Gênesis 40
40
José Hipnawlu Hinkaklexyawaka Piranapni
1Waneya wane pnut-hohnetka Egito tshijne pohire hirkaluru jetumhakleru hiyrun-koxa h-pão-te kkamhakleru hahkkakatka htowutjerna Egito pohireya.
2Phuru Faraó, htowrene hepi rahkatka. Hirkaluru jetumhaklerune chefe-te rahka hiyrun-koxa pão kkamhakleru chefe-te rahka.
3Hiyáhoni preso rutakna phuru hinotatshine chefe-te preso-ne hitakjexikowakapjiya, José preso hwakanaxyawakapji.
4Waneya phuru hinotatshine chefe-te José hislahle rutakna. Hiyáhoni José hinotatkana. Wane rawatkana pchini hohnejiji.
5Waneya wanna hepi hipnawatatka walerutu yetshno rupnawatatkana. Egito pohire hirkaluru jetumhakleru preso hwatshri hipnawle satuko hiyrun-koxa pão kkamhakleru preso hwatshri hipnawle satuko.
6Waneya wale prika José jihlokyehitna, retna. Hwamonuwatna.
7Waneya repomhatkana phuru Faraó chefe-tekananune waleymalune htowutjerupjiya, wla htshina hepomhaletna:
— Haklu tshinanhe hwamonuwata xye hohne?
8Waneya wla htshinruna:
— Wupnawata seyni hike yineru wukchika hyokkajyawakaplu wimatjemyawaklu.
Waneya José wla tshinatkana:
— Hi he Hoyakalu ptowru pirana himat-yokkakatshrini wale? Hiyáhoni hitatshi hinkakanhi hipjereru.
Phuru Hirkaluru Jetumhakleru Chefe-te Hipnawle Piranapni
9Waneya phuru hireru jetumhakleru chefe-te hinkaklu José rix-hipnawlexyawaka wla htshina:
— Uva-tsa nupjeta.
10Hahapitsa mapa skitatsalu nupjeta. Hhiwuwaphutata, chinipotukawa ralixatka, hsahiwatatka uva-hawa rixnawa.
11Phuru Faraó copa-te stono nkachihipnakanata. Uva nkachita, nkatsohatlu Faraó hirapre stonoya waneya phuru Faraó-myo nutakastonotlu nupnawleya.
12Waneya José wla tshinru:
— Wlakta raluk-tshinreta. Mapa plu map-hohne hyapkakleta.
13Hiyáhoni map-hohnepka mahata phuru Faraó hitajyawakapyi pixakanaxyawaka pixyawakatnaka. Phuru Faraó hirapre stono putakanu wale myoya pixjekanaxyawaka pixanutnaka wale hirkaluru hetumhatshri pixakanaxyawaka pixka.
14Nanjityi xye kihleru hakanhayehixiniklunupyi puchinikanunno, kihlewaka pkamhininno, nkochpajikowakapa xye preso-ya.
15Klu tshinanu hit-honra hebreu-nerun-yehi nwapachaxika hipokananu hike himatyehitno. Hiyrun-koxa hewi nwiywaka hike hikolukle minjene preso nutakka.
Pão Kamhatshine Chefe-te Piranapni
16Waneya pão kamhatshine chefe-te rexinixkalu hipnawlu ruphujtaxikowaka kihle pirana rixyawaka wla htshinru José:
— Ha hit-koxa hipnawata mapa chiwatu nutseptahihipnamta pão klatalu yehi.
17Chiwatu yoptowaka hwamtatshri ptowru hixatshri kamhajpalu wane hwamta phuru Faraó tshinanupa. Seyni kamejirune runna hnikapluna kamhajpalu chiwatu hwatshri nojiwu hoho nanikamxinri.
18Waneya José wla tshinru:
— Wlakta raluk-tshinreta pupnawle. Mapa chiwatu yapkakletlu map-hohne.
19Hiyáhoni map-hohnepka mahata phuru Faraó kastakanojixyawakapyi waneya pimanni hahmuna hiwrolekkako. Kamejirune pihitni nikanu.
20Waneya map-hohne hiknohinixka, phuru Faraó hohneru, tsru niklu hkamha htowrene tshinanupa. Wale hohneko Faraó hitakatnaklu hirkaluru jetumhaklerune chefe-te hiyrun-koxa pão kamhatshine chefe-te rutakatnaka htowrerune tskalaya.
21Hirkaluru jetumhaklerune chefe-te rutakatnaka pnute hkamhiywakaplu hkamhajekanatanru. Hiyáhoni copa stono rutakatnaka phuru Faraó-myoya rixjekanaxyawaka.
22Seyni pão kamhatshine chefe-tni hostuplatkanatka rix-hipnawlexyawakni hyokajyawaka José pixka rixanatka.
23Seyni hirkaluru jetumhaklerune chefe-te hi hichinikanretatkalu José seyni ruherukatkalu.
Currently Selected:
Gênesis 40: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
