Lucas 5
5
Jesus Nuretna Satkaka Rikamrurewatjenepa Piranapni
1Waneya wla rixa Jesus. Hipowha Genesaré wnahlu rawakanata Jesus. Ripxakjekanaxyawakluna yine Hoyakalu tokanu hjemyawakna.
2Waneya hepi kanawa reta, hipowha wnaha rawakanatna. Seyni kkanawaterune mariskakanatatshine hichotlo hkanawatna klu tshinanu h-tarrafa-tkakna rerokakanatna hipowha wnahaya.
3Hiyáhoni sato kanawa hpokowna Jesus, Simão tshinkaluru kanawate. Waneya Jesus hanjitlu Simão hanikajhayaka ranjiywaklu. Waneya kanawa htuplata waneya hyinuwaka hasrukletna yine hixolune.
4Waneya rali hinkaklewlexinixka, Simão htowuta, wla htshina:
— Kanawa xako tenohawaka panikanu. Waneya hiknok-tarrafa-tetanu chima hkachixyawakapa.
5Seyni Simão wan-tshinru:
— Kasruklewakleru, psol-yetshnokmaka wmariskata seyni hike wkachita. Seyni pixa tokanu tshinanu, tarraf-kaka nuknokanu.
6Waneya rali wan-hixletatkana, hix-potu chima hkachitna. Haté ruskatana h-tarrafa-tkaknina.
7Waneya repirna rutsejrihjeyehitna sato kanawa hwakanatatshine, repixyawakapna. Runna. Waneya hepi kanawa htsepotna chima haté rimxikpiratna kanawane.
8Waneya xye rexinixka Simão Pedro, hyoptsojityehitlu Jesus. Waneya wane htshinru:
— Tsru Hixikatshriwa hit-yehi pasujini klu tshinanu hitni jejno hektuntshi hwalerno.
9Klu tshinanu Simão hiyrunu pimrin-koxa himyekpotuta hixo chima hkachitanruna tshinanu.
10Tiago hiyrunu João tshinkalune, Zebedeu tshinkaluru whenen-koxa, Simão tshinkaluru hepirene himyekpotuta. Waneya Jesus wan-tshinru Simão:
— Hi ppikanu. Xawakni yine kmariskahohoklerunpatkahi.
11Waneya tshiji hyosropkaklona hkanawatkakna. Ptowruko ruknokamtatkana waneya Jesus romkahitatkana.
Jesus Hitskalajyawaklu Hijirohitutatshri Piranapni
12Waneya pa katatnaka Jesus pa poktshi hwakanatatka waneylu satu jeji hijirohitutatshri hallikanatatshri. Waneya Jesus rexiniklunu hyoptsojityehitlu Jesus tshiji rutspakhojita waneya Jesus ranjita:
— Tsru Hixikatshriwa, palujinipa pumukata hitskalakletno.
13Waneya Jesus homyokanwakatlu, hkamruklu. Waneya Jesus wan-tshinru:
— Hehe, naluka. Putskalakkatka.
Waneya waneklukawa potuko rujirhitle ramhiyatka, rutskalhatka.
14Waneya Jesus hijretlu wla htshinru:
— Petanu. Hike punkakanu seyni pyanutka. Sacerdote pekhimantapinwa putskalhinrixka. Waneya panikanru henekachalu henekawaka nwaka Moisés-ni yonreru tshinyawaka pixka pimrine himaxyawakaplu putskalhiywakatka.
15Seyni pnute hya kopalpiranretlu. Hiyáhoni hixolune yine hinanwakatlu Jesus tokanu hjemyawakna hiyrun-koxa hyeyixlena rutskalajyawakapa.
16Seyni Jesus kahnete sputa hya potshkewaka. Waneya wane ranjihohnexya.
Jesus Hiktehatshri Hitskalajyawaka Piranapni
17Waneya pa hohnetnaka Jesus hasrukakanatna. Wane koxa rawakanata satkaka fariseu-ne hiyrun-koxa satkaka yonawahlo yonha kyimakleru Jesus-stsi htuplakanatna. Ptowru poktshi pejnu runyatkana Galileia tshijneya hiyrun-koxa Judeia tshijne hajeneya. Jerusalém poktshi koxa runyatkana. Tsru Hixikatshriwa Hoyakalu himukatle Jesus-ymalu ptowru hahijewaktshi rutskalajyawaka.
18Waneya pimrine jejine hanikanwakatlu Jesus satu jeji hiktehatshri hijeko hikoluhatshri. Raluka pantshi jihlokletmakna Jesus-stsi rutajyawakamkapluna hiktehatshri.
19Seyni hixolune yine tshinanu hi rumukata hijihlokletluna hiktehatshri. Hiyahokni ranikluna pantshi hoho hwakwatatshri. Hjihmikakwatluna waneya wane swa hkosputajyaluna yoklutsayma hiktehatshri hijeko hikoluhamtatshri, hixolune yine hanikajite Jesus hojistsi rutspakluna.
20Waneya Jesus hexinri wanna halixle, wane htshinru hiktehatshri:
— Nimatletleru, pektunu puknojikatka.
21Waneya fariseu-ne hiyrun-koxa kasruklewaklerune hinanchitkaluru pirana hasruklewatatshine yinuwaka hijhahchinikanretna waneya wla htshinatkana:
— Katnihe xye jeji hektuwaka htshinanwakatlu Hoyakalu? Katu tsonhe himukata hiknokhektunutlu yineru? Satupkalu Hoyakalu tsonu.
22Seyni Jesus himathetahchinikanutna hiyáhoni ruhitna, wane htshinatkana: — Klu tshinanhe wan-hixahchinikanuta xyekaka hektutu hichinikanrethajixyawaka?
23Hanupothe kihle tshinko? Wla htshinikowaka hiktehatshri: “Pektunu puknojikatka”, ho wla htshinikowaka: “Pyotunotanu, pyanutka”?
24Seyni himatjempotuxyawakaplu Jeji Whene tshinkaluru hitakkalurutkani xye tshijiya ruknokhektunuxyawakapna yine hiyáhoni wla ntshinanru hiktehatshri:
— Pixa wane ntshinyi: Pyotunotanu, pkochtshekjekomtanu pyanutka pipji.
25Waneya waneklukawa hyotunomtatka, hkochtshekjekomtatka ptowruneko hetanu. Hipji nwaka hyatka. Rimalwumtlu Hoyakalu.
26Ptowruneka tsru himyeklu rixna. Tsru pikluyma rimalwutluna Hoyakalu. Wane htshinkakna:
— Kluneru pixkalutu weta xawakni?
Jesus Tshanixyawaklu Levi Piranapni
27Waneya wane pnute ruchpakamta Jesus, retlu satu jijhawenrukleru, Levi tshinkaluru. Htuplakanata tuplawaka hwenuxikolu hyoptoxyawakapa. Waneya Jesus wan-tshinru:
— Pomkahitanno.
28Waneya ptowruka ruknokachata, hpalnamtatka waneya romkahitlu Jesus.
Jesus Hektuneyma Nijyawaka Piranapni
29Waneyakni Levi tshinkaluru tsru niklu hkamhiylu Jesus, waleko hipjiya. Wane rawakanatna hixolune jijhawenruklerune, pimrin-koxa wannayma tuplakanatatshine nikawakakwa yehi.
30Seyni fariseu-ne hiyrun-koxa kasruklewaklerune hinanchitkaluru pirana hasruklewatatshine kahemhayehitna Jesus hasruklene. Wla htshinna:
— Kluneru tshinanhe wannayma hnika, rura wanna jijhawenruklerune, hektuneyma?
31Waneya Jesus wan-tshinna:
— Pomtalune hi haluklu kpinrewakleru seyni katshinomtalu haluklu.
32Klu tshinanu hi nuna ntshanixyawakapna kihlerune seyni hektune ntshanixyawaka rehchinikanuxyawakapna.
Hix-hohne Mnikkatu Piranapni
33Waneya satkaka yineru wan-tshinru Jesus:
— Haklu tshinanhe João Batista hasruklene hohajirewjeta, ranjihohnejet-koxna hiyrunu fariseu-ne hasruklene waneko pixka rixna seyni pasruklene nika, rurna?
34Waneya wane htshinatkana:
— Rumukata natshretnahe hnunrowlu hetatshine hnunrowatatshriymalune? Hike.
35Seyni rapokhohnexinpatka hnunrowpiratatshri hixolune hetanu hkochpakkoklunpatka. Waneklu papko halikaka rohajirewatanutkana wanna.
36Waneya satu yapkaklu pirana runkakkoxna, wla htshinatka:
— Hi kihle hipxatkolu mkatshri hitsruka herotu samayma. Wan-rixkoklunu herotu sama hiskakkakanunru tsrutsolejipni. Hiyrun-koxa hi pixkakakluni tsrutsoleji herotu samayma.
37Hi kihle tsrutsoleji mapa hitakhatkolo vinho-ha hekamhakolha. Wan-rixkoklunutka vinho-ha hipchekkakanunru sac-kakapni. Tuyokhatanuna vinho-hapni waneya sac-kaka koxapni salewnanuna.
38Seyni vinho-ha herotu, saco herotu tutakhatka.
39Hiyrun-koxa mitshikawlurha hiratshritka hi hannahatlo herotha. Klu tshinanu wane htshinna: “Mitshikawlurha halikaka kihlepotu.”
Currently Selected:
Lucas 5: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
