkaklewatatshri piranaya nwuhenethi Jesus Cristo-ya.
16Hiyáhoni nanjithi hita pixka hixanu.
17Wale tshinanu Timóteo tshinkaluru nyokananwakathi. Timóteo-ni noturu pixkalutu nalukanru potuko, poyahokakatshri Wutsrukate Jesus-ya. Wale hichinkapkakanhi nixjexyawaka Cristo Jesus-ya. Wane nixa hasruklewleta ptowru sretako ptowru potuko Cristo halixatshin-yehi hapatjexikowakaya.
18Satkakhi hixa halixkoxnawa klu tshinanu hkahwakhetkotlu klanu nma yiywakanupa.
19Seyni chinpotukawa hix-yehi nyanu, Tsru Hixikatshriwa hitshixinipno klanu nyanu. Waneya nimatanru ho tokantshichalhe ho halikaklahe Hoyakalu pixkonu halixkoxikatshinwa tskala hwa.
20Klu tshinanu Hoyakalu pohirewaxyawaka hi tokantshichani seyni himukatluni.
21Hanuru pot-haluka? Ho kotshipjerewapiyma nyanwakaxyawakhi ho kihle hchinikanurno nyanwakaxyawakhi, hixako hichinikanretatshrino?
Currently Selected:
1 Coríntios 4: mpdBiblia
Highlight
Copy
Compare
Share
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil