João 14
14
Jesus Hatnu hapo, Halikakalutu, Hiweklu Rixyawaka Piranapni
1Waneya Jesus wan-tshina:
— Hi hwamonuwatanu; hi hkojwakahchinikanutanu. Hmunanhanru Tsru Hixikatshriwa Hoyakalu, Hit-koxa hmunanhanu.
2Nuru Hoyakalupji hixo hwikowaka hwa. Wane hmixkanumka nunkakanmakhi. Wane nyanu nalpokoxyawakaplu hwiywaka hixa tshinanu.
3Waneya nyinpatka, hixa hwiywakapa nalpokoxyawakapa, nunanutnaka. Hitako hwapanutkahi, hixa hita hwiywaka hwanutka.
4Nyiywakapa nwaka himata hiyrun-koxa hyapawakle himata.
5Waneya Tomé tshinkaluru wla tshinru:
— Tsru Hixikatshriwa, hi wimatlu hanu pyanu hiyáhoni hanhe wumukata himatletlu hatnu hapo?
6Waneya Jesus hihitna:
— Hitni hatnu hapno, Hitni halikakalutno, Hitni hiwekluno. Yine Hita tshinanu tsonu rumukata hapokanwakletluna Nuru Hoyakalu.
7Hita himathexinmaka, Nuru Hoyakalu koxa himathetanu. Hiyáhoni xawaknikananuko himatlu hiyrun-koxa hetatkalu.
8Waneya Filipe tshinkaluru wla tshinru:
— Tsru Hixikatshriwa, hixatshi Puru pekhitanwu waneya hike pnuteko wujhanutka.
9Waneya Jesus wla tshinru:
— Hix-hohne nimwatkayi seyni wanepnawaka hi pimathetawanhe Filipe? Hita netjeru Nuru Hoyakalu koxa reta. Hiyáhoni xawakni haklu tshinanhe wla ptshina, Puru Hoyakalu pekhitanwu?
10Hi he palixlu Nuru Hoyakalu hwatshrino hita hiyrun-koxa Nuru Hoyakalu hita hwatshrini wale? Tokantshi nunkaklexyahi hi hita nnurrerni wale nunkakletanru. Seyni Nuru Hoyakalu hita hwatshri, waleni ptowru potuko kochpakatshrini.
11Halixanno Nuru Hoyakalu hwatshrino nixyawaka, hiyrunu halixanru Nuru Hoyakalu hita rawa. Ho halixanno kamrurtshikaka nkamhalerutka tshinanu tsonu.
12Halikakni, halikakni ntshinhi, Kamrurtshikaka nkamhaleru, hita nalixjeru koxa kamhanru. Xye kamrurtshikaka wale yohnika hkamhanu klu tshinanu Nuru Hoyakalu nwaka nyiywaka tshinanni.
13Hiyáhoni kluneruktako hanjixini hita hiwaka tshinanu, wale nkamhanu halikaka, Nuru Hoyakalu himalwuxiko Whentshi tshinkalurno tshinanu.
14Kluneruktako hanjixini hita hiwaka tshinanu, nkamhanru.
15Hamoxinipno, ntowuxyahi hkamhanu.
Jesus Hinkakletlu Satu Hapnanuhchinikankaklewatatshri Hyokanaxyawakapa Piranapni
16Jesus pnute hya tshinreta, wla htshina:
— Hita hanjitanru Nuru Hoyakalu wale satu hapnanuhchinikankaklewatatshri renejyawakaphi, hix-yehi rawhohnekanaxyawakapa.
17Xyepni Hiwejikaluru Halikakalutu. Seyni xye tshijne hajene malixkane hi himukata yoptotletlu klu tshinanu hi retluna hi koxa rimatyehitluna. Seyni hixa himatlu klu tshinanu hix-yehi rawa hiyrunu hixa hitokote rawanu.
18— Hi nuknokanhi hi muslahkonephi. Seyni nsatokanu hixa nwaka.
19Pchini tsonu yine xye tshijne hajene hi hetanutnakno. Seyni hixa hetanutnakno. Klu tshinanu niwekanutnaka hita hiyáhoni hix-koxa hiwekanu.
20Wale hohnepa hixa himathetanru Nuru Hoyakalu hwatshri nixyawaka hita. Himathetanru hixni hita hwatshinhi hiyrun-koxa hita hixa hwatshrino hita.
21Ntowuxyahi tokanu himwatshri, wale tokantshi homkahitatshri, walekni nalukjeru. Nalukjeru, hanuruktako yineru, Nuru Hoyakalu koxa halukanru. Hit-koxa halukanru wale hiyrunu wale yehi nuphujexinwa kat-potno hita.
22Waneya Judas tshinkaluru, hi Judas Iscariotes tshinkalurni seyni satuko, wla tshinru:
— Tsru Hixikatshriwa hanhe pixa hiphujetlexinwa hix-yehi tsonu seyni yine xye tshijne hajene yehi hi puphujexinwa?
23Waneya Jesus wla tshinru:
— Yineru hita nuchinikjeru, ntokanu koxa romkahitanu. Hiyrun-koxa Nuru Hoyakalu hamotanru wale. Wale yehi wyanu. Wale yehi wwanutka.
24Seyni nmalukjetu hi homkahitlu ntokanu ntowuxyalu. Hjemanru tokantshi ntshinyahi. Wale tokantshi ntshinyahi hi ntokanni wale seyni Nuru Hoyakalu nyokanatjeru tokanni wale.
25Xyekaka tokantshi ntshinyahi hix-yehi nwaka pchinika.
26Hiyrunu Hapnanuhchinikankaklewatatshri ptowru potuko hasrukanhi. Walekni hepixanhi hichinijyawaklu ptowru potuko nunkaklexyatkahi. Xye Hapnanuhchinikankaklewatatshri, Hoyakalu Hiwejikalurni. Walekni Hoyakalu yokanatanrupa Hita hiwakaya.
27— Hapnanuhchinikanrewlu hix-yehi nutakanu nuhlehchinikanyehixikolu nenekanhi. Xye tshijne hapnanuhchinikanre phuta pixkalutu hi nenekanhi. Hiyáhoni hi hkojwakahchinikanutanu. Hi hpikanu nyiniklunpatka.
28Hjempiranatatkalu wane ntshinyawakatka mitshi: “Nyanutka seyni nunanutnaka hix-yehi.” Halikaka hitamka halukatka, hpoyikowatanumka klu tshinanu wane ntshina, Hirtshi Hoyakalu nwaka nyanu. Klu tshinanu Nuru Hoyakalu hita yohnika Tsru Hixikatshriwani wale.
29Xawakni nunkakatkahi hmapokkanuwa xye, rapojinpatka halixyawakaplu.
30Xawakni pnutpatka hi hixo pirana nunkakanhi klu tshinanu xye tshijne towutatshri hinanu. Hike htowutanu hit-yehiya.
31Seyni xye nkamha xye tshijne hajene himaxyawakaplu Nuru Hoyakalu nuchinijyawaka pirana hiyrunu xye nkamha htowuxyawakno pixka. Hajewa hpalnanu, hewi wuchpajinitka.
Currently Selected:
João 14: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
