Mateus 26
26
Hjemahchinikankakyehitluna Jesus Ruylaxyawakapluna Piranapni
1Waneya xye pirankaka rali tshinrexinixka Jesus, wla htshinatkana rasruklene:
2— Hixa himatlu hepi hohne mahatlu Páscoa hohne tshinkaluru waneya Jeji Whene renekko cruz rupniywakpatka.
3Waneya tsru hixikatshinwa sacerdote-ne hiyrun-koxa tsrukakalune judeu-ne tsru pjiru tsru sacerdote Caifás tshinkalurupji rapatjexyana.
4Waneya rujhahchinikanutna hanu rixa himukata preso hitakletluna Jesus yokwiruyma ruylaxyawakapluna.
5Waneya wla htshinatkana:
— Seyni xye hi wkamhanu tsru hohne pchinika hmakanhiywakanupa yin-sejire.
Suxo Phamluhalo Hiyokjiwuxyawaklu Jesus Piranapni
6Waneya Jesus, Simão tshinkaluru hijirohitutatshripji Betânia poktshi rawakanaxini,
7sato suxo yanwakatlu. Pa stono phamluhalo kwenuro potuko yehi tanika. Jesus nikawakakwa rukóluha waneya Jesus jiwu tuyokhatlo phamluhalo.
8Seyni rasruklene hexinixkalo, rumtuwnahchinikanutna, wla htshina:
— Klu tshinanhe t-saletachatlo?
9Phamluhalo tsru wenru tumukata hichankalexyalo waneya wale tiyirotemka tumukata henekletna hike mwikane.
10Waneya Jesus himatlu klu htshinna hiyáhoni wla htshinna:
— Haklu hikojwaklo twu suxo? Kihler-potuko tkamhiyno.
11Hike mwikane ptowru hohneruka himwanu hixa tskalaya seyni hi ptowru hohneruka pimwanno hita.
12Phamluhalo tutakmanexinno, talpokomanetno nkapnaxikolupa.
13Halikaka ntshinhi, psol-tshijneko kihle piranalu potuko hiwekkaklewatatshri pirana hinkaklexiko, tkamhaleru koxa hinkakletko, tuchinijikolupa wala.
Judas Tshinkaluru Kamnixyawaklu Jesus Piranapni
14Waneya satu doze rixinri Jesus hasrukleru, Judas Iscariotes tshinkaluru yanwakatna tsru hixikatshinwa sacerdote-ne.
15Waneya repomhana:
— Kluhe henekanno Jesus nenejiniphi?
Waneya rutakyahoklona trinta proji tiyiro renejyawakapluna.
16Waneklu kananuko rujhalu hiklukta hpoyaho hekhiretanna, Jesus rekhixyawakapna.
Jesus Páscoa Hohne Hichinijyawaka Pirana
17Pão myapjetu hnikjexinrina hohne rasruklene yanwakatlu Jesus, repomhapyaluna, wla htshinruna:
— Hanurhe walpokotanru Páscoa hohne nikle wnijyawakapa tshinanu?
18Waneya wla htshinna:
— Tsru poktshi hjihlojinipa wane hyoptoxinri satu jeji waneya punkakanru: “Kasruklewakleru wla tshina: Nohohnestsitkani. Páscoa hohne nikle pipji wnijini.”
19Hiyáhoni rasruklene kamhalu htowuxyawakna, ralpokotatkaluna Páscoa hohne hniklerupna hnijyawakapna.
Jesus Hekhixyawaklu Hkamnitjeru Piranapni
20 Páscoa hohne kayno Jesus hiyrunu rasruklene doze nikawakakwa rukoluhana.
21Hnikka pchinikna Jesus wla tshina:
— Halikaka ntshinhi, satu hewi hwatshri nkamnitjerupa.
22Waneya wanna wamonuwpotuta waneya satkaka yinuwaka hepomhaletlu:
— Hitlahe?
23Jesus hihitna:
— Nkamnitjerukni hitayma pão yotshmota prato-ya.
24Jeji Whene tshinkaluru halikaka hipnanu Hoyakalu hixahchinikanuxyawaka pixka. Seyni hektu potlu wale jeji, Jeji Whene tshinkaluru kamnitatshri. Kihle potlu wale jeji hma matuxyawakanutka.
25Waneya Judas, Jesus kamnitjerupa, wla tshina:
— Kasruklewakleru, hitlahe?
Jesus hihitlu, wla htshinru:
— Pixako wan-tshina.
Jesus Hipninri Yapkakle Piranapni
26Waneya hnikka pchinikna, Jesus pão hkochtsheka. Waneya hpoyahnutlu Hoyakalu. Hjiknajrotlu pão waneya rasruklene reneklu. Waneya wla htshina:
— Pão hyoptotanu, hnikanru. Xyeni hatatjewa nomane.
27Waneya copa stono hkochtsheka. Hpoyahnutlu Hoyakalu, rasruklene reneklu. Waneya wla htshina:
— Xye copa himurkakanu hixa ptowrunekhi.
28Twu copa stonha nunkakletleru, waleni herotu nohraha piranni. Xye nohraha hixolune yine tshinanu hiyokkalurupa hektuntshi hiknojikowakapa tshinanu.
29Halikaka wane ntshinhi hikeklu hohne nnikanru xye Páscoa hohne tshinanupa haté rakanhanu Páscoa hohne potu Nuru Hoyakalu pohirewaxyawakaya.
30Waneya satu chikale hchikaletna, ralimtna, himriji Monte Oliveiras tshinikowaka hyatkana.
Jesus Hinkaklu Pedro Wkatakluyakawa Pirana
31Waneya Jesus wla tshinna:
— Xawakni yetshno potuko hixa ptowrunekhi hiknokanno niknohlerupa tshinanu klu tshinanu wla htshina Hoyakalu tokanu: “Nuylatanru carneiro-ne hinotatshri, waneya hiprane hipalatanu.”
32Seyni niwejinpatnaka, hita kosekanhi hixa Galileia tshijne nwaka.
33Seyni Pedro wla tshina:
— Yáholu ptowruneka hiknojinyi, hita hikeklu nuknokanyi.
34Waneya Jesus wan-tshinru:
— Halikaka wane ntshinyi. Xye yetshno hma yanumatkanuklunuwa patlapa, pixa map-kata pma mimatletanutu ptshinanno.
35Seyni Pedro wla tshinru:
— Hike! Hikeklu hohne nma mimatletanutu ntshinanyi yáholu pixayma nupnanu.
Waneya pimrine rasruklene ptowruneka koxa wane potuko htshinna.
Jesus Getsêmani Tshinikowaka Hyiywaka Piranapni
36Waneya Jesus rasrukleneyma Getsêmani tshinikowaka hya. Waneya wla htshina:
— Hixa hewitshi tuplatanu, hawla nyanu nanjihohnexyawakapa.
37Pedro hiyrunu Zebedeu whenene hepi ranika waneya hyinuwaka wamonuwleta, hsalewnahchinikanuta.
38Waneya Jesus wla tshinna:
— Niwejinri wamonuwpotuthonuka, hatatjewa nupnakastsitkani. Hewiphitshi, hitayma hislahanu.
39Waneya pnutejiji hya, hyospaka tshiji rutspakhojita, wla htshina ranjihohnereya:
— Nuru! Palujinipa pkochripaxinno twu copa salewaktshi yehiya. Seyni hi hitako nalujyawaka pkamhanu seyni pixako palujyawaka pkamhanu halikaka.
40Waneya Jesus satokanwakatna rasruklene, retamtna himkatshine, waneya repomhalu Pedro:
— Hi he pa hora-kna himukata hislahleta hitayma?
41Hislahanu, hanjihohnetanu hmallixikowakanupa. Klu tshinanu jmeremkahi seyni mantshicha mmixkotni.
42Hiyrunuko pnute hya ranjihohnexyawakapa, wla htshina hanjihohnereta:
— Nuru, nma muriknuko pchinro twu copa salewaktshi yehiya hi tumukata hitneprikkakota, palujyawaka pkamhanu.
43Waneya hsatokatnaka rasruklene nwaka, retamtna himkatshine hi rumukata himrekhayhaletna.
44Hiyáhoni hyatnaka, map-kata rixinri ranjihohnetatnaka, htshinakanaxyawaka pixka htshina hanjihohneretatnaka.
45Waneya Jesus satokanwakatatnakna rasruklene, wla htshinna:
— Himkawhe, hapnanutawhe? Hetanu, rapokpapkolutatka. Jeji Whene tshinkaluru hektuwaka kamhatshinemyo rutakkatka.
46Hpalnanu, hayewa! Tujrapa nkamnitjeru!
Jesus Kachixikowaka Piranapni
47Jesus yanumakanaxiniwa, satu rasruklene Judas tshinkaluru hapokatka. Waleymalune hixolune tsru hixikatshinwa sacerdote-ne hiyrun-koxa tsrukakalune judeu-ne yokanatanune. Yohlolewapi hiyrunu hahaje ranikna.
48Kamnitatshri satu rimaxikole runkakna, wla htshina:
— Katukta namlutanu, walekatkani. Hkachitanru wale.
49Waneya Judas hajeyri hapokastsitlu Jesus waneya wla htshinru:
— Hali, kasruklewakleru!
Waneya ramlutlu.
50Waneya Jesus wan-tshinru:
— Nimatletleru, pkamhanru paluka kamhaletanru.
Waneya hkachpiratjene hinanwakatlu Jesus, hkachpotutluna.
51Waneya satu Jesus-ymalune kochpaklu hyohlolewapre, hkastakjepitlu tsru sacerdote towrer-jepi.
52Seyni Jesus wla tshinru:
— Pimretanru pyohlolewapre klu tshinanu katukta hiylalewata yohlolewapiyma, yohlolewapi ruylaxikotka.
53Hixlahe kahwaklu hi numukata hanjiretlu Nuru waneyamka wale hixolune hiwejikalune htowrene tenhohne hajene doze ptohkakamka hyokanatanu repixyawakapnona?
54Seyni wan-rixini hanhe xawaka rixa poyahokakletanu Hoyakalu tokanu tshinyawaka rujhalu wan-rixyawakapa yonatkaluru tshinyawaka pixka?
55Waneklu Jesus wla tshinatkana hkachitjene:
— Katshowhurlanohe wkata hina yohlolewapikakayma, hahajekakayma koxa hkachixyawakapno? Ptowru hohneruka Hoyakalupji nasrukjekanaxyahi. Seyni hi hkachitno.
56Seyni xye ptowruka hakanha Hoyakalu tokanu hinkakletatshinni yonreru tshinyawaka hpoyahokajyawakapa tshinanu. Waneya rasruklene ptowruneka hichotatkalu, rasukatkana.
Tsrukakalune Jemahchinikankakyehixyawaklu Jesus Piranapni
57Jesus kachitjene hanikatkalu tsru sacerdote Caifás tshinkaluru yehi, wane koxa rapatjexyana kasruklewaklerune hinanchitkaluru pirana hasruklewatatshine hiyrunu tsrukakalune judeu-ne.
58Seyni Pedro hohatjinijiji romkahyehixyalu Jesus haté tsru sacerdote-pji maleka sreta potuko. Waneya tsru sacerdote hiputre hjihloka, htuplata Hoyakalupji soldado-teneyma rethixanuyehitlu.
59Waneya tsru hixikatshinwa sacerdote-ne hiyrunu pimrine tsrukakalune jemahchinikankakatshine hijhamkalu satu rukolukanuwninri yáhole rumukata hiylalexyawakapluna.
60Yáholu hixolune hapokatshine weyawyehitlu Jesus seyni hi jikolukanuru rukchikna ruylalexyawakluna. Waneya hepi hapkatatatshine hapoka.
61Wla htshinna:
— Xye jeji wla tshina: “Numukata nikatletanru Hoyakalupji seyni map-hohne pnute, nkamhanutnaklu.”
62Waneya tsru sacerdote palnatka, wla htshinatkalu Jesus: — Hanhe pixa hihletanru hjihyehixyayina?
63Seyni Jesus potshkecha. Waneya tsru hixikatshriwa sacerdote wan-tshinru:
— Ntowutyi Hoyakalu Hiwekatshri hetanuya. Punkakanwu, pixlahe Messias-yi, Hoyakalu Whenyi?
64Jesus hihitlu, wla htshina:
— Hehe, pixako wan-tshina. Seyni ptowruneka tshinanu wla ntshina: Xawaknikananuko hixa hetanru Jeji Whene, hohimkohi hoho hapokatshripa, Ptowru Himukatatshri Hoyakalu potukle sreta tuplatatshripni.
65Waneya tsru sacerdote hjihekannu tshinanu hsuskamkaluxnawa waneya wla htshina:
— Hektuwaka htshinanwakatlu Hoyakalu! Hi wujhana pimrine hiphujtatatshine. Hetanu, xawakni hjemlu hektuwaka htshinanwakaxyawaklu Hoyakalu!
66Hiyáhoni kluhe hkahwaka hixa?
Waneya pimrine hihitlu, wla htshinna:
— Waleko htshinanu rujhalu rupniywakapa!
67Waneya rutskahahojitlu Jesus, rutsojtakluna. Pimrin-koxa himpaklu.
68Waneya wanna wla tshinru:
— Xawakni Messias tshinikatshriwayi, pmetanutu punkaklewatanu kathe hiylakyi?
Pedro Wan-tshina Hi Rimathetlu Jesus Piranapni
69Pedro honra tsru sacerdote hiputre tuplata waneya sato towretshro yanwakatlu, wla ttshinru:
— Pix-koxa Jesus Galileia hajeruymalutyi.
70Seyni Pedro ptowru yineru hetanu hmetjejetanutu htshinru, wla htshina:
— Hi nimata klukta ptshina.
71Waneya Pedro hiputu jihlokawakle hya, wane koxlo sato suxo. Waneya tetlu, wane hwakanatatshine tunkaka, wla ttshina:
— Xye jeji Jesus Nazaré hajeruymalutni.
72Hiyrunuko hmetjejetanutu htshinatnaklu, wla htshina:
— Nmunanhalu Hoyakalu, hi nimathetlu xye jeji!
73Hi howukchini wane hwatshine yopkakatshine Pedro-stsi rapokna waneya wla htshinatkaluna:
— Pixa halikaka wannaymalutyi klu tshinanu Galileia hajene pixka pixa yanumleta.
74Waneya hyinuwaka hektuwaka tshinrexnawa, wla htshinatnaka:
— Halikakni hi nimathetlu xye jeji!
Waneya waneklukawa potuko patlapa yanumatatka.
75Waneya Pedro hichinikaplu Jesus tokanu htshinakanaxyawaklu: “Hma yanumatkanuklunuwa patlapa, pixa map-kata hi pimathetno ptshinanu.” Hiyáhoni kahnete hya, tsru wamontshiyma htshiyahpotuthonukatka.
Currently Selected:
Mateus 26: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
