Gênesis 37
37
José Hipnawle Piranapni
1Jacó wane hwajeta rurni hwajekanaxyawaka Canaã tshijneya.
2Xyekni Jacó piranapni: Dezessete mhaletkalu José maklujitkani, rinotjekanatna hiprane carneiro-ne himoleneyma; rimotsjekanatna Bila, Zilpa ruru hhanunrone whenene; waneya José himolene himtuknu kamrure hinkaklu ruru.
3Hetanu, Israel whenene ptowruneka yohnika hamotle rixlu José klu tshinanu José rutsruhinixka hwuhenni. Hiyáhoni hkamhalu satu mkatshri howukalu hokanopnalu ptowru hix-yonhatatshri.
4Waneya rexinixkaluna himolene José wanna ptowruneka yohnika hamotle rixlu ruru, rahnanutluna José hiyáhoni hike tokantshi kihleru rumukata tshinretluna José.
5Waneya rupnawatatka José waneya José hinkakna himolene; hiyáhoni wale tshinanu yohnika hahkale rixluna.
6José wane tshinatkana himolene:
— Nanjithi xye nupnawle hjemyawakapa.
7Hitaklu wapatjekanata, wostujekanatlu campo-ya waneya nostuptaleru yopkaka hipnata, hyotunotatka seyni hixa hostuptaleru mkoje hapyehitlu nostuptaleru, hyonohiyehitluna nostuptale.
8Waneya wane htshinruna himolene:
— Pukchikluhe ptowrexyawakapwu? Halikaklahe wtowutjeryi pixinwa? Hiyáhoni rupnawle tshinanu hiyrunu ptowruka htshinyana tshinanu yohnik-rix-hahkaletluna.
9Waneya rupnawatatnaka José waneya runkakna himolene waneya wla htshinna:
— Hiyrun-koxa nupjetlu tkatshi, ksuru hiyrunu onze katahirine yonohyehitno, — htshina.
10Waneya José hinkajinixkalu ruru, himolen-koxa, ruru hijretlu wla htshinru:
— Klu koxhe pupjejeta pixa? Halikakpaklahe wyanwakatanyi hita, punro, pimolen-koxa hyonohyehixyawakapyina haté tshiji potuko?
11Waneya himolene hahxatlu seyni ruru himrettokanutlu wale nanwaka.
José Hichanjikowaka Piranapni
12Waneya himolene hinotjekanatna rurna prane Siquém tshinikowakaya.
13Waneya Israel hepomhalu José, wla htshinru:
— Hi he Siquém tshinikowaka pratshine rinotjexyana pimolene? Punanu, pixa nyokanatanu pimolene nwaka.
Waneya José wla tshinru:
— Hawu.
14Waneya Israel wan-tshinru:
— Pyanutka xawakni, petapanu ho kihlenhe pimolene ho hike pratshin-koxa. Wanna pirana pisatkapanu. Waneya hyokanatlu Hebrom kihlemta tshiji waka nwaka hyokanatlu, Siquém nwaka hyamta.
15Himolene rujhajeta José campo-ya waneya satu jeji yoptotlu José hiyáhoni repomhalu, wla htshinru:
— Klunerhe pujha?
16Waneya ruhitlu:
— Nomolene nujhajeta; pumukata hinkakletnohe hanhe rinotjexyaluna nomolene pratshine?
17Waneya wla htshinru jeji:
— Hewi ruchpajyana klu tshinanu njema wan-tshinretna: “Wuya Dotã poktshi nwaka wyanu.”
Waneya José himolene hatjini hya waneya rukchikna Dotã poktshistsiya.
18Howukako retapyaluna José waneya hi rapokawa José htshanixkakatkana ruylaxyawakapluna.
19Wane htshinkakna wannakakluko:
— Tujrapatkani jipnawakleru.
20Wuya wuylateru waneya wuknokanru kapna hitokote waneya wla wtshinanu: “Satu hocha hajeru kmatsyiru nikanru.” Waneya wetanu ho rakanhewhe rupjejekanatanru ho hike.
21Seyni Rúben xye tokantshi hyijnakotatka, hkochpaklu José wanna myoya wane htshina:
— Hike, hi wuylatanru.
22Wane koxa htshinna Rúben:
— Hike, hi hiylatanru seyni xye kapna kahnete hwatshri hiknokanru seyni hi hixako hiylatanru.
Seyni xye tokantshi wane htshinya Rúben, hkochpajyawakaplu José wanna yehiya, ruru nwaka hsatkapyawakapa José.
23Hiyáhoni rapojinixka José himolene yehi, hkonamkalhapkatluna, wale mkalu howukalu hokanopnalu ptowru hix-yonhatatshri rutakjekanatanruni.
24Waneya ranikluna, kapna ruknokluna, hi kahlu kapna seyni popriru.
25Waneya wane htuplatatkana hnijyawakapna. Wane rixawana htunohiyhaletna retapna marreteiro-ne ismaelita-nerune, Gileade hichpajikatshine. Wanna prane camelo-ne wunutshri hitjita arômatas, bálsamo, mirra, (phamluhalo hkamhika) Egito tshijne yatshripa.
26Waneya Judá wane-tshinna himolene:
— Hanhe rix-hepixletanwu wuylachaxinri wepuru hiyrunu wyohimaxinri wkamrure?
27Wuya, ismaelita-nerune wuchanjinri, hi wale hixako hiylatanru klu tshinanu halikakni wimolni, hixako wihit-koxni wale. Waneya himolene xye tokantshi hkojiretna.
28Riknohinixkana jichanrewaklerune midianita-nerune, José molene kapna tenopnalu hkochpajyaluna José waneya ismaelita-nerune ruchanjiyatkaluna. Vinte proji prata hkayaxyaluna José wenru waneya ismaelita-nerune Egito tshijne ranikluna José.
29Waneya hsatojinixka Rúben kapna tenopnalu yehi, hi wane rawatka kapna José hiyáhoni hwamonnu tshinanu Rúben suskamkaluxnawa.
30Waneya hyanwakatna himolene waneya wla htshina:
— Mturu honra hi wanetka. Ha hita xawakni hanhe nutukanutka?
31Waneya José mkalu kakoje yonhalu ranikna waneya satu bode ruylatna, wale hraha hsahatluna José mkalu.
32Waneya mkatshri kakoje yonhalu ranikanwakatluna rurna waneya wane htshinruna:
— Xye wukchikatka. Petpotutanru ho pituru mkallahe ho hike.
33Rimathetatkalu waneya wla htshina:
— Hehe, xye noturni mkalni! Satu nijewlu kmatsyiru nikanatkalu José-ni halikakni wale kopalhitutanatkalu.
34Hiyáhoni Jacó suskamkaluxnawa hwamonnu tshinanu saco hmakaxyanawa hiturni pohwaka tshinanu hiyrunu hixo mhale potuko hwamonuwna hiturni tshinanu.
35Waneya hiwhenene jejine, suxon-koxa yanwakatlu ruykoxyawakluna seyni wale hi yijnakotlu ruykoxikolu seyni wla htshinahonuka:
— Hi nutuk-wamonnutanu haté nyanwakaxinri noturni, nupninpatka.
Hiyáhoni Jacó tshiyahpohwakatanru José-ni.
36Seyni wane pchinika midianita-nerune hichankalu José Egito tshijneya. Potifar tshinkaluru ruchanjiyaluna José. Potifar, phuru Faraó towreru, tsru hitakkalurni. Phuru Faraó hinotatshine towutjerni.
Currently Selected:
Gênesis 37: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
