Genesis 37

Yosefe ni asinne

1Nave Yakobo aavirellella okhalla mu ellapo ya Kanani nko attiitthinnya yakhanlliiwa wonanko mulleto. 2Ella sika epilli ya nibanja na Yakobo.

Yosefe ari musombwe a miyakha 17, achiha enkhosa ni epuri nimodda ni asinne, anamwani a Biliha ni a Zilipa, awariwa ang'onong'ono a attiitthinnya. Vano Yosefooyo aanaalleella attiitthinnya ddoonanara ddittheddene yeera asinnaayo.

3Sika Yakobo aanamukonda Yosefe okhwaranya anaaye amodda attheene kaambiiwa Yosefooyo ayariwe olliye uulluvallille. Sika aamusowella mukanjo wooreera.#37.3 mukanjo wooreera: apaalle mukanjo wa miwono ddoorekama. 4Asinne yoonilliiwa wi Yakobo aanamukonda Yosefe okhwaranya alliwaayo yahaamba omwiita Yosefooyo nave kheyaallotana moohakallalla.

5Nllapo nimodda Yosefe aalloha nave ahaatthopoollella asinne ollohanko. Nndda ddaheeriha wi emwiite wunchichi okhwaranya khalle. 6Olliye ahaalleella wi, “Iwani nnddo killohilleemi. 7Attheenehi naamaka mitolo ddahu dda tirigu m'matani. Nimakaka ddiiddo, mutolwaaka wahiimella. Vano mitolo ddanyu ddahaapheella mutolwaaka ddikokhorille.”

8Nave asinne yaamukoha wi, “Ethiyo onaganiza wi weyaano ttuukhalla mwene nave ttuunilamulella hiyaano?” Sika vano yaamwiita wunchichi okhwaranya khalle ekaamba ya ddoolloha ni ddoollota ddayennddo.

9Vano Yosefe aallohattho nave ahaatthopoollellattho asinnaayo wi, “Koollohattho nave kahoona nndduwa, mweeri ni etheneeri khumi ni emodda ddikikokhorellaka.”

10Ahaalleellattho attiitthinnya dda ollohanko ni asinnaalle, attiitthinnyaayo yaamuhumullulla wi, “Ethiyo olloha wenngu onattaphullella tini? Ethiyo onaganiza wi miyaano, amaaywaalla ni asinnwaalla, ttuuwuukokhorella weyaano?” 11#Mit 7.9Sika asinnaalle yaamukhallella ehache wunchichi koma attiitthinnya yaakhalla eganizeraka ddenndda.

Okullihiwa wa Yosefe o Iguputo

12Nllapo nimodda asinne a Yosefe yaaya o Shekemu woochiha eziweto dda attiitthiiwa. 13Nave Yakobo aamulleella Yosefe wi, “Asinno enachiha eziweto o Shekemu. Kinapaalla wi oye wawoone.”

Yosefe ahaakhulla wi, “Ee kineeroyaawo.”

14Attiitthinnya yaamulleella wi, “Khawe wawoone asinno ni eziweto ddene yaarimi eri phaama, weera ddiiddo owe okilleelle.” Sika attiitthinnya yaamuruma Yosefe ovenyera o ntapo na Hebroni.

Yosefe aphiyalle o Shekemu, 15muthu mmodda aamuphwanya aapheellaka muhakanimmo. Nave muthooyo aamukoha Yosefe wi, “Ethiyo onaasha tini?”

16Yosefe ahaakhulla wi, “Kinawaashaasha asinnaka. Koophara mwetwaanyu, killeelleni nko enachihiiwa enkhosa.”

17Muthoolle aallota wi, “Yavenyillewo khalle wuno. Kaawiiwa ellotaka wi enaya o Dotani.” Sika Yosefe ahaathwara asinnaayo, ophiyera ahaaphwanya o Dotani.

18Nave asinnaalle yamoonilliiwa awaaka voorekama, ahinaatamelle naari vang'ono ophiya yaariiwamvo, yahiiwanana wi emwiiphe. 19Mwawiiwanana yaallota wi, “Ngamooneni namalloha anawa mvooyo! 20Hankoni nimwiiphe, mutembwaaye niwuvokhelle mu emodda mwa ehime ddiri mvanndda. Niye nallote wi oottakhuniwa ni enama yawoopiha nave nineerewoona mmo onaakhallelle ottaphullella wa olloha waye wulle.” 21Koma Rubeni ahiiwa ddallota amoddaalle nave aheeseesa wi amuvulluse Yosefe. Sika aallota wi, “Iyaayi, nihimwiiphe. 22Nimuvokhelle mwiihimeni yoohikhalla ni maaddeella ochipululuni weewuno. Nihimuphoriihe naari vang'ono iyaayi.” Rubeni yoolingaaye yaari yawi amuvulluse Yosefe m'mattani mwiwa nave amuhokolloselle wa attiitthinnya. 23Yosefe aaphwanyille asinnaayo, alliwaayo yaamurulla mukanjwaaye wooreeroolle,#37.23 mukanjwaaye wooreeroolle: apaalle mukanjwaaye wa miwono ddoorekama. 24nave yaamuvokhella mwiihimeni yawumma.

25Echaka, yahoona mulloko wa amalonda ovenyeraka o Giliyadi. Ekamira* ddiwa dditukhullalle makhura awunkhella oohiyanahiyana olendo wooya o Iguputo. 26Nave Yuda ahaakoha asinne wi, “Ethiyo ninaaphurevo tini namwiipha munnihu nave nakhuwa wi khanimwiiphalle? 27Hankoni nimukullihe wa amalondaalla vawi olliyoolla tti mwanamunnihu a nipelle nimodda.” Nave asinnaayo yahaakhullella. 28#Mit 7.9Nave vano amalonda amodda yaviriiwa vaavo, asinnaayo yaamukhumiha Yosefe mwiihimeni mulle nave emukulliha wa amalondaayo va mutengo wa makobiri asiliva makhumi meelli. Nave amalondaayo yaayaana Yosefe o Iguputo.

29Vano Rubeni ahokollweelle wiihimeni wulle amuphwanyille Yosefe ahiimo. Vaavo ahaahulla ddoowara ddaye moomoriwa ethakaraka. 30Nave aahokollweella wa asinnaalle aalleella wi, “Musomboolle khaamo! Vano miyaano kinaaye kakomelle wuuwi?”

31Sika asinne a Yosefaalle yahiipha epuri nave etthaveya mukanjo wa Yosefe munikhamenimmo. 32Nave yaakusa mukanjoolle eya yawoonihella attiitthiiwa. Nave yaallota wi, “Ngoonani niphwannyeehu. Khe mukanjo wa mwaninyu olla apaalle khe yooyo?”

33Yakobo aawudduwella mukanjooyo nave aallota wi, “Ee, ddawoona tti mukanjo wa mwanaka! Enama yawoopiha yoomwiipha mwanaka. Kookhwa miyaano, Yosefe oottakhuniwa!” 34Sika Yakobo ahaahulla ddoowara ddaye nave awara echiguduli vawoonihani ethakaraka. Nave ahinlla maliro a mwanayaayo va enthawi yoorekama. 35Anaaye attheene aallopwana ni aatthiyana yaawa wi emukhurumuse murima koma olliye aakhoota ni wi, “Kinaakhalle kinllaka maliro a mwanaka ophiyera kivollowille mu mahame mmo muri olliyooyo.” Sika aavirellella winlla ekaamba ya Yosefe mwanaye. 36Enthawi yeeyo amalondaalle yaari emukullihalle Yosefe wa Potifara o Iguputo. Potifarooyo aari enduna yuullupalli ya akhoto oowehera enyumba ya Farao.

Currently Selected:

Genesis 37: MW2019

Highlight

Copy