Gênesis 47
47
Jacó Egito Tshijne Rawyawakapa Piranapni
1Waneya José hapokanwakatlu phuru Faraó waneya wla htshinru:
— Nuru, nomolene hapokatka hipraneyma hiyrun-koxa ptowruka rimwalerna rimapokatkana. Canaã tshijne ruchpajyatkana hiyáhoni xawakni Gósen tshinikowaka rapokatkana.
2Waneya cinco himolene hnureta waneya phuru Faraó rekhitapna.
3Waneya phuru Faraó hepomhatkana, wla htshinatkana:
— Klunernihe hkamrure?
Waneya ruhitluna, wla htshinruna phuru Faraó:
— Hixa pratshine suslahaklerunwu. Hixa wane wixa kamrureta wutsrukatenni kananuko haté xawakni.
4Hiyrun-koxa wla htshinruna phuru Faraó:
— Wkata wuna hewi tshijne wiywakapa. Klu tshinanu peklo hi hwa wiprane tshinanupa klu tshinanu hmixkowata natshi Canaã tshijneya. Hiyáhoni xawakni wanjityi pitshitanwu Gósen tshinikowaka wwiywakapa.
5Waneya phuru Faraó wla tshinru José:
— Puru hiyrun-koxa pimolene hapoyehitatkayi.
6Egito tshijne psoluka nitshixyayi. Hiyáhoni tshiji kihlewak-potuko putakanru puru hiyrun-koxa pimolene wane putakanu wane rawyawakapna Gósen tshinikowaka tshiji. Hiyrun-koxa rawyinipa satkaka jmereru wale putakanu noprane hislahatshri towutatshri rixyawakapna.
7Waneya José hanikatkalu ruru. Rutakatkalu phuru Faraó hetanuya. Waneya Jacó kihleru pirana htshinanwakatlu phuru Faraó.
8Waneya phuru Faraó hepomhatkalu Jacó wla htshinatkalu:
— Hi pejnu mhaletkayihe?
9Waneya Jacó yanumatatka, wla htshinatkalu phuru Faraó:
— Niwejinri hohne pejnu cento e trinta mhale. Hi hixo mhale niwekahoxnawawa hiyrun-koxa tsru kojwaklu neta niweka pchinika. Wanepnawaka hi nutsrukatenni mhale pejnu napkapkawa.
10Waneya Jacó kihleru pirana htshinanwakatlu phuru Faraó. Waneya hyatka.
11Waneya José hitakatkalu ruru hiyrun-koxa himolene rutaka Egito tshijne rawyawakapna. Kihleru tshiji potuko renekna rumutujyawakapluna Ramessés tshinikowaka tshijne renekna phuru Faraó tshinyawaklu pixka.
12Hiyrun-koxa rohlutlu ruru hiyrun-koxa himolene, rurupji hajene ptowruneka rohlutatka honantshiya satkaka xkehi hijhaleru pso reneka.
Tsru Natshi Hohne Pejnu Piranapni
13Waneya tsru natshi hakanhatka wale tshijne psoluka klu tshinanu hi rawapa nijittshi. Tsru natshi potu retna hiyáhoni ruhrokna Egito tshijne hajene hiyrun-koxa Canaã tshijne hajene hihrokatka tsru natshi tshinanu.
14Waneya José tiyiro ptowruka rapatjetatka honantshi hanjixikolu tiyiro Egito tshijne hajene tiyiroteya hiyrun-koxa Canaã tshijne hajene tiyiroteya. Waneya wale tiyiro ranikatka phuru Faraó-pji nwaka.
15Waneya yine Egito hajenni tiyirote mahatatka hiyrun-koxa Canaã tshijne hajenni mahatiyirotetanatka waneya yine yanwakatlu José waneya wla htshinruna:
— Honantshi penekanwu! Hi petachatanunwu wupniywakapa tiyiro mahle tshinanu.
16Waneya José wla tshinatkana:
— Haté hehe hiprane henekanno waneya nijittshi nenekanhi hiprane kachrijru.
17Hiyáhoni hiprane ranikanwakatluna José. Waneya José honantshi renekna cavalo-ne kachrijru, ovelha-ne kachrijru, boi-ne kachrijru, jumento-ne kachrijru renekna honantshi. Wale mhale psoluka rohlutatkana honantshi hiprane kachrijru.
18Waneya wale mhale hiknohatka waneya hepi rixinri mhale hsatokanwakatluna José, wla htshinruna:
— Hi wyohimayehitanyi pixa wutsrukate tiyiro wmahaxya, wiprane koxa pumutukatka pixa wutsrukateyi hiyáhoni hike potuko wumutukatka seyni wimanepka wimwatka hiyrun-koxa wtshijne tsonu, seyoka.
19Hiyáhoni kluhe wimetachatko wnikaxikowakapa hixa hiyrun-koxa wtshijne nikaxikowakapa pixa hetanuya? Hiyáhoni panjitanunwu hixa hiyrun-koxa wtshijne panjitanu honantshi kachrijru waneya phuru Faraó towrenepatkawu. Hitataji penekanunwu wiwejyawakapa, wma mupniywakanupa natshi tshinanu, tshiji mutakletu hmixyawakanupa.
20Hiyáhoni wane rixa José hanjixyalu Egito tshijne psoluka phuru Faraó tshinanupa klu tshinanu egito-nerune ptowruneka hichanjiyatkalu wannako h-campo-tna klu tshinanu tsru natshi retna wanna ptowruneka hiyáhoni wale tshijne ptowruka rimwatka phuru Faraó.
21Hyokmakatkana yine kahnete hwakanatatshine haté ptowru sreta Egito tshijne mahle sreta hwakanatatshine, poktshi rawyawakapna.
22Sacerdote-ne tshijne tsonu hi ranjitatka klu tshinanu wanna phuru Faraó kotnujyatkana hnikanrupna. Hiyáhoni hi ruchankaluna htshijnena.
23Waneya José wla tshinna yine:
— Hetanu, xye hohne hixa nanjitatka phuru Faraó tshinanupa hiyrun-koxa hixa tshijne nanjitatka phuru Faraó tshinanup-koxa. Seyni hewitkalu hitataji, hixa tshinanupni. Wala tataji hitakanru tshiji.
24Hiyahpakni rixowlewninipa psoji satupka cinco psojite phuru Faraó henekanu seyni quatro psojite hixanpatkani hitataji hitaklerupa tshinanupni, hnijitu tshinanu koxni, hixapji hajene niklerupa tshinanupni hiyrun-koxa hiwhenene niklerupa tshinanupni.
25Waneya wanna wla tshinru:
— Piwekkakatkawu. Hiyáhoni pixa wutsrukatyi pukchikhihlenuxyawakwu tshinanu phuru Faraó towrertshinepatkawu.
26Waneya José satu towuwlu hkamha Egito tshijne hajene tshinanu. Satupka cinco-te rutaklena renejikowakapa phuru Faraó seyni sacerdote-ne tshijne tsonu hi phuru Faraó renekapsojitetko. Wane rixa towuwleta Egito tshijne haté xawakni.
Jacó Hanjire Ralipre Piranapni
27Waneya Israel Egito tshijne rawatkana Gósen tshinikowaka tshijne. Hejnu rapatjeyehixnawana, hwuhenewatna, rixowlepotutatkana.
28Egito tshijne riwejyatka Jacó dezessete mhale pejnu hiyáhoni riwejinri mhale pejnu cento e quarenta e sete.
29Waneya rupnakastsi Jacó, hituru José repukatka waneya wla htshinru:
— Pukchikhihlenuxinno nanjityi pimyo noskota putakanu, punkakanno kihleru pixanno, hi Egito tshijne pkapnatanno ptshinanno.
30Hiyahokni nomanni panikanu Egito tshijne malekate nurunni yomle nwaka wannani hinaple nkapnaxikowakapa. Waneya José wla tshinru:
— Ptshinakanaxyawaka nkamhanu.
31Seyni Jacó wla tshinru:
— Ptshinanno pixyawakapno. Waneya José hinkaklu rixyawakaplu pa hohne. Waneya Israel yonohita rukoluhawakleya.
Currently Selected:
Gênesis 47: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
