Lucas 18
18
Hipnahnurutatshro Hepixikolu Piranapni
1Waneya Jesus satu yapkaklu pirana runkakna ranjihohnexyawakapna, hma muhrojyawakanupna.
2Wla htshinatkana:
— Pa poktshi rawa satu hetamayxaklerewatatshri. Wale hi piklu Hoyakalu. Yine koxa hi hkahwakpirata.
3Wale poktshi twakanat-koxa sato hipnahnurutatshro. Waneya wale yehi tya. Wla ttshinru hetamayxaklerewatatshri: “Papnuyehitanno nkamnitjeru tshinanu!”
4— Seyni hix-hohne hi repixlo. Waneya wale pnutetka wane htshinahchinikanuta: “Himka npiklu Hoyakalu. Hiyrun-koxa hi nkahwakpiratlu yineru.
5Seyni twu hipnahnurutatshro kojwakjepotutno hiyáhoni napnuyehitanutkalo. Wane nmixkanuklunupa nupukalewatanutka wala hinjetatshro tshinanu.”
6Tsru Hixikatshriwa Jesus wla tshin-koxa:
— Hyijnakotanru klu htshina hetamayxaklerewatatshri mpomunanukotu.
7Hiyáhoni hi he xawaka Hoyakalu hapnuyehitanna rayinetene hnurrene, hohohne hoyetshno koxa ranjitjene? Himka repixhapkatanna.
8Seyni wane ntshinhi, repixanna halikaka! Seyni rapojinipa Jeji Whene tshinkaluru halixlerhe rukchikanu xye tshijiya?
Fariseu Hiyrun-koxa Jijhawenrukleru Piranapni
9Waneya Jesus xye yapkaklu pirana htshin-koxa, yine kihle hikahwajikatshinwa hiyrunu pimrine reyikjetna.
10Waneya wla htshina Jesus:
— Hepi jejine yanwakatlu Hoyakalupji ranjihohnexyawakapna. Satu jeji fariseu-ne hiyrunu satu jeji tiyiro kyoptokleru.
11Waneya fariseu-ne yotunotatka ranjihohnetatka walepka. Wla htshinnawa: “Ha, Tsru Hixikatshriwa Hoyakalu npoyahnutyi hita hi pimrine pixka hixatshrino, wanna katshowhurune, hektutu kamhajetatshine, suxohewatatshine, haté xye tiyiro kyoptokleru pixka hi nix-hita.
12Pa semankaka hepi kata hita hi nika hiyrun-koxa Hoyakalu nenekjetlu psoji ptowruka nkayaleru.”
13— Seyni tiyiro kyoptokleru howuka hyotunoxyatka, hi tenoko hyihatatka. Seyni rutpestaxnawa wane htshina: “Ha, Tsru Hixikatshriwa Hoyakalu, petwamonutanno hitni hektuwaka kamhatshrino!”
14Waneya Jesus wan-tshina:
— Wane ntshinhi jeji mitshikananu hanjihohnetatshri hi ruhlehchinikanutka seyni hapkat-hanjihohneretatshri kihle hchinikanutka hsatkapa hipji nwaka Tsru Hixikatshriwa Hoyakaluyma. Klu tshinanu katukta kihle rixahoxnawa mtserutu rixinixkawa seyni katukta mtserutu hixakanaxinwa htserutkotka.
Jesus Hiyrunu Mturune Piranapni
15Waneya mturunemka ranikanwakatka Jesus, kihle hwachalerunephi htshinikowakamkapna mturune seyni Jesus hasruklene hi hitshitna.
16Waneya Jesus tomhana rasruklene. Wla htshinatkana:
— Hetachatanna mturune hyanwakaxyawaknona. Hi himaletanna. Klu tshinanu Hoyakalu pohirewaxyawaka hayinetene mturune pixkalune koxni wanna.
17Wla ntshinhi halikaka:
— Katukta hi yoptotanru Hoyakalu pohirewaxyawaka mturu pixka, hi hjihlokanru.
Jeji Phuru Piranapni
18Waneya satu judeu tsrukakalu hepomhaplu Jesus, wla htshina:
— Kasruklewakleru kihleru, klunerhe nkamhanu niwejinri hikeklu hohne nma nikawniywakanupa?
19Waneya Jesus wla tshinru:
— Haklu tshinanhe wane ptshinno kihle nixyawaka? Hikeni yineru kihleru, Hoyakalu tsonu kihleru hikeni hiyrunu.
20Pimathonru hiykolu pirana: “Hi hapoklewatanu, hi puylalewatanu, hi ptshowhuwatanu, hi pimrine pweyatanu, pkahwakpiratanru puru, punro.”
21Waneya phuru hihita:
— Nmatureyakawa haté xawakni nomkahitlu xye hiykolu ptowruka.
22Waneya hjeminixkalu Jesus xye ptowruka wla htshinatkalu:
— Seyni satu pa hixanu pmaha kamhaletawa. Puchankanru ptowruka pimwanru, penekanna ptowruka mahaxikatshine. Wane pixa pohirewnaletanu tenhohneya. Waneya punanu, pomkahitanno hita.
23Waneya wale pirana hyijnakoxinixka phuru, hwamonuwnapotuta klu tshinanu phurupotukni.
24Waneya rexinixkalu Jesus hwamonuwnapotuxyawaka phuru, wla htshinru Jesus:
— Hi pa yaprenukananru phurune Hoyakalu pohirewaxyawaka hjihlojyawakapna!
25Kyapreru camelo tsapujripna hjihlojyawaka seyni wane yohnik-yapren-potu phuru Hoyakalu pohirewaxyawaka hjihlojyawaka.
26Waneya wale pirana yijnakotatshine wla tshina:
— Ha han-hixatshri hiwekkakko?
27Waneya Jesus wla tshina:
— Yine mumukatanutu, wale rumukata Hoyakalu.
28Waneya Pedro wla tshina:
— Petanu, ptowruka wuchota, pixa womkahixyawakatka.
29Waneya Jesus wla tshinna:
— Nmunanhalu ptowru yineru hipji hichotatshri, ho runro, ho ruru, ho himolene ho himolerone ho hhanunro, ho hiwhenene hichotatshri Hoyakalu pohirewaxyawaka tshinanu.
30Wale yoptotanru yohnik-potu xawakni riwejinri hiyrun-koxa xye riwejinripa hinatshri hyoptotanru riwejinri hikeklu hohne mnikawnakatupa.
Jesus Hinkaklexyawaklu Rupninri Piranapni
31Waneya Jesus hanikna kahnete doze rasruklene, waneya wla htshinatkana:
— Jerusalém poktshi nwaka wyamtanu. Wane poktshikni rakanhini ptowruka yonatkaluru tshinyawaka mitshi Hoyakalu tokanu hinkakletatshinni yonre tshinyawaka pixka Jeji Whene pirana.
32Klu tshinanu judeu mixkane renekko. Reyikko, rapnokatko, rutskahjetko.
33Hkotshipjetko waneya ruylatko. Waneya map-hohne rixinri riwekanutnaka.
34Seyni wanna hike pirana rimatjemna. Wanna rinanchixika xye pirana hiyáhoni hi rimatjematkaluna klu raluka tshinreta Jesus xye pirana tshinanu.
Jesus Mtsawa Hitskalajyawaka Piranapni
35Waneya Jericó poktshistsi rapojinixka Jesus satu mayhaletu hatnu tnumne tuplakanatatshri. Tiyiro hanjijetatshri.
36Waneya hixolune yine hjema hiknohlexinixka, repomha:
— Klunernihe?
37Waneya runkakluna mtsawa Jesus Nazaré poktshi hajeru hiknohamxyawaka.
38Hiyáhoni hyinuwaka saplewleta, wla htshinjeta:
— Jesus, phuru Davi-ni whene, petwamonutanunno.
39Waneya kosekamtatshine hiykotlu potshke rixyawaka mtsawa; seyni wale wane pnute hsaplewjepotuta:
— Phuru Davi-ni whene, petwamonutanunno hitni!
40Waneya Jesus yopkaka. Waneya ranikjixlu wale nwaka. Waneya mtsawa Jesus-stsi rapojinixka repomhalu.
41Wla htshinru:
— Klunerhe paluka nkamhiywakyi?
Waneya mtsawa hihitlu:
— Kasruklewakleru, naluk-hetletatnaka hiyrunuko!
42Waneya Jesus wla tshinru:
— Petanutka. Palixle tshinanu putskalhatka.
43Waneya waneklukawa retatka. Waneya mtsawakananu homkahitatkalu Jesus, Hoyakalu rimalwumta. Hiyrun-koxa ptowrunek-yine xye hetatshine yinuwaka himalwuretlu Hoyakalu.
Currently Selected:
Lucas 18: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
