Lucas 7
7
Jesus Hitskalajyawaklu Soldado Chefe-te Towreru Piranapni
1Waneya rali wan-tshinretna yine xye pirana ptowruka Jesus, Cafarnaum poktshi nwaka hyatka.
2Wanekananru satu soldado-ne pohire. Htowreru ramotanru potu yeyixa. Rupnakastsitkani.
3Waneya hjempiranyehixiniplu Jesus, satkaka tsrukakalune judeu-ne hyokanata Jesus nwaka. Jesus htshanixakjixna runanwakaxiniplu rutskalajyawakaplu htowreru.
4Waneya hyanwakatluna Jesus, htshanixpotutluna wane hyiywakapa. Wane htshinatkana:
— Pujhalu wane pyiywaka klu tshinanu xye jeji hijhalu repixikowaka.
5Klu tshinanu winerune retwamonpotuta. Haté satu hanjihohnewakapji hkamhiyatkawu.
6Waneya Jesus himotsatna. Seyni hi howukatkalu pantshi, soldado-ne pohire yokanatna satkaka rimatletlene Jesus nwaka wla htshinakjixna:
— Tsru Hixikatshriwa, hi pkojwajinwa. Klu tshinanu hike kochpakatshrino nopji potuko pjihlojyawakapa.
7Hiyrun-koxa hi tsru hixikatshriwano pixa niynumsaxyawaka. Seyni pyanumanwakachatanru, ntowreru hitskalhanu.
8Klu tshinanu hit-koxa k-chefe-tno, towutkalurno. Wanepnawaka soldado-ne ntowuta. Satu wane ntshina, “pyanutka”, hiyáhoni hya. Satutnaka wane ntshinru, “puna”, hiyáhoni runanwakatno. Ntowreru koxa wane ntshininri, “xye pkamhanu”, hkamhanru.
9Waneya xye pirana hjemini Jesus, rimyeka. Waneya ruprotakyehitatkana hixolune yine romkahikanatjene. Wane htshinatkana:
— Halikaka wane ntshinhi israel-nerune tskalaya hi nexyalu xye pixkalutu halixlu.
10Waneya pantshi hsatojinixkana yokanatkalune, retluna rutskalhatka towretshri.
Hipnahnurutatshro Whene Riwekkajyawaka Jesus Piranapni
11Waneya pa hohnepka hiknohatka waneya Jesus pa poktshi hjihlokatnaka Naim tshinikowaka. Rasruklene hiyrun-koxa hixolune yine himotsamtlu.
12Hiyáhoni poktshi jihlokawakle hiphaptotestsi rapokamtatkana, ruchpakakananumtna yomletshi nwaka yatshine. Hipnatshri ranikamtna. Waleni satupkalutnixkani toturni. Hipnahnurutatshroni wala. Hixolune yine poktshi hajene himotsamtlo.
13Tsru Hixikatshriwa Jesus hexinixkalo, retwamonpotutlo. Waneya wane htshinatkalo:
— Hi ptshiyahatanu.
14Waneya rapokastsitlu. Hkamruklu rukoluhamxyawakakwa hwatshri. Waneya htunwatna hipnatshri hanikakanatatshine. Waneya wane htshinru hipnatshri:
— Makluji, pixa wane ntshina: Pyotunotanu!
15Waneya htuplata hipnapatshritka. Hyinuwaka yanumleta. Waneya runro renekka.
16Waneyakni ptowru neruka pikatka, rimalwutluna Hoyakalu. Wla htshinatkana:
— Tsru jinkaklewakleru rakanhayehikakatkawu Hoyakalu. Runa Hoyakalu hayinetene ruchokjixyawakapa.
17Waneya hpohiwata Jesus kamhaleru pirana Judeia tshijne psoluka hiyrun-koxa pimri tshijnekakaya wanestsi hwatshrikaka.
João Yokanrene Jesus Nwaka Hyiywakna Piranapni
18Waneya João Batista runkakna rasruklene xye pirana ptowruka. Waneya htomhana hepi.
19Hyokanatna Tsru Hixikatshriwa Jesus nwaka repomhiywakapluna: “Pixakatkalhe hinatshripyi tshinkaluryi ho satuklatshi wkahwakanu?”
20Hiyáhoni Jesus nwaka rapokna waneya wane htshinatkana:
— João Batista yokanatwu wepomhiywakapyi: Pixaklahe hinatshritkayi ho satuklahetshi hinanu?
21Waneklu papko Jesus hixolune yine yeyixatshine, hahijewnalkaka rutskalaka hiyrun-koxa kkamtshiterune rakajya. Hixolune mayhalene retkak-koxa.
22Waneya ruhitatkana. Wla htshinatkana João Batista yokanrene:
— Hajewa. Hinkakapanru João xye hetanrukaka hiyrun-koxa hyijnakotanrukaka. Mayhalenekananu hetatka. Myankanekananu yanatka. Hijirhitukanatatshine hitskalhatka. Majnakonekananu jema. Hipnatshine hiwekkakka. Kihle piranalu potuko hiwekkaklewatatshri pirana runkakkatkana hike mwikane.
23Poyikowatatshine hita tshinanu mutspetkanepa!
Jesus Hiphujtaxinri João Batista Pirana
24Waneya hyinixkana João yokanrene, Jesus yinuwaka João pirana hepomhaletna yine, wane htshina:
— Kluhe haluk-hetletapa? Kaptsheru kanniphalu kowchirerrahe hetapa?
25Klunerhe hetapa? Satu jeji kihleru mkatshri hitakatshrirhe hetapa? Hetanu kihleru mkatshri hitakjetatshine, kihle hiweklerunni, phurupjikaka rawna wan-hixatshine.
26Seyni kluhe mitshi haluk-hetletapa? Satu Hoyakalu tokanu hinkakletatshrirhe hetapa? Hehe, wane ntshinhi, Hoyakalu tokanu hinkakletatshinni yohnik-hijhakaluru hetpatka.
27Klu tshinanu João yonpiranyehitkalurni: “Hewitkalu nyokanreru, hinkaklewatatshri,” htshina Hoyakalu. “Wale nyokanatanu pixa hnapu. Ralpokohnapuxyawakaplu patnu hapote.”
28Klu tshinanu wane ntshinhi João Batista ptowru matutatshri yohnik-hijhakalurumkani. Wanepnawaka mujhakon-potu Hoyakalu pohirewaxyawaka hwatshine, João yohnik-hijhakalunetkani wanna.
29Waneya jijhawenruklerune hiyrun-koxa ptowrunek-yine xye pirana yijnakotatshine Potukalu htshinruna Hoyakalu klu tshinanu h-batiza-tkana João batiz-leya.
30Seyni fariseu-ne hiyrun-koxa Moisés yonreru pirana himatpotutatshine hi ralukluna João batiza-xyawakna. Hiyáhoni ruknokluna Hoyakalu halujyawaka ruchinikanreta heneklexikolmakna.
31Waneya Jesus wan-tshina:
— Kluneru pirana nyapkakletanna xye klu papko hwatshine? Kluneru pixka rixna?
32Wanna hetko mturune niktshi hanjijexikowakaswa tuplajetatshine pixka rixna. Pa sreta tuplatatshine wan-tshinna pa sreta tuplatatshine: “Wtumlejyehithi poyikowlu hima seyni hi hahsat-hixa. Kwamonuru himamka wchikaletatka seyni hi htshiyahatatka.”
33Klu tshinanu João Batista hi paõ hnika, hi vinho-ha rura seyni hixa wan-tshinru: “Waneylu kamtshi.”
34Runa Jeji Whene tshinkaluru. Hnika, rura. Seyni hixa wan-tshina: “Haha hetanu, xye jeji tsru nikalu, vinho-ha jirakleru. Jijhawenruklerune hiyrun-koxa majnakowatatshine rimatleta.”
35Seyni himatkaltshi potuknu ptowru wuhenetkalune tshinanni.
Simão Tshinkalurupji Rawakanaxyawaka Piranapni
36Satu fariseu-ne tshanixlu Jesus waleyma hnikapyawakapa. Waneya Jesus yatka fariseu-ne-pji nwaka. Waneya nikawaka htuplata.
37Waneya wale poktshi koxa twa sato suxo hektutu kamhaklero. Waneya timaxinixka Jesus fariseu-ne-pji rukoluhinixka nikawakakwa pa stono phamluhalo yehi tanika.
38Jesus tjimne tapoka hijixistsi. Ttshiyahakananumta. Tyinuwaka hihakjixletlu toktehaya. Tojiwu chehi tcheyixyalu. Tamlujixitlu. Waneya phamluhalo tuyokjixihohotlu.
39Waneya xye rexini fariseu-ne, wla htshinahchinikanuta: “Xye jeji Hoyakalu tokanu hinkakletatshri rixkamka, rimathetanmaklo katni twu suxo hanu hixatshropotni hkamrukjero. Hektutu kamhakleroni.”
40Waneya Jesus wan-tshinru fariseu-ne:
— Simão, pa pirana naluk-hinkakletanyi.
Waneya Simão wan-tshinru:
— Hehe, kasruklewakleru.
41Jesus wan-tshinru:
— Rawna hepi jejine deve-tatshine. Satu jeji tiyiro hikchiklewjexikatshri h-deve-tna. Satu quinhentos tiyiro proji h-deve-kanata, satu cinquenta tiyiro proji h-deve-ta.
42Seyni hi satukna himukata wenutletlu h-dev-rerna. Hiyáhoni wanna hepi jejine hichya-conta-techatkatka. Hiyáhoni xawakni, hanuru potu wanna hepi hichinikpotutanru ruchya-conta-techatjerna?
43Waneya Simão wan-tshinru:
— Hitaho tsru potu conta hichyachaxikalurni.
Waneya wane htshinru Jesus:
— Hehe, wane potuko ptshina.
44Waneya ruprotakyehitlo suxo waneya wla htshinru Simão:
— Petlo twu suxo. Njihlokapjityi seyni hi penekno honha nojixi herojikolu. Seyni wala hihaklu nojixi toktehaya hiyrunu tojiwu tcheyitlu.
45Napojini hi pamlutno. Seyni wala njihlokkawaka hi tucho hamlurjixitno.
46Hi nhihtshihako puyokjiwutno seyni twu suxo phamluhalo tuyokjixitno.
47Hiyáhoni wane ntshinyi, hixo tektunu tuknojikatka. Hiyáhoni tamotpotutno. Klu tshinanu wla rixa, psotsonu hiknojikaluru psotsonu ramotlewaxya.
48Waneya wane htshinatkalo:
— Pektunu puknojikatka.
49Waneya wale nikawakakwa rimwanune yinuwaka wan-tshinreta hihchinikanuyna:
— Katnihe xye haté hektuntshikaka koxa ruknoka?
50Waneya wane htshinro suxo:
— Palixle hiwekkakatkayi. Pyanutka, kihlehchinikanpatkayi.
Currently Selected:
Lucas 7: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
