Gênesis 49
49
Jacó Kihlewaka Htshinanwakaxyawakna Hiwhenene Piranapni
1Waneya Jacó hepukatkana hiwhenene, wla htshina towutletna:
— Hapatjexinwa hit-yehi nunkajyawakaphi klu hkanhayehitanhi hinatshripa hohne.
2Jacó whenene hapatjetatka hjemyawakapluna rurna Israel tokanu.
3— Rúben pixni nowhene tsrujruyi, pixni nmixkonyi.
Nmixkowle himathexikolu yinuwakle pixni.
Tsru kahwakpiratkalurumkapyi, tsru himukatatshrimkapyi.
4Mpokokotu honha pixka pixa. Hiyáhoni hike pkochpakanu Klu tshinanu puru hnunro pyoknachayehita, nhanunro papokmanetatka, nojeko pumtukatka.
5Simeão, Levi moletkakatshinetka. Hyohlolewapre hiylakaklu tsonu ruchinikanreta.
6Wanna hchinikanu hi homkahitanu, Hiyrun-koxa hi himapatjetanna klu tshinanu hmatsyinna tshinanu rahnannu tshinanna yine ruylachatatkana. Raluka hixlechaxyawak-tshinanna boi-ne koxni rustajikotsamtna hmayanyawakanupna.
7Hahnanuwle kamakatkalurupni klu tshinanu kmatsyipotlu
Hjihekanunna himtuklewata
Hiyáhoni Jacó tshijneya nkaniprexinna hiyrun-koxa Israel hajene yehi nupalkajinna.
8Judá pixa himalwutko pimoleneya.
Pkamnitjene hi pallirijixinwa. Puru whenene yonohiyehitanyi.
9Judá leão whene mtserutuwa pixkalutni.
Pkamnireru, puylaleru yehi psatjetanu, noturu.
Leão pixka pixa hikoluhleta, pukóluha leão tsruru pixkalutyi hi rawa pkamnitjeru.
10Phuru hi hmahatanu Judá klopichaya hiyrun-koxa hi hmahatanu towutatshri hiklopichaneya hma mapokkanu pchinika Towutatshri Potuko.
Waneklu ptowru yineru kajnakolunepa wale yehiya.
11Hipra jumento htsatanu rutakle uva-tsaya hiyrun-koxa rutakle uva-ptshetsa herotu htsaxinri hipra jumento whene. Wale mkalu herokakotka vinho-haya, himkalu vinho-ha serohaluya rerojiko.
12Hiyhale hi rapkathojixini vinho-ha tshinanu hiyrun-koxa hiyhi leite yohnika hlatnuplu.
13Zebulom mar powha wnaha hwanu.
Hiyáhoni tsro kanawa yopjewaklepatkani.
Haté Sidom tshinikowaka htshijnepatka.
14Issacar jumento hixkolu pixkalutupni.
Ptowru sretako hwunuxikolu jimukluhaklerupni wale.
15Retlu rimapnanwunruchaxini hikamtúholu hiyrun-koxa retlu htshijne hikamtu rixahotlu.
Wunutshri rutjipichata hike htshina. Hiyáhoni htowutko, hkamrurewachatanu hike hwenutko.
16Dã himatshwahanna himolene neru xkehi israel-neru ptohikaka hma mikahwajikowakanupa.
17Dã himnu hatnu hapo kwakleru pixkalutupni, himnu kamaklewatatshripni yine yapawakle hapo hwatshripni. Cavalo jixi rachkatanu, hiyáhoni hjijrukanru cavalo tji yapatshri.
18Ha Tsru Hixikatshriwa Hoyakalu hektuntshi yehi nuchokakjeryi pixa. Xyekni nkahwakjekanata.
19Gade kamnitko seyni wale potu hallitanunna wannapni. Waleko hkamnitjene hatjini hyanu.
20Aser nikawakle nijittshi hwapotutanu. Rutakanru nijittshi phuru nikleru.
21Naftali kchoteru hichotkaluru pixkalutupni. Kihle tokanuplu, tokantshi hepixlewatatshri htshinanu.
22José hahmuna kwakleru pixkalutupni. Hahmuna hakophastsi hitakkaluru pixkalutupni. Hiplukaka cerca pa sreta rontapluxini.
23Runokakjenemka kamnipotutatkalu, rinokamkatkaluna katshraluya, rahnanutmakluna.
24Seyni wale koxa hi rimenuwakatshraleta, hiyrun-koxa himyo mixkowatatka Jacó Hoyakalute myo hixkolu himukatleyma. Suslahlewakleru hiwaka tshinanu, israel-nerune sotle.
25Puru Hoyakalute tshinanu, pepixjeru. Ptowru himukatatshri tshinanu pserutjerni wale tenhohne hajeru teno hwatshri, pserutjerni tenohalu hitokha hwatshri. Pserutjerni whenewluya hiyrun-koxa ptowru hixatshri matutatshri pserutjerni wale.
26Puru tserutjeru nowhenene tserutatshri yohnika, teno mrijiwaka mnikawnakatupa pa tserutle hixlewatatshri. Waleko htserutjeru José jiwu hoho hwanu, himolene jiwu hoho rawanutka satu sahyi pixka.
27Benjamim lobo yahakatshri pixka rixanu. Yetshpotukawa hnikanru hkachireru. Kayi sreta ritshetleru rapsalewatanu.
28Nyikaka doze xkehna israel-nerune. Xye tokantshi tserutlewatatshri htshinanwakatna rurna. Satkaka yoptotatkalu waleko htserutjeru pirana ruru tserupiranaxyana.
Jacó-ni Hipniywaka Piranapni
29Waneya hiwhenene htowutatka. Wla htshinatkana:
— Hi howukchini nomolenni yehi napatjexinitka hiyáhoni kapna hipjita jitoxikolu Efrom hitita-neru campo-te hwatshri nurunni kapnaxikowaka hkapnatanno hita.
30Kapna hipjita jitoxikolu campo Macpela tshinikowaka, Manre tshinikowakastsi hwatshri Canaã tshijneya Efrom tshinkaluru hitita-neru ranjixya yomletshi rixyawakapa wane hkapnatanno.
31Wanekni hkapnatkana Abraão-ni, hhanunro Sara-ni wane tkapnatkana, Isaque-ni wane hkapnatkana, hhanunro Rebeca-ni wane tkapnatkana. Wane koxakni nkapnatanro Lia-ni.
32Wale campo hanjitkaluru hiyrun-koxa kapna hipjita jitoxikolu hitita-nerune hanjitkaluru.
33Waneya rali wane tshinretna hiwhenene rukoluhatka rupnanatka. Himolenni yehi rapatjexyatka.
Currently Selected:
Gênesis 49: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
