João 18
18
Jesus Getsêmani Tshinikowaka Hyiywaka Piranapni
1Waneya rali hanjihohnerexinixka, Jesus rasrukleneyma yatka waneya hkoprutluna Cedrom tshinikowaka tskata. Rapokluna oliveira-cha wane sreta hwatshri.
2Waneya Judas, Jesus hiphujetatshri, himathetlu oliveira-cha wane hajeru klu tshinanu hixo kata wane rapatjexya Jesus rasrukleneyma.
3Hiyáhoni Judas koxa oliveira-cha hya, hkosekamtna soldado-ne hiyrun-koxa satkaka tsru hixikatshinwa sacerdote-ne hiyrunu fariseu-ne yokanatanune. Ranikluna lamparina, kolhamero koxa hiyrunu hiylalewapkaka.
4Ptowruka riknohjerupa rimatahnapuxyawaka tshinanu, Jesus yanwakhapkatna waneya repomhatkana:
— Kathe hijha?
5Waneya ruhitluna:
— Jesus, Nazaré hajeru.
Waneya Jesus wla tshinna:
— Hitakni.
(Wannayma koxlu Judas, Jesus kamnitjeru.)
6Waneya Jesus wla tshininiklunu, “hitakni”, ratjini hyoxiritna hnakhamtna.
7Hiyáhoni rimepe hepomhaletatnakna:
— Kathe hijha?
Waneya wanna wla tshina:
— Jesus, Nazaré hajeru.
8Waneya Jesus hihitna:
— Nunkakatkahi hitakni. Hiyáhoni hita hijhini, hetacha yaletanna nyi.
9Wane htshina hpoyahokajyawakapa tokantshi htshinyawaka mitshi, wan-tshinatshri: “Yine penejyano hi satukna namtaka.”
10Simão Pedro yohlolewapi himwakanata, waneya hkochpaklu hyohlolewapre, hkastakjepitlu tsru sacerdote towrer-jepi. Hkastaklu hpotukle jepi. (Wale towrertshi hiwakni Malco.)
11Seyni Jesus wan-tshina hiykoletlu Pedro:
— Pihnanutanru hipaji pyochmakanru pyohlolewapre! Pixlahe hi halukno twu copa salewaktshi yehi Nuru henejyano nuryawaka?
Anás Yehi Ranijyawakluna Jesus Piranapni
12Waneya soldado-ne h-chefe-tnayma hiyrunu judeu-ne tsru hixikatshinwa kachitlu Jesus. Rostutluna.
13Mitshikananhapka ranikluna Anás yehi. Caifás tshinkaluru himatjirni Anás. Caifás tsru sacerdote wale hwalapu tshinanu.
14Caifás honra wla tshinatkana judeu-ne kihleru satupka jeji hipniywaka yine tshinanu.
Pedro Wan-Tshinyawaka Hi Rimathetlu Jesus Piranapni
15Simão Pedro hiyrunu satu Jesus hasrukleru homkahitlu Jesus. Tsru sacerdote hetjejreru potuko xye Jesus hasrukleru Jesus-yma jihloklu tsru sacerdote-pji hiputre.
16Seyni Pedro hiphapto maleka sreta hitukatka. Waneya Jesus hasrukleru, tsru sacerdote himathetleru, hsatkapa waneya riynumsatlo suxo hiphapto hislahatshro waneya hjihlokaklu Pedro.
17Waneya suxo hepomhalu Pedro:
— Hi he pixa xye jeji hasrukler-koxyi?
Waneya ruhitlo, wla htshina:
— Hita hike.
18Katshikleru tshinanu towrertshine hiyrunu soldado-ne holkakanata tshitshi hpawlerna yehi. Pedro koxa wannayma yopkaka rolkakanata.
Tsru Hixikatshriwa Sacerdote Hepomhiywaklu Jesus Piranapni
19Waneya tsru sacerdote hepomhalu Jesus. Repomhalu rasruklene pirana hiyrunu Jesus hasruklewle pirana.
20Waneya Jesus wla tshinru:
— Ptowruneko hetanu nunkaklewjeta. Ptowru judeu hapatjexyawaka hanjihohnewakapji hiyrunu Hoyakalupji, nunkaklewjekanaxya. Nunkaklewaxyawaka hikeklu nyohimata.
21Klu tshinanhe hita pepomha? Pepomhanna njemakanatjene. Wanna halikaka himatlu nunkakjekanaxyana.
22Seyni wane htshininixka satu soldado Jesus-stsi hwatshri himpakhojitlu Jesus. Waneya soldado wla tshinru Jesus:
— Wanerhe ptshin-hihretlu tsru sacerdote?
23Waneya Jesus hihitlu, wla htshinru soldado:
— Hektuwaka ntshinini, puphujetanru ntokanu hektutu. Seyni halikaka ntshinini, klu tshinanhe pumpakhojitno?
24Waneya Anás yokanatlu Jesus hostutkaluruko tsru sacerdote Caifás tshinkaluru nwaka.
Pedro Hiyrunuko Wan-tshinyawaka Hi Rimathetlu Jesus Piranapni
25Waneya Pedro holkakanaxiniwa repomhaluna:
— Hi he pix-koxa Jesus hasrukleryi?
Seyni Pedro weyawata, wla htshinna:
— Hi hitni.
26Waneya tsru sacerdote towreru Pedro kastakjepitanru mole wla tshinru:
— Hi he netyi Jesus-yma oliveira-chaya?
27Hiyrunuko hweyawata Pedro waneya waneklukawa potuko hyanumatatka patlapa.
Jesus Pilatos Yehi Hapojyawaka Piranapni
28Waneya judeu-ne haniklu Jesus. Caifás yehi ruchpajyana phurupji ranikluna. Yetshpotukawa. Judeu-ne hi haluka jihlokletlu phurupji hma pitshoxnawakanupwana Páscoa hohne nikle rumukata niklexyawakapna.
29Hiyáhoni Phuru Pilatos hipji hichpajya waneya repomhana:
— Klu tshinanhe hjihyehitlu xye jeji?
30Waneya ruhitluna, wla htshinruna:
— Hektutu hma kamhaknumka, himka pixa wenekanru.
31Hiyáhoni Phuru Pilatos wla tshinna:
— Haté hisatkapanru. Hjihyehitanru hixanu yonreru pirana tshinyawaka pixka.
Waneya judeu-ne wan-tshinru Phuru Pilatos:
— Seyni hixa hi rawiyawu hinhatshri wuylaxyawaklu satu yineru.
32Wan-rixluna Jesus hpoyahokajyawakapa htshinyawaka rixa hipnalexyawakapa salewaktshiyma.
Phuru Pilatos Hepomsaxyawaklu Jesus Piranapni
33Waneya Phuru Pilatos jihlokapjita, htomhalu Jesus waneya repomhalu, wla htshinru:
— Pixlahe judeu-nerune pohiryi?
34Waneya Jesus hihitlu:
— Pixako pihchinikanrahe ptshina ho pimrine hchinikanra ptshina?
35Seyni Phuru Pilatos wla tshinru:
— Ha, judeu-nerlahe pkahwakno hita? Pineruneko hiyrunu tsru hixikatshinwa sacerdote-ne hita hsamyokyina. Kluhe pkamha pixa?
36Waneya Jesus wla tshinru:
— Npohirewaxyawaka hi xye tshijne hajerni. Xye tshijne hajeru rixkamka, ntowrerune yahotkakanmaka nma kachixikowakanupa judeu-neya. Npohirewaxyawaka hi hewi hajerni.
37Waneya Phuru Pilatos wla tshinru:
— Hiyáhoni pixlahe phuryi?
Waneya Jesus hihitlu, wla htshina:
— Pixako wan-tshina. Halikaka wale tshinanu nmatuta hiyrunu xye tshijne napoka nuphujtaxyawakaplu halikakalutu pirana. Ptowruneka halikakalune yijnakotlu ntokanu.
38Waneya Phuru Pilatos hepomhalu:
— Ha klunernihe halikakalutu pirana?
Wane htshininixka ruchpakatka judeu-nerune nwaka hya.
Waneya wla htshinna judeu-nerune:
— Hi psojikna hikolukanuwnalu nukchijyalu xye jeji.
39Seyni ptowru Páscoa hohne tshinanu nuchojetlu satu preso hajeru. Hi he haluklu nuchoxyawakaplu judeu pohire?
40Seyni ptowrunek-yine wla tshin-sapleta:
— Hike, hi walepni seyni Barrabás tshinkaluru puchoxinwu!
Barrabás tshinkaluru honukla katshowhuru.
Currently Selected:
João 18: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
