Genesis 31

Yakobo anamuthawa Labani

1Yakobo ahiiwa wi anamwani a Labani yallota wi, “Yakobo ookusa ddittheddene dda attiitthiihu. Aphwannye eyuumaaye ovenyera mu eyuuma ya attiitthiihu.” 2Yakobo ahoonattho wi Labani khaamupwatha wonanko eerelleeye khalle. 3Sika Apwiya yaamulleella wi, “Hokollweella o ellapo ya makhollwaawo ni ya abalaawo nave miyaano kineerokhalla ni weyaano.”

4Sika Yakobo aarumiha mawu wa Rakele ni Leya wi akumanena obusani nko waari eziweto ddaye. 5Aphiyallewo, olliye ahaalleella wi, “Kohoona wi attiitthiinyu khenakipwatha wonanko yeerelliiwa khalle. Koma Mulluku a attiitthaaka ookhalla ni miyaano. 6Eellinyu munnadduwella mmo ni masivaaka mattheene kaapharelleemi mutteko attiitthiinyu. 7Koma alliwaayo aakilleka nave aakhalla yaakakhanihaka mallivellwaaka okhumi. Koma Mulluku khaapaallille wi akeerelle ddoonanara. 8Enthawi ddittheddene attiitthiinyu yallota wi, ‘Kinuullivelle eziweto dda madonthomadontho,’ Eziweto ddittheddene ddaarella anamwani a madonthomadontho. Nave yallota wi ‘Kinuullivelle eziweto dda malembamalemba,’ Eziweto ddittheddene ddaarella anamwani a malembamalemba. 9Mulluku ohaakha eziweto ddittheddene wa attiitthiinyu nave ookivaha miyaano.

10“Va enthawi eyo eziweto ddiniitumiiwa, miyaano kaalloha. Nave kahoona wi anankhoro yaddiwellaayo yaari a mizeremizere ddaweella, a madonthomadontho ni a mankhaangamankhaanga. 11Muullohani, mungelo a Mulluku aallota ni miyaano wi, ‘Yakobo,’ Nave kahaakhulla wi, ‘Miyaano!’ 12Olliye aallota wi, ‘Tukhulla miitthwaawo nave ona, anankhoro attheene enawellaalla tti amadonthomadontho, amizelemizele ddaweella ni amankhaangamankhaanga. Ddenndda kenre tti miyaano vawi kohoona nnddo Labani anaweerelleeye. 13#Gen 28.18-22Mi tti Mulluku awooneyelle o Betele wulle wiimesilleewe nlluku na yawuupuwella nave waanizoza ni makhura navettho wenko waallupella. Okhozeke vano, ovenyewo wuno, ohokollweelle o ellapo yoowaninyu.’ ”

14Rakele ni Leya yahaakhulla wi, “Khavihallille erive ello wi ttuuhallana ovenyera wa attiitthiihu. 15Hiyaano attiitthiihu enaneesa alleto. Yaanikulliha nave makobiri yaaphwanyilliiwa ovenyera mwa hiyaano, yahaamalla waacha mattheene. 16Eyuuma ettheene Mulluku ohaakha wa attiitthiihu, tti yaahu ni aniihu, sika erani nnddo Mulluku uulleelleenyuni.”

17‏-18Sika Yakobo aakhozekella olendo woorowa wa attiitthinnya o Kanani. Nave ahaawelliha anaaye ni awariye va ekamira.* Nave eziweto ddittheddene yaaddihoolliha enaddittottha ni ddittheddene addiphwanyilleeye o Mesopotamiya wulle. 19Labani aari akelle woochema enkhosa. Nave ari wenko, Rakele ahiiya milluku dda mpa mwa Labani attiitthinnya. 20Sika Yakobo aamulleka Labani Muaramoolle voohimullaanyani wi animavenyavo. 21Sika aakusa ddaaye ddittheddene, avenyavo moothawa. Aatimulla, allapuwa muhinje wa Yufurate, aamba olendo wooya o ellapo yamiyaango ya Giliyadi.

Labani anamuthamakella Yakobo

22Viviralle mallapo mararu, Labani ahiiwa wi Yakobo oothawa. 23Vano ahaakusa athwaaye, anamuthamakella Yakobooyo mallapo matthanu ni meelli, ophiyera aamuphwanya o ellapo yamiyaango dda Giliyadi. 24Muullohani mahiiyu yaayo, Mulluku aamulleella Labani Muaramoolle wi, “Onesesa wi ohimoopopihe Yakobo mu erive ettilla.” 25Vano Labani aamuphwanya Yakobo atthipenlle misasa omiyaangoninnddo. Olliyettho Labani aatthipella misasa ddaye wenkottho o ellapo yamiyaango ya Giliyadi.

26Labani aamukoha Yakobo wi, “Kaambiiwa tini okillekilleewe niwaakusa anaaka aatthiyana wonanko oophariwa okhotoni? 27Kaambiiwa tini wakillekilleewe nave okithawa ohikilleella? Wakilleelleke keerowaakhullella moohakallalla nave viri wiipa machipo ni asikoma ni magitala. 28Khonapaalla wi killaanyane ni edduullu ddaka ni anaaka. Woheera ddookarangeya. 29Kookhalla ni masiva ooweerella yoonanara koma mahiiyu evirallaalla, Mulluku a attiittho ookilleella wi, ‘Onesesa wi ohimoopopihe Yakobo mu erive ettilla.’ 30Kinnadduwella wi waatimulla kaambiiwa waapaallesesa ohokollweella owaninyu. Koma kaambiiwa tini okiiyerilleewe milluku ddaka.”

31Yakobo ahaakhulla wi, “Kaamoova kaambiiwa kaganiza wi ttuukaakha aniinywaalla. 32Koma mwaphwanya wi mmodda a hiyaano vaava ari ni milluku ddanyunnddo, iiphiwe yooyo. Athu niriihunaalla ekhalle mboni nyuwaano vawaashani ddeko ddanyu mukatunduni muttheenoolla. Sika mwaphwanya ddeko ddanyunnddo muddikuse.” Vawi Yakobo khaadduwella wi Rakele sika iiyalle millukunnddo.

33Nave Labani aavollowa m'musasani mwa Yakobo ni m'musasani mwa Leya navettho m'musasani mwa akaporwaaye aatthiyana eellaalle koma khaaphwanyillemo milluku ddayennddo. Sika vano aavollowa m'musasani mwa Rakele. 34Rakelooyo aari asunge millukunnddo vatthi va saduro ya ekamira nave olliyooyo aakeraatthella vaavo. Labani ahaashaasha m'musasani koma khaaphwanyillemo. 35Rakele ahaalleella attiitthinnya wi, “Attiitthi, muhinakishella murima ekaamba yawi ngiimenlle moovelleella olemu vamiitthoni vanyu. Miyaano ngiri phaama ekaamba kiri omweerini.” Sika Labani khaaphwanyille milluku ddayenndde.

36Vano Yakobo aasha murima wunchichi nave moosimwa aamukoha Labani wi, “Ethiyo mullatwaaka tti ttuuvi? Ethiyo kichimwalle tini wi nyuwaano mukithamakelleke ddiidda? 37Vawi mohaashaasha variyari va katundwaaka muttheene, ethiyo muphwanyillemo tini yaanyu? Eyo muphwannyeenyumo muyikhumihelle vaweellamva wi athwaanyu ni athwaaka eyoone. Nave alliwaayo sika eneeruza variyari va nyuwaano ni miyaano wi emphwanye aphaama ttaani. 38Kookhalla ni nyuwaano miyakha 20 ophiyera ollello nave enkhosa ddanyu ni epuri ddanyu ddene kheddaavuddalle naari omodda. Nave miyaano nginamullawiheke omuttakhuna nankhoro a enkhosa a munikhollani mwanyu. 39Enkhosa yattakhuniwa ni enama yawoopiha, miyaano kaanallivella enthawi ddittheddene, ngaaphiyana vamiitthoni vanyu wi kooneye oohilakwa. Mwaanoonesesa wi killivelle erive ello yawiiyiwa mahiiyu apaalle otthaana. 40Enthawi ddinchichi kaanahoowa ni oviha otthaana navettho ni oriirya mahiiyu. Ata, ngaakona. 41Mmu sika ddeko ddakhallelliiwa va miyakha 20 nnddo kakhanlleemi ni nyuwaano. Kohuupharellani mutteko miyakha khumi ni misese ekaamba ya aniinyu eellaalla nave miyakha mitthanu ni mmodda ekaamba ya eziweto. Komave mookhalla murukunusaka okumi mallivellwaaka. 42Mulluku a attiitthaaka, Mulluku a Abrahamu, Mulluku oyo Isaki amooveye, ahikhanlleke ni miyaano, ddaano mukiikarihalle khalle mattave. Koma Mulluku ahoona ddookatamiha ddaka ni mitteko ddaka nave mahiiyu evirallaalla ohuuhumullullani.”

Echipangano variyari va Yakobo ni Labani

43Labani aamwaakhulla Yakobo wi, “Anamwani aatthiyanaalla tti aaka, aniiwaalla tti aakattho ni eziweto ddittheddenenndda. Koma ethiyo vano kineere tini wa anaaka aatthiyanaalla ni edduullu ddakanndda? 44Vano hanko nikeraatthihe echipangano wi ekhalle omboni variyari va weyaano ni miyaano.”

45Sika Yakobo ahiimesa nlluku na yawuupuwella. 46Ahaalleella athwaaye wi etotelle malluku awuukellelle nipuro nimodda. Nave vakhwipi va nipuronno yaachellavo yoocha. 47Vano nipuronno Labani aaniromolla Yagara Sahaduta,#31.47 Yagara Sahaduta: Nnddina nenna mu Earami ninattaphullella nipuro na yawuupuwella. koma nipuro nennottho Yakobo aaniromolla Galedi.#31.47 Galedi: Nnddina nenna mu Eheberi ninattaphullella nipuro na yawuupuwella. 48Vatulli viwa Labani aallota wi, “Nipuro nenna ninaakhalle omboni variyari va miyaano ni weyaano.” Sika nipuronna yaaniromolla Galedi. 49Labani aallotattho wi, “Apwiya eniwehere eellihi naahiyanaka.” Sika nipuronno yaaniromollattho Mizipa.#31.49 Mizipa: Nnddina nenna niniiweya wonanko na Eheberi nno ninattaphullella nipuro nooweherellavo. 50Vawi Labani aavirellella ollota wi, “Waawaahoosaka anaakaalla apaalle waatthella atthiyana amodda naari vihiri arive muthu mwa alla niriihunaalla, wuupuwelle wi Mulluku sika mboni variyari va miyaano ni weyaano.” 51Vano Labani aamulleella Yakobo wi, “Ngoona nipuro namalluku kuukellelleeminna nave vaava vookhalla nlluku na yawuupuwella. 52Nipuro namallukunna ni nlluku na yawuupuwella, ddittheddenenndda tti omboni. Nave miyaano ngiwa killapuwa nipuro nenna wi killipane ni weyaano. 53Mulluku a Abrahamu, Mulluku a Nahori,#31.53 Abrahamu…Nahori: Abrahamu aari apwinnya a Yakobo nave Nahori aari apwinnya a Labani. Mulluku a attiitthiiwa, sika anaaneeruze eellihi.” Sika Yakobo aallupella vamiitthoni va Mulluku oyo attiitthinnya Isaki yamooviiwa. 54Vano Yakobo aavelleella mukutho vamwaangonimvo nave awiithana athwaaye wi eche ddoocha. Emallihalle ochanko, yaakona vamwaangonimvo. 55Osaka wene, ohinase, Labani aakhupaarella edduullu ddayenndde ni anaaye aatthiyana. Nave aadalisalle, ahaallaanya, sika aatimulla anarowa owaniwa.

Currently Selected:

Genesis 31: MW2019

Highlight

Copy