Mateus 13
13
Hitaklu Tataji Jiplaljekleru Piranapni
1Wale hohne potuko Jesus hipji ruchpajyatka waneya Galileia powhastsi hyatka. Waneya htuplatatka.
2Seyni hixolune yine hapatjeyehitlu Jesus hiyáhoni sato kanawa hpokownatka htuplaxyawakapa. Waneya hixolune yine ksatuko yopkaka.
3Waneya hi heppika pirana rasrukna Jesus yapkaklu piranayma. Waneya Jesus wan-tshinna:
— Satu jitaklewakleru hichpakamta rutaklewaxyawakapa.
4Waneya ruplaljetatajixinri, pimriji hatnu hapostsi hapoktatajita waneya kochitshine nikloktatajitanruna.
5Pimriji sotlu hoho mteno tshijiwaka rapoktatajita. Waneya ruptshekhapkatamka klu tshinanu mteno tshijiwaka ruptshejya.
6Hiyáhoni ruchpajinixka tkatshi, hjimanatkalu, riprihanatka hitaklukaka hma matskinu tshinanu.
7Pimriji kona yehi hapoktatajita. Waneya konaymakananuko htseruwna hiyáhoni hkakmokanatkalu.
8Seyni hitataji kihle tshijiwaka hapokatshinetka hixolewnatka hiyáhoni satkakaji pejnu tshinanu cem-ji rawatka ho sessenta-ji ho trinta-ji rawatka.
9Waneya Jesus wan-tshinna:
— Kajnakopnahi hyijnakoxyawakapa, hyijnakotanu.
Jesus Hasrujyawaklu Klu Hyapkakleta Jiplaljekleru Pirana
10Waneya Jesus hasruklene Jesus-stsi hapoka waneya repomhaluna:
— Klu tshinanhe yapkaklu piranayma punkakletna wanna?
11Waneya Jesus wan-tshinatkana:
— Hixamka henekka himaxyawakaplu mimatyehitkotu pirana tenhohne pohirewaxyawaka pirana seyni wanna hike.
12Klu tshinanu katukta himatjemlu, Hoyakalu pnute rimatjemkakanru wale haté rimatjempotuxyawakaplu. Seyni mimatjemkatu haté rimatjemlejiji hkonanu Hoyakalu.
13Wale tshinanukni yapkaklu piranayma nasrukna. Klu tshinanu halikaka retmakna seyni hi rapkathojitna; hjemmakna seyni hi hyijnakopiratna hiyrun-koxa hi rimatjempiratna.
14Hoyakalu tokanu hinkaklewatatshri Isaías-ni wane pixka hixatshine yonyehijekanata, wane htshina: “Hyijnakotmaklu seyni hi himatjemanru; hetmaklu seyni hi himathetanru.
15Hoyakalu wan-tshina: Klu tshinanu xye yine hchinikanu hi himatjempirata; ruchyajnakotna hiyrunu ruchyayhaletna. Wane hmixkanuklunumkana, rumukata hetletmakna hiyrun-koxa rumukata yijnakoletmakna. Wanna hchinikanu himukata himatjemletamka hiyáhoni rehchinikanutanumkana numukata hitskalakletmakna.”
16Waneya pnuteko htshina Jesus:
— Seyni hihlewahchinikanyehitka hixa! Klu tshinanu hiyhale hapkathojita hiyrun-koxa hijnako yijnakota.
17Hichinikanru xako xye: Híxona Hoyakalu tokanu hinkakletatshinni hiyrun-koxa pimrine potukalunni haluk-hetletmaklu hixa hetanru seyni hi rumukatatkana; hiyrun-koxa raluka yijnakoletmaklu hixa yijnakotanru seyni hi hyijnakotluna.
18— Hyijnakotanu himatjemyawakaplu yapkaklu jiplaljekleru pirana.
19Hatnu hapostsi hapoktatajitatshri yaholni Hoyakalu pohirewaxyawaka pirana jematshri. Hjemmaka seyni hi rimatjemlu. Waneya runa Satanás kamtshi hkonyawakaplu Hoyakalu tokanu raji hitakkaluru.
20Sotlu yehi hapoktatajitatshine wannani Hoyakalu tokanu jematshine, waneklukawa potuko tsru poyikowluyma yoptotatshinetkani
21seyni pchini tsonu hwatshinepni klu tshinanu matskitni wale. Runini yahtaletlewlu ho salewaktshi Hoyakalu pirana tshinanu, ramtakanruna tokantshi hjemlerna.
22Waneya hitataji kona yehi hapoktatajitatshine wanna Hoyakalu tokanu jematshine pixkalune seyni kojwawaktshi xye hohne hajeru tshinanu ho pohirewnalu yokwire hakanhinipa, hkakmokannatkalu hiyáhoni hi hjiwatanatkana.
23Seyni kihle tshijiwaka hapoktatajitatshine wannani Hoyakalu tokanu jematshine, rimatjemluna hiyrun-koxa hjiwatanutkana: satu trinta, satu sessenta, satu cem kata pnute hjiwatna.
Kchana Yapkaklu Piranapni
24Jesus satu yapkaklu rutakatnaka, wla htshina:
— Tenhohne pohirewaxyawaka satu jeji kihleru tataji hsana jitaklewakleru pixkalutni.
25Seyni ptowru yineru himkakako pchinika, hkamnitjeru hsana hapoka waneya kchanatataji rutaka trigo-tataji hanikajiteya waneya hyatka.
26Waneya trigo hiptshejinixka, kaji rixinixka, kchana koxa hiphujewnatka.
27Waneya susanateru htowrene yanwakatlu waneya wla htshinruna: “Tsru Hixikatshriwa, hi he kihletatajiru putaka pusanateya? Ha hanhe ruchpajya xye kchana?”
28— Waneya ruhita: “Satu jeji nkamnitjeru wan-hixlu.” —
Waneya htowrene hepomhalu: “Palukluhe wopliptshexyawakaplu?”
29— Waneya ruhitna: “Hike klu tshinanu kchanaptshe hoplixini, trigo koxa hoplitanu.”
30Hetacha tseruwnaletanna wanna hepi haté ramikolu papkopa. Waneya waneklu papko nunkakanna hamatshinepa: Mitshikananhapka, hapatjetanru kchana waneya hostuptajetanru tshitshipawa hiknokanru. Wane pnute hapatjetanru trigo, rimrexikowakapji hitakanru.”
Mostarda-tataji Piranapni
31Jesus satu yapkaklu rutakatnaka, wla htshina:
— Tenhohne pohirewaxyawaka mostarda-tataji pixkalutni. satu jeji haniklo, rusanate rutaklo.
32Mostarda-tataji honukla pimri tataji kayaho mtsernurut-potu. Seyni ttseruwniniklunu wala pot-tseruwnatshroni ptowru hejnuji munaya. Hahmuna tixnawa waneya kochitshine teno yapatshine hina toplukaka hkamhachalexyawakna.
Chitshponatshri Piranapni
33Satu yapkaklu hkamhatnaka Jesus, wla htshina:
— Tenhohne pohirewaxyawaka tserutatshri pixka rixa. Sato suxo hwalu. Mapa chiwatupso trigo pahi tyapjetlu haté psolujpako chitshponatka.
Klu Tshinanhe Jesus Yapkaklewaxyawaka Piranapni
34Xyekaka Jesus yapkakluyma hinkakna hixolune yine. Yapkaklu minjeyma hi runkakna.
35Wan-rixa hakanhaleta hpoyahokajyawakapa Hoyakalu tokanu hinkakletatshrini tokanu, wla htshina mitshi: “Yapkakluyma nyanumatanu, xye tshijne hiyakotkoklunukawa yohimakanatkaluru pirana nunkakletanu.”
Jesus Hasrujyawaklu Klu Hyapkakleta Kchana Pirana
36Waneya hixolune yehi ruchpajya, pantshi hjihlokatka. Waneya rasruklene yanwakatlu, wla htshinruna:
— Puhle hinkakletanwu kchana hsana hajeru yapkakle pirana.
37Waneya wla htshinna:
— Kihletatajiru jitakakleru walekatkani Jeji Whene.
38Hsanni xye tshijne. Kihletatajiru wannakatkani Hoyakalu pohirewaxyawaka hayinetene. Kchana walekatkani Hoyakalu kamnitjeru hayinetene,
39hiyrunu hkamnitjeru walekni Satanás. Ramikowaka walekni xye tshijne nikawninri hohnepa hiyrunu hamatshine wannakni hiwejikalune Hoyakalu towrerune tenhohne hajene.
40Kchanaptshe hoplikkaluru yoxijikolu pixka rixanna xye tshijne nikawninri hohnepa.
41Jeji Whene yokanatanna hiwejikalune htowrerune tenhohne hajene rapatjexyawakapluna ptowru hitspekaklewatatshri hiyrunu hektutu kamhatshine Jeji Whene pohirewaxyawakaya.
42Waneya tshitshmero ruknokanna wane rawanu tsru tshiyahlu haskiyhiru koxa.
43Hiyáhoni potukalunetka hatajiwnanu tkatshi pixka Rurna pohirewaxyawakaya. Katukta kajnakopnapa hyijnakoxyawaka, hyijnakotanru.
Halukkaluru Yohimatkaluru Piranapni
44— Tenhohne pohirewaxyawaka satu halukkaluru yohimatkaluru campo-ya pixkalutni. Waneya satu jeji hikchijiniklunru hyohimatatnaklu. Waneya hpoyiknu tshinanu, hyatka, rimwaleru psoluka ruchankatka, wale campo ranjixyawakapa.
Pérola Piranapni
45— Hiyrunuko tenhohne pohirewaxyawaka satu kmaronewakleru tuwutu kwenuru pérola tshinkaluru hijhatshri pixkalutni.
46Satu pérola kwenur-potuko rukchijiniklunu, hyatka, rimwaleru psoluka ruchankatka wale pérola ranjixyawakapa.
Tarrafa Piranapni
47— Hiyrunukotnaka, tenhohne pohirewaxyawaka satu tarrafa pixkalutni. Hipowha ruknokkoklunutka waneya ptowru hixatshro chima hkachita.
48Katsepo rixinixka, kchimahaklerune hwanha hkochpaxyatkalona. Waneya htuplatna, hkotspalatlona. Chima kihlero chiwatu rutakanna seyni chima muhleto ruknokachatna.
49Waneko pixka rixanu xye tshijne nikawninri papko. Hiwejikalune Hoyakalu towrerune tenhohne hajene hapokanu hkotspalaxyawakapna hektutu kamhatshine potukaluneya.
50Waneya tshitshmero ruknokanna hektutu kamhatshine tsru tshiyahluyma raskiyhixyawakna koxa.
Jesus Hasruklewle Herotu Hiyrunu Rasruklewakanaxyawaka Piranapni
51Hiyáhoni Jesus hepomhana rasruklene, wla htshinna:
— Xye piranakaklahe himatjematka?
Waneya ruhitluna:
— Hehe.
52Waneya Jesus wan-tshinna:
— Ptowru Moisés hiykole yonatkaluru hasruklewatatshri tenhohne pohirewaxyawaka himatyehitatshri satu kapjiru pixkalutni. Kapjiru pantshi hejnu herotu hiyrun-koxa hejnu tsrutsoleji himretawaka hkochpajyalu.
Jesus Nazaré Poktshi Rawyawaka Piranapni
53Xyekaka yapkaklu pirana rali hinkaklexinixka, pnute hya.
54Waneya Jesus htseruwniywaka poktshi Nazaré tshinikowaka rapokatka. Hyinuwaka hasruklewleta hanjihohnewakapjiya. Waneya ptowruneka himyekahchinikanuta. Waneya repomhakakna:
— Hanhe ruchpajya rimatkalnu hiyrunu pixkontshi hetkalurkaka hkamhiywaka?
55Hi he hahmuna chpatako kamruretakleru José tshinkaluru whenni wale? Hi he Maria tshinkalurokni runro hiyrunu repurune Tiago, José, Simão hiyrunu Judas tshinkalune?
56Hi he hewi wimwana repurone? Hiyáhoni hanhe rukchijyalu xyekaka himatkalewlu hiyrunu pixkontshi?
57Wale tshinanu hike hijhatkalu Jesus. Seyni Jesus wla tshinatkana:
— Satu muphujewnakatuwa pirana hinkakletatshri kahwakpiratka ptowruchayaka seyni waleko htshijneya ho waleko himolene tsonuyma hi hkahwakpiratka.
58Hiyáhoni hi hixo hetkalurkaka hkamha Jesus wale poktshiya hmalixlenna tshinanu.
Currently Selected:
Mateus 13: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
