Eksodo 27

Nikuwa na mukutho wooshellelliha

(Eks 38.1-7)

1“Opange nikuwa na mukutho wooshellelliha na matabwa akesha. Nikhalle noorekama masentimita 229, okhuveya wiwa okhallettho masentimita 229 nave oya muddullu wiwa okhalle masentimita 137. 2Opange manyaka va makoniiwa masesaayo, oopangiwa ni ntabwa nimoddave nenno nave onihuruwelle ni mukuwa. 3Opangettho embale ddiwa moomorellamo ntuura, mafosholo, mabeseni, mafoloko muullupalli navettho ezipangizo ddookharihavo munllo. Ezipangizo ddittheddene dda va nikuwanno ddikhalle dda mukuwa. 4Opangettho echiwaya yamukuwa yookhalla wonanko esefa. Mu makona mwiwa opangellemo emphete ddamukuwa ddootukhullellana. 5Omakellelle echiwayeeyo variyari va nikuwanno. 6Opange ekopo ddakesha ddootukhullellana nikuwanno nave oddihuruwelle ni mukuwa. 7Vootukhullani nikuwanno, ekoponnddo eddiherere mu emphete dda mukhwipi mwa embali piilli dda nikuwanno. 8Nave nikuwanno onihiyere nikhungu muwari mwiwa. Onimake moollikana ni mmo kawoonihelleemi vamwaangoni valle.

Nthato na musasa

(Eks 38.9-20)

9“Opange nthato na musasa waapheelliha mpanda. Omwera wiwa okhalle ekuwo ddabafuta aphaama, orekama wiwa okhalle mamita 46. 10Apotwiiwa 20 ni matthipellwiiwa 20 ekhalle a mukuwa koma engowi dda apotwaayo ni ekopo ddiwa ddikhalle dda siliva. 11Emoddamoddave yeeyo embali yoompoto, ohiyewo ekuwo, orekama wiwa mamita 46 ni apoto 20 ni matthipellwiiwa 20 amukuwa koma engowi dda apotwaayo ni ekopo ddiwa ddikhalle dda siliva. 12Okhuveya wiwa wa nthatonno, embali ya woovollowa nndduwa, okhalle ekuwo orekama wiwa mamita 23 ni apoto khumi owaakattho matthipello khumi. 13Embali ya wookhuma nndduwa nko ori mullakwiiwa, nthatonno nikhallettho mamita 23 okhuveya wiwa. 14Va embali emodda ya mullako vikhalle ekuwo, orekama wiwa mamita matthanu ni piilli ni apoto araru ni matthipello mararu. 15Emoddamoddave yeeyo va embali emodda vikhallettho ekuwo, orekama wiwa okhalle mamita matthanu ni piilli ni apoto araru ni matthipello mararu. 16Va mullako wa nthatonno vikhalle ekatani yabululu, yooreera yoofiira, yoofiira, yabafuta aphaama navettho yoopetiwa mweeruso. Orekama wiwa okhalle mamita matthanu ni masese. Ekhalle ni apoto asese oomakiwa va matthipello masese. 17Apoto attheene waapheella nthatonno ellundellelliwe ni ekopo ddasiliva nave engowi ddiwa ddikhallettho dda siliva koma matthipellwiiwa ekhalle a mukuwa. 18Orekama wiwa nthatonno okhalle mamita 46, okhuveya wiwa mamita 23 nave oya muddullu wiwa okhalle masentimita 230. Ekuwonnddo ddikhalle ddabafuta aphaama nave matthipellwiiwa ekhalle a mukuwa. 19Ezipangizo ddoopharihella mitteko ddoohiyanahiyana m'musasani wamutthukumano ni ekhomo dda musasa ni dda nthatonno, ddittheddenennddo ddikhalle dda mukuwa.

Makhura a enyali

(Lev 24.1-4)

20“Waalamule Aisraele wi yuuvahe makhura a olivi oopangiwa phaama, ookharihella enyali wi ekhareke mahiiyu mattheene. 21Aroni ni anaaye ekhariheke enyali mu musasa wamutthukumano eyo eri otte wa ekatani yootchinga nibokosi na echipangano. Vano enyaleeyo ekhareke wenko waambeella misikuwa ophiyera ohinase. Nenna nikhalle lamulo wa enthawi yoohimalla wa Aisraele ni mibado ddiwa ddittheddene.

Currently Selected:

Eksodo 27: MW2019

Highlight

Copy