Lucas 19
19
Jesus Hiyrunu Zaqueu Tshinkaluru Piranapni
1Waneya Jesus Jericó poktshi hjihlokamta waneya hkoprutlu.
2Waneya wanekananru satu jeji Zaqueu tshinkaluru. Waleni jijhawenruklerune chefe-te. Phurni wale.
3Raluk-hetletlu Jesus hanu hixatshrini seyni hi rumukata hetletlu hixolune yine tshinanu klu tshinanu mtseruwnakatni.
4Hiyáhoni pnuteyaka hya hasukleta. Waneya satu hahmuna ratskotatka rexyawakaplu Jesus. Klu tshinanu wane hyapamtanu.
5Waneya rapojinixka Jesus wale yehi, teno hyihata Jesus. Waneya wla htshinru:
— Zaqueu, hajewa pserpikhapkatanu klu tshinanu xawakni pipji naluk-hapokleta.
6Hiyáhoni hchireta serpikleta Zaqueu. Hyoptotlu Jesus hpoyikonuyma.
7Seyni pimrine hetakanatatshine kahemha. Wla htshinna:
— Hektutu kamhatshripji rawanu.
8Waneya ptowru yine hetanu hyopkaka Zaqueu tshinkaluru. Waneya wla htshinru Tsru Hixikatshriwa Jesus:
— Tsru Hixikatshriwa Jesus, petanu, hanikaji nimwaleru nenekanna hike mwikane. Hiyrun-koxa katuktako pa hixanu ntshowhuxya nyokwijreymalu, quatro kata pnute nsatkajinri.
9Waneya Jesus wla tshinru:
— Xawakniko hiweklu jihlokatkalu xyepji. Klu tshinanu Abraão-ni when-koxni wale.
10Klu tshinanu Jeji Whene tshinkaluru hina hamhakanatatshri rujhiywakapa riwekkajyawakaplu.
Dez Ouro Proji Piranapni
11Waneya Jesus yapkaklu pirana runkakna, tokantshi jemakanatatshine. Klu tshinanu hi howukatkalu Jerusalém poktshi hiyrunu wanna kahwakatkalu Hoyakalu pohirewaxyawaka hakanhahapkaxyawakpatka.
12Hiyáhoni wla htshina Jesus:
— Satu jeji phuru hijhalu pa tshijne hyiywakapa wale tshijne pohire rutajikowakpatka. Waneya hima hsatkapanu.
13Seyni mitshikananhapka htomhanna hkamrurewkakjetanune dez-rune. Waneya pa projkaka ouro renekna satkaka. Waneya wla htshinna: “Hetanu hi psokta tiyiro himukata kamhaletanu wale projiyma haté napojini.”
14— Seyni rawyawaka tshijne hajene hahnanutlu. Hiyáhoni hyokanatna wale hatjini tokantshi hanikatshine. Wla tshinatshine: “Hi walukyi pixa wwiywaka poktshi pohire pixyawaka.”
15— Waneya rali yoptolexinixkalu hpohirewaxyawaka pa tshijneya, htshijne nwakako hsatokatnaka. Waneya hkamrurewkakjetanune ouro proji renekamtanune htomha rimaxyawakaplu hi psokta tiyiro hkayatatkana walaya.
16Mitshikananu jeji hapokatka waneya wla htshina: “Nutsrukate, pa proji ouro penekamxyano, dez proji ouro wanetka.”
17— Waneya phuru wan-tshinru: “Poyahnu, kihleru towrertshiyi. Psotsonu tshinanu kihle hislahlu pixlu. Hiyáhoni dez poktshi pohirepyi.”
18— Waneya satu hinatnaka. Waneya wla htshina: “Nutsrukate, pa proji ouro penekamxyano, cinco proji ouro-tkalo.”
19— Waneya wale koxa wla htshina phuru: “Pix-koxa cinco poktshi pohirepyi.”
20Waneya satu hinatnaka, wla htshina: “Nutsrukate, xyetkani ouro proji penekamxyano, satupkalutu. Nimretlo, mkatshri sama npoyitlo.
21Klu tshinanu npikyi, pix-honra jeji menekachalewakletyi. Pwiya pma kamhanutuko. Mutakatúkoyi hamlu.”
22— Waneya wla htshinru: “Hektutu towrertshiyi. Pixako ptokanuko nukolukkakanunyi. Pimatnohe jeji menekachalewakletu nixyawaka? Nma kamhanutuko nimwiywaka hiyrun-koxa mutakkatukno hamyawaka?
23Haklu tshinanhe hi banco putaklo ntiyirote tatskoxyawakapa? Wane pixkamka napojinitka nyoptotanmaklo tiyiro tsroyakalotka.”
24Waneya wla htshinatkana wane hwakanatatshine: “Hkonanru ouro proji nenekamxyalu. Dez proji ouro himwatshri henekanro.”
25— Seyni wanna wla tshina: “Seyni Tsru Hixikatshriwa, wale honra dez projine ouro rimwa!”
26— Waneya wla htshina phuru: “Wla ntshinhi, tsru himwatshriko pnute renekko. Hiyrun-koxa hike mwikatu seyo rimwalerujiji hkonko.
27Hiyrun-koxa nmalukjene hpohirna nmaluk-hixletjene hanikanna hewi. Hita hetanuko hiylatanna.”
Jesus Jerusalém Poktshi Jihlojyawaka Piranapni
28Waneya rali wan-tshinretatka Jesus, hyatka. Hkosekamtna Jerusalém poktshi nwaka.
29Waneya Betfagé hiyrunu Betânia poktshikaka rapokastsixinixka, himriji Oliveiras tshinikowakastsi hyokanatna hepi rasruklene.
30Wla htshinna:
— Poktshi pnute hajeru nwaka hyanu. Waneya chinpotukawa hjihlokanru, hetanru jumento whene tsatkaluru hikeklu myapatjitkotuwa. Hkochpirokanru wale, hanikanru wkata.
31Seyni satu yineru hepomhiniphi haklu wla himixa waneya wla htshinanna: “Kasruklewakleru haluklu.”
32Waneya hyatkana Jesus yokanrene. Rukchikluna htshinakanaxyawak-potuko.
33Hkochrijinixkaluna jumento whene kaprane hepomhana, Haklu hikochriklu jumento whene?
34Waneya wane htshinna:
— Kasruklewakleru haluklu.
35Waneya rasruklene Jesus nwaka ranikluna jumento whene. Waneya himkalna jumento-tji hoho rutakna. Waneya Jesus waletji rutakatkana.
36Riknohamtka pchinika Jesus, yine koprakamkata hatnu hapo.
37Waneya Jerusalém poktshistsi rapojinixka, Oliveiras-pjita yopikjexikowaka, hixolune yine romkahitjene himuwata. Hyinuwaka himalwuretluna Hoyakalu. Hsaplew-himalwuretluna ptowru retakanatanruna, hetkalurkaka tshinanu.
38Wla htshinna:
— Himalwutkalurni Pohirtshi, Tsru Hixikatshriwa hiwaka hinikatshri! Kihle hwachalu rixanu tenhohneya! Tenoya hoyakawaxikowaka!
39Waneya satkaka fariseu-ne hixolune yine himwakanatatshine wan-tshinru Jesus:
— Kasruklewakleru, putshrokjixanna pasruklene.
40Waneya Jesus wla tshinna:
— Halikaka wane ntshinhi, nyi potshke hixinipa seyni sotlune saplewatanu.
Jesus Tshiyahaxyawaka Jerusalém Poktshi Tshinanu Piranapni
41Waneya Jerusalém poktshistsi rapojinixka Jesus, rexinixkalu htshiyahata wale poktshi tshinanu.
42Wla htshinakteta Jesus:
— Ha! Himatkamka, haté xawakniko, himukata hikchikletlu kihle hwachalu! Seyni xawakni hi pumukata hetletlu.
43Klu tshinanu pa hohne runanna pkamnitjene, tshiji hjitotanna hkamnixyawakyina papkopa. Hsajrukanyina. Ptowru sretako rerutanyina.
44Hyotkakanyina hiyrun-koxa pixa hitokote hwatshinepni. Hi satukna sotlu hwahohokakanu klu tshinanu hi pimathetlu Hoyakalu hepixlepir-hohne.
Jesus Hoyakalupji Rapkapyawaka Piranapni
45Waneya Hoyakalupji hjihlokamta Jesus. Hyinuwaka maleka yokanretna hichanrewatatshine.
46Wla htshinna:
— Wla htshina yonatkaluru Hoyakalu pirana: “Nopji hanjihohnewakapjini.” Seyni hixa katshowhurune hwiywaka hkamhiyatkalu!
47Jesus ptowru hohneruka hasruklewjekanata Hoyakalupjiya. Tsru hixikatshinwa sacerdote-ne, kasruklewaklerune, hinanchitkaluru pirana hasruklewatatshine hiyrun-koxa judeu-ne tsru hixikatshinwa haluk-hiylaletmaklu Jesus.
48Seyni hi rukchikluna hanu potu rixa hiylaletanruna. Klu tshinanu ptowrunek-yine haluka jemlepotutlu Jesus tokanu.
Currently Selected:
Lucas 19: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
