Mateus 23
23
Jesus Hinkaklexyawaklu Fariseu-ne Hiyrunu Hinanchitkaluru Tokantshi Hasruklewatatshine Piranapni
1Waneya Jesus wla tshinatkana rasruklene hiyrun-koxa hixolune:
2— Kasruklewaklerune hinanchitkaluru pirana hasruklewatatshine hiyrun-koxa fariseu-ne rawyana tsru towuwlu runkaklexyawakluna Moisés yonreru pirana.
3Hiyáhoni hixa yijnakotanna homkahitanna ptowru htshinyawakhina. Seyni hi wanna pixka hixanu klu tshinanu htowuxyawakna hi hkamhana wanna.
4Hatatjewa yine tsru hinolu rutjijixna seyni wanna hi hepixna rutjixyawaklu hinolu, hi pamyojiymakna repixna.
5Ptowruka hkamhanruna yine hexyawaklu tshinanu hkamhaluna. Hoyakalu tokanu yonatkaluru yonha paji htserutjetna. Xye pajkaka himkalna rostutna yine hexyawakaplu. Himkalna hyokakluna chichyoha samalu. Waneko pixka rixna ptowru potuko hkamrureyna Hoyakalu romkahpotuxyawakna hkahwajikolupna.
6Ralukpotutluna kihleru niklur-yeh-potuko htuplaxyawakna hiyrun-koxa rujhaluna tuplawaka tsru hixikatshriwa tuplaxyawaka htuplaxyawakna ptowru hanjihohnewakapjiya.
7Rukchikhihlenutluna ralijikowakna hixowaka hetanu hiyrunu kasruklewakleru htshinikolna yineya.
8Seyni hixa hi kasruklewakleru htshinko klu tshinanu satupkalu pasrukjeru hiyrun-koxa hixa ptowrunekhi moletkakatshinhi.
9Hiyrun-koxa hike xye tshijne hajeru hiru htshinanu klu tshinanu satupkalu Puru, tenhohne hwatshri.
10Hi koxa kasruklewakleru htshinkakanu klu tshinanu satupkalu pasrukjeru, Cristo tshinkaluru.
11Hijhakalur-potni hixkakluko yehiya ptowutkoluya.
12Klu tshinanu katukta kahwakpiratkaluru hitajinwa, malukkotu rutakko wale. Seyni malukkotu hikahwajikatshriwa, hkahwakpiratka wale.
Jesus Hikolukna Fariseu-ne Hiyrunu Hinanchitkaluru Tokantshi Hasruklewatatshine Piranapni
13— Hapnokatkalunephi kasruklewaklerune hinanchitkaluru pirana hasruklewatatshine hiyrun-koxa fariseu-ne, hixachatatshinhi! Hixa himaletna tenhohne pohirewaxyawaka jihlokpiratatshine. Hi hixako jihloklu. Hiyrun-koxa wane jihlokpiratatshine himaleta.
14[Hapnokatkalunephi kasruklewaklerune hinanchitkaluru pirana hasruklewatatshine hiyrun-koxa fariseu-ne! Hipnahnurutatshrone hkonahejnunkatetna. Wanepnawaka hohanjihohneru rixjetna kihleru hkahwajikolupna. Seyni wanepnawaka tsru hapnokatlu rixkona.]
15— Hapnokatkalunephi kasruklewaklerune hinanchitkaluru pirana hasruklewatatshine hiyrun-koxa fariseu-ne, hixachatatshinhi! Psol-tshijne hyapa hixa, yáholu tshijiko yáholu mar powhako hyapa, judeu halixlewle halixkajyawaklu yineru waneya satu yineru halixiniplu htokanu, hixa hsalewninri hepi kata pnute hkayatanru tshitshmero.
16— Hapnokatkalunephi hixa mayhalenni kosekatshinephuthi! Klu tshinanu wla htshina hasruklewleta: “Satu yineru Hoyakalupji hiwaka hmunanhiniklunutka, hi rujha kamhaletatkalu htokanu htshinakanaxyawaka. Seyni satu yineru ouro Hoyakalupji hajeru hiwaka hmunanhiniklunutka, rujha kamhaletlu htshinyawaka.”
17Jipukalhi, mayhalenhi! Hi he himata Hoyakalupji potu hijhakaluru ouro walepji hajeru yohnika? Ouro Hoyakalupji hajeru kotspalatka Hoyakalu kamrure tshinanu.
18Hiyrunu wla koxa htshina hasruklewleta: “Satu yineru altar hiwaka hmunanhiniklunutka, hi rujha kamhaletatkalu htokanu htshinakanaxyawaka. Seyni satu yineru henekachalu hmunanhiniklunutka, rujha kamhaletlu htshinyawaka.”
19Mayhalene pixkalunhi! Hi he himata altar potu hijhakaluru henekachaluru yohnika? Henekachlu altar hoho rawyawaka tshinanu tsonu Hoyakalunutkani henekachlu.
20Wale tshinanu satu yineru altar hiwaka hmunanhini, altar hiyrun-koxa henekachlukaka altar hoho hwatshri hmunanha.
21Hiyrun-koxa satu yineru Hoyakalupji hiwaka hmunanhini, Hoyakalupji hiyrun-koxa walepji hajeru hmunanha.
22Hiyrun-koxa satu yineru tenhohne hmunanhini, Hoyakalu tuplawakle tskihi hiyrunu wale hoho tuplatatshri koxa hmunanha.
23— Hapnokatkalunephi kasruklewaklerune hinanchitkaluru pirana hasruklewatatshine hiyrun-koxa fariseu-ne, hixachatatshinhi! Hixa henekjetlu Hoyakalu haté phamlu sureru, hortelã, erva-doce hiyrunu cominho tshinkaluru décima psojite. Seyni hi hkamhalu Moisés yonreru pirana hasruklewlukaka hijhakalur-potu, potuknutshi hchinikanni, hetwamonrewlu hiyrun-koxa halixlewlu. Xyekaka hijha kamhaleta halikaka seyni pimrine xako hi hichotanu.
24Mayhalene kosekatshinhi! Hirhalerumka hixirijyalo yosla hma niklojyawakaplu seyni camelo hnikloka.
25— Hapnokatkalunephi kasruklewaklerune hinanchitkaluru pirana hasruklewatatshine hiyrun-koxa fariseu-ne, hixachatatshinhi! Hixa herokalu copa stono prat-koxa maleka sreta tsonu. Seyni hitoko hixa hinanwaka katsephi hahnanuwlu, sotanuhonutshi koxa.
26 Fariseu mayhaletyi! Mitshikananhapka ppowratanru copa stono prat-koxa hitoko sreta, roho hajer-koxa powra rixyawakapa.
27— Hapnokatkalunephi kasruklewaklerune hinanchitkaluru pirana hasruklewatatshine hiyrun-koxa fariseu-ne, hixachatatshinhi! Kapnatkalunenatka pixkalunhi. Hixa yomletshi sahatkaluru pixka hixatshinhi. Maleka sreta kihleylu seyni hitoko katseplu hipnatshri hapu hiyrunu ptowru hixatshri posuru.
28Hixa waneko pixka hixa. Maleka sreta yine hexyawakhi potukalune phuthi seyni halikaka hixachatatshinhi, hektuwaka kamhatshinhi.
29— Hapnokatkalunephi kasruklewaklerune hinanchitkaluru pirana hasruklewatatshine hiyrun-koxa fariseu-ne, hixachatatshinhi! Klu tshinanu Hoyakalu tokanu hinkakletatshinni yomle hkamhajeta hiyrunu hihlejetlu potukalunni yomlekaka.
30Hiyrunu wla htshinna: “Ha hixako wiwekamka wutsrukatenniklu papko, himka wepixa hiylatanna Hoyakalu tokanu hinkakletatshinni.”
31Wan-hixa hiphujetlexnawa Hoyakalu tokanu hinkakletatshine hiylatatshine klopichanhi.
32Hiyáhoni hnikata kamhaletanru hitsrukatenni yinuwaka kamruretanru.
33Hixa himnu kamaklewatatshri pixka hixatshinhi, himnunerunhi. Hanhe hixa hasuklexinri salewaktshi nwaka hikolukanuwnayehixikolupa?
34Hiyáhoni wane ntshinhi nyokananwakatanhi hinamtatshri pirana hinkakletatshine, jimatkalerune hiyrun-koxa kasruklewaklerune hinanchitkaluru pirana hasruklewatatshine. Hixa satkaka wannapni hiylatanu, satkakapni cruz hitakko, pimrinepni hkotshipjetanu hanjihohnewakapjiya hiyrunu pa poktshi pejnukananu hkamnixinna pimrinepni.
35Wale tshinanu hixa hapnokatko ptowruneka hiylatkalunni hike mixkanni tshinanu. Abel potukalni hiylaxikoluklu haté Zacarias, Baraquias tshinkaluru whene, honnira Hoyakalupji altar yehi hwatshri hanikajiteswa ruylaxikana.
36Hehe, halikakni nyi hiwekatshinewa rapnokatkona xyekaka hiylalewlu hkamhale tshinanna mitshikawa hiwekatshinni.
Jesus Wamonuwniywaka Jerusalém Tshinanu Piranapni
37— Jerusalém, ha Jerusalém! Puylajetna Hoyakalu tokanu hinkakletatshine hiyrunu pimrinni pixa nwaka hyokanatanunni Hoyakalu psotlujeta! Hixo katmaka naluka sapriklethi ho kapolethi patlapa tapatjewhenexini pixka! Tomeji hpuko tutajinna pixka. Seyni pixa hi hitshitno.
38Hetanru, xawakni hipji hichotkotka.
39Halikaka ntshinyi hi hiyrunu petanutkano haté wla ptshininipa: “Hoyakalu hihlewahchinikanutlu Tsru Hixikatshriwa Hoyakalu hiwaka hinikatshri.”
Currently Selected:
Mateus 23: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
