Eksodo 9

Yoottikhiniha yaneetthanu: Okhwa wa eziweto

1Vano Apwiya yaamulamula Mose wi, “Khawe wa Farao wamulleelle wi, ‘Apwiya Mulluku a Aheberi, enallota wi owaakhullelle athwaaka evenyewo wi eye yakillapelle. 2Koma waakhootiha wi ehivenyewo, 3Apwiya eneerewuullakani ni ereta yawoopiha va eziweto ddawo wonanko akavalo, abulu, ekamira,* eng'ombe, enkhosa ni epuri. 4Koma eneerohiyaniha variyari va eziweto dda Aisraele ni dda Aiguputo. Sika kheyiivo naari echiweto emodda ya Aisraele enaakhwe. 5Apwiya aakhoza osiisello wi ekhalle enthawi yaweera ddenndda mwiillaponimmu.’ ”

6Sika osaka wene Apwiya yaheera moollikana ni mmo yallotelliiwa nave eziweto ddittheddene dda Aiguputo ddaakhwa. Koma kheyaarivo naari echiweto emodda ya Aisraele yakhwille. 7Nave Farao akohille phaama, ahiiwa wi kheyaarivo naari echiweto emodda ya Aisraele yakhwille. Koma Farao ahummihave murima nave khaawaakhullelle athwaayo wi evenyewo.

Yoottikhiniha yaneetthanu ni emodda: Etthuku

8Vano Apwiya yaamulamula Mose ni Aroni wi, “Muvahulle ntuura na viikho nnatta nimodda nave Mose anivokhelle ntuuranno muddullu vamiitthoni va Farao. 9Ntuuranno nineeromwareyella mu ellapo ettheene ya Iguputo wonanko nthupi. Nave virive veko va athu ni enama mvo ninaamoorelliiwavo, vineerokhuma marudda ayo enaaphulleyeke.” 10#Yaw 16.2Vano Mose ni Aroni yaavahulla ntuuranno viikho nave yahiimella vamiitthoni va Farao. Nave Mose aanivokhella ntuuranno muddullu nave va athu ni enama vaakhuma etthuku nnddo ddaphulleya. 11Amasengaalle kheyaaworillettho ophiyera vamiitthoni va Mose ekaamba yawi alliwattho yaari etthukuve, moollikana ni mmo yakhallelliiwa Aiguputo attheene. 12Koma Apwiya yaamummihave murima Farao sika khaawiiwellelle Mose ni Aroni moollikana ni mmo Apwiya yallotelliiwa.

Yoottikhiniha yaneetthanu ni piilli: Marallalla

13Vano Apwiya yaamulleella Mose wi, “Osiisello ohinase oye wakumane ni Farao, wamulleelle wi, ‘Apwiya Mulluku a Aheberi, enallota wi owaakhullelle athwaaka evenyewo wi eye yakillapelle. 14Vawi kineerorumiha millilli ddaka ddittheddene wa weyaano, wa enduna ddawo ni wa athwaawo wi odduwelle wi khaavo mmodda oophwanaphwana ni miyaano va ellapo yavatthi ettheene. 15Katukhullalleke nnatta naka wi kuullakena weyaano ni athwaawo, ddaano mutthollowille. 16#Aro 9.17Koma kohuusungani ni okumi wi koonihe masivaaka ni ovuwiha epillaaka mu ellapo yavatthi ettheene. 17Koma onimaanyaambusave athwaaka, vawaakhootihani wi evenyewo. 18Vano ngiiwani, osiisello enthawi yawi ddiidda, kineeromoriha marallalla awoopiha ayo ehinamorekevo ovenyera ephatuwello ya Iguputo. 19Sika vano vollochihani eziweto ddanyu ddittheddene munipuroni nooteteziwa ni ddeko ddanyu ddittheddene muriinyuna. Arive muthu apaalle erive enama eyo enaakhalle vaatte, munipuroni noohiteteziwa, eneerokhwa yamorelliwa ni marallalla.’ ” 20Enduna ddimodda dda Farao ddahoova ekaamba ya mawu a Apwiya nave ddahaathawihella akaporwiiwa mpa ni eziweto ddiwa ddene. 21Koma enduna ddimodda kheddaapwathille mawu a Apwiya nave yaarimoona waahiya akaporwiiwa vaatte ni eziweto ddiwa ddene.

22Vano Apwiya yaamulleella Mose wi, “Tukhulla nnatta nawo oddullu nave marallalla eneeromora va athu, va enama ni va ddoomella ddittheddene mu ellapo ettheene ya Iguputo.” 23Mose aatthoonyihella ekopwaaye oddullu. Nave Apwiya yaarumiha ogugudeya wa murimu ni marallalla nave ettari ddaamora muthaani. Sika Apwiya yaamoriha marallalla va ellapo ya Iguputo. 24#Yaw 8.7; 16.21Nave waakhalla marallalla ni ettari ddoosherima wunchichi. Marallalleene yaari awoopiha ayo ehinamorekevo ovenyera ephatuwello ya ellapo ya Iguputo. 25Marallallaayo yahoononga ddittheddene ddahisungiwe mpa mu ellapo ya Iguputo ettheene, athu attheene ni enama ddene. Yahoonongattho ddoomella ddittheddene navettho etthalla miteekho ddittheddene. 26Marallallaayo kheyaamorellewo o ellapo ya Gosheni, nko wakhalla Aisraele.

27Vano Farao aamwiithana Mose ni Aroni aalleella wi, “Ddawoona koochimwa. Apwiya tti ookhoza koma miyaano ni athwaaka, attheene niri oochimwa. 28Ddoottepa! Vekella wa Apwiya wi ehiihe ogugudeya wa murimu ni marallallaalla. Kineerowaakhullellani wi muvenyewo. Khemukhallattho wuno iyaayi.”

29Mose aamwaakhulla wi, “Kakhumave m'muzindanimmu, kineerovekella wa Apwiya. Nave ogugudeya wa murimu ni marallalla ddineerohiya wi mudduwelle wi ellapo yavatthi ettheene tti ya Apwiya. 30Koma kinnadduwella wi nyuwaano ni enduna ddanyu khemunawoovave Apwiya Mulluku.”

31Nave nthoche ni tirigu ooromolliwa bale ddahoonongeya, ekaamba yawi balooyo aari awaraallille khalle nave nthochenno naari naambeelle khalle ophuwella malluwa. 32Koma mitundu ddimodda dda tirigu kheddaawonongeyille kaambiiwa ddiithwa mooselliwa.

33Mose aavenyawo wa Farao wulle, akhuma m'muzindanimmo nave aavekella wa Apwiya. Vano ogugudeya wa murimu wulle ni marallallaalle ddaahiya navettho murimu aamwara. 34Koma Farao oonille wi murimu, marallalla ni ogugudeya wa murimu ddoohiya, aachimwattho wiilli nave ahummihave murima, olliye ni enduna ddayenndde. 35Sika Farao ahummihave murima nave khaawaakhullelle Aisraele wi evenyewo moollikana ni mmo Apwiya yamulleellelliiwa oweella mwa Mose.

Currently Selected:

Eksodo 9: MW2019

Highlight

Copy