Marcos 16
16
Jesus Hiwejyawakatnaka Piranapni
1Waneya hapnanuxikalur-hohne hiknohatka waneya Maria Madalena tshinkaluro, Salomé tshinkaluro hiyrun-koxa Maria tshinkaluro, Tiago hinro hanjitlo phamluhalo Jesus manni ruyohaxyawakaplona.
2Domingo hohne yetshpotukawa ronoxinixka tkatshi yomletsh-yehi hyatkana.
3Hatnu hapo hyapamtna wane htshinamtna:
— Kathe heruxinwu yomletshi hichyatatshri sotlu?
4Wane htshinna wanna klu tshinanu tsru potuklu sotlu. Seyni ronotamxinixkana retluna rerutkatka sotlu.
5Hiyáhoni hjihlokyomletluna. Waneya retluna makluji klatalu mkatshri hitakatshri, hpotukle sreta htuplakanata. Rimyekpotutna.
6Seyni wale wan-tshina:
— Hi himyekanu! Nimatlu Jesus Nazaré hajeru cruz hipnapikatshri hijha. Seyni hi hewitkalu, riwekatnaka. Hetanru rukoluhakanaxyawaka.
7Xawakni hyanu. Pedro, pimrine rasruklen-koxa hinkakanu xye pirana: “Wale kosekamtanhi hixa Galileia tshijne. Wane hexinri htshinyahi pixka.”
8Waneya yomletshi nwaka ruchpajyatkana. Rasukamtna. Tsru piklu rixna. Rutatakna hiyrunu hike runkakna klu tshinanu hpikpotuthonukna.
Jesus Hakanhayehixyawaklo Maria Madalena Piranapni
9Jesus hiwekatnaka domingo prika. Mitshikananhapka Maria Madalena rakanhayehita. Wala honra mitshikananu sete kamtshine takajika.
10Wala yatka tunkakapyawakapna Jesus himwakanatatshine klu tshinanu hwamonuwnana, htshiyahakanatna.
11Seyni hjeminixkaluna Jesus hiwejinritnaka hiyrunu texyawaklu pirana, hi ralixlona.
Jesus, Hepi Rasruklene Yehi Hakanhiywaka Piranapni
12Waneya wane pnute Jesus hakanhayehitna hepi rasruklene campo yamtatshine. Seyni Jesus satu yáholu rixnawa.
13Waneya hsatkapna pimrine rasruklene nwaka runkaklewaxyawakapna seyni wanna hi halixlu runkaklexyana.
Jesus Onze Rasruklene Hakanhayehixyawaka Piranapni
14Waneya Jesus hapkata hakanhayehletna onze rasruklene. Hnikakanatna. Waneya wale hijretna hmalixlenna tshinanu hiyrunu hchikhajna tshinanna. Klu tshinanu hi ralixtokanutna pimrine Jesus hiwekatshri hetatshine.
15Waneya wla htshina:
— Ptowru tshijne hyanu hinkakanna kihle piranalu potuko hiwekkaklewatatshri pirana ptowru tshijne hajeneka.
16Katukta halixanru hiyrunu h-batiza-xikowakapa riwekkaka hikeklu hohne mnikawnakanepni. Seyni katukta hi halixanru hamhatshripni.
17Halixatshinepa pixkontshi renekkotkana xye hetkalurkaka hkamhiywakapna: kamtshine ruknokajyawakapna hita hiwakaya, hiyrun-koxa herotu nrukaka hyanumaxinna.
18Hiyrun-koxa ho himnu hkachixinna ho hisa rurinna hike rixanna. Hiyrunu yeyixatshine hoho rutakamyoxinna rutskalhanna.
Jesus Tenhohne Yinri Piranapni
19Waneya rali hiynumsaletna Tsru Hixikatshriwa Jesus tenhohne hanikkatka. Hoyakalu potukle sretate htuplata.
20Waneya rasruklene ptowru sreta hyana runkakletluna kihle piranalu potuko hiwekkaklewatatshri pirana. Hiyáhoni Tsru Hixikatshriwa Jesus hepixlewata hetkalurkakayma rekhixyawakapa halikaka pirana htshinna.
Currently Selected:
Marcos 16: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
