Genesis 35

Mulluku anamudalisa Yakobo o Betele

1 # Gen 28.11-17 Vano Mulluku aamulleella Yakobo wi, “Timulla, oye o Betele, wakhalle wenko. Wamakewo nikuwa na Mulluku oyo awooneyelle enthawi wamuthaweewe mwanamunno Esau.” 2Sika Yakobo ahaalleella a mu nibanja naye nittheene ni athu attheene aariiyena wi, “Tathillani milluku ddeelleto nnddo ddiri variyari vanyu. Muddeellihe nyookhaanyu nave muware ddoowara ddaphaama. 3Nineerotthaamawo wuno nave nineeroya o Betele nko kineereemi kamake nikuwa na Mulluku oyo akikaviherille va enthawi ya ddookatamiha ddaka. Vawi olliye sika akhanlle akiweheraka orive weko kayeemiwo.” 4Sika milluku ddeelleto ddittheddene anaaye yaariiwana, yaaddivelleella wa Yakobooyo, vamoddattho ni endolo dda m'maaruni yawariiwa. Ddittheddenennddo yaaddivuhellella vatthi va muteekho wa muthundu vakhuviru ni Shekemu.

5Yakobo ni anaaye yatimulliiwa, athu attheene a mizinda ddawaapheella yahoova wunchichi vawi yaalephela waathamakella. 6Sika Yakobo ni athwaaye yaaphiya o Luzi, nipuro nooromolliwattho Betele mu ellapo ya Kanani. 7Aamaka nikuwa wenko nave nipuronna yaaniromolla Betele, ekaamba yawi wenko sika Mulluku adduupullullalleeye wa Yakobo enthawi amuthaweeye mwanamunne. 8Debora oomullella Rebeka ovenyera enamwanaaye, akhwenlle wenko nave aavitthiwa vatthi va muteekho wa muthundu o Betelenko. Sika nipuronno naaromolliwa wi Muteekho wa Winlla.

9Yakobo awiillewo o Mesopotamiya wulle, Mulluku aamooneyellattho nave amudalisa. 10#Gen 32.28Mulluku aallota wi, “Nnddina nawo tti Yakobo koma waambeella ollello nnddina nawo ninaakhalle Israele.” Sika ahaamba oromolliwa Israele. 11#Gen 17.4-8Nave Mulluku aamulleella wi, “Mi tti Mulluku, Amasiva Mattheene. Nave muyarane wi mwaate. Edduullu ddawo ddineerokhalla mitundu ddinchichi nave ovenyera mwa ddennddo muneerokhalla mamwene. 12Kineerewuuvaha ellapo eyo kamvahilleemi Abrahamu ni Isaki. Ellapo yeella kineeroyivahattho wa edduullu ddawo, weyaano wakhwa.” 13Vano Mulluku aamuhiya Yakobo vanipuroni nne alloteeyena. 14#Gen 28.18,19Yakobo ahiimesa nlluku na yawuupuwella va nipuro nenno. Aavelleella mukutho wayoowirya vanllukunimvo nave aanizoza ni makhura. 15Yakobo aaniromolla nipuronno Betele.

Okhwa wa Rakele

16Vano attheene yaavenyawo o Betele koma ehinaphiye o Efurata, enthawi yawi Rakele ayare yaamukwakhwanella nave oyara waye waamukatamiha wunchichi. 17Ddiphiyalle voonanara wunchichi, azamba yaamulleella wi, “Muhoove, yoolla tti mwaana aamullopwana mmoddattho.” 18Vano Rakele amalliheyeeye, nngu avumellaka muddullu, aamuvaha nnddina mwaanooyo nawi Benoni,#35.18 Benoni: Nnddina nenna mu Eheberi ninattaphullella mwaana aamullopwana a ethakaraka. koma attiitthinnya yaamuvaha nnddina nawi Benjamini.#35.18 Benjamini: Nnddina nenna mu Eheberi ninattaphullella mwaana aamullopwana oyo anaakhalle ni ekari.

19Rakele akhwilleeye, avitthiwe mukhwipi mwa musewu wooya o Efurata, sika wi o Betelehemu. 20Nave Yakobo ahiimesa nlluku na yawuupuwella va mahame a Rakele. Nllukunno nookhallawove ophiyera ollello. 21Yakobo aakhwaranya aya atthipella misasa ddaye ntthella na nttattha na Edere.

Anamwani aallopwana a Yakobo

(1 Epi 2.1-2)

22 # Gen 49.4 Yakobo ari mwiillaponimmo, Rubeni aakona ni Biliha, mmodda mwa awariye ang'onong'ono a attiitthinnya nave Yakobo ahiiwa ddenndda.

Yakobo aari ni anamwani aallopwana khumi ni eelli. 23Anamwani aallopwana a Leya yaari Rubeni mwaana awaamba a Yakobo, Simeoni, Levi, Yuda, Isakara ni Zebuloni. 24Anamwani a Rakele yaari Yosefe ni Benjamini. 25Anamwani a Biliha kaporo a Rakele yaari Dani ni Nafutali. 26Anamwani a Zilipa kaporo a Leya yaari Gadi ni Ashere. Yaalla sika anamwani aallopwana a Yakobo yayarelliwe o Mesopotamiya.

Okhwa wa Isaki

27 # Gen 13.18 Yakobo aaphiya wa attiitthinnya o Mamure, nkottho waromolliwa o Kiriyati Ariba apaalle Hebroni, nko wakhalla Abrahamu ni Isaki wonanko alleto. 28Isaki akhwille ari ni miyakha 180. 29Nave aakhwa avitthiwa mu mahame uulluvallille wunchichi. Anaaye, Esau ni Yakobo sika yamuvitthalle mu mahame.

Currently Selected:

Genesis 35: MW2019

Highlight

Copy