João 10
10
Jesus Carneiro Suslahakleru Pixka Rixyawaka Piranapni
1Jesus wla tshina:
— Halikakni, halikakni wla ntshinhi, hanuruktako yineru carneiro himjiywaka hruko hiphaptote hma yapkanuklunu seyni pnuko hyapini, waleni katshowhuru ho ktshowhuwakleru.
2Seyni hiphapto jihlojikatshri halikakni carneiro suslahaklerni.
3Hiphapto hinotatshri hiphapto hkotpukyehitanru hiyrun-koxa carneiro-ne himat-tokanutlu. Waleko hiprane htomha satkaka thiwakaya. Hkosekna ruchpajyawakna.
4Waleko hiprane hkochpajinixka, hkosekna. Carneiro-ne homkahitlu klu tshinanu rimat-tokanutluna.
5Carneiro-ne hi homkahitanru satuko yineru hmetjejetanutu seyni rasujyaluna wan-hixatshri klu tshinanu hkahimtatokanutluna.
6Jesus-mka hinkakna xye yapkaklu pirana seyni hi rimatjemluna klu pirana raluka tshinreta xye yapkaklu tshinanu.
7Waneya wane pnute htshina hinkakleta Jesus:
— Halikakni ntshinhi, Hitni hiphaptono carneiro jihlokawakleno.
8Wanna ptowruneka hita pnute hapokatshine wannani katshowhurune, ktshowhuwaklerune seyni carneiro-ne hi rimatjemtokanutkana wanna.
9Hitni carneiro jihlokawakleno hiyáhoni katukta hita hiknohanu riwekanu, hjihlokanu, ruchpakanu, rukchikanru hnikleru.
10Seyni katshowhuru xye tshinanu tsonu runa htshowhuxyawakapna, ruylalewaxyawakapa, hnikaxyawakapna carneiro-ne. Seyni hita hina carneiro-ne jiwekle hixyawakpatka hiyrunu hiweklu hike mmahaxikatutka nenejyawakapna.
11Hitni carneiro suslahakleru kihlerno; carneiro suslahakleru kihleru hamtaka hiwekletanu pratshine tshinanu.
12Seyni pratshine kamrurewyehichatatshri, carneiro suslahakleru potuko hmixkanuklunu, pratshi mpuratkatu rixini, lobo rexini wale nwaka yamtatshri, ruknokachatna pratshine carneiro, rasuka honuka. Waneya lobo hakakna pratshine hiyrunu rupalkakna.
13Pratshine kamrurewyehichatatshri hasukachata klu tshinanu pratshine kamrurewyehichatatshrini wale hiyáhoni hi ramotna pratshine carneiro-ne.
14Hitni carneiro suslahaklerno kihleru hiyrunu nimatna noprane carneiro-ne. Hiyrun-koxa noprane himatno hita.
15Waneko pixka Nuru Hoyakalu himatno hiyrunu hita himatlu Nuru Hoyakalu. Niwekle namtakanu noprane carneiro-ne tshinanu.
16Pimrine pratshine carneiro-ne pixkalune nwiya hi xye carneiro himjiywaka hruko hajenni wanna. Wanna koxa nujha hwapleta. Ntokanu hjemanna. Pa xkehipkapna hiyrun-koxa carneiro-ne suslahakleru satupkaplu.
17Wale tshinanu Nuru Hoyakalu hamotno. Klu tshinanu niwekle namtaka numukata kochtshekletatnaklu niwekle.
18Hike yineru himukata kochtsheklexyano niwekle seyni namtakanru niwekle hitako nalujyawaka tshinanu. Numukata hamtakletlu niwekle hiyrun-koxa numukatle tshinanu numukata kochtshekletatnaklu niwekle. Nuru Hoyakalu towutno xye nkamhiywaka.
Judeu-ne Kotspalahchinikanuxyawaka Piranapni
19Waneya hkotspalahchinikanutatnakna judeu-ne xye pirana hjemakanaxyawakna tshinanu.
20Waneya yine hixolune wla tshinanwakatlu Jesus:
— Wale hetko kkamtshiterni, mahchinikanutni wale. Ha, klu tshinanhe hyijnakjetokanutlu xye?
21Seyni pimrine wla tshina:
— Htokanu, hi kkamtshiteru tshinyawaka pixka, htshina xye. Hiyrun-koxa rumukathe kamtshi rumrekhakajyawaklu mayhaletu?
Jesus Hoyakalu Rutajnawa Piranapni
22Jerusalém poktshi tsru niklu hohneni, Nurexikolu hohne tshinkaluru hohneni. Katshikleru klu papko.
23Waneya Jesus Hoyakalupji psojite, Salomão tshinikowaka hyapamta.
24Waneya judeu-ne sajruklu Jesus waneya wla htshinruna:
— Hi pchini hohnehe pkojwakahchinikankakanwu hixni? Cristo tshinkaluru pixini halikaka, punkakpotutanwu.
25Jesus wla tshinna:
— Nunkakamkatkahi seyni hi halixa. Kamrurtshi, nkamhaleru Nuru Hoyakalu towuwle tshinanu, wale hiphujtatno.
26Seyni hixa hi halixa klu tshinanu hixa hi n-carneiro-tene hwawakle hajenhi.
27Noprane carneiro-ne pixkalune jemtokanutno, nimatna hiyrunu romkahitnona.
28Nenekanna hiweklu hike rixiniko mnikawnakatu. Hikeklu rupnanna hiyrun-koxa hi satuknako yineru himukata ninotle yehi kochpaklexyana.
29Nuru Hoyakalu pratshine carneiro-ne pixkalune nenekjeru, ptowru potuko tsru potni wale. Hi satuknako yineru himukata Nuru Hoyakalu hinotle yehi kochpaklexyana.
30Hita hiyrunu Nuru Hoyakalu satupkalunwu.
31Waneya judeu-ne sotlumka hkochtshekatnakna hsotlujexyawakamkapluna.
32Waneya Jesus wla tshina:
— Hixo kamrurtshi kihleru, Nuru Hoyakalu kamhakjixleru, nekhithi. Hiyáhoni hanuru kamrurtshi xyekaka nkamhaleru tshinanu hsotlujetanmakno?
33Waneya judeu-ne kosekatshine hihitlu, wla htshinruna:
— Ha, hi satu kamrurtshi kihleru pkamhaleru tshinanu wsotlujetyi seyni hektuwaka ptshinanwakaxyawaklu Hoyakalu tshinanni. Klu tshinanu pixa yineruchayi seyni putajnawa Hoyakalu pixka pixnawa.
34Jesus hihitna, wla tshinna:
— Yonatkaluru homkahjereru pirana, wla htshin-yonhata, “Hita wane ntshinhi, Hixni hoyakalunhi.”
35Hoyakalu tokanu yonatkaluru hi hiknokko hiyrunu htokanu henekkalune hoyakalune htshinna.
36Seyni wanepnawaka hixa wan-tshinanwakatno hita Hoyakalu Nurrerno, Hoyakalu yokanreno xye tshiji napojyawaka seyni wanepnawaka hektuwaka ptshinanwakatlu Hoyakalu, htshinjetno. Seyni wane htshina klu tshinanu wla ntshinnawa Hoyakalu Whenno, ntshina.
37Nuru Hoyakalu kamrure nma kamhaknumka waneya hi halixanno halikaka.
38Seyni Hoyakalu kamrure nkamhini halikaka, yáholu hi hita halixini seyni kamrurtshi nkamhaleru halixanu. Himaxyawaklu hiyrunu halixyawaklu Nuru Hoyakalu himwano hita hiyrunu hita himwalu wale.
39Hiyáhoni wannamka hiyrunukotnaka haluka kachretlu Jesus seyni wanna rasujyatka.
40Waneya Jordão wenne pa sreta wnahlu, João mitshi batiz-jekanaxyawaka yehi hyatnaka Jesus. Waneya wan-rutukatka.
41Hixolune yine hapatjeyehitlu Jesus waneya wla htshinkakna:
— João tshinkaluru hikeklu hiyákolu hkamha seyni ptowru xye jeji pirana runkakletahnapuxyalu mitshi halikakni.
42Waneya wane hajene hixolune yine halixatkalu.
Currently Selected:
João 10: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
