Gênesis 33
33
Jacó, Esaú Yoptoxyawaka Piranapni
1Waneya htunohiyhalexinixka Jacó retlu tujrapatkani runamtatka Esaú quatrocentos jejine ymamnuru. Hiyáhoni mturune hkanipretatka Lia sreta, Raquel sreta, htowrerone hepi sreta hkaniprexyana.
2Htowrerone hiwhenennayma hyihapkakatka, waneya hapkatamtatshro Lia towheneneyma rutaka waneya hapkatamtatshro potuko Raquel rutaka towhene José-yma.
3Waneya Jacó hiknohatkana, hyonohiyehitlu sete kata tshiji rutspakhojitatka haté himole hapokastsitlu.
4Waneya Esaú hasukamtatka wale nwaka hsaprikatkalu, Jacó noji hsaprikatka, ramlutlu. Waneya wanna hepi tshiyahatatka.
5Waneya Esaú tunohiyhaletatka retna suxone, mturuneyma. Waneya wla htshinatka:
— Katnihe wanna pixaymalune?
Waneya Jacó wla tshinru:
— Wanna honukla nowhenene Hoyakaluko ruhlenu tshinanu renejyano hita ptowrerno.
6Waneya Jacó towrerone wale nwaka rapokatkana wanna hiwheneneyma. Hyoptsojityehitluna.
7Waneya Lia towheneneyma hapokanwakatlu koxa. Hyoptsojityehitluna. Waneya José hiyrun-koxa Raquel hapokanwakatlu. Hyoptsojityehitluna.
8Waneya Esaú hepomhalu, wla htshinru:
— Kluhe paluka tshinkakletlu hejnune nyoptojemtanune?
Waneya Jacó wla tshinatkalu:
— Wale honukla kihle yoptole pimixyapno pixa nutsrukatyi.
9Waneya Esaú wla tshinru:
— Seyni nomole hejnu hixo waneyno. Hiyáhoni xawakni pimwalerutka pumutukanu.
10Waneya Jacó wla tshinru:
— Seyni hike, puchinikanrexinpakno nanjityi nenekachale pyoptoxinno. Klu tshinanu pix-hoji nexyawaka hatatjewa Hoyakalu hoji netatka hatewa pukchikhihlenutno.
11Hiyáhoni nanjityi pumutukanru xye pepixjerupa hita henekle klu tshinanu Hoyakaluko ruhlenu tshinanu nimwalu hejnu hixetatshri. Waneya hipokananu hyoptokjixlu renekachale hiyahokni hyoptotlu.
12Waneya Esaú wla tshina:
— Hayewa, wsatokamtatjewa, nkosekamtanutshi hita.
13Waneya Jacó wla tshinru:
— Nutsrukate pimatlu mturune hi tsrukakawana hiyrun-koxa pratshine kowhenerune hitaymakaka. Nmaklutene hipokananu hanjininapna pratshinepni pa hohnepka tshinanu ptowruneka pratshine hipnanuna.
14Hiyáhoni xawakni nanjityi pixa nutsrukatyi pkosejinno hita ptowrerno. Waneya hitatshi hihleko yanu pratshine hatjiniyaka, mturune hakota yalexyawaka pa teyakamnupno haté nutsrukate yehi napojinipa Seir tshinikowaka.
15Waneya Esaú wla tshinru:
— Pitshitanno satkaka nmaklutene hitaymalune pix-yehi nuchomxyawakapa.
Seyni Jacó wla tshinru:
— Hi nujhalu wane pixyawakno. Npoyahnutyi kihle yoptole pixyawakno nutsrukate.
16Hiyáhoni wale hohneko Esaú satokatka hyiywaka Seir tshinikowaka.
17Seyni Jacó Sucote tshinikowaka nwakako hyatka. Waneko hpanawaxyatka hiyrun-koxa corral-kaka hkamha hiprane tshinanu. Hiyáhoni Sucote rutakhiwakatka hipoktshi.
18Padã-Arã tshinikowaka ruchpajiniklunutka Jacó, Siquém poktshi rapokatka Canaã tshijne hwatshri. Waneya wale poktshi yoptowaka sreta hpokowaxyatka.
19Campo psoji nikalumtapji hpokowaxyawaka ranjitatka. Hamor tshinkaluru whenene Siquém hiru ranjitlu. Cem proji pejnu prata kamhikolu hwenutlu.
20Waneya altar hkamhatka waneya. Hoyakalu Israel Hoyakalute rutakhiwakatlu.
Currently Selected:
Gênesis 33: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
