Lucas 17
17
Hektuntshi Hiyrunu Ramtakahchinikanyehixikolu Piranapni
1Waneya Jesus wla tshinna hnurrene:
— Hi rumukata himaletkota hitspetkalurukaka hma wiywakanupa. Seyni hektumkalu wale yineru kojwakahchinikanrewatatshri!
2Kihlepotmaklu tsru sotlu rostunojixikowaka waneya mar powha ruknojikowaka hma pupjekajyawakanupna mtserkakanewa.
3Hixanuko hislahinwa! Pimwastsireru hektuwaxini punkakanru jikolukanuru rixyawaka. Rehchinikanuxinipa hamtakahchinikanuxinri rektunu.
4Sete kata rektuwyehixinipyi pa hohne tshinanu seyni sete katako rapokanwakaxinipyi wla htshininipyi: “Nehchinikanutatka”, waneya pamtakahchinikanutanru rektunu.
Halixlu Piranapni
5Waneya nuretkalune wla tshinru Jesus:
— Tsru Hixikatshriwa, ptserut-halixletanwu.
6Waneya Jesus wla tshina:
— Mostarda-tataji pso rixiniklunu halixle waneya himukata xye figueira muna wla tshinreta, mutakkotu muna, “Pkopkolijinwa. Mar powha putajinwa.” Waneyamka wane potuko rixanu.
Towrertshi Kamhalerupa Piranapni
7Waneya Jesus wla tshina:
— Hixa satkakhi htowreru hsana yochyakakanatatshri, ho campo kamrurewakanaxikatshri pantshi rapojini hixa hi wla tshinru: “Punanu ptuplatanu nikawaka yehi.” — hi htshinru.
8Hi he wla htshinhonuklu: “Nijittshi pkamhanu. Mkatshri nijittshi hikamhapi pmakatanu waneya punanu nijittshi putajinno. Nnikka pchinika nurka pchinika pinotanno. Nali niklexini tsonu pnikanu, puranu”? Hi he xawaka wlako htshinru htowreru?
9Towrertshirhe xawaka poyahnutka ruhlenu kamrure tshinanu? Hike.
10Hiyáhoni hix-koxa ptowru potuko htowuxikowaka hali kamhalexini, wla htshinanu: “Hixa towrertshinwu hike hepixatshinwu. Klu tshinanu wtowuxikolupka wkamha.”
Jesus Dez Hijirohitutatshine Rutskalajyawaka Piranapni
11Waneya wla rixatka Jesus. Jerusalém poktshi nwaka hyamxini Samaria hiyrunu Galileia tshinikowaka tshijne hyapamtatka.
12Waneyakta satu poktshi hjihlokamxinixka dez jejine hijirohitutatshine yoptotaplu. Howukako hyopkakna.
13Hsaplewatna:
— Tsru Hixikatshriwa Jesus, petwamonutanunwu!
14Jesus yijnakotna waneya wla htshinna:
— Hajewa, sacerdote-ne hekhitapinwa. Waneyatka wane hyaka pchinikna rutskalhatkana.
15Waneya satu wanna, Samaria-nerni, rexinixkawa rutskalhiywakatka, hsatoka, tsru tokantshiyma rimalwumtlu Hoyakalu.
16Waneya Jesus jixistsi hyoptsojitamta waneya hpoyahnutlu.
17Waneya Jesus wla tshinru:
— Hatshni dez-na hitskalakalune? Seyni ha pimrine nove, hanhe hyatkana?
18Klu tshinanhe xye jeji tsonu, pa neruko satoka Hoyakalu rimalwuxyawakapa?
19Waneya Jesus wla tshinru:
— Ppalnanu. Pyanutka. Putskalhatka palixle tshinanu.
Hoyakalu Pohirewaxyawaka Hapojinri Piranapni
20Waneya satkaka fariseu-ne hepomhalu Jesus hikluplu Hoyakalu pohirewaxyawaka. Waneya Jesus hihitna, wla htshinna:
— Hoyakalu pohirewaxyawaka hapojiklu hi phujetkalurupa yine yhaleya.
21Hike yineru himukata wan-tshinretlu: “Hetanu, hewitkalu”, ho “Hawlalu”. Klu tshinanu Hoyakalu pohirewaxyawaka hixa hitokote rawa.
22Waneya Jesus wla tshinatkana rasruklene:
— Rapokpapkoluxinipa hixa haluk-hetletanru Jeji Whene tshinkaluru klu papkopa yáholu pa hohnejiji. Seyni hi hetanru.
23Wla htshininiphina: “Hetanu, wanetkalu” ho “Hewiru”. Hi wane hyanu. Hi homkahitanna.
24Klu tshinanu rawrakle pixka rixanu, pa sreta hyinuwaka hawraklexini haté pa sreta hohne rapokhawrakletsatanu. Waneko pixka rixanu Jeji Whene tshinkaluru hapojinri hohnepa.
25Seyni mitshikananhapka rujhalu hsalewniywaka hiyrun-koxa ruknokko xye hohne hiwekatshine klu papko.
26Noé klu papko pixka rixanu Jeji Whene tshinkaluru hapojinri papkopa.
27Klu tshinanu ptowrunniko yinni hniknina, rurnina, hhanunrowatnina, hhanuruwatnina, Noé-ni tsro kanawatlo jihlojinriklu potukananuko. Waneya runatka hahyekachalu, ptowrunnika yinni hnikata.
28Ló tshinkalurni klu papko koxa waneko pixka rixa. Hniknina, rurnina, hmaronewatnina, rutaklewatnina, hpanawatnina.
29Ló tshinkalurni hichpajin-hohne potuko, Sodoma poktshiya wan-rixanixkana. Waneya hina pixka rixa hijrukleta tenhohneya tshitshmero hiyrun-koxa enxofre. Ptowrunnik-yinni hnikata.
30Waneko pixka rixanu Jeji Whene tshinkaluru ruphujewnin-hohnepa.
31Waneklu hohnepa katukta pantshi hoho hwatshripa, rasukhapkatanu. Hi pantshi hjihlokanu rejnunkate pantshi hwatshri rawapyawakapa. Katukta campo hwanu, hi hsatkapanu hipji nwaka.
32Hichinkapanro Ló tshinkaluru hnunroni.
33Katukta haluk-hiwekkaklexinwa, ramtaklewatanun-honuka. Katukta hamtakanru riwekle riwekanu halikaka.
34Wane ntshinhi: Wale yetshnopa hepi himumkakakatshinepni walerutu chetshiya. Satu hanikko, satupni hiknokamtkona.
35Hepi suxone trigo-ji yojitatshinepa, sato hanikko, satopni hiknokamtkona.
36Waneya rasruklene hepomhalu, wla htshinna:
— Tsru Hixikatshriwa Jesus, hanhe rakanhini xye ptshinreru?
37Waneya Jesus wla tshinna:
— Hanukta rawamanetanuna hipnatshripni wane rapatjexinna maylune.
Currently Selected:
Lucas 17: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
