1 Coríntios 6
6
Wla Raluk-hixletna Halixatshine Hapatjetatshine Hikolukanuwnalkaka Tshinanu Piranapni
1Klu tshinanhe hixa tskala hwatshri halixatshri hikolukanuwnalu kamhatshri hixa hijhahchinikanjixyehitlu tsrukakalune malixkane yehi seyni hi potukalune Cristo halixatshine hijhahchinikanjixyehitlu hikolukanuwnalkaka tshinanu?
2Hi he himata xawaka hixa Cristo halixatshinhi potukalunhi psol-tshijne hajeneko hikolukanuwnalkaka tshinanu hixa hijhahchinikanyehjixkona? Psol-tshijne hajeneka tshinanu hixa hijhahchinikanyehjixkona. Hiyáhoni kluneru tshinanhe xawaka hi hixako himukata hijhahchinikanyehretlu hikoluklu mpomuklukanutpotu tshinanu?
3Hi he himatlu haté hiwejikalune Hoyakalu towrerune tenhohne hajene tshinanu wujhahchinikanyehjixko? Hi he wane pnute wujhahchinikanyehjixanna xye hohne hajeru hikoluklukaka?
4Hiyáhoni hixa hijhahchinikanyehjixiniplu jikolukanuru xye hohne hajeru tshinanu seyni haklu tshinanhe hixa hi hitakna rujhahchinikanyehixikowakna Cristo halixatshine mpomujhakon-potu Cristo halixatshine hapatjetatshine yehiya?
5Hixa patetjexnawa! Hi he rawa satu hix-yehi jimatkaleru himat-hichinikanuwyehrewatatshri hixa halixatshine hapatjetatshine yehiko?
6Wane. Wanepnawaka Cristo hiwaka moletkajikatshinepnawakhi hijhahchinikanyehjixlu. Hiyrunu malixkane hijhahchinikanyehjixlu.
7Hixa hikolukakjeta hixkakluko hiyáhoni hixa pupjeta. Hi he xawaka kihlepotlu hetachaxyawaklu jikolukanurkaka? Klu tshinanu kihle potlu htshowhuwachaxinixka.
8Seyni hixa hi wan-hixa. Hixa himtukkakjeta hixkakluko. Cristo hiwaka tshinanu moletkajikatshinekhi wan-hixa.
9Hi he himatlu hektutu kamhatshri hi Hoyakalu pohirewaxyawaka hyoptotanu? Hi hyokwijexinwa. Hi kapoklewakleruneko, hi mayawletshicha homkahitatshineko, hi jimopatakleruneko, hi suxonkaklu yamankakjetatshineko, hi jejineko perepnakakjetatshineko.
10Hi katshowhuruneko, hi ksotanuholuneko, hi jimekleruneko, hi jejnuhimakleruneko, hi ktshowhuwakleruneko, hi hyoptotanruna Hoyakalu pohirewaxyawaka.
11Mitshikananu satkakhi hixa wan-hixjekanatatshinhi. Seyni hixa hektuntshi herojikatka, Hoyakalu yoptolenetkahi, hi jihyehitkalunetkahi Hoyakaluya, Wutsrukate Jesus Cristo tshinanu hiyrun-koxa Hoyakalu Hiwejikaluru tshinanu.
Hoyakalu Himalwuxikolu Mantshiyma Piranapni
12Hiyáhoni satuko wan-tshinanu: “Kluneruktako naluka kamhaletanu, nkamhanru.” Hehemka seyni hi ptowru potuko paluka kamhaletanru hepixanyi. Numukata wan-tshinreta: “Hehe, numukata nalukanru ptowru potuko kamhaletanu.” Wanepnawaka hi nitshitanru nkamhaleru towuxyawakno.
13Satukotnaka wan-tshinanu: “Nikkaluru nosatu tshinanupa hiyrun-koxa sattshi tshinanu rawa nikkaluru.” Wanemka seyni Hoyakalu pa hohne nikatanru nosatu hiyrun-koxa nikkaluru. Wimane hi hapoklewlu tshinanni seyni wimane Hoyakalu yokanrerupni. Tsru Hixikatshriwa Hoyakalu wimane hyapa wale halukanru hkamhiywakapa.
14Hoyakalu hiwekkakatkalu Tsru Hixikatshriwa Jesus hiyrun-koxa hix-koxa riwekkakanu waleko hpixkonuyma.
15Hi he himata hixa hix-mane Cristo psojitni? Kihlehohihe Cristo mane psojite kapoklewaklero mane nipxakkajyawaka? Hike.
16Hiyrun-koxa hi he himatlu katukta kapoklewaklero hapokmanexini, pa manepka rixatka walayma? Klu tshinanu wane potuko htshina Hoyakalu tokanu yonatkaluru mitshikawlur-pirana: “Hepikananna, pa manepka rixkakna.”
17Hiyáhoni katukta Tsru Hixikatshriwa Hoyakalu hipxakanu satupkalututkani hiwejikaluruya.
18Hasujinri hapoklewlu. Ptowru pimri hektuntshi yineru kamhanru wimane malekate hwatshrini. Seyni hapoklewatatshri waleko himaneko hmajnakowaxya.
19Hi he himatlu wimane Hoyakalu Hiwejikaluru hwiywakni hixa himane hitokote hiwejikatshrini, Hoyakalu henejyawu? Wale waneyhi Hoyakalu tshinanu. Hi hixanukni hixa.
20Klu tshinanu kwenuru hanjixikalunhi. Hiyáhoni Hoyakalu himalwutanu himaneyma.
Currently Selected:
1 Coríntios 6: mpdBiblia
Highlight
Copy
Compare
Share
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil