Gênesis 24
24
Sato Suxo Hhanunrowaxyawakapatka Isaque Piranapni
1Tsrutsolejitkani Abraão hixo mhaletkalu. Tsru Hixikatshriwa Hoyakalu hepixle ymalu ptowru tshinanuko.
2Waneya Abraão hiynumatatkalu htowreru mitshikawluru rimwaleru ptowruka towutatshri wla htshinru:
— Pimyo noskota pyochmakanu. (Wane rixakanatna mitshkawlunni pa pirana renejinpatka klu tshinanu Abraão hipnakastsitkani.)
3Ptshinanno Tsru Hixikatshriwa Hoyakalu tshiji Hoyakalute, tenhohne Hoyakalute koxa hiwakaya hi xako pwapanro suxo hewi canaã-nerune nero whene nwatkalrene whene hhanunroxyawakaplo, noturu Isaque.
4Naluklu ptshinamxyawakno ntshijne potuko pyanu nomolene nwaka suxo pwapyawakapa noturu Isaque hhanunroxyawakaplo.
5Waneya towrertshi wla htshinru:
— Ha suxo mimotspiratkanuklunupno wkata nujhalhe piwhene puchpajyawaka tshijne nyokanaxyawaklu?
6Waneya Abraão hihitlu wla htshinru:
— Xako puslahanru hikeklu hohne xako noturu wane pyokanatanu.
7Tsru Hixikatshriwa Hoyakalu, tenhohne hajeru nurni pji nuchpakakjixjeru hiyrun-koxa nmatuxyawak-tshijne nuchpakakjixjeru, hiynumatatkano hiyrun-koxa runkakno, wla htshinatkano: “Xye tshijne nenekanna piklopichane rumutujyawakapluna.” Walekni yokanatanru htowreru tenhohne hajeru pma muchpakkanuklunuwa pixa. Hiyáhoni waneko pwapinro sato suxo hhanunroxyawakapa noturu.
8Seyni wala suxo maluka himotsletkanuklunupyi psatojinipa wkata wane rixinipa ptshinamxyawaka hike kochpakanutka. Halikaka xako noturu hi wane panikanu.
9Hiyáhoni htowreru rutsrukate Abraão skota hyochmakamyota. Runkaklu hkamhiywakaplu xye pirana Abraão hanjixyalu.
10Waneya towrertshi hwaplu dez camelo htowutjeru prane hiyrun-koxa rutsrukate hejnunkate kihlekakalu ranikamta klu tshinanu walekni rutsrukate hejnunkate ptowruka towutatshri. Waneya hyatka Mesopotâmia tshijne Naor hwiywaka poktshi nwaka hyatka.
11Waneya kayi sreta camelo-ne hyoptsojitakjixna satu hakophastsi poktshi malekate sreta. Waneklu papko suxone hichpakatka honha hsajehaxyawakapna rasruha hixlejexyawakna.
12Waneya wla htshina:
— Ha Tsru Hixikatshriwa Hoyakalu, Abraão Hoyakalute nanjityi penejyawakapno kihle hakanhaleru xye hohne tshinanu, kihlewaka pixanru nutsrukate Abraão.
13Hakophastsi nyotunoxya. Xye poktshi hajene whenene suxone hichpakamta honha hsajehaxyawakapna.
14Hiyáhoni xawakni nanjityi makloji hanuroktako niynumatanu wla ntshininplo: “Psajehapre tshiji putakanu honha psajijinno nurrerupa waneya wla ttshininipno: “Haté hehe puranu pixa hiyrun-koxa nsajikhatanu piprane camelo-ne tshinanu koxa,” ttshininipno wala. Walakni pnurrero ptowreru Isaque tshinanupa. Wane hixatshropakni nimatanu puphujexyalu kihleru pkamhiylu nutsrukate Abraão.
Rebeca Tshinkaluro Nurexikolu Piranapni
15Waneya hi rutuka yanumletawa, Rebeca tshinkaluro Betuel tshinkaluru hchitsho Milca tshinkaluro Naor-yma himekahyona Abraão mole mekahyo wane tyapamta hachhaji tuthanamta.
16Makloji kihle hojiro potukoni, jeji mapokmanetanutowa. Walakni yopikatka hakopha nwaka hachhaji tsepohatlu waneya tkankatka.
17Waneya towrertshi hasukamtatka wala nwaka waneya wla htshinro:
— Nanjityi putanno honha psojha pachhajre panikamxinruha.
18Waneya tuhitlu, wla ttshinru:
— Pura nutsrukate.
Waneya tchireta kochtshekletlu tothanaya hachhaji tutspakatkalu waneya tutatkalu.
19Waneya rali hirexinixka wla ttshinru:
— Piprane camelo-ne tshinanu koxa nsajehatanu haté rayokhaxinipna.
20Waneya tchiretatka tuyokhatlu honha hachhaji hwatshri pratshine hirawakleya waneya tasukamtatnaka hakopha nwaka honha tsajehaxyawaka wale prane camelo-ne ptowruneka tshinanu.
21Seynikta jeji hike mtshinkatuko hislahakanatlo rexyawakaplu tsru hyanre repixijeruplahe hkamhinri Tsru Hixikatshriwa Hoyakalu ho hike.
22Waneya rali hirretatkana camelo-ne waneya wale jeji satu hisrojretshi ouro kamhikolu cinco gramas e meio pa hinurutu hetkolu reneklo. Hiyrun-koxa hepi pulseira-ne ouro kamhikolu cento e dez gramas pa hinurutu hetkoni tomyonota tutaklerupa reneklo.
23Waneya repomhalo wla htshinatkalo:
— Katu whenyihe?
Hiyrun-koxa wla htshinro:
— Punkakanno, kwawaklerhe yineru purupjiya wane wumkapyawakapa?
24Waneya tuhitlu wla ttshinru:
— Betuel tshinkaluru whenno, Milca tshinkaluro whene Naor-yma.
25Wla ttshinru wane pnutetka:
— Pratshine niklerupa hi wmahaxya hiyrun-koxa kwawaklena hpoyaho wane hiknokakleyetshnoxyana.
26Waneya jeji yoptsojitatka Tsru Hixikatshriwa Hoyakalu rimalwutatka.
27Wla htshina himalwuretlu:
— Kchinikanurni Tsru Hixikatshriwa Hoyakalu nutsrukate Abraão Hoyakalute. Pixa pepixle hiyrun-koxa ppotuknu hi pkonyalu nutsrukate Abraão. Hiyrun-koxa hita ranikno Tsru Hixikatshriwa Hoyakalu nutsrukate Abraão molene nwaka potuko yahapotatshri ranikatkano.
28Waneya makloji hasukamtatka xye ptowruka hakanhatshri tunkakatkana tunro pji hajene.
29Twu Rebeca tshinkaluro kamólero Labão tshinkaluru. Xyekni hichpakatka, rasukamtatka hyoptoxyawakaplu jeji hakophastsi hwakanatatshri.
30Wane rixa klu tshinanu retlu hisrojretshi hiyrun-koxa hikanretshimtakaka reta himole suxo myonota hwakanatatshri hiyrun-koxa hjemlu himole suxo tokanu wla tshinatshri: “Wla htshina hinkakletno,” ttshina. Hiyáhoni jeji yehi rapokatka Labão. Waneko hyopkakakanatawa hakophastsi camelo-neyma.
31Waneya wla htshinatkalu jeji:
— Pjihlokanutshi pixa Tsru Hixikatshriwa Hoyakalu nurreryi haklu tshinanhe maleka sretako pyopkakachata? Hit-honra pantshi nalpokohnaputatkayi hiyrun-koxa camelo-ne hwiywakapa nalpokotatka.
32Waneya jeji pantshi jihlokatka. Waneya Labão kochpirokatkana camelo-ne, peklo kastakkaluru hiyrun-koxa hitataji pratshine nikanru rukchijyatkana. Honha koxa rukchijyalu jeji rerkajixixyawakapa hiyrun-koxa honha rukchika jejine waleymalune herkajixixyawakapa.
33Waneya nijittshimka rutakyehitkamka hniklerupa. Seyni wale wla tshinatka:
— Hi nnikanu nma munkakkanuko pchinhi klu hikoluklu tshinanu wkata nuna.
Waneya Labão wla tshinru:
— Haté hehe pyanumatanu.
34Waneya wla htshina:
— Hitni Abraão towrerno.
35Tsru Hixikatshriwa Hoyakalu hepixpotutatkalu nutsrukate ntowutjeru. Tsru phuru rixkaklu. Pratshine carneiro-ne hixolune reneklu hiyrun-koxa pratshine boi-ne hix-potuko reneklu. Prata, ouro reneklu, towretshine suxone, towretshine jejine reneklu, camelo-ne reneklu, jumento-ne reneklu.
36Hiyrun-koxa Sara ntowutjeru hnunro jeji tmatkajyatkalu ntowutjeru Abraão tsrotsolejitka. Ptowruka rimwaleru xye hiwhene renekatka.
37Ntowutjeru yokanatno wla htshinno:
— Hi xako pwapanro suxo canaã-nero nwajexyawaka tshijne hajene hhanunroxyawakapa noturu.
38Seyni nurni poktshi nwaka pyanu, nomolene yehi waneya wane hajero suxo pwapinri noturu hhanunroxyawakaplo.
39Waneya wla ntshinatkalu nutsrukate ntowutjeru:
— Seyni tmaluka himotsletkanuklunupno hanhe nixanu?
40Waneya wla htshinatkano:
— Tsru Hixikatshriwa Hoyakalu niyanjereru yokanatanru htowreru tenhohne hajeru pixayma repixyawakapyi pyanreya. Wane hixatshripyi nuruni poktshi nwaka pyanu, nomolene wane hajene yehi waneya waneko suxo pwapini noturu hhanunroxyawakaplo.
41Hiyáhoni xawakni nomolene yehi papojinipa seyni wanna tshipexiniplo waneya putneprijyatkalu ptshinamxyano pirana.
42Hiyahokni xye hohne napokatka hakopha yehi waneya wla ntshinatka:
— Tsru Hixikatshriwa Hoyakalu, ntowutjeru Hoyakalute pujha hakanhakakletlu wkata nunyawaka tshinanu
43Nanjityi hakophastsi nyotunoxini makloji hanuroktako niynumatanu wla ntshininiplo:
— Halya honhala hachhaji panikhamxinri putanno, ntshininiplo.
44Waneya tuhixinipno wla ttshininipno: “Puranu pixa hiyrun-koxa nsajikhatanu piprane camelo-ne tshinanu koxa,” ttshininipno, waneypakni nimatanutka Tsru Hixikatshriwa Hoyakalu nurreroni ntowutjeru whene tshinanupa, ntshinru.
45Seyni hi nali yanumletawa nohchinikanuya tunatka Rebeca tshinkaluro hachhaji tanikamta tothana tanikamxyalu. Hakopha nwaka tyamta tsajkapyawakapa waneya wla ntshinatkalo: “Halya honhal-putanno.”
46Waneya tchiretatka hachhaji tanikamtanru tutspakatka waneya wla ttshinatka: “Puranu pixa hiyrun-koxa piprane camelo-ne tshinanu nsajkapanu ruryawakapna.” Hiyáhoni nuratka hita hiyrun-koxa camelo-ne turkakatka.
47Waneya nepomhatkalo wla ntshinatkalo: “Katu whenektshikyi pixa?” Waneya wla ttshinno: “Betuel tshinkaluru, Naor tshinkaluru whene Milca tshinkaluro matkakleru whenno hita.” Waneya nutaka hisojretlo hiyrun-koxa hikanretshimta tokano nutakatka.
48Waneya nyonohitatka Tsru Hixikatshriwa Hoyakalu nimalwutatka npoyahnutatkalu Tsru Hixikatshriwa Hoyakalu ntowutjeru Abraão Hoyakalute repixle tshinanu. Klu tshinanu hkosekatkano ntowutjeru mole whene suxo nwaka potuko nanijyawakaplo ntowutjeru whene jeji nwaka.
49Hiyáhoni xawakni paluka kihleru kamhanwaklexiniplu ntowutjeru punkakanno ho pitshiterohe ho hike nimaxyawakaplu hanu nixanutka, hewirhe nutukanu ho pnu sretakla nyanutnaka.
50Waneya Labão hiyrun-koxa Betuel hihitlu, wla htshinruna:
— Xye Tsru Hixikatshriwa Hoyakalu kamhalerni hiyáhoni hi wumukata kihlewaka tshinretyi hi koxa wumukata hektuwaka tshinretyi.
51Hetanu twukni Rebeca pixastsi. Hiyáhoni panikanro, pyanutka ptowutjeru whene hhanunro tixyawakapa htshinakanaxyawakatka Tsru Hixikatshriwa Hoyakalu.
Isaque Hanunroxyawaka Piranapni
52Hiyáhoni wanna tokanu hjeminiklunutka Abraão towreru himalwutatkalu Tsru Hixikatshriwa Hoyakalu hyonohyehitlu hihoji tshiji rutspaka.
53Waneya towrertshi hejnu hkochpaka, hejnu prata kamhikolu, hejnu ouro kamhikolu, mkatshri koxa hkochpakatka waneya Rebeca reneklu. Hiyrun-koxa hejnu kwenuru reneklu Rebeca mole jeji hiyrun-koxa tunro reneklu hejnu kwenuru.
54Waneya hnikatka, ruratka wale hiyrun-koxa waleymalune ptowruneka nikatka, ruratkana. Ruknohkakluna wale yetshno waneya wale prika ruptekatkana waneya wla htshinatka:
— Pitshitanno nyiywakapa ntowutjeru nwaka.
55Waneya tomole jeji hiyrun-koxa tunro wla tshina:
— Pitshitanrotshi makloji pa hohneyaka hix-yehi tutukamxyawakapa haté dez hohne pchinikatshi hewi tutukanu. Waneya wane pnut-hohne tyanutka.
56Waneya wla htshinatka:
— Hi himaletanno klu tshinanu Tsru Hixikatshriwa Hoyakalu nyanre repixatka. Hiyáhoni nanjithi hyokanaxyawakapno nyiywakapa ntowutjeru nwaka.
57Waneya wla htshinatkaluna:
— Makloji wtomhanu wepomhanro wala potuko hanu potu ttshinanwu.
58Hiyáhoni Rebeca htomhana waneya wla htshinatkalona:
— Pixlahe himotsatanru xye jeji?
Tuhitatka, wla ttshinatka:
— Hehe waleymapno.
59Hiyáhoni hyokanatatkana hyiywakapna, himolna Rebeca hyokanatna, ttowrero hyokanatna, Abraão towreruymatkana hiyrun-koxa jejine waleymalune hyokanatna hyiywakpatkana.
60Kihlewaka htshinanwakaxyawaklona wla htshinatkalona:
“Pixni wimole suxyi hiyáhoni xawakni hixolune potu hakanhakakatshropyi,
yinepa hixo mil kata mil hakanhakakatshropyi.
Hiyrun-koxa pkamnitjenemka htowutanna piklopichanepa!”
— htshinrona.
61Waneya tpalnatka Rebeca ttowreroneyma, camelo-netji ratskotna waneya wane hixatshrone romkahitluna wale jeji. Hiyáhoni wale towrertshi yoptotlo Rebeca waneya hyatka.
62Waneklu papko Isaque hinakananumta hatnu hapoya Beer-Laai-Roi tshinkaluru hapo klu tshinanu Neguebe tshinikowaka tshijne rawjekanatatka Isaque.
63Kayi sreta Isaque campo hya ruchinikanuwaxyawakapa. Waneyatka rimrekhatatka camelo-ne retpatka hinamtatshine.
64Rebeca heknojtatatka waneya Isaque texiniklunu camelo-tji tuptejyatka.
65Wane tixa klu tshinanu tepomhiniklunutka towrertshi katnihe jeji hinamtatshri wanna nwaka yamtatshri, runkaklo htowutjeru rixyawaka. Waneya kasamalu tkachita tohoji tuchyapre.
66Waneya towrertshi hinkaklu Isaque ptowruka hkamhalerutka pirana.
67Waneya Isaque haniklo Rebeca runroni Sara-ni tenda-tepji raniklo Rebeca hiyáhoni hhanunrotlo Rebeca. Hiyáhoni wale hanunroni. Ramotlo. Hiyáhoni Isaque hapnanuhchinikanutatka runroni hipnale tshinanu.
Currently Selected:
Gênesis 24: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
Gênesis 24
24
Sato Suxo Hhanunrowaxyawakapatka Isaque Piranapni
1Tsrutsolejitkani Abraão hixo mhaletkalu. Tsru Hixikatshriwa Hoyakalu hepixle ymalu ptowru tshinanuko.
2Waneya Abraão hiynumatatkalu htowreru mitshikawluru rimwaleru ptowruka towutatshri wla htshinru:
— Pimyo noskota pyochmakanu. (Wane rixakanatna mitshkawlunni pa pirana renejinpatka klu tshinanu Abraão hipnakastsitkani.)
3Ptshinanno Tsru Hixikatshriwa Hoyakalu tshiji Hoyakalute, tenhohne Hoyakalute koxa hiwakaya hi xako pwapanro suxo hewi canaã-nerune nero whene nwatkalrene whene hhanunroxyawakaplo, noturu Isaque.
4Naluklu ptshinamxyawakno ntshijne potuko pyanu nomolene nwaka suxo pwapyawakapa noturu Isaque hhanunroxyawakaplo.
5Waneya towrertshi wla htshinru:
— Ha suxo mimotspiratkanuklunupno wkata nujhalhe piwhene puchpajyawaka tshijne nyokanaxyawaklu?
6Waneya Abraão hihitlu wla htshinru:
— Xako puslahanru hikeklu hohne xako noturu wane pyokanatanu.
7Tsru Hixikatshriwa Hoyakalu, tenhohne hajeru nurni pji nuchpakakjixjeru hiyrun-koxa nmatuxyawak-tshijne nuchpakakjixjeru, hiynumatatkano hiyrun-koxa runkakno, wla htshinatkano: “Xye tshijne nenekanna piklopichane rumutujyawakapluna.” Walekni yokanatanru htowreru tenhohne hajeru pma muchpakkanuklunuwa pixa. Hiyáhoni waneko pwapinro sato suxo hhanunroxyawakapa noturu.
8Seyni wala suxo maluka himotsletkanuklunupyi psatojinipa wkata wane rixinipa ptshinamxyawaka hike kochpakanutka. Halikaka xako noturu hi wane panikanu.
9Hiyáhoni htowreru rutsrukate Abraão skota hyochmakamyota. Runkaklu hkamhiywakaplu xye pirana Abraão hanjixyalu.
10Waneya towrertshi hwaplu dez camelo htowutjeru prane hiyrun-koxa rutsrukate hejnunkate kihlekakalu ranikamta klu tshinanu walekni rutsrukate hejnunkate ptowruka towutatshri. Waneya hyatka Mesopotâmia tshijne Naor hwiywaka poktshi nwaka hyatka.
11Waneya kayi sreta camelo-ne hyoptsojitakjixna satu hakophastsi poktshi malekate sreta. Waneklu papko suxone hichpakatka honha hsajehaxyawakapna rasruha hixlejexyawakna.
12Waneya wla htshina:
— Ha Tsru Hixikatshriwa Hoyakalu, Abraão Hoyakalute nanjityi penejyawakapno kihle hakanhaleru xye hohne tshinanu, kihlewaka pixanru nutsrukate Abraão.
13Hakophastsi nyotunoxya. Xye poktshi hajene whenene suxone hichpakamta honha hsajehaxyawakapna.
14Hiyáhoni xawakni nanjityi makloji hanuroktako niynumatanu wla ntshininplo: “Psajehapre tshiji putakanu honha psajijinno nurrerupa waneya wla ttshininipno: “Haté hehe puranu pixa hiyrun-koxa nsajikhatanu piprane camelo-ne tshinanu koxa,” ttshininipno wala. Walakni pnurrero ptowreru Isaque tshinanupa. Wane hixatshropakni nimatanu puphujexyalu kihleru pkamhiylu nutsrukate Abraão.
Rebeca Tshinkaluro Nurexikolu Piranapni
15Waneya hi rutuka yanumletawa, Rebeca tshinkaluro Betuel tshinkaluru hchitsho Milca tshinkaluro Naor-yma himekahyona Abraão mole mekahyo wane tyapamta hachhaji tuthanamta.
16Makloji kihle hojiro potukoni, jeji mapokmanetanutowa. Walakni yopikatka hakopha nwaka hachhaji tsepohatlu waneya tkankatka.
17Waneya towrertshi hasukamtatka wala nwaka waneya wla htshinro:
— Nanjityi putanno honha psojha pachhajre panikamxinruha.
18Waneya tuhitlu, wla ttshinru:
— Pura nutsrukate.
Waneya tchireta kochtshekletlu tothanaya hachhaji tutspakatkalu waneya tutatkalu.
19Waneya rali hirexinixka wla ttshinru:
— Piprane camelo-ne tshinanu koxa nsajehatanu haté rayokhaxinipna.
20Waneya tchiretatka tuyokhatlu honha hachhaji hwatshri pratshine hirawakleya waneya tasukamtatnaka hakopha nwaka honha tsajehaxyawaka wale prane camelo-ne ptowruneka tshinanu.
21Seynikta jeji hike mtshinkatuko hislahakanatlo rexyawakaplu tsru hyanre repixijeruplahe hkamhinri Tsru Hixikatshriwa Hoyakalu ho hike.
22Waneya rali hirretatkana camelo-ne waneya wale jeji satu hisrojretshi ouro kamhikolu cinco gramas e meio pa hinurutu hetkolu reneklo. Hiyrun-koxa hepi pulseira-ne ouro kamhikolu cento e dez gramas pa hinurutu hetkoni tomyonota tutaklerupa reneklo.
23Waneya repomhalo wla htshinatkalo:
— Katu whenyihe?
Hiyrun-koxa wla htshinro:
— Punkakanno, kwawaklerhe yineru purupjiya wane wumkapyawakapa?
24Waneya tuhitlu wla ttshinru:
— Betuel tshinkaluru whenno, Milca tshinkaluro whene Naor-yma.
25Wla ttshinru wane pnutetka:
— Pratshine niklerupa hi wmahaxya hiyrun-koxa kwawaklena hpoyaho wane hiknokakleyetshnoxyana.
26Waneya jeji yoptsojitatka Tsru Hixikatshriwa Hoyakalu rimalwutatka.
27Wla htshina himalwuretlu:
— Kchinikanurni Tsru Hixikatshriwa Hoyakalu nutsrukate Abraão Hoyakalute. Pixa pepixle hiyrun-koxa ppotuknu hi pkonyalu nutsrukate Abraão. Hiyrun-koxa hita ranikno Tsru Hixikatshriwa Hoyakalu nutsrukate Abraão molene nwaka potuko yahapotatshri ranikatkano.
28Waneya makloji hasukamtatka xye ptowruka hakanhatshri tunkakatkana tunro pji hajene.
29Twu Rebeca tshinkaluro kamólero Labão tshinkaluru. Xyekni hichpakatka, rasukamtatka hyoptoxyawakaplu jeji hakophastsi hwakanatatshri.
30Wane rixa klu tshinanu retlu hisrojretshi hiyrun-koxa hikanretshimtakaka reta himole suxo myonota hwakanatatshri hiyrun-koxa hjemlu himole suxo tokanu wla tshinatshri: “Wla htshina hinkakletno,” ttshina. Hiyáhoni jeji yehi rapokatka Labão. Waneko hyopkakakanatawa hakophastsi camelo-neyma.
31Waneya wla htshinatkalu jeji:
— Pjihlokanutshi pixa Tsru Hixikatshriwa Hoyakalu nurreryi haklu tshinanhe maleka sretako pyopkakachata? Hit-honra pantshi nalpokohnaputatkayi hiyrun-koxa camelo-ne hwiywakapa nalpokotatka.
32Waneya jeji pantshi jihlokatka. Waneya Labão kochpirokatkana camelo-ne, peklo kastakkaluru hiyrun-koxa hitataji pratshine nikanru rukchijyatkana. Honha koxa rukchijyalu jeji rerkajixixyawakapa hiyrun-koxa honha rukchika jejine waleymalune herkajixixyawakapa.
33Waneya nijittshimka rutakyehitkamka hniklerupa. Seyni wale wla tshinatka:
— Hi nnikanu nma munkakkanuko pchinhi klu hikoluklu tshinanu wkata nuna.
Waneya Labão wla tshinru:
— Haté hehe pyanumatanu.
34Waneya wla htshina:
— Hitni Abraão towrerno.
35Tsru Hixikatshriwa Hoyakalu hepixpotutatkalu nutsrukate ntowutjeru. Tsru phuru rixkaklu. Pratshine carneiro-ne hixolune reneklu hiyrun-koxa pratshine boi-ne hix-potuko reneklu. Prata, ouro reneklu, towretshine suxone, towretshine jejine reneklu, camelo-ne reneklu, jumento-ne reneklu.
36Hiyrun-koxa Sara ntowutjeru hnunro jeji tmatkajyatkalu ntowutjeru Abraão tsrotsolejitka. Ptowruka rimwaleru xye hiwhene renekatka.
37Ntowutjeru yokanatno wla htshinno:
— Hi xako pwapanro suxo canaã-nero nwajexyawaka tshijne hajene hhanunroxyawakapa noturu.
38Seyni nurni poktshi nwaka pyanu, nomolene yehi waneya wane hajero suxo pwapinri noturu hhanunroxyawakaplo.
39Waneya wla ntshinatkalu nutsrukate ntowutjeru:
— Seyni tmaluka himotsletkanuklunupno hanhe nixanu?
40Waneya wla htshinatkano:
— Tsru Hixikatshriwa Hoyakalu niyanjereru yokanatanru htowreru tenhohne hajeru pixayma repixyawakapyi pyanreya. Wane hixatshripyi nuruni poktshi nwaka pyanu, nomolene wane hajene yehi waneya waneko suxo pwapini noturu hhanunroxyawakaplo.
41Hiyáhoni xawakni nomolene yehi papojinipa seyni wanna tshipexiniplo waneya putneprijyatkalu ptshinamxyano pirana.
42Hiyahokni xye hohne napokatka hakopha yehi waneya wla ntshinatka:
— Tsru Hixikatshriwa Hoyakalu, ntowutjeru Hoyakalute pujha hakanhakakletlu wkata nunyawaka tshinanu
43Nanjityi hakophastsi nyotunoxini makloji hanuroktako niynumatanu wla ntshininiplo:
— Halya honhala hachhaji panikhamxinri putanno, ntshininiplo.
44Waneya tuhixinipno wla ttshininipno: “Puranu pixa hiyrun-koxa nsajikhatanu piprane camelo-ne tshinanu koxa,” ttshininipno, waneypakni nimatanutka Tsru Hixikatshriwa Hoyakalu nurreroni ntowutjeru whene tshinanupa, ntshinru.
45Seyni hi nali yanumletawa nohchinikanuya tunatka Rebeca tshinkaluro hachhaji tanikamta tothana tanikamxyalu. Hakopha nwaka tyamta tsajkapyawakapa waneya wla ntshinatkalo: “Halya honhal-putanno.”
46Waneya tchiretatka hachhaji tanikamtanru tutspakatka waneya wla ttshinatka: “Puranu pixa hiyrun-koxa piprane camelo-ne tshinanu nsajkapanu ruryawakapna.” Hiyáhoni nuratka hita hiyrun-koxa camelo-ne turkakatka.
47Waneya nepomhatkalo wla ntshinatkalo: “Katu whenektshikyi pixa?” Waneya wla ttshinno: “Betuel tshinkaluru, Naor tshinkaluru whene Milca tshinkaluro matkakleru whenno hita.” Waneya nutaka hisojretlo hiyrun-koxa hikanretshimta tokano nutakatka.
48Waneya nyonohitatka Tsru Hixikatshriwa Hoyakalu nimalwutatka npoyahnutatkalu Tsru Hixikatshriwa Hoyakalu ntowutjeru Abraão Hoyakalute repixle tshinanu. Klu tshinanu hkosekatkano ntowutjeru mole whene suxo nwaka potuko nanijyawakaplo ntowutjeru whene jeji nwaka.
49Hiyáhoni xawakni paluka kihleru kamhanwaklexiniplu ntowutjeru punkakanno ho pitshiterohe ho hike nimaxyawakaplu hanu nixanutka, hewirhe nutukanu ho pnu sretakla nyanutnaka.
50Waneya Labão hiyrun-koxa Betuel hihitlu, wla htshinruna:
— Xye Tsru Hixikatshriwa Hoyakalu kamhalerni hiyáhoni hi wumukata kihlewaka tshinretyi hi koxa wumukata hektuwaka tshinretyi.
51Hetanu twukni Rebeca pixastsi. Hiyáhoni panikanro, pyanutka ptowutjeru whene hhanunro tixyawakapa htshinakanaxyawakatka Tsru Hixikatshriwa Hoyakalu.
Isaque Hanunroxyawaka Piranapni
52Hiyáhoni wanna tokanu hjeminiklunutka Abraão towreru himalwutatkalu Tsru Hixikatshriwa Hoyakalu hyonohyehitlu hihoji tshiji rutspaka.
53Waneya towrertshi hejnu hkochpaka, hejnu prata kamhikolu, hejnu ouro kamhikolu, mkatshri koxa hkochpakatka waneya Rebeca reneklu. Hiyrun-koxa hejnu kwenuru reneklu Rebeca mole jeji hiyrun-koxa tunro reneklu hejnu kwenuru.
54Waneya hnikatka, ruratka wale hiyrun-koxa waleymalune ptowruneka nikatka, ruratkana. Ruknohkakluna wale yetshno waneya wale prika ruptekatkana waneya wla htshinatka:
— Pitshitanno nyiywakapa ntowutjeru nwaka.
55Waneya tomole jeji hiyrun-koxa tunro wla tshina:
— Pitshitanrotshi makloji pa hohneyaka hix-yehi tutukamxyawakapa haté dez hohne pchinikatshi hewi tutukanu. Waneya wane pnut-hohne tyanutka.
56Waneya wla htshinatka:
— Hi himaletanno klu tshinanu Tsru Hixikatshriwa Hoyakalu nyanre repixatka. Hiyáhoni nanjithi hyokanaxyawakapno nyiywakapa ntowutjeru nwaka.
57Waneya wla htshinatkaluna:
— Makloji wtomhanu wepomhanro wala potuko hanu potu ttshinanwu.
58Hiyáhoni Rebeca htomhana waneya wla htshinatkalona:
— Pixlahe himotsatanru xye jeji?
Tuhitatka, wla ttshinatka:
— Hehe waleymapno.
59Hiyáhoni hyokanatatkana hyiywakapna, himolna Rebeca hyokanatna, ttowrero hyokanatna, Abraão towreruymatkana hiyrun-koxa jejine waleymalune hyokanatna hyiywakpatkana.
60Kihlewaka htshinanwakaxyawaklona wla htshinatkalona:
“Pixni wimole suxyi hiyáhoni xawakni hixolune potu hakanhakakatshropyi,
yinepa hixo mil kata mil hakanhakakatshropyi.
Hiyrun-koxa pkamnitjenemka htowutanna piklopichanepa!”
— htshinrona.
61Waneya tpalnatka Rebeca ttowreroneyma, camelo-netji ratskotna waneya wane hixatshrone romkahitluna wale jeji. Hiyáhoni wale towrertshi yoptotlo Rebeca waneya hyatka.
62Waneklu papko Isaque hinakananumta hatnu hapoya Beer-Laai-Roi tshinkaluru hapo klu tshinanu Neguebe tshinikowaka tshijne rawjekanatatka Isaque.
63Kayi sreta Isaque campo hya ruchinikanuwaxyawakapa. Waneyatka rimrekhatatka camelo-ne retpatka hinamtatshine.
64Rebeca heknojtatatka waneya Isaque texiniklunu camelo-tji tuptejyatka.
65Wane tixa klu tshinanu tepomhiniklunutka towrertshi katnihe jeji hinamtatshri wanna nwaka yamtatshri, runkaklo htowutjeru rixyawaka. Waneya kasamalu tkachita tohoji tuchyapre.
66Waneya towrertshi hinkaklu Isaque ptowruka hkamhalerutka pirana.
67Waneya Isaque haniklo Rebeca runroni Sara-ni tenda-tepji raniklo Rebeca hiyáhoni hhanunrotlo Rebeca. Hiyáhoni wale hanunroni. Ramotlo. Hiyáhoni Isaque hapnanuhchinikanutatka runroni hipnale tshinanu.
Currently Selected:
:
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil