Genesis 42

Asinne a Yakobo enaya o Iguputo wookulla yoocha

1Yakobo iiwalleeye wi o Iguputo wookhalla tirigu, ahaakoha anaaye wi, “Kaambiiwa tini muneereenyu moona okeraatthi ooheeravo ello? 2#Mit 7.12Kohiiwa wi o Iguputo wookhalla tirigu. Khaweni wenko, mwanikullellewo hiyaano wi nivulluwe nave nihikhwe ni ettalla.” 3Sika asinne khumi a Yosefe yaatimulla oya o Iguputo woomukulla tirigu. 4Koma Yakobo khaamurumallena Benjamini, mung'onong'onwaaye a Yosefoolle kaambiiwa oova wi apaalle ttuukumana ni otulli.

5Anamwani a Yakobwaayo yaaya o Iguputo wookulla ddoocha ni athu amoddattho attheene kaambiiwa mu ellapo ya Kanani mwaakhalla ettalla. 6Nave Yosefe aari enduna yuullupalli yoolamulella ellapo ettheene ya Iguputo nave olliye sika amukulliha tirigu wa athu oovenyera o ezigawo ddittheddene dda ellapo. Nave asinne a Yosefe yaaphiya navettho yaamukokhorella Yosefooyo. 7Yosefe awoonille asinnaayo, ahaadduwella koma aaddiipitthiha wonanko mulleto. Nave ahaamba waallochella moowalli, anaakoha wi, “Ethiyo nyuwaano munavenyera wuuwi?”

Alliwaayo yahaakhulla wi, “Ninavenyera o Kanani wi nikulle yoocha.”

8Yosefe ahaadduwella asinnaalle koma alliwa kheyaamudduwenlle. 9#Gen 37.5-10Nave ahuupuwella mmo allohelleeye dda alliwaayo nave aallota ni asinnaayo wi, “Nyuwaano tti oozonda. Muweelle wi moone mmo efookelle ellapwaahwiilla.”

10Alliwa yaallota wi, “Iyaayi, apwiya, hiyaano oorumeyellaanyu niwiille wi nikulle ddoocha. 11Attheenehi tti anamwani a muthu mmodda. Khanihiyo oozonda iyaayi apwiya, koma niri athu oororomelleya.”

12Yosefe aallota wi, “Iyaayi. Nyuwaano muweelle wi mweetellelle ellapwaahu wi moone mmo efookelliiwa.”

13Vano alliwaayo yaallota wi, “Apwiya, hiyaano nayariwe anamwani aallopwana khumi ni eelli, anamwani aallopwana a muthu mmodda mu ellapo ya Kanani. Munnihu mung'onong'ono ari ni attiitthiihu nave mmodda aakhwa.”

14Koma Yosefe aawaakhulla wi, “Tti ddennddo kaakeeminndde wi nyuwaano tti oozonda. 15Vano kinapaalla kiweeseni mwawi ddiidda, kinallupella mu okumi wa Farao! Nyuwaano khamurowa ophiyera Mung'onong'onwaanyooyo awiille wuno. 16Murumeni mmodda mwa nyuwaano wi aye amukuse. Amodda attheene oohallanyu munaawallelliwe mundendeni ophiyera mawaanywaalla esimikizelliwe, noone mwaarimi mullotaka ddawoona. Olephela mvo, kinimallupella mu okumi wa Farao, nyuwaano tti oozonda.” 17Allotille ddenndda, ahaawallella mundendeni mallapo mararu.

18Viviralle mallapo mararu Yosefe ahaalleella wi, “Vawi miyaano kinnamoova Mulluku, muneerovulluwa vaavove mweera nndda. 19Mwaarimi muri oororomelleya, muthu mmodda ahalle mundendenimmu, amodda attheenenyu muroweke wi mwamuvelleelle tirigu wa makhollwaanyu o nibanja na owaninyu ori ettallanko. 20Mung'onong'onwaanyooyo mwaweena wuno, osimikiza wi munallota ddawoona nave khamwiiphiwa.”

Alliwaalle yahaakhullella ddennddo. 21Nave yahaamba ollota mmodda ni mukhwaaye wi, “Ddawoona, hiyaano naachimwa valle mung'onong'onwaahu anivekilleeye wi nimweerelle echifundo koma hiyaano naakhoota omweerella echifundo. Nave sika ekaambiiwa niri muddookatamiha ollellova.”

22 # Gen 37.21,22 Sika Rubeni aallota wi, “Valle miyaano kahuulleellani wi musomboolla muhimweerena erive ello koma nyuwaano khamwaakiiwellelle. Mohoonathi vano nirina ollivelliwa ekaamba yoomwiipha olliye.” 23Yosefe aaniiwa ddittheddene nnddo yallotiiwa koma alliwaayo kheyaadduwella kaambiiwa wi yallota ni olliye oyeella mwa oottaphullella. 24Vano Yosefe aaya otte nave ahinlla miitthori. Murima omukhurumuwalle aahokollweella muwari mulle nave aambattho ollota. Aamutthoollavo Simeoni nave aamumaka vaavo alliwaayo yoonaka ni miitthwiiwa.

Asinne a Yosefe enahokollweella o Kanani

25Vano Yosefe aalamula wi mathumbiiwa eddallihiwe ni tirigu nave wi makobiri a arive muthu ehiyiwe munthumbani mwaye mwemmo. Aalamulattho wi yaavahe pooso a voolendoni. Akaporo a Yosefe yaheera ddenndda. 26Asinnaayo yaamakellella va abulu mathumbiiwa a tirigu yamukullalliiwooyo nave yaatimulla olendo. 27Ephiyalle va nipuro nookonella olendo, mmodda mwa alliwaayo aattaphulla nthumba naye wi avahullemo vang'ono yoocha yoomuchihella bulwaaye. Nave attaphullalle aphwanyille owanoni wa nthumbanno ori makobiri. 28Nave aawiithana mookhuwa asinne wi, “Ha, ngoonani ookihokollosella makobiraaka. Khe alla eri mun'thumbanaalla!” Attheenaayo yaatthomowamo murima. Yaatthukumella ni woova wunchichi nave yaallota wi, “Mulluku aneerenlleeyeella tti tini?”

29Ephiyalle wa attiitthiiwa o ellapo ya Kanani, yahaatthopoollella attiitthiiwa ddittheddene nnddo ddaweereyelle. Yaallota wi, 30“Enduna yuullupalli yeellapweeyo yaanilochella moowalli wi eniwa hiyaano tti oozonda awoonellella ofooka wa ellapwiiweeyo. 31Hiyaano naamulleella muthooyo wi, ‘Attheenehi tti anamwani a muthu mmodda. Khanihiyo oozonda iyaayi, apwiya koma niri athu oororomelleya ddawoona,. 32Apwiya, hiyaano nayariwe anamwani aallopwana khumi ni eelli, anamwani aallopwana a muthu mmodda mu ellapo ya Kanani. Munnihu mung'onong'ono ari ni attiitthiihu nave mmodda aakhwa.’ 33Vaavo olliyooyo aallota wi, ‘Wi kidduwelle wi muri athu oororomelleya, mmodda mwa nyuwaano ahalle ni miyaano wuno koma amodda attheenenyu mumukuse tirigu, muyeena o nibanja noowaninyu ori ettallanko. 34Mung'onong'onwaanyooyo mwaweena wuno, osimikiza wi munallota ddawoona nave khamwiiphiwa. Vaavo sika kineerodduwella wi khamuhiyo oozonda koma muri oororomelleya. Vano kineerewuuhokollosellani mwanamunninyooyo nave nyuwaano ttuuvirellella weera malonda mwiillaponimmu.’ ”

35Ettaphullalle mathumbiiwa, arive muthu aphwanyille nthumba na makobiraaye niri muwari mwa nthumbanno. Yoonilliiwa makobiraayo, alliwaayo ni attiitthiiwaayo yahoova wunchichi. 36Vano Yakobo attiitthiiwa ahaalleella wi, “Mookaakha anaaka vawi Yosefe aarimeella navettho Simeoni aarimeella nave vano munapaalla m'mukusettho Benjamini. Ddookatamiha ddittheddenenndda ddookimorella miyaano!”

37Rubeni ahaalleella attiitthinnya wi, “Ttuuwiipha anaaka aallopwana eelli, kalephela omuhokollosella Benjamini wa nyuwaano. Mukihiyere m'mattani mwaka kimupwathe nave kineerewuuhokollosellani.” 38Koma Yakobo aallota wi, “Mwanakoolla khathaanana ni nyuwaano iyaayi, valle mwanamunne aakhwa nave ahanlle yeekha. Apaalle ttuukumana ni otulli nave miyaano kuulluvallelleemimmu ethakaraka sika ddinaakiiphe.”

Currently Selected:

Genesis 42: MW2019

Highlight

Copy