João 15
15
Uva-tsa Halikakalutu Piranapni
1— Hitni uva-tsa halikakalutu pixkalutno. Nuru Hoyakalu uva-cha hislahatshrini.
2Ptowruka hita hwatshri plukaka masahitu Hoyakalu kastakanru. Hiyrun-koxa ptowru plukaka kasahiru wale hihletlu hsahiwpotuxyawakapa.
3Hixni hihletkatka ntokanu nunkajyatkahi tshinanu.
4Hita hwanu hiyrunu nwanhi hixa. Klu tshinanu uva plu hi himukata sahiwleta waleko hmixkonu tshinanu tsonu seyni rujhalu hiptshe hyokajikowaka. Waneko pixka hixatshinhi hixa. Klu tshinanu hixa hike himukata kochpakleta hita hma yokakkanuklunu.
5— Uva-tsa pixkalutno hita. Hixni hiplu. Hiplu hita hwatshripa hiyrunu hita nimwaleru-plu pixkalutu, hixo sahiplu. Seyni hita mwakatu hikeko hkochpaka.
6Katukta hi himwano, hiplu hiknokkaluru pixkalutupni. Riprihanu hiplu hiyáhoni rapatjetka yineya waneya tshitshmero ruknokkana. Hyoxikka hiplu.
7Hita himwini hiyrunu ntokanu hixa hitokote hwanu, halukanru kluneruktako hanjixini, wale hyoptotanu.
8Nuru Hoyakalu himalwutko hix-potu sahi pixkalutu hsahiwaxini. Wan-hixatshinephi nasruklene.
9Nuru Hoyakalu hichinijyawakno pixka waneko pixka nixa hichiniklethi hixa. Hi hasujinri nuchinikle hixa tshinanu.
10Ntowuxyahi homkahixini hi nutuk-hichiniklethi. Nuru Hoyakalu tokanu nomkahjexyawaka pixka. Hiyáhoni hi rutuk-hichinikletno.
11— Xye pirana nunkakhi, numuwle himwatshine himukatatshinephi, hiyrun-koxa hpoyikowaxyawaka hike mahatatka.
12Xyekni ntowuxyahi pirana, hichinikakjexyawaka, hita hichinijyawakhi pixka.
13Hikeni xye yohnik-hichiniklewatatshri, satu yineru rimatletanune kachrijru rupniywaka.
14Nimatletanunephi, ptowru tokantshi ntowuxyahi homkahixini.
15Hi towrertshine ntshinatkahi klu tshinanu towrertshinecha hi himatlu towutatshri, htowutjerna hchinikanu. Seyni nimatletanune ntshinatkahi klu tshinanu ptowru tokantshi Nuru Hoyakalu tshinyano njemleru, nunkakatkahi.
16Hixa hi nuretno hita seyni hitako nuretatkahi hixa hiyrunu nenek-kamrurethi hyiywakapa, Hoyakalu halukanru hkamhiywaka, rawhohnekanaxyawakapa hkamrure. Waneyakni kluneruktako hanjixinri Nuru Hoyakalu, hita nhiwaka tshinanu hanjixinri, renekanhi.
17Xyekaka pirana ntowuthi, Hichinikkakanu.
18— Xye tshijne hajene hahnanuxiniphi, hichinikanru hit-hapka rahnanutatkana.
19Xye tshijne hajeneymalune hixkamka waneyamka hamotko hixa wannanu pixka. Seyni xye tshijne hajeneymalune hma mixyawakanu tshinanni, hiyrunu nurethi xye tshijne hajene hmixyawakanu tshinanu, xye tshijne hajene hahnanuthi.
20Hi hamtakanru tokantshi ntshinyatkahi. Xyekni wale: “Towrertshi hi htowutjeru yohnik-himukatatshrini wale”. Hiyáhoni hita hsalexinixka, hix-koxa hsaletanna yine. Hita ntshinyawaka rimrexinna waneya hixa tshinyawaka koxa rimretanna.
21Hiyáhoni xyekaka ptowruka hkamhinna hixa, nhiwakaymalunhi tshinanu. Xye hkamhanna klu tshinanu hi rimatluna nyokanatjeru.
22Hita nma munkanumka hiyrunu nma miynumatkanumkana yine waneyamka hi hektuwaka kamhatshinetkani. Seyni xawakni hi rawyana rektunna mimathexikowakanu.
23Hita nahnanutjeru, Nuru koxa rahka.
24Kamrurtshi nkamhaleru satukna yineru mkamhanutu, nma kamhaknumka wanna hetanu, himka hektuwaka kamhatshinetkani. Seyni xawakni retluna nkamrure wanepnawaka rahnanutnona hiyrunu Nuru koxa rahnanutna.
25Seyni xye hakanhatka hpoyahokajyawakapa tokantshi yonatkaluru wanna yonre hwatshri, wla tshinatshri: “Rahkanona hike mixkatukno.”
26Seyni Hapnanuhchinikankaklewatatshri, Hiwejikaluru halikaka pirana hiphujetatshri, Nuru Hoyakalu yehi hichpajikatshripa, nyokanatanrupa, rapojinipa hixa nwaka, waleko hiphujtatanno.
27Hiyrunu hix-koxa hiphujtalewatanu klu tshinanu nehapoklekananuko hitaymalunekananhi.
Currently Selected:
João 15: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
