Mateus 25
25
Dez Maklojine Piranapni
1— Hiyáhoni tenhohne pohirewaxyawaka dez maklojine pixka rixanu. Maklojine lamparina hanikatshrone hichpakamta hyoptoxyawakapluna hnunrowpiratatshri.
2Cinco-na kahchinikanurone hiyrunu cinco-na mahchinikanune.
3Waneya mahchinikanune lamparina hanikamta seyni hi ranikluna óleo-ha.
4Seyni kahchinikanurone hanikamtlu lamparina pa stono óleo-haymakananuko.
5Waneya hnunrowpiratatshripa mapokhapkatkanuklunupa hiyáhoni maklojine hixapnewatatka, rumkatkana.
6— Hanikaj-yetshno rixinixka, hjemka sapletshi wan-tshinatshri: “Hnunrowpiratatshripatkani! Hichpakanu hyoptoxyawakaplu!”
7— Waneya ptowroneka maklojine hiyokatka, ruhlepokotluna h-lamparina-tna.
8Waneya mahchinikanune wla tshinatkana kahchinikanurone: “Wuya, psojha óleo-ha henekanunwu klu tshinanu w-lamparina-te hiwnapiratatka.”
9Seyni kahchinikanurone wla tshinna: “Ha hike! Klu tshinanu pa katako hi hpoyahotanu hixako w-lamparina-te tshinanupa hiyrunu hixa h-lamparina-te tshinanu. Seyni óleo-ha halujinipa, hanjitapanru.”
10— Seyni óleo-ha ranjitapkako pchinikna hnunrowatatshripa hapokatka. Waneya maklojine halpokokanatatshrone hnunrowatatshripayma hjihlokna hnunrowlu nikle yehi. Waneya ruchyahiphaptotetkatka.
11— Howukchini mahchinikanune hapokatka. Waneya wla htshinna: “Tsru Hixikatshriwa, Tsru Hixikatshriwa, pkotpukyehitanunwu.”
12— Seyni wla htshinna: “Halikaka ntshinhi, hi nimathethi.”
13— Hiyáhoni hkakonjetanmaklu klu tshinanu hi himatlu hihohne, hi hipapkoko runinripa Jeji Whene.
Cinco Ouro Proji Yapkaklu Piranapni
14— Hiyrun-koxa satu jeji pa tshijne yatshripa pixka rixanu tenhohne pohirewaxyawaka. Mitshikananhapka htomhanna hkamrurewkakjetanune htowuxyawakapna rejnunkate rinoxyawakapna.
15Waneya satu towrertshi cinco proji reneka, satu hepi proji reneka, satu pa projipka reneka. Satkaka rumukaxyawakna renekna. Waneya hyatka.
16Waneya chinpotukawa cinco proji yoptotatshri halimta, htiyiroteyma rikamrurewatlo waneya cinco proji hkayatatka.
17Hiyrun-koxa hepi proji yoptotatshri waneko pixka rixatka, waneya hiyrunu hepi proji hkayatatka wale.
18Seyni pa proji yoptotatshritka, hyatka, tshiji hjitota, hyohimaxyalo tiyiro htowutjeru henejyalu.
19— Howukchini hpohirna satkapatka, ruhlepokotlu hkamrurna htowutamtanuneyma.
20Cinco proji yoptotatshri hiyrunu cinco proji ranika waneya wla htshina: — “Tsru Hixikatshriwa, petanu, cinco proji penekamxyano dez ouro-tkalo.”
21— Waneya rutsrukate wan-tshinru: “Hikamturu pkamrure! Kihleru towrertshiyi poyahokakatshriyi. Pixa psotsonuyaka kihle kamrure pixle tshinanu tsru kamrurtshi koxa penekka. Punanu hitayma ppoyikowatanu.”
22— Waneya hepi proji yoptotatshri koxa yanwakatlu htowutjeru, wla htshinru: — “Tsru Hixikatshriwa, petanu hepi proji penekamxyano quatro ouro-tkalo.”
23— Waneya rutsrukate wan-tshinru: “Hikamturu pkamrure! Kihleru towrertshiyi poyahokakatshriyi. Pixa psotsonuyaka kihle kamrure pixle tshinanu tsru kamrurtshi koxa penekka. Punanu hitayma ppoyikowatanu.”
24— Waneya pa proji yoptotatshri hapokatka, wla htshina: — “Tsru Hixikatshriwa, nimatyi pix-honra jeji menekachalewakletyi. Mutakatúkoyi hamlu. Yineru pimrine hitakle hapatjetatshri pixka pixa.
25Hiyáhoni npikatka, nalimtatka, tshiji nyohimaxyalo proji tiyiro. Haha xyetkani ptiyirote.
26— Waneya wla htshinru: “Hektutu towrertshiyi mmeretu. Pimatnohe jeji menekachalewakletu nixyawaka? Nma mutakanutuko namyawaka hiyrun-koxa nma muplaljetanutuko napatjeta?
27Haklu tshinanhe hi banco putaklo ntiyirote tatskoxyawakapa? Wane pixkamka napojinitka nyoptotanmaklo tiyiro tsroyakalotka.”
28— Waneya wla htshina: “Hkonanru ouro proji nenekamxyalu. Dez proji ouro himwatshri henekanro.
29Klu tshinanu tsru himwatshriko pnute renekko wane yohnika. Hiyrun-koxa hike mwikatu seyo rimwalerujiji hkonko.
30Maleka sreta mapchahawaka hiknokanru hektutu towrertshi tsru tshiyahlu haskiyhiru yehi.”
Hoyakalu Hikolukanuwnajixle Hohnepa
31— Jeji Whene ruphujewnin-hohnepa, royaknuyma runanu hiyrunu hiwejikalune htowrene tenhohne hajeneymalu. Phuru tuplawakle htuplatanu rukolukanuwniywakapa.
32Wale hetanuya rapatjetanu ptowru yineru xye tshijne hajene waneya carneiro hinotatshri kotspalaxyawakna carneiro-ne bode-yma pixka rix-kotspalletanna yine.
33Carneiro pixkalune (wannakatkani potukalune) hpotukle sretate rutakanu hiyrunu bode pixkalune (wannakatkani pimrine) pa sta sreta rutakanu.
34Waneya pohirtshi wla htshinanna hpotukle sretate hajene: — “Hinanu, Nuru kihleru htshinyehixyahi. Hyoptotapanru hyoptolerupa Hoyakalu pohirewaxyawaka hixa tshinanu halpokotkalurutka hma muyakotkonuklunuwa xye tshijne.
35Klu tshinanu nnatshikanaxinixka hixa henek-nikletno, nonunnahatewakanaxini hixa henek-hirretno hiyrunu hma metjejetanutno hyoptokanata.
36Mamkatno nixinixka, hmakatno. Nyeyixakanaxinixka, hixa hinotno hiyrun-koxa preso nwaka nwakanaxinixka, hixa hapkapyehitatkano.”
37— Waneya potukalune wla htshinanru: — “Tsru Hixikatshriwa, hikluhe wetyi pnatshixyawaka waneya wohlutyi, hiyrunu hikluhe wetyi ponunnahatewaxini wutyi?
38Hikluhe wetyi wma metjejetanutyi waneya wyoptotyi ho mamkatyi wmakata?
39Hikluhe wetyi pyeyixyawaka ho preso nwaka hwatshriyi wapkapyehityi?”
40— Waneya pohirtshi hihitanna, wla htshinanna: — “Halikakni wane ntshinhi, xyekaka hkamhiniklunna nomolene haté mujhakot-potu tshinanu hkamhinri, nkahwaklu hita tshinanu hkamhalu.
41— Waneya wla htshinanunna pa sta sreta hajenepni: — “Hyachatanutka, hapnokatkalunephi! Tshitshmero hikeklu hohne mnikawnakatupa yehi tsru kamtshi hiyrunu htowrene kamtshine tshinanu halpokotkaluru yehi hyanu.
42Klu tshinanu nnatshixiniklunu, hi henek-nikletno hiyrunu nonunnahatewaxiniklunu hi hutno.
43Hma metjejetanutno hi hyoptota hiyrunu mamkatu nixiniklunu hi hmakatno. Nyeyixiniklunu ho preso nwaka nwiniklunu hixa hi hapkapyehitno.
44— Wanna koxa wla htshin-hepomhaletanru: — “Tsru Hixikatshriwa, hikluhe wetyi pnatshixyawaka ho ponunnahatewaxyawaka ho wma metjejetanutyi ho mamkatyi ho yeyixatshriyi ho preso nwaka hwatshriyi waneya waneklu hi wepixyi?”
45— Waneya ruhitanna, wla htshinanna: — “Halikakni wane ntshinhi, hma kamhanutu xyekaka nomolene haté mujhakot-potu tshinanu, hita tshinan-koxa hi hkamhalu.”
46— Waneya wanna hapnokaxikowaka hikeklu hohne mnikawnakatupa yehi hyanuna seyni potukalune yoptotanru hiweklu hikeklu hohne mnikawnakatupa.
Currently Selected:
Mateus 25: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
