Eksodo 12

Waambeya wa Ehakallallo ya Paska

1 # Lev 23.5; Num 9.1-5; 28.16; Deu 16.1,2 Apwiya yaallota wa Mose ni wa Aroni mu ellapweelle ya Iguputo wi, 2“Mweeri yoolla onaakhalle mweeraanyu wawaambella muyakha. 3Mullalleye othenga wa Aisraele attheene wi va nllapo na neekhumi na mweeroolla, arive muthu anitthoollelle nibanja naye mwaanaankhosa apaalle mwaanapuri mmodda. 4Nibanja nayeva wawi kheniwora ocha enama ettheeneeyo, mabanja meelli awaatamana ettakanyiherane vamodda moollikana ni waata wiwa nave moollikana ni mmo muthu anachelleeye. 5Mwaanaankhosa apaalle musaanaapuri akhalle ohirakalla, aamullopwana navettho a muyakha mmodda. Ttuuwora waatthoollattho anamwani a epuri. 6Mumusunge ophiyera nllapo na 14 na mweeri, mvo Aisraele attheene yiiphalle enama ddiwannddo misikuwa. 7Vano ekusewo nikhame na enameeyo nave enimidde embali ddiraru dda eferemu ya vamullakoni wa enyumba eyo enaachelliiwamo enameeyo. 8Eyoose enameeyo mahiiyu vaavo nave eyiche ni buledi oohikhalla ni yisiti ni matthaapa amakukhu oowaawa. 9Muhiiyiche ekitthi apaalle yawaapeya koma muyoose ettheene ni murwiiweene, meto ni dda m'mirimani ddittheddene. 10Muhihiyewo erive ello ya enameeyo ophiyera ohinase koma ello emodda yahalla muyishellellihe. 11Ocha wene mucheke muwarille mookhozekella olendo, esapato ddanyu ddiri omanyalloni, ekopo ddiri m'mattani. Mucheke mwawaakuviha. Nenna sika nllapo na Paska ookititimihana miyaano, Apwiya.

12“Mahiiyu yaayo miyaano kineerovira mwiillaponi ya Iguputo nave variyari va Aiguputwaayo kineerowiipha anamwani aallopwana awaamba a athu ni a eziweto. Kineerollaka milluku ddittheddene dda Iguputo vawi mi tti Apwiya. 13Nikhamenno ninaakhalle echizindikiro ya enyumba nnddo munakhalleenyumo. Koona nikhamenno kineerewuukhwaranyani nyuwaano nave mullilli wawoononga khewuumorellani kaallakaka ellapo ya Iguputo. 14#Eks 23.15; 34.18; Lev 23.6-8; Num 28.17-25; Deu 16.3-8Munuupuwelleke nllapo nenna mvo munaakhallekeenyu ni ehakallallo yookititimihana miyaano, Apwiya. Mibado ddanyu ddittheddene ddisungeke nllaponna wi nikhalle lamulo wa enthawi yoohimalla.”

Waambeya wa Ehakallallo ya Buledi Oohikhalla ni Yisiti

15Vano Apwiya yaallota wi, “Mumucheke buledi oohikhalla ni yisiti wa mallapo matthanu ni meelli. Va nllapo nawaamba mumuvenyiheke yisiti muttheene mu enyumba ddanyu vawi arive muthu oyo anaamuche buledi ookhalla ni yisiti va mallapo matthanu ni meellaalla aneerovenyihiwa variyari va Aisraele. 16Va nllapo nawaamba ni va nllapo naneetthanu ni piillinno mweeriheke mutthukumano woopatuleya. Muhiphareke mutteko va mallapo yaayo koma muneerekokhoza yoochave yawi arive muthu acheke. 17Ehakallallo ya Buledi Oohikhalla ni Yisiti yeella muyisungeke kaambiiwa nllapo nenna tti nawuupuwella okhumihiwa wa malloko mattheene ovenyera mu ellapo ya Iguputo. Mibado ddanyu ddittheddene ddisungeke nllaponna wi nikhalle lamulo wa enthawi yoohimalla. 18Mumucheke buledi oohikhalla ni yisiti waambeella misikuwa a nllapo na 14 na mweeri wawaamba ophiyera misikuwa a nllapo na 21 na mweeri yooyo. 19Va mallapo matthanu ni meelli mattheenaayo, mpa mwanyu muhiphwanyeyekettho yisiti kaambiiwa arive muthu oyo anaache yoocha yookhalla ni yisiti, aneerovenyihiwa variyari va Aisraele, mulleto apaalle Muisraele. 20Muhicheke erive ello yookhalla ni yisiti nave m'mavaatte mwanyu mutthemwene mumucheke buledi oohikhalla ni yisiti.”

Paska awaamba

21Vano Mose aawiithana oohoollella attheene a Aisraele, aalleella wi, “Khaweni mwamutthoolle mwaanaankhosa apaalle mwaanapuri ookwakhwanella va nirive nibanja nave mumwiiphe nave enameeyo ekhalle yoocha ya Paskooyo. 22Mukuse enthambi ya ddoomella dda hisope,* muruweye mu embale eyo muhellilleenyumo nikhame.#12.22 muruweye…nikhame: apaalle oyihiye va yoovotellamo yookhuneelliwa ni nikhame. Vano mumidde nikhamenno embali ddiraru ddene dda eferemu ya vamullakoni. Arive muthu ahikhume mpa mwaye ophiyera osiisello ohinase. 23#Ahe 11.28Apwiya eneerovira mu ellapo ettheene ya Iguputo wi ewiiphe anamwani attheene aallopwana awaamba a Aiguputo. Yaawoonaka nikhamenno va embali ddiraru dda eferemu ya vamullakoni eneerekokhwaranya mullakooyo nave khemwaakhullellaka mungelwaaye awoononga wi avollowe mpa mwanyu wi awiipheni. 24Nyuwaano ni aniinyu mumusungeke Paskoolla wi okhalle mutetho woohimalla. 25Nave mwaavollowaka mu ellapo eyo Apwiya enuuvaheewaneeyo moollikana ni mmo yalonjezilliiwa, musungeke mutetho yoolla. 26Aniinyu yaawuukohakani wi, ‘Ethiyo mutetho yoolla onattaphullella tini?’ 27Vano nyuwaano muwaakhulleke wi, ‘Tti mukutho wa Ehakallallo ya Paska wowaatitimihana Apwiya ekaamba yawi yaakhwaranya enyumba dda Aisraele o Iguputo yawiiphiiwa anamwani aallopwana awaamba a Aiguputo. Koma yaanihiya ohiniipha.’ ”

Oohoollellaayo yiiwalliiwa ddenndda yaakokhora ellapella. 28Yaarowa nave yaheera ddittheddene nndde Apwiya yamulamulalliiwa Mose ni Aroni.

Okhwa wa anamwani aallopwana awaamba

29 # Eks 4.22,23 Variyari va mahiiyu, Apwiya yaawiipha anamwani attheene aallopwana awaamba mu ellapo ya Iguputo. Yamwaambille mwaana aamullopwana awaamba a Farao oyo aphwanella ovollowa omwenaaye, ophiyera mwaana aamullopwana a mukaidi a mu enyumba dda mwiipiphini dda mu endende. Mwaana aamullopwana awaamba a eziweto ahiiphiwattho. 30Farao ni enduna ddaye ddittheddene ni Aiguputo attheene yaavenya variyari va mahiiyu nave mu ellapo ettheene ya Iguputo mwaakhalla winlla wuullupalli kaambiiwa khenaarivo nibanja nno nahaari ni mwaana ookhwa. 31Mahiiyu yaayo Farao aamwiithana Mose ni Aroni nave ahaalamula wi, “Nyu ni Aisraele attheene, khumani mwawaakuva. Ahiyeni athwaaka, khaweni mwaallapelle Apwiya moollikana ni mmo mwallotilleenyu. 32Mukuse enkhosa ddanyu, epuri ddanyu, abulwaanyu ni eng'ombe ddanyu ddene moollikana ni mmo mwallotilleenyu nave muvenyemo. Mwavekelle wi nameenettho akidalise.”

33Aiguputo yaawaakuviha athu wi evenyemo mwiillaponimmo nave yaallota wi, “Ninoova wi ninaakhwe attheene.” 34Vano Aisraele yaakusa othu wa buledi wawoottowa khalle woohikhalla ni yisiti ni embale ddoowoottowella othu, eddihuruwelle mukuwoni, edditukhulla vamathurini viwa. 35#Eks 3.21,22Navettho Aisraele yaari yeerille moollikana ni mmo Mose aalleellelleeye. Yaaveka wa Aiguputwaayo ddawiireerihana mwiilli ddasiliva ni ddagolide navettho ddoowara. 36Apwiya yaaweeriha Aiguputwaalle wi ekhalle ooreera murima wa Aisraele wi yaavahe Aisraelaayo ddittheddene nnddo yavekilliiwa. Sika Aisraelaayo yahaakhawo eyuuma ya Aiguputwaalle.

Aisraele enakhuma mu Iguputo

37Sika Aisraele yaatimulla olendo ovenya o Ramsesi oya o Sukoti. Allopwana yaarivo 600,000 ohiweerengella atthiyana ni anamwani. 38Vaakhallattho mulloko muullupalli wa athu amodda ayo yahiri Aisraele navettho enkhosa, epuri, abulu ni eng'ombe ddinchichi. 39Yaamwaapeya buledi oohikhalla ni yisiti a othu wawoottowa khalle, oyo yakusalliiwa o Iguputo wulle. Othooyo khewaari ni yisiti kaambiiwa yahiikarihiwa mwawaakuva o Iguputo wulle. Sika kheyaarina enthawi yookhozella pooswiiwa a voolendoni.

40 # Gen 15.13; Aga 3.17 Aisraele yakhallillewo miyakha 430 o Iguputo wulle. 41Va nllapo nenno mvo miyakha 430 ddamalliiwa, malloko mattheene a athu a Apwiya yaavenyawo o Iguputo. 42Mahiiyu mattheene Apwiya kheyaakonille, waakhumiha Aisraelaayo mu ellapo ya Iguputo. Sika mahiiyu yaalla mibado ddittheddene dda Aisraele ddihikoneke, ddeereke mutetho yoolla mowaatitimiha Apwiya.

Malamulo a Paska

43Vano Apwiya yaamulleella Mose ni Aroni wi, “Malamulo a Paska tti awi, arive muthu oyo ahiri Muisraele ahiche. 44Koma arive kaporo oyo aakulliwe ttuucha, aphaddiwe. 45Mullupa muttekwaanyu oyo ahiri Muisraele ahiche. 46#Num 9.12; Yoh 19.36Mumuchelleke mu enyumba eyo akhozelliweeyemo, muhikhumekena vaatte enameeyo nave muhipweseke makhuviiwa. 47Aisraele attheene yeereke ehakallallo yeella. 48Mulleto akhalla variyari vanyu, aapaallaka wi eerena Ehakallallo ya Paska a Apwiya, mwaambeke waaphadda allopwana attheene a munibanjanimmo. Vatulli viwa ttuuwora ovollowa ni weerana ehakallallweeyo. Olliyooyo mumweeseke Muisraele mukhwaanyu. Koma oohiphaddiwa ahiche. 49Mukhalle ni lamulo nimoddamoddave va Muisraele navettho va mulleto oophaddiwa oyo ari variyari vanyu.” 50Aisraele attheene yaaneera nnddo Apwiya yamulamulelliiwa Mose ni Aroni. 51Sika nllapo nno Apwiya yaakhumihalliiwa Aisraele o Iguputo m'millokoni mwiwa.

Currently Selected:

Eksodo 12: MW2019

Highlight

Copy