Gênesis 50
50
Jacó-ni Hipniywaka Piranapni
1Waneya José hiknojnawa rurni hoho, htshiyahahohotanru, ramlutanru.
2Waneya kpinrewaklerune htowrene htowuta hpinimanexyawakanruna hma mujpahiywakanunapa rurni Israel. Waneya hpinitluna hma mujpahahapkaxyawakanupa.
3Quarenta hohne pejnu hpinimanjetanruna hma mujpahahapkaxyawakanupa klu tshinanu hmujpahahapkaxyawaka hipnatshri pinixikolu quarenta hohne pejnu ralukka. Waneya egito-nerune hitshiyahatanru setenta hohne pejnu.
4Waneya riknohinixka htshiyahaxyawakna hohne pejnu José hiynumatna phuru Faraó-pji hajene, wla htshinna:
— Nanjithi, hikchikhihlenuxinipno, Faraó jemanu wla htshinanu,
5“Nurni mitshi towutno nunkaklexyawaklu ranjire nkamhiywakapa. Wla mitshi htshinrewatni: Hetanu nupnakastsitkani hiyáhoni yomletshi njitotjixleru Canaã tshijneya pkapnaxinno. Hiyáhoni nanjityi hitshitanno nyiywakapa nurni nkapnatapyawakapa. Waneya nsatkapanu.”
6Waneya phuru Faraó hihitlu, wla htshinru:
— Wanetshi pyanu, purni pkapnatapanu ptshinyawakatka mitshi.
7Waneya José hichpakatka hkapnatapyawakanaplu rurni. Phuru Faraó hchinikanu hepixatshine, hipji hajene hiyrun-koxa egito tshijne towutatshine ptowruneka himotsatlu.
8José-pji hajene ptowruneka wane yatka, himolene ptowruneka, rurni pji hajene ptowruneka wane yatka. Mturune, ovelha-ne, boi-ne tsonu hi wane yatka seyni Gósen tshinikowaka ruknokamtna.
9Hiyrun-koxa carro-ne cavalo kosleru waleyma wane yatka hiyrun-koxa yine cavalo yapatshine himotsatlu. Hiyáhoni rimotsatjene hixolune potuko.
10Pa hixanu hiplokjexikowaka Atade tshinikowaka rapokatkana Jordão wennestsi hwatshri hwamonuwnatkana tsru tshiyahlu rixatkana. José hitaklu hwamonuwaxinri hohnena sete hohne pejnu rurni ruchinijinri hohne.
11Waneya wane hajene Canaã tshijne hajene hexinixkalu tshiyahlu pa hixanu hiplokjexikowaka Atade tshinikowakaya wla htshinatkana:
— Halikaka egito-nerune wamonuwnapotuta. Hiyáhoni pa hixanu hiplokjexikowaka Jordão wennestsi hwatshri Abel-Mizraim rutakhiwakatluna.
12Waneya Jacó-ni whenene rixa towutlekanaxyawakatkana rixna.
13Hiwhenene jejine hanikanru Canaã tshijne nwaka waneya hkapnatanruna himriji hwapnatatshri Macpela tshinikowaka campo-teya Manre tshinikowakastsi hwatshri. Xye campo mitshi Abraão-ni hanjixyalu Efrom tshinkaluru hitita-neru yomletshi rixikowakapa.
14Waneya rali kapnaletanruna rurni José, himolene hiyrun-koxa ptowruneka rimotsatjene rurni hkapnatapyawakna satokatka Egito tshijne nwaka.
José Hamtakahchinikanyehixyawakna Himolene Kamnixyawaklu Mitshi Piranapni
15Waneya José molene hexinixkalu rurnina hipniywakatka wla htshinatkana:
— Xawakni pa katako José hahnanutanwu, wale hetko hapnutanwu hektutu ptowruka wkamhiywaklu tshinanu.
16Waneya yonawahlo hyokananwakatluna José wla htshinruna José:
— Purni mitshi hma mupnaknuklunuwa htowutyi.
17Wla htshinakjixatkawu wtshinyawakapyi mitshi: “Nanjityi pamtakahchinikanyehixyawakapna pimolene hektunu, hkamhiyatkayina mitshi.” Hiyáhoni wanjityi puru Hoyakalute towrerune hektunu puknokyehixinwu. Waneya wanna tokanu hjeminixka José htshiyahatatka.
18Waneya himolene potuko yanwakatlu hyoptsojityehitluna tshiji rutspakhojitatkana waneya wla htshinruna:
— Hetanu pixa towrerunekwu hixa.
19Waneya José wla tshinatkana:
— Hi hpikanu. Hkahwakluhe Hoyakalno hita?
20Hix-honra haluka hektuwaka kamhalexyamkano mitshi seyni Hoyakalu halukatkalu kihleru rakanhakajyawakapa, hixo yine riwekkajyawaka wexyawakapa haté xawakni hohne.
21Hiyáhoni hi hpikanu. Nohlutanhi hixa hiyrun-koxa hixa whenene nohlutanu. Waneya rapnanuhchinikankakatkana. Kihlewaka htshinatkana.
José-ni Hipniywaka Piranapni
22José hiyrun-koxa rurni pji hajene Egito tshijne hwatka. José hiwekatka cento e dez mhale pejnu.
23Efraim whenene whenene retatka José. Hiyrun-koxa Manassés whene Maquir tshinkaluru whenene hyoptota hatatjewa wale wheneneko rixyawakna.
24Waneya hma mupnaknu pchinika José, José hinkakna himolene, wla htshinna:
— Nupnakastsitkani. Seyni Hoyakalu halikaka hiphujewnayehitanhi hiyrun-koxa xye tshijne hkochpajiniphi, ranikanhi tshiji runkaklexyalu Abraão-ni, Isaque-ni, Jacó-ni nwaka.
25Waneya José towutna Israel whenene runkaklexyawakluna, wla htshinatkana:
— Halikaka Hoyakalu hakanhayehitanhi waneya waneklu papko nohapu hewi tshijne hanijini.
26Waneya rupnanatka José-ni. Cento e dez mhaletkalu. Hpinitluna hmujpahyawakanunapa waneya kapajiru rutakmanetanruna Egito tshijneya.
Currently Selected:
Gênesis 50: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
