Mateus 21
21
Jesus Jerusalém Poktshi Jihlojyawaka Piranapni
1Waneya Jerusalém poktshi rapokpiraxinixka, Betfagé poktshi rapokastsixinixka, himriji Oliveiras tshinikowakastsi, hyokanatna hepi rasruklene.
2Wla htshinna:
— Poktshi pnute hajeru nwaka hyanu. Waneya chinpotukawa hyoptotanro jumento tsatkaluro towheneymaluto. Hichotanna wanna, hanikanna wkata.
3Seyni satu yineru hepomhiniphi haklu wla himixa waneya wla htshinanna: “Kasruklewakleru haluklu.” Ritshitanhi chinpotukawa wkata hanikanna.
4Xye ptowruka wan-hixa, hpoyahokajyawakaplu ptowruka htshinyawaka Hoyakalu tokanu hinkakletatshriya:
5“Wla ptshinanna Jerusalém hajene: Haha hetanru, hixa hpohire hinanwakathi mayohotu jumento yapatjitatshri, jumento whene jumento whenenni.”
6Waneya hyatkana Jesus yokanrene ptowru hyokanaxyana hkamhana.
7Waneya rasruklene Jesus nwaka ranikluna jumento hiyrun-koxa jumento whene. Waneya himkalna jumentonetji hoho rutakna. Waneya Jesus himkalna tuplahohota.
8Hixolune yine koprakamkata hatnu hapo, hiyrunu pimrine hahmuna chehi hatnu hapo hitaka.
9Waneya kosekamtatshine hiyrunu hapkatamtatshine saplewamta:
— Himalwutkalurni Phuru Davi-ni whene! Kihlehchinikanuru hinatshri Tsru Hixikatshriwa pixkonuyma. Himalwutkalurni Hoyakalu tenhohne pnut-tennu hajeru.
10Waneya Jerusalém poktshi hjihlojinixka Jesus, ptowru yine wane hajene kaheknanuwata, repomsakakna:
— Katnihe xye jeji?
11Waneya hixolune rimotsane wla tshina:
— Xyekni Jesus, Hoyakalu tokanu hinkakletatshrini Nazaré poktshi Galileia tshijne hajeru.
Jesus Hoyakalupji Rapkapyawaka Piranapni
12Waneya Hoyakalupji hjihlokamta Jesus. Hyinuwaka maleka yokanretna hichanrewatatshine hiyrun-koxa maronewatatshine. Tiyiro proji hipekotatshine mesa-kaka hiyrun-koxa kamowa henekachalu tshinanu hichanretatshine tuplawakkaka hyotkakatka.
13Wla htshinna:
— Wla htshina yonatkaluru Hoyakalu pirana: “Nopji hanjihohnewakapjini.” Seyni hixa katshowhurune hwiywaka hkamhiyatkalu.
Jesus Hasruklewaxyawaka Hoyakalupjiya Piranapni
14Waneya Hoyakalupji mtsawane hiyrunu myankane yanwakaxyalu Jesus waneya rutskalhatkana.
15Seyni tsru hixikatshinwa sacerdote-ne hiyrun-koxa kasruklewaklerune hinanchitkaluru pirana hasruklewatatshine rexinixkaluna hixo hiyakolukaka hkamhiywaka hiyrunu hjemna mturune Hoyakalupji hwatshine wla tshin-saplewjeretatshine:
— Himalwutkalurni Phuru Davi-ni whene!
Hiyáhoni rahkaluna Jesus.
16Waneya repomhaluna Jesus:
— Pjemnahe mturune tshinyawaka?
Jesus hihitna:
— Hehe, njemna. Hi he het-yonhatlu yonatkaluru potukalu wla tshinatshri: “Pyanumkakanna mturune hiyrunu hematlune himalwuru kihlewak-potuko htshinyawakna.”?
17Waneya ruknokamtna, Betânia poktshi hya rumjiywakpatka.
Figueira Piranapni
18Waneya yetshpotukawa, Jesus Jerusalém poktshi satokamtawa, hnatshita.
19Waneya satu figueira-muna reta hatnu hapostsi hwatshro seyni hi kasahlu, hisurkaka tsonu reta. Waneya wla htshinru:
— Hikeklu hohne psahiwatanutnaka!
Waneya waneklukawa potuko riprihanatka.
20Xye rexinixkana rasruklene, rimyekahchinikanpotutna. Waneya repomhaluna:
— Hanhe rixa chinpotu hiprihletanatka figueira-ni?
21Waneya Jesus hihitna, wla htshinna:
— Halikaka ntshinhi, halixinipa hiyrunu hi hmalixlenu hmixkanuklunupa, hi xyepka nkamhaleru pixkalutu himukata kamhaleta seyni hixa himukata wla tshinretkoxlu himriji: “Ppalnanu mar powha puknojinwa.” Waneyamka wane potuko rixanu.
22Halixinri hanjireru hanjihohneruya hyoptoxyawaka, hyoptotanru.
Jesus Tsru Potu Hitakkalurni Piranapni
23Waneya pa hohne Jesus Hoyakalupji jihloka, waneya yine rasrukakanatka pchinika, tsru hixikatshinwa sacerdote-ne, hiyrun-koxa tsrukakalune judeu-ne hapokanwakatlu. Waneya repomhaluna:
— Punkakanwu hanhe ruchpajya ptowutjeru xyekaka pkamhiywaka? Kathe henekyi xye tsru hitakkaluru?
24Waneya Jesus wan-tshin-hihretna:
— Hit-koxa satu hepomhalu nixanhi hixa. Hihixinri xye, hit-koxa hinkakanhi hixa katu henekno xye tsru hitakkaluru xyekaka nkamhiywaka.
25Ha João h-batiz-lewaxyawaka? Hanhe ruchpajya htowutjeru, ho Hoyakalu ruchpajya ho jeji ruchpajya?
Waneya hyinuwaka hiynumsakakletna wannakakluko. Waneya wla htshinkakna:
— Wla wtshininri Hoyakalu, waneya repomhanunwu: “Haklu tshinanhe hi halixlu João-ni?”
26Seyni wla wtshininri jeji ruchpajya htowutjeru, nyi hixolune yine wpikanu. Klu tshinanu ralixluna João-ni Hoyakalu tokanu hinkakletatshrini rixyawaka.
27Wale tshinanu wanna wla tshina hi hima rimatna hanu ruchpajyatka wale towuwlu. Hiyáhoni Jesus wla tshinna:
— Hit-koxa hi hinkakanhi hanukta ruchpajya xyekaka ntowuxijeru.
Hepi Wheneru Piranapni
28— Xawakni, kluhe hikchika hixa? Satu jeji hepi whenru. Hyanwakatlu tsrujru waneya wla htshinru: “Noturu, xawakni pkamrurewatanu nusanate uva-chaya.”
29— Waneya ruhitlu ruru: “Hi jmerno.” Seyni xekoyaka hyokmanahchinikanutatka, uva-cha hyatka.
30— Waneya rurna waneko pixka rixa towutletlu hituru hepurtshi. Seyni wale wan-tshinru ruru: “Haté wuya, papa.” — Seyni hi wane hya.
31Waneya Jesus hepomhana tsru hixikatshinwa sacerdote-ne hiyrunu judeu-ne tsru hixikatshinwa, wla htshinna:
— Hanurhe kamhalu ruru halujyawaka?
Waneya wla htshinruna:
— Hituru tsrujru.
Hiyáhoni Jesus wla tshinna:
— Jijhawenruklerune hiyrun-koxa kapoklewaklerone Hoyakalu pohirewaxyawaka jihlokanu hixa hkosejinna.
32Klu tshinanu João Batista-ni hinyehithi rekhixyawakaplu powraxikowaka pirana seyni hixa hi halixatkalu. Seyni jijhawenruklerune hiyrun-koxa kapoklewaklerone halixatkalu. Waneya yáholu hexinixkalu ralixlena seyni hi hehchinikanutatka halixyawakaplu.
Hsana Kamrurewaxikatshine Piranapni
33— Hyijnakotanru satu yapkaklu pirana: Pa kata satu jitaklewakleru hitaklu uva-cha. H-cerca-tetlu, hiyrun-koxa hjitotlu uva katsrekjexikowaka vinho-ha hkamhiywakapa hiyrunu satu tenopjiru uva-cha hislahikowakapji hkamha. Waneya hsana hislahatshine renekamta. Waneya pa tshijne howuka hya.
34Waneya rapokpapkoluxinixka ramikolu, jitaklewakleru yokanatlu satkaka htowreru hyoptoxyawakaplu hitaklucha hislahatshine nwaka psoji jitaklewaklerunupa.
35Seyni hitaklucha hislahatshine kachitna htowrene, satu hkotshipjetluna, satni ruylatna waneya mapa rixinri htowreru hsotlujetanatkaluna.
36Waneya pimrine htowrene hyokanata mitshikananu hyokanatanune yohnika seyni wanna koxa waneko pixka rixkana.
37Waneya hnikawnaletka hituru potuko hyokanatatka. Wla htshina: “Wale hetko hkahwakpiratanna.”
38Seyni rexinixkaluna hitaklucha hislahatshine, riynumsakakna wannakakluko, wla htshinna: “Ha xyekni jitaklewakleru whene. Hayeri wuylateru. Waneyakni ptowruka ruru henejyamkaplu hixanpatka!”
39— Hiyáhoni hkachitluna kahnete ruknokluna hitaklu mwiywakanu. Waneya ruylatanruna.
40Hiyáhoni klunerhe hkamhinna jitaklewakleru rapojiniklunupa?
41Waneya ruhitluna:
— Runanu ruylatanunna hektune hitaklucha hislahatshinepni. Waneya pimrineko hitaklucha hislahatshine renekanu ramikolu papko hitaklu psoji renekjenepatka.
42Waneya Jesus wla tshinna:
— Hi he Hoyakalu pirana hexyalu xye pirana? Wla htshina: “Sotlu kpanawaklerune malukkotu rikahwakluna hepixlewatatshri potukni, psolupjiko poyehitatshrini wale. Tsru Hixikatshriwa kamhalerni hiyáhoni kihle potuklu hixa hetanuya.”
43Hiyáhoni wane ntshinhi:
— Hoyakalu pohirewaxyawaka hixa hkonka, waneya pa neru renekko Hoyakalu halujyawaka kamhatshinepa.
44[Katupnikta xye sotlu hoho hijrukanuna rumlokanuna. Hiyrun-koxa katupnikta xye sotlu hapokhohotanu, hipahi tsonunapni.]
45Waneya fariseu-ne hiyrun-koxa tsru hixikatshinwa sacerdote-ne jeminixkalu Jesus, rimatluna Jesus kamnitna yapkaklu piranaya runkakletleru.
46Raluka kachretmakluna Jesus seyni hpikna yine klu tshinanu hkahwakluna Hoyakalu tokanu hinkakletatshri rixyawaka.
Currently Selected:
Mateus 21: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
