Mateus 14
14
João Batista Hipninri Piranapni
1Waneya phuru Herodes, Galileia tshijne pohire, hjemyehitlu Jesus kamhajekanatanru pirana,
2waneya wla htshinatkana htowrene:
— Xyekni hetko João Batista-ni; hipuktshi riwekkajikatka! Wale tshinanu tsru kpixkonru xawakni.
3Wane htshina klu tshinanu Herodes preso rutakjixniru João-ni, rostukjixniri waneya preso rutakniru Herodes repuru Filipe hnunrotakanatanro Herodias tshinkaluro tshinanu.
4Klu tshinanu João-ni mitshi wan-tshinatkalu Herodes hinanchitkalurni pimwiywaklo.
5Herodes-mka haluk-hiylaletniru João-ni seyni hpikna yine klu tshinanu yine kahwakniru satu Hoyakalu tokanu hinkakletatshrini.
6Seyni Herodes hohneru tshinanu Herodias tshinkaluro hchitsho hahsata wanna hanikajite waneya Herodes hikchikhihlenupotutlo.
7Tpoyikoxyawaklu tshinanu runkaklexyalo kluneruktako tanjitanu renekanro.
8Waneya tunro hanjijixlo wla ttshinyawaka:
— Xawakni potuko hewi penekanno prato-tlo João Batista jiwu.
9Waneya phuru wamonuwahchinikanuta tanjixyawaklu tshinanu. Seyni runkaklexyalo htshanixlene hetanu tshinanu, renekjixatkalo.
10Htowrene hyokanata hkastaknojixyawakapluna João-ni preso yehiya.
11Waneya makloji nwaka João-ni jiwu prato-tlo ranijyana waneya tunro yehi taniklu.
12Waneya João-ni hasruklene hapoka ranikmanetatkaluna. Hkapnatatkaluna. Waneya runkakapatkaluna Jesus.
Jesus Hixolune Yine Rohluxyawaka Piranapni
13Waneya xye pirana hjemini, kanawa hpokowna kahnete poktshiri hya rapaluchaxyawakapa. Seyni hixolune yine jempiranyehitlu wane hyiywakapa hiyáhoni poktshikaka ruchpajyatkana, tshijiko romkahixyaluna.
14Waneya ruptejinixka Jesus, retna hixolune. Retwamonutatkana rutskalakna ptowruneko yeyixatshine.
15Waneya kayi rixinixka Jesus hasruklene hapyehitlu. Wane htshinruna:
— Kayixkani hiyrunu hewi wwiywaka kahnete poktshirni. Pyokanatanna yine hixolune poktshikaka nwaka hyiywakapna rukchijyawakapluna hnikanrupna.
16Waneya Jesus wla tshinna:
— Hi rujhaluna hyiywakapna, hixa henekanna hnikanrupna.
17Waneya ruhitna:
— Nijittshi wimwalerutka cinco pão hepi chima tsonu.
18Waneya wane htshinna rasruklene:
— Hita nwakatshi hanikanru.
19Waneya htuplakjixna ptowruneka peklomta hoho. Waneya Jesus kochtsheklu cinco pão, hepi chim-koxa. Tenhohne hyihata hpoyahnutlu Hoyakalu. Waneya hjiknajrotlu pão. Rasruklene reneklu waneya hixolune yine rapsatna rasruklene.
20Waneya ptowruneko nikatka. Jinanutkana. Waneya hkochtshekluna pão-ni hixetatshrini, chim-koxni, doze chiwatu htsepotana.
21Nikatshine pejnu cinco mil jejine, suxone mturune hi hitakyahokka.
Jesus Honha Hoho Hyanamxyawaka Piranapni
22Waneya Jesus hixolune yokanatka pchinika hkosekjixna rasruklene pa sreta powha hkopruhaxyawakapna kanawaya.
23Hixolune rali yokanrexinixka Jesus, walepka himriji hya ranjihohnexyawakapa. Kayi rixinixka wale tsonu wane hwakanata,
24seyni kanawa hownahatkalo hiyrunu tsru kanniphalu satkajyawaklo tshinanu tenoplojhalu yotkajimtlo kanawa.
25Waneya hoprikako Jesus yanwakatna rasruklene, tsru powha honha hoho hyanamta.
26Rexiniklunruna Jesus honha hoho hyanamxyawaka, hpikpotuthonukna. Tsru pikluyma wla htshin-saplewletna:
— Samentshitkani!
27Seyni waneklukawa potuko Jesus wan-tshinna:
— Hixkohchinikanuphi, Hitni! Hi hpikanu.
28Waneya Pedro wla tshinru:
— Tsru Hixikatshriwa, pixa rixini halikaka, ptomhanno pixa nwaka nyiywakapa tsru powha honhamta hoho pyanakjixanno.
29Waneya Jesus wan-tshinru:
— Punanu.
Hiyáhoni Pedro honha hoho yinuwaka yanwaklexyalu Jesus.
30Seyni hixko nniphalu hjeminixka, hpikatka, hyinuwaka himxiklemtanatka waneya wla htshin-saplewleta:
— Tsru Hixikatshriwa, pepixanno nmahyejyawakanupa!
31Waneklukawa potuko Jesus homyokanwakatlu Pedro, hkachitlu. Waneya Jesus wla tshinru:
— Pixa pso halixle jijiryi! Klu tshinanhe putuk-munanhaletno?
32Waneya kanawa hyohrejinixkana, kanniphalu hitukamtatka.
33Waneya rasruklene kanawa hwakanatatshine yoptsojityehitlu Jesus. Wla htshina himalwuretluna:
— Pixni halikaka Hoyakalu Whenyi!
Genesaré Tshijne Rawyawaka Jesus Piranapni
34Waneya rali kopruhalexinixkana, Genesaré tshijne rapokna.
35Waneya wale tshijne hajene himathetatkalu Jesus hiyáhoni hpohitatkaluna Jesus hapojyawaka pirana wale sreta psoluka. Yeyixatshine ptowruneko ranikanwakatluna
36hiyrunu ranjipotutluna yeyixatshine hyotnejyawakluna Jesus mkalustsipto waneya katukta yotneklu rutskalhatka.
Currently Selected:
Mateus 14: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
