Lucas 1
1
Teófilo Tshinkaluru Tshinanupa
1Hi heppika yineru yahot-yonretmaklu Jesus pirana rixjekanaxyawaka hix-yehi hkamhajekanaxinri pirana tshinanu.
2Xyekaka pirana wunkakjene, reyinuwaklekananuko hetatshine hiyrun-koxa Hoyakalu tokanu jinkakletaklerunekananni.
3Hiyáhoni, kchinikanur-potni Teófilo, hit-koxa hikchikhihlenutlu nyonaxyawaklu xye pirana kihle pokowak-potuko nixyawakaplu pixa tshinanu. Klu tshinanu hit-honra xye pirana reyinuwaklekananuko nuslahpiranpotukanatlu.
4Pimatpotuxyawakaplu pix-koxa psol-piranako halikaka pirana pasrujikolu.
João Batista Matuxinri Hinkaklexikolu Piranapni
5Judeu tshijne pohire Herodes tshinkaluru klu papko wanekanan-koxlu satu sacerdote Zacarias tshinkaluru. Sacerdote-ne Abias tshinkalune klopichni wale. Hiyrun-koxa Zacarias hnunro Isabel tshinkaluro sacerdote klopich-koxni Arão tshinkaluru klopichni wala.
6Hiyrun-koxa powrahchinikanurunni wanna hepi Hoyakalu hetanuya. Kajnákona Tsru Hixikatshriwa Hoyakalu hiykolukaka. Hi psojikna hpupjexyana.
7Seyni Isabel tshinkaluro hi michiwata hiyáhoni mwuhenewaklenni; hiyrun-koxa tsrutsolejinetkani.
8Waneya pa kata Zacarias tshinkaluru sacerdote kamrure hkamhakanata Hoyakalu kamrure, rix-kamrurjexyawakna sacerdote-ne.
9Wan-rix-kamhaljexyawakna sacerdote-ne, rutakka Zacarias tshinkaluru, Tsru Hixikatshriwa Hoyakalupji hjihlojyawakapa phamluhalo hyoxijyawakapa.
10Waneya rapokpapkoluxinixka phamluhalo hyoxijyawaka, pimrine hixolune Hoyakalupji maleka sretate hwakanatatshine ranjihohnekanatna.
11Waneyakni satu hiwejikaluru Hoyakalu towreru tenhohne hajeru hakanhayehitlu Zacarias. Kapajiru henekachalu yoxikkaluru hitajikowaka phamluhalo yoxijikowakastsi hpotukle sreta hyopkakakanata Hoyakalu towreru tenhohne hajeru.
12Waneya Zacarias hexinixkalu hkojwakahchinikanuxnawa. Hpikpotutatka.
13Seyni hiwejikaluru Hoyakalu towreru tenhohne hajeru wan-tshinru:
— Hi ppikanu, Zacarias. Hoyakalu himatlu panjireru hanjihohneruya. Hiyáhoni phanunro Isabel matuwhenexinyi jejipni. Phiwakatanru xako João.
14Hmatuxinipa pumuwatanu pixa hiyrun-koxa hixolune yine poyikowatanu.
15Klu tshinanu tsru hitakkalurupni Tsru Hixikatshriwa Hoyakalu yhaleya. Wale xako hikeklu hohne ruranru vinho-ha, hi katshwuhaloko ruranu. Hoyakalu Hiwejikaluru tsepotmanetanru runro nanwaka ruchpajinikananuko.
16Hixolune yine israel-nerune hsatkakanu Tsru Hixikatshriwa Hoyakalu Royakalutna romkahixyawakapna.
17Hoyakalu towrerupni, jinkaklewaklerupni. Hoyakalu tokanu hinkakletatshrini Elias-ni tshinkalurni hchinikanu pixka rixleyma hiyrun-koxa Elias-ni pixkonu pixka rixleyma rimatletkakanna tsrune hwuheneneymana. Hektutu kamhatshine ruprotakanna potuka hchinikanurune hiykole romkahixyawakapna. Ralpokohnaputna yine Tsru Hixikatshriwa hapojinripa.
18Waneya Zacarias hepomhatkalu hiwejikaluru Hoyakalu towreru tenhohne hajeru:
— Hanhe xawaka nixa halixletlu xye pirana? Klu tshinanu tsrutsolejitkano. Nhanunro koxa hixo mhaletkalo.
19Waneya hiwejikaluru Hoyakalu towreru tenhohne hajeru wane htshin-hihretlu:
— Petanu. Nhiwaka Gabriel, Hoyakalu towrerno. Walekni nyokanatjeru pixa nunkajyawakapa xye pirana kihler-potuko.
20Petanu. Hi palixlu nunkakle wanepnawaka rapokpapkoluxinipa rakanhanu ptowru piranaka nunkajyatkayi. Seyni pmalixtokanutkan-tshinanno, myanumatkatupyi. Hi pumukata yanumletanuna haté hmatuxinipa piwhene.
21Seyni yine wane pchinika hkahwakakanatluna Zacarias tshinkaluru Hoyakalupji ruchpajyawakapa. Rimyekna klu tshinanu hohamokatkalu.
22Ruchpakamxinixka hi rumukata yanumletanatka. Waneya rimathetluna pa hixanu hetko hetkaluru rethetkotatka Hoyakalupjiya. Myanumatkatukananukotkani hiyáhoni himyoko runkajyatkana yine.
Isabel Tshinkaluro Poyikowaxyawakapa Piranapni
23Wan-rixa. Rali kamruremxinixkalu, sacerdote kamrure, hipji nwaka hyatka.
24Waneya pchini hohnejijitka Zacarias hnunro Isabel tshinkaluro michiwatatka waneya cinco ksuru hi tuchpaka topjiya.
25Waneya wane ttshina:
— Xawaknikananu Tsru Hixikatshriwa Hoyakalu hepixatkano. Xawakni nimatlu ruchinijyawakno klu tshinanu hkonyano npatewle yine hetanuya, klu tshinanu kwhenepatkano. Mwuhenewakletno nixpatka.
Jesus Matuxinripa Piranapni
26Waneya seis ksuru rixinri kamchiro tixyawaka Isabel tshinkaluro Hoyakalu yokanatatnaklu hiwejikaluru htowreru tenhohne hajeru, Gabriel tshinkaluru, Nazaré poktshi Galileia tshijneya, hyiywakapa.
27Makloji jeji mapokmanetanuto yehi hya. Twu suxo José tshinkaluru tunkaklexika, Phuru Davi-ni tshinkalurni klopichni, hhanunroxyawaka. Twu suxo jeji mapokmanetanuto hiwakni Maria.
28Hiyáhoni hiwejikaluru Hoyakalu towreru tenhohne hajeru hapyehitlo wla htshinatkalo:
— Hali, pixa Hoyakalu nurreroyi Tsru Hixikatshriwa Hoyakalu pixaymalu.
29Seyni Maria kojwakahchinikanuta wane htshina haliklexyawaklo. Tujhahchinikanuta klu tshinanhe wane htshintokanyehitlo.
30Seyni hiwejikaluru Hoyakalu towreru tenhohne hajeru wan-tshinro:
— Hi ppikanu, Maria, klu tshinanu kihlehchinikanru Hoyakalu pixa tshinanu.
31Petanu. Pixa michiwatanu, jeji pmatkakanu. Jesus putakhiwakatanru.
32Tsru Hixikatshriwa rixyawakapa. Hhiwakatko, Hoyakalu Tsru Potuko whenni. Tsru Hixikatshriwa Hoyakalu henekanru rurni Davi-ni pohirewakanaxyawaka.
33Jacó-ni klopichane pohirepni hikeklu hohne mnikawnakatupa, hiyrun-koxa hpohirewnale hikeklu hohne nikawnanutka.
34Waneya Maria wan-tshinru hiwejikaluru Hoyakalu towreru tenhohne hajeru:
— Hanhe rixa hakanhaletanu xye klu tshinanu hita hike hapokmanetno.
35Seyni hiwejikaluru Hoyakalu towreru tenhohne hajeru wan-tshinro:
— Hoyakalu Hiwejikaluru pix-hohwaka rapokanu. Hiyrun-koxa Hoyakalu Ptowru Potuka Himukatatshri himukatle pix-hitokote hwanu. Wale tshinanu mturu pkaylerupa Hoyakalu nurrerni. Hoyakalu whene htshinko.
36Hiyrunu petanu. Pimole Isabel-mka tsrotsolejni. Seyni wala koxa kwajnanwaka mturu seyni jejni. Hike kahwaklo tmichiwaxyawaka seyni kamchirotkani. Seis ksurutkalo.
37Klu tshinanu Hoyakaluyma hikeni kyapreru.
38Waneya Maria wan-tshinru:
— Hewitkano. Tsru Hixikatshriwa Hoyakalu towrerno. Wane potuko rixanno ptshinyawakno.
Waneya hiwejikaluru Hoyakalu towreru tenhohne hajeru yatka.
Maria Hetapyawaklo Tomole Isabel Piranapni
39Waneya hi hix-hohnepotu, wane tuchpajya Maria. Teyakawamta. Teno mrijiwaka tya. Judeia tshijne hajeru poktshi nwaka tya.
40Zacarias-pji tjihlokatka waneya Isabel tshinkaluro talikatka.
41Wane tixatka. Isabel jem-haliklexinixkalo Maria, mturu Isabel nanwaka hajeru ruptekapa. Hoyakalu Hiwejikaluru pixkonu himwatkalo.
42Hiyáhoni hipokananu tyanumata. Wla ttshina yanumleta Isabel:
— Hihlehchinikanyehitkalúroyi pixje suxon-yehiya. Hiyrun-koxa hihlehchinikanyehitkaluru pixa nanwaka hichpajikatshripa.
43Katnohe hita tyanwakaxyawakno Noyakalute hinro tetapyawakno?
44Petanu. Hajeyrono yijnakotatkayi palijyawakno mturu nonanwaka hajeru hiptekapa hpoyikonuyma.
45Hihlehchinikanyehitkalúroyi klu tshinanu palixanru rixa hakanhalexyawaka psol-piranako Tsru Hixikatshriwa Hoyakalu hinkajyatkayi halikaka.
Maria Himalwure Piranapni
46Waneya wla ttshinatka Maria:
— Naji himalwutlu Tsru Hixikatshriwa Hoyakalu.
47Niwejinri himuwata Hoyakalu Niwekkakjeru tshinanu.
48Klu tshinanu hita ruchinikanretatka, hitako, htowrerno, hike makotkatokno. Xawakni pnut-hohne hihlewahchinikanyehitkalurno wane htshinnona ptowru hiwekhohnekanatatshine ptowru hixatshine jejine, suxone.
49Klu tshinanu Hoyakalu Ptowru Potuko Himukatatshriko tsru hetkaluru hkamhiyno. Hhiwakni Potukal-potuko.
50Retwamonre rekhitna yine hkahwakpiratjene pejnu hiwekakanatatshine haté xawakni pnut-hohne hiwekatshinepa.
51Rekhitlu hmixkonu hkamrureymakotka. Hkopalatna halixkotachaxikatshinwa ruchinikanretanruymana.
52Phurunekananu hkonyana hpohirewaxinrina. Waneya hike mkochpakkanekananu tsru rixkakatkana.
53Jinanu rixkakna natshikanatatshine ptowru nijittshi kihleruya. Phurune hyokanatanna hyiywakatkana hike manikaneko.
54Repixlu htowreru israel-nerune klu tshinanu hi ramtakatkalu retwamonrewle.
55Runkajya pirannina wutsrukatenni. Wan-rixlu Abraão-ni hiyrun-koxa hiklopichaneya hikeklu hohne mnikawnakatupa.
56Waneya Maria tshinkaluro mapa ksuru pchinika Isabel tshinkaluro yehi twa. Waneya topji nwaka t-satokatnaka Maria.
João Batista Tshinkaluru Matuxyawaka Piranapni
57Waneya rapokpapkoluxinixka Isabel tshinkaluro tmatuwhenexyawaka, twuhenetlu mturu jeji.
58Waneya timwastsirene hiyrun-koxa tomolene jempiranyehitlu Tsru Hixikatshriwa Hoyakalu hepixyawaklo Isabel tshinkaluro pirana. Hiyáhoni rumuwatna wanna ptowruneka walayma.
59Waneyatka mturu oito hohne rixinixka ranikluna mturu hjiprojhaptojimtaxikowakpatka. Waneyakni rutakhiwakatmakluna Zacarias, ruru hiwakako.
60Seyni runro wan-tshina:
— Hike seyni João htshinko halikaka.
61Waneya pimrine wan-tshinro:
— Seyni hi satukna pimolene xye hiwaka hiwakatletatshri.
62Waneya rutsejrihjetluna mturu hiru hanu htshinahiwakatlepiratlu wale.
63Waneya Zacarias hanjitlu papel-mta. Waneya hyonatlu hituru hiwaka João. Waneya ptowruneka himyekatka.
64Waneya waneklukawa potuko Zacarias himukata yanumletatnaka. Waneya hyinuwaka himalwuretlu Hoyakalu.
65Waneyakni rimwastsitanune pikatkalu Hoyakalu. Hiyrun-koxa Judeia tshijne teno mrijiwakaya psoluchako hpohixikatka xye pirankaka.
66Waneya ptowru yine xye pirankaka jematshine himretpiranatlu rajiyna. Repomhiynawana:
— Klu hixatshripni xye mturu? Klu tshinanu halikaka phujetkalu Hoyakaluyma rixyawaka.
Zacarias Tshinkaluru Hinkakletlu Mapokatuwa Piranapni
67Waneya mturu hiru, Zacarias tshinkaluru, katsepoylu Hoyakalu Hiwejikaluru hiyáhoni runkakletlu mapokatuwa pirana, waneya wane htshina:
68— Himalwutkaluru Tsru Hixikatshriwa israel-nerune Hoyakalute, klu tshinanu runatka, riwekkakatkana rayinetene.
69Hoyakalu henekatkawu satu hiwekkaklewatatshri, tsru pixkonurutu Tsru Hixikatshriwa Hoyakalu towreru Davi tshinkalurni klopichni.
70Mitshikawako wane htshinatka Hoyakalu, htokanu hinkakletatshine nuretkaluneya.
71Runkakletlu wkamnitjenemyoya riwekkajyawakapwu, waneya pnuteko runkakwu wahnanutjene jihekannu hkochtshejinwu.
72Retwamonre pirana wutsrukatenni runkaklexinritka rekhitanu. Htshina hinkaklexyawaknina pixka potuko rixa halikakalutu pirana hi ramtaklu.
73Hoyakalu hinkakniri wutsrukatni Abraão-ni, hiyáhoni Hoyakalu kamhiylu htshina hinkaklexyawak-potuko.
74Hkochpajyawakapwu wkamnitjene hamlenu, wpoyaho homkahrexyawakaplu Hoyakalu, hike wpikanu,
75Wumukata homkahretlu powrahchinikanurunwu, potukalunwu ptowru hohneruka wiwejinriya Hoyakalu hetanuya.
76Hiyáhoni, noturu, Tsru Hixikatshriwa Hoyakalu, tenhohne hajeru tokanu hinkakletatshri ptshinko. Klu tshinanu pixa yihapamtanu Tsru Hixikatshriwa Hoyakalu hatnu hapote palpokoxyawakapa.
77Hoyakalu hayinetene punkakanu hiwekkaklewatatshri pirana, rektunna hiknojikowakpatka.
78Woyakalute retwamonrewle tsru potuko rixanwu. Hkotpukyehitanwu ratnuya hiwekkaklewatatshri pirana tenhohne hichpajikatshri pirana.
79Hnikotyehitna mapchahawaka hwatshine, hipuktshistsi hwatshinena; rekhixyawakapwu hatnu hapo hapnanuhchinikankaklewatatshri hapo wyapyawakapa. (Seyokatkani Zacarias chikale.)
80Waneya mturu João Batista tseruwnatka, hmixkowahchinikanutatka. Popriwaka rawjekanatatka haté rakanhayehitatkana israel-nerune.
Currently Selected:
Lucas 1: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
