Mateus 27
27
Pilatos Renejyawakapluna Jesus Piranapni
1Yetshpotukawa tsru hixikatshinwa sacerdote-ne hiyrun-koxa tsrukakalune judeu-ne ptowruneka hikchikahchinikanuta Jesus ruylaxyawakapna.
2Rostutluna Jesus, waneya ranikluna Phuru Pilatos renejyawakapluna.
Judas-ni Hiylaxnawakwa Piranapni
3Waneya Judas, Jesus hiphujtatjeru, rexinixkalu rukolukanuwninritka Jesus, rehchinikanutatka hkamrure tsru hektutu tshinanu. Waneya trinta proji prata hsatkakatka tsru hixikatshinwa sacerdote-ne hiyrun-koxa judeu-ne tsrukakalune tiyirote.
4Waneya wla htshina Judas:
— Hektuwaka kamhatshrino hita! Klu tshinanu hike mixkatuko nenekna hkamnitjene.
Seyni wanna wan-tshinru:
— Seyni hike wix-hixa. Waleni pixako ptshinanni.
5Hiyáhoni Judas hiknokatkalo proji tiyiro Hoyakalupjiya waneya ruchpakatka. Wane pnute rostuplaxnanwa.
6Waneya tsru hixikatshinwa sacerdote-ne hapatjetlo tiyiro projkaka. Waneya wla htshinna:
— Hinanchitkalurni Hoyakalupji tutajikowaka tiyiro proji klu tshinanu jeji hraha wenrutkani.
7Hiyáhoni rukchikahchinikanutna ranjixyawakapluna Kajpako Kamni tshinkaluru tshijne. Walekni pnu tshijne hichpajikatshri kapnaxikowaka.
8Wale tshinanu haté xawakni “Jratshijneru” htshinikowakatka wale tshiji.
9Hiyáhoni wan-rixatka hpoyahokajyawakaplu Hoyakalu tokanu hinkakletatshrini Jeremias tshinkalurni tshinyawaka, wla htshina mitshi: “Rawlona trinta proji tiyiro prata kamhikaluru rutakwenruxikolu wenru, pimrine israel-nerune klopichane hitakwenrutanru,
10ranjixyawakapluna Kajpako Kamni tshijne, Tsru Hixikatshriwa tshinyawakno.”
Pilatos Yehi Ranijyawakluna Jesus Piranapni
11Waneya Jesus tsru hixikatshriwa Pilatos tshinkaluru hetanu hyopkaka waneya Pilatos hepomhalu:
— Pixlahe judeu-nerune pohiryi?
Jesus hihitlu, wla htshinru:
— Pixako wan-tshina.
12Waneya tsru hixikatshinwa sacerdote-ne hiyrun-koxa tsrukakalune judeu-ne jihyehixinixkalu Jesus, hike htshina.
13Waneya phuru Pilatos hepomhalu:
— Hi he pjemlu hjihyehixyayina?
14Seyni Jesus hike tshina, hi satukna hjihyehixikolu ruhita. Waneya phuru himyekahchinikanuta wan-rixyawaka tshinanu.
15Tsru niklu hohne tshinanu phuru Pilatos hasruhlu satu preso hajeru hichoxyawaka, yine nurrer-potuko.
16Waneklu papko satu jeji ptowru yineru himatyehreru Barrabás tshinkaluru preso hwa.
17Hiyáhoni hixolune hapatjexinixka, repomhana:
— Hanurhe nuchoxinhi ho Barrabás tshinkaluru ho Jesus, Cristo tshinkaluru?
18Klu tshinanu Pilatos himathetna judeu-nerune tsrukakalune hhahxalna tshinanu, Jesus renekluna.
19Waneya phuru Pilatos jihyehixikowaka htuplakanaxiniwa, wale hnunro yonawahlo yokananwakatlu, wla tshinatshri:
— Petachatanru xye jeji hike mixkatu klu tshinanu xye yetshno nsalewnapotuta nupnawleya wale tshinanu.
20Seyni tsru hixikatshinwa sacerdote-ne hiyrun-koxa tsrukakalune judeu-ne hanjijixpotutlu hixolune hanjixyawakaplu Pilatos ruchoxyawakaplu Barrabás tshinkaluru hiyrun-koxa Jesus ruylajixyawakapa.
21Waneya Pilatos hepomhana:
— Hanurhe nyi hepi jejine nuchoxinhi?
Waneya ruhitluna:
— Barrabás.
22Waneya repomhatnakna:
— Kluhe nkamhinri Jesus, Cristo tshinkaluru?
Wanna ptowruneka hihitlu:
— Cruz putakanru!
23Seyni repomhatnakna:
— Haklu tshinanni? Klu hektuntshihe hkamha?
Seyni pnut-potu hsaplewatna, wla htshinna:
— Cruz putakanru!
24Waneya phuru Pilatos hexinri pnute hi rumukatatka hiyrun-koxa tsru sejirtshi hyinuwakpiratna, honha ranikakjixatka waneya reromyohatka hixolune hetanu. Waneya wla htshina:
— Xye jeji hiylaxikowakapa hi hitako ntshinanu seyni hixako htshinanupni.
25Waneya ptowru yineru hihitlu, wla htshinruna:
— Wale hraha hixa wtshinanupni hiyrunu wiklopichanepa tshinanupni.
26Waneya phuru Pilatos henekna Barrabás tshinkaluru. Seyni Jesus hkotshipjejixa, waneya renekna cruz rutajyawakapluna.
Soldado-ne Heyijyawaklu Jesus Piranapni
27Waneya soldado-ne haniklu Jesus phurupji waneya soldado-ne ptowruneka Jesus-stsi hapatjexya.
28Hkomkahatkaluna waneya mkatshri serolu hmakatluna Jesus.
29Waneya kawchiriplu hsaxpatna sahyi hkamhiywakapna, Jesus jiwu rutajyawakapluna. Waneya Jesus potuklemyo rutakluna hahaje, hyoptsojityehitluna, reyikatkaluna, wla htshinruna:
— Hali judeu-ne Tsru Hixikatshriwate!
30Waneya rutskahjetluna, hahaje hkochtshekna, rutpejiwutluna.
31Rali heyiklexinixkaluna, mkatshri serolu hkomkahatkaluna waneya waleko himkalu rutakleru hmakatatnakluna. Waneya ranikluna cruz rutajyawakapluna ruylaxikowakapa.
Simão Tshinkaluru Hanijyawaklu Jesus Cruz-te Piranapni
32Waneya ranikakanaxinixkaluna Jesus hatnu hapoya, satu jeji hyoptotna Simão tshinkaluru Cirene poktshi hajeru. Waneya cruz rutjikakluna.
Cruz Rutajikowakapa Jesus Piranapni
33Waneya rapokluna Calvário tshinikowaka. (Wale tokantshi yokakkaluru, yineru jiwuta pixkalutu yehi.)
34Wane vinho-ha kapsalu yapjetkaluru ruxyaluna Jesus seyni retumhiniklunru hi hyoptotatkalu.
35Waneya rali cruz hitaklexinixkaluna, hiknokkaluru ruknokna soldado-ne rimaxyawakapna katu kayatanru Jesus-ni mkalu.
36Waneya htuplatna, ruslahyawakapluna.
37Waneya Jesus jiwu hohwaka raw-yonhata Jesus jihyehixikolu pirana. Wla htshin-yonhata: “Xyeni Jesus judeu-ne pohire.”
38Hiyrun-koxa katshowhurune hepi wan-rutakna. Satu Jesus potukle sreta rutakka. Satu pa sta sreta hitakka.
39Hiknohatshin-koxa hektutu tshinanwakatlu, ruwnownojiwyehitluna.
40Waneya wla htshinruna:
— Pix-hima kopalatanru Hoyakalupji waneya map-hohne ppanawatanutnaka hiyáhoni piwekkajinwa! Halikaka Hoyakalu Whene pixinipakni, cruz pkochpajinwa!
41Waneko pixka rixa heyikletluna tsru hixikatshinwa sacerdote-ne, kasruklewaklerune hinanchitkaluru pirana hasruklewatatshine hiyrun-koxa tsrukakalune judeu-ne waneko pixka rixa heyikletluna.
42Wla htshinruna:
— Pimrine riwekkaka seyni wale nanuko hi rumukata hiwekkaklexnawa! Hi he judeu pohirni wale? Cruz hkochpajiniklunupwa tsonu walixanru.
43Hi he Hoyakalu munanhalerni? Hi he Hoyakalu Whene tshinikatshriwani? Hiyáhoni wetanru ho Hoyakalu haluk-hepixletanru.
44Jesus-yma cruz hitakkalune waneko pixka rixa heyikletkoxluna, hixo hektutu htshinanwakatluna.
Jesus Hipninri Piranapni
45Waneya hanikaj-hohnetkani rutshpokatka, três hora pchinika psol-tshijneka hitshpoka.
46Waneya mapa hora-stsitkani Jesus wla tshin-saplewleta:
— “Eloi, Eloi, lamá sabactâni?” Wale tokantshi yokakkaluru: “Noyakalute, Noyakalute, haklu pumuknokanno?”
47Waneya satkaka wane hwakanatatshine xye jeminixka, wanna wla tshina:
— Elias-ni htomha.
48Waneklukawa satu jeji hasukamta kamkolu ruhajyawakapa. Vinagre-ha rutaka, hahajestsipto rutaklu, Jesus rurjixlu.
49Waneya pimrine wla tshinru:
— Petachatanru. Weteru ho Elias tshinkaluru hepixanru ho hike.
50Waneya Jesus hipokananu saplewatatka, rupnanatka.
51Waneklukawa mkatshri sama Hoyakalupji hwatshrini hiskakana hepi tshraj-samanru, teno haté tshiji ruskajyanatka. Tshiji hiyolikatka, sotlukaka hipokanatka.
52Waneya yomletshikaka kotpukkatka, hixo yinni potukalunni hipnakanatatshinni hiwekkakkatka.
53Yomletshikaka ruchpajyatkana waneya Jesus hiwejinritnaka hohne pnute, Jerusalém poktshi hyamtna, hixolune yehi ruphujewniyna.
54Waneya romano-neru soldado-ne pohire hiyrun-koxa Jesus hislahatshine waleymalune tshiji hiyolikle hiyrunu ptowru hiknohatshri rexinixkaluna, rimyekahchinikanutna, waneya wla htshinna:
— Halikakni xye jeji honnira Hoyakalu whene.
55Wane koxna hixo suxone Jesus homkahitjene Galileia rumuchpajinine ruslahjerone, xye ptowruka howuka retakanaxyana.
56Sato wannaymalune Maria Madalena tshinkaluro, sato Tiago hiyrunu José hinro Maria tshinkaluro hiyrun-koxa sato Zebedeu whenene hinro.
Jesus Kapnaxikolu Piranapni
57Waneya kayi rixinixka satu phuru José tshinkaluru, Arimateia hajeru, hapoka. Wale koxa Jesus hasrukleru.
58Hyanwakatlu Pilatos, ranjixyawakaplu Jesus-ni mane. Waneya Pilatos henekjixlu.
59Waneya José kochtsheklu Jesus-ni mane, mkatshri sama powralu, linho sama, ruwtoklu.
60Waneya sotlu jitoxikolu hipjitaya José kapnaxikowakamkapa, satukna mutajikowakanuwa, rutakmanetlu Jesus-ni. Waneya tsru sotlu reruta yomletshi jihlojikowaka, ruchyaxyawakaplu waneya hyatka.
61Hepi tuplakanatatshine koxa yomletshi yoptowakle sreta tuplakanata, Maria Madalena tshinkaluro hiyrunu sato Maria tshinkaluro.
Yomletshi Ruslahyawakna Piranapni
62Wale prika, walekni hapnanuxikaluru prik-hohne, tsru hixikatshinwa sacerdote-ne hiyrun-koxa fariseu-ne yanwakatlu phuru Pilatos.
63Waneya wla htshinatkaluna:
— Tsru Hixikatshriwa, wuchiniklu wale kyokwirewaklerni riwekakanaxinni wla htshina, Map-hohne hiknohinpatka niwekkako.
64Hiyáhoni ptowutanru kihle hislahle potuko rixanruna yomletshi map-hohne pejnu tshinanu. Himanni hma tshowhutapyawakanupna rasruklene wla hma tshinyawakanupna: “Riwekatka hipnatshinetka tskalaya.” Hiyáhoni xye rapkatle hyokwirewle yohnik-himtukaplu.
65Waneya Pilatos hihitna, wla htshinna:
— Nenekanhi soldado-ne yomletshi hislahatshinepa. Hajewa, hanukta hixa himukata hislahletanru, wan-hixanru.
66Hiyáhoni hyatkana, sotlu yomletshi hichyatkaluru rimaxikoletna hiyrunu hislahatshine rutakna.
Currently Selected:
Mateus 27: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
