João 17
17
Jesus Hanjihohnere Piranapni
1Xyekaka pirana htshinatka Jesus. Tenhohne hyihata waneya wla htshina:
— Hoyakalu, Nuru rapokpapkolutatka. Piwhene puphujetanu, ruphujexyawakapyi pix-koxa.
2Peneklu towuwlu ptowru yineru htowuxyawaka, hiweklu hike rixiniko mnikawnakatuko renejyawakapna yine ptowruneka penejyatkalu.
3Pixa Hoyakalu halikakalutu rimaxyawakapna yine, hike pixka hixatshriyi, hiyrunu Jesus Cristo, pyokanatanru rimaxyawakapna yine, xyekni hiweklu hike rixiniko mnikawnakatupa.
4Nuphujetatkayi pixa hewi xye tshijneya. Nnikatatkalu kamrurtshi ptowuxyano nkamhiywakapa.
5Hiyáhoni xawakni Nuru Hoyakalu, pix-potuko puphujetanno. Xye tshijne myinuwakkanuklunuwa pixayma nwajekanaxini hoyaknutshi netleru penekanno.
6— Nuphujetatkalu pixa phiwaka yine penejyano xye tshijne hajene yehiya. Payinetene penejyano. Hiyrun-koxa pixa ptokanu romkahjetna.
7Xawakni rimathetluna ptowruka penejyano, pix-yehi hichpajikatshri rixyawaka.
8Klu tshinanu tokantshi punkajyatkano, wanna nunkakatka. Hiyrun-koxa wale tokantshi ralixna. Pix-yehi hichpajikatshrino halikaka rimathetna hiyrun-koxa rimathetnona pixa yokanatanruno nixyawaka.
9— Nanjihohneta wanna tshinanu, hi xye tshijne hajene tshinanu nanjihohneta. Seyni nanjihohneyehitna yine penejyano klu tshinanu pixanunni wanna.
10Hiyrun-koxa hitanunni, pixanun-koxni wanna. Waneko pixka rixa pixanunni hitanun-koxni wanna. Wanna tshinanu rawa noyaknu.
11Pixa nwaka nyanu, hatatjewa hi hewi tshijne nwawa seyni nyi yine hewi tshijne hwawa. Nuru Hoyakalu Potukalu, nyi yine penejyano pihnanutanu pixa hiwaka himukatle tshinanu. Pa hchinikanurune rixyawakapna hixa pixka.
12Wannayma nwakanaxini xye tshijneya pixa hiwaka himukatleyma nihnanutatkana. Yine penejyano nihnanutatka hi satukna hamha seyni hamhatshri tsonupni tshitshmero yatshripa tsonu. Wan-rixatka hpoyahokajyawakaplu Hoyakalu tokanu yonatkaluru tshinyawaka.
13Hiyáhoni pixa nwaka nyanu. Hiyrun-koxa xyekaka tokantshi xye tshijne hajene nunkakatka, numuwle nenejyana hpoyahokajyawakapa wanna yehi.
14Pixa tokanu nunkakatkana seyni xye tshijne hajene hahnanutna klu tshinanu hi xye tshijne hajenetkani, hita xye tshijne hajeru nmixyawakanu pixka.
15Hi nanjityi xye tshijne pkochpajyawakapna seyni nanjityi pinoxyawakna kamtshi hma kojwajyawakanupna.
16Wanna hi xye tshijne hajenetkani, hita xye tshijne hajeru nmixyawakanutka pixka.
17Ppotukatanna halikaka piranayma. Halikakalutni ptokanu.
18Pyokanaxyawakno xye tshijne pixka, wanna koxa nyokanata xye tshijne hyiywakna.
19Wanna tshinanu pixa nenejnawa. Wanna koxa ptokanu halikakalutu tshinanu pixa renejinwana.
20— Hiyrun-koxa hi nyi tshinanu tsonu nanjihohnetanu seyni nanjihohneyehitanna koxa hita halixatshinepa runkakle tshinan-koxna.
21Nanjityi pa hchinikanurune rixyawakapna, hixa pixka Nuru Hoyakalu pa hchinikanurunwu pixa hitayma hiyrunu pa hchinikanurunwu hita pixayma. Nanjityi pa hchinikanurune pixkakanna hixayma, xye tshijne hajene halixyawakaplu pyokanatanruno nixyawaka.
22Hiyrunu hoyaknutshi penejyano, wale nenekatkana wanna. Pa hchinikanurune rixyawakapna, pa hchinikanurune wixyawaka pixka.
23Hita wannayma hiyrunu pixa hitayma hike mmahaxikane rixyawakapna pa hchinikanurune rixyawakapna. Xye tshijne hajene himaxyawakaplu pixa yokanatno hiyrunu rimaxyawakapna puchinikna puchinikjexyawakno pixka.
24— Nuru Hoyakalu nanjityi yine penejyano hita nwiywakapa rawyawakapna wanna koxa. Npohirewnale penejyano rexyawakapna. Klu tshinanu xye tshijne hma kamhakonuklunuwa puchinikatkano.
25Ha, Nuru Hoyakalu Potukalu, xye tshijne hajene hi himatatkayi. Seyni hita himatatkayi hiyrunu nyi yine himatatkalu pixa yokanatno hita.
26Pixa nimatkakatkana wanna hiyrunu pix-pirana nunkakjetawana. Hichiniklewlu puchinijyawakno pso, wannayma rawyawakapa hiyrunu hita wannayma nwiywakapa.
Currently Selected:
João 17: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
