1 Coríntios 7
7
Hnunrotshine, Hnurtshine Hiykoxikolu Piranapni
1Xawakni hixa yonyehixyano pirana nkochtshekanu. Kihlepotlu jeji suxo hma yotnexyawakanu.
2Seyni hapoklewlu tshinanu satkaka jeji hijhalo waleko hhanunro rimwiywakapa. Hiyrun-koxa satokaka suxo hijhalu walako thanuru timwiywakapa.
3Hnurtshine haluklu hhanunrone halujyawaka romkahixyawakna. Waneko pixka tixanru suxo thanuru.
4Wala suxo hi towutmanexinwa wala nanuko seyni halikaka thanuru towutleropni. Waneko pixka rixa thanuru. Hi htowutmanexinwa seyni hhanunro halikaka towutmanetanru.
5Wanna hepi, jeji hhanunroyma hi htshipetmankajinna ho pchinhohnejiji tshinanu tsonu mimaletkonepni ranjihohnexyawakna tshinanu tsonu. Waneyakni himumkakakanutnaka Satanás myahtalexyawakanupna hmakoxikowakanupna tshinanu.
6Seyni pchinhohnejiji htshipetmankajyawakna jeji hhanunroyma pirana hi ntowuxikolni wale pirana. Wale hitshitkaluru piranni.
7Nalukmaklu ptowruneko halixatshineko hita pixkamka rixanna hi khanunrophi, hi khanuruphi. Seyni satkaka wan-rixa Hoyakalu henejyalu. Satu wane potuk-hixa. Satu pnuko hixa.
8Wane ntshinna mhanunrone hiyrun-koxa hipnahnurutatshrone wane ntshina. Hita pixka rixhohnekanatanmakna.
9Seyni hma makotkanuklunupluna wan-rixyawakna hhanunrowhapkatanna, hhanuruwhapkatanna. Klu tshinanu kihleru halikaka hanunrowhapkaxyawakna, hanuruwhapkaxyawakna hma kaheknanuwaxyawakanupna.
Hnunrotshi, Hnurtshi Hma Muchoxikowakanu Piranapni
10Satu yokanruru waneyno hixa himwakakatshine tshinanu. Halikakni hi hitako nanikpiranachalerni seyni Tsru Hixikatshriwa Cristo yokanrerni. Suxo khanururo hi hichohnurutanu.
11Tuknokahnuruxinipa, mhanuruthohnekananpatkani ho wannako hihlekakanu. Hiyrun-koxa jeji hi hichohnunrotanu.
12Waneya wane pnute hita wan-tshina, hi Tsru Hixikatshriwa Cristo wan-tshina: Cristo halixatshri malixkato hnunroxini taluk-himwalhohnekanaxinri, hi ruchotanro.
13Hiyrun-koxa suxo Cristo halixatshri hmixkanuklunu thanuru raluk-hohnekanaxinro, hi tuchotanru thanuru.
14Klu tshinanu hnurtshi malixkatu hihlehchinikanutka Hoyakaluya hhanunro halixatshro tixini. Waneko pixka tixa hnunrotshi malixkato hihlehchinikanutka Hoyakaluya thanuru halixatshri rixini. Wane hmixkanuklunna hwuhenenna hi ruhlehchinikanutkana Hoyakaluya. Seyni xawakni ruhlehchinikanutkana Hoyakaluya.
15Malixkatu haluk-hicholexinro hhanunro Cristo halixatshro hyachatanu malixkatu. Wan-rixini malixkatu hike rixa halixatshine tshinanu ho jeji ho suxo. Hoyakalu honra tshanixatkahi kihle hwachale hixinripa.
16Klu tshinanu pixa suxyi halixatshroyi hi pimatlu phanuru malixkatu xawaka palixkakanu, waneko pixka rixa jeji halixatshri ho phanunro malixkato xawaka palixkakanu.
17Seyni riwejinri Tsru Hixikatshriwa Cristo heneksaxya tshinanhi satkakhi hixa wanekananuko hixa hiwekletanutka Hoyakalu tshanixiniklunutkahi pixkako hixhohnekanatanutka. Wane nixa hasrukletna ptowruneka Cristo halixatshine hapatjetatshin-yehkaka.
18Satu yineru judeu-neru jiprojhaptojimtatatshri htshanixkoklunutka Hoyakaluya hi rujhalu mjiprojhaptojimtatkotu pixka rixyawaka. Hiyrun-koxa ho pa neruko mjiprojhaptojimtatkotu htshanixkoklunutka Hoyakaluya hi rujhalu hjiprojhaptojimtaxikowaka.
19Jiprojhaptojru hike repixa Hoyakalu hetanuya hiyrun-koxa hma jiprojhaptojimtatkanuklunu yineru hike repixa Hoyakalu hetanuya. Hepixlewatatshri potni Hoyakalu yokanatanru homkahixikolu.
20Hanukta rixakanatatka yineru Hoyakalu tshanixinixkalu waneko rixanutka.
21Hiyáhoni towutachatkaluryi pixakanaxini ptshanixkoklunutka, hike rixa seyni pumukata hichpaklexiniplu ptowuxikolu puchpakanu halikaka.
22Klu tshinanu towrertshicha htshanixka Tsru Hixikatshriwa Hoyakaluya hiyáhoni mtowretkotuko hiyrun-koxa Hoyakalunutkani. Waneko pixka rixa towrertshicha mixkatu htshanixkoklunutka Cristo towrerni wale.
23Hixa kwenuru hanjixikalunhi. Hi yine towutanunephi.
24Cristo tshinanu nmoletanune, hanukta hixakanata satkakhi htshanixkoklunu Hoyakaluya, waneko hixanu Hoyakalu hetanuya.
Maklojine Hiyrunu Mhanunrone Hiyrun-koxa Hipnahnurutatshine Piranapni
25Maklojine jejine mapokmanetanunewa tshinanu, Tsru Hixikatshriwa Cristo hike hyokanaxyano seyni Hoyakalu hitakno halixatshine ninoxyawaka halikaka pirana hinkakletatshrino, waleko retwamonre tshinanu, hiyáhoni wane nixa himatjemletlu xye pirana.
26Hitaho kihleru xye papko kaheknanuwle tshinanu hanukta rixakanata jeji waneko rixanu.
27Suxlahe pimwa? Hi pujhanru puchoxyawakaplo. Mhanunrotu pixinrahe? Hi pujhanro suxo.
28Seyni phanunrowaxini hi hektuntshini wale. Hiyrun-koxa hi hektuntshini makloji thanuruwaxini. Seyni himatanu hnunrowatatshri ho hnuruwatatshro hsalewnamanetanna. Xye salewnalu pirana tshinanu wane ntshina hixa hma salewniywakanumkapa.
29Cristo tshinanu nmoletanune, wane ntshina, hi hohohneru Cristo hapojinripa. Hiyáhoni khanunrolune mhanunrone hiwekle pixka rixanna.
30Tshiyahatatshine mtshiyahatkane pixka rixanna. Ho himuwatatshine mpoyikowatkane pixka rixanna. Maronewatatshine malechayalune pixka rixanna.
31Xye tshijne hajerkaka hikamrurewatatshine hi wan-hixatshine pixka rixpotukanatanna. Klu tshinanu xye hohne hixjexyawaka nikawnanu.
32Naluk-hepixletmakhi hma kojwakahchinikanuxyawakanupa. Klu tshinanu jeji mhanunrotu hijhahchinikanuxinwa hanu pot-xawaka rumukata homkahretlu Nutsrukate Tsru Hixikatshriwa halukanru.
33Seyni khanunrolu haluk-himatletanru xye tshijne hajerkak-pirana hanu pot-rumukata kamhaleta hhanunro halujyawakako.
34Hiyáhoni wan-hixatshri hepi hchinikanru. Suxo mhanuruto hiyrun-koxa suxo jeji mapokmanetanutowa Tsru Hixikatshriwa halukanru pirana tuchinikanretjeta. Rujhaluna suxone powra rixyawakna himaneymana hiyrun-koxa riwejinriyna. Seyni suxo khanururo thanuru halujyawaka pirana tuchinikanretanu tpoyikowkajyawakaplu thanuru.
35Wane ntshina hiykolethi klu tshinanu naluk-hepixlethi. Hi naluklu nkotspehchinikanuxyawakhi. Seyni naluklu halikakalutu potukalu pirana homkahixyawakapa hiyrun-koxa Tsru Hixikatshriwa Hoyakalu halujyawaka henejinwa ptowru hmixkonuyma.
36Xyekni ntshina hiykoletna mhanunrone. Satu mnukawa hnunrowpiratatshri hyokmanahchinikanuxini, hmaklojite hma hnunrotpiraxyawakanu wla ntshina hiykoletlu. Hyokmanahchinikanuxinixnaka mhanunrotu klu tshinanu hi rukchikhihlenutlu tuchochaxikowaka makloji ho ralukpotutawalo hiyrun-koxa raluk-hnunrotlexinro hiyáhoni wane ntshina kihleru hhanunroxyawaklo. Wan-hixatshri hi hektuntshi hkamha.
37Seyni hmixkowahchinikanuxini hihchinikanuya hma hnunrowaxyawakanu klu tshinanu hi rujhalu hanunrowaxyawaka hiyrun-koxa rakotlu mhanunrotu rixachaxyawaka hiyáhoni kihleru hma hnunroxyawakanro hmaklojite.
38Hiyáhoni katukta hmaklojite hhanunrota kihleru hkamha. Seyni katukta hmaklojite hi hnunrota kihler-potu hkamha.
39Suxo tiwekahnurutka pchinika tinanchitka. Seyni tupnahnuruxinixka waleni towre tuchpajyatka. Hiyáhoni tumukata hnurutletlu talukanru katuktako. Seyni Cristo halixatshri tsonupni halikaka.
40Seyni hitaho tma hnuruwatkanuklunupa tumuwatanu. Hiyrun-koxa nkahwaklu Hoyakalu Hiwejikaluru himwano hit-koxa.
Currently Selected:
1 Coríntios 7: mpdBiblia
Highlight
Copy
Compare
Share
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil