Genesis 48

Yakobo anamudalisa Efuremu ni Manase

1Viviralle enthawi, Yosefe aalleelliwa wi, “Attiitthiinyu enimavoriiwa.” Sika ahaakusa anaaye eelli, Manase ni Efuremu, ayaana wa Yakobo. 2Yakobooyo alleelliwe wi, “Mwaninyu Yosefe oowa wi awooneni,” ahiillipiha nave aavenya, akeraatthi vabedini. 3#Gen 28.13,14Nave Yakobo aamulleella Yosefe wi, “Mulluku Amasiva Mattheene oyo akooneyelle o Luzi mu ellapo ya Kanani, aakidalisa. 4Nave aakilleella wi, ‘Kineerewuuvaha wi okhalle nikhollo nuullupalli na mitundu ddinchichi dda athu. Ellapweella kineerovaha edduullu ddawo wi ekhalle yayiwa wa enthawi yoohimalla.’ ”

5“Sika vano anaawo eelli waayarilleewe o Iguputo wuno, miyaano kihinawe, yaayottho tti anaaka. Efuremu ni Manase enaakhalle anaaka, wonanko ekhallelle Rubeni ni Simeoni. 6Koma ooyariwa vatulli va alliwaayo enaakhalle aawo nave enaakhelle yoohallaniiwa oweella mwa asinniwa Efuremu ni Manase. 7#Gen 35.16-19Kenre ddenndda ekaamba yawi enthawi kavenyereemi o Mesopotamiya, amaayo Rakele yakhwenlle mu ellapo ya Kanani, vihanlle mwanamutunda wi niphiye o Efurata. Ethakaraka ddaakimora wunchichi. Vano nahaavittha wenko mukhwipi mwa musewu wooyeella o Efurata.” (Efurata tti Betelehemu.)

8Yakobo awoonille anamwani a Yosefe, aakoha wi, “Ethiyo asombwaalla tti awani?”

9Yosefe ahaakhulla wi, “Alla tti anaaka Mulluku akivahilleeye o Iguputo wuno.”

Sika Yakobo aallota wi, “Pepaani, ewe wuno anamwanaayo wi kaadalise.” 10Vano miittho a Yakobo yaari ehoonaka phaama ekaamba ya wuulluvalla sika Yosefe aawaatamelliha ni Yakobo nave Yakobooyo ahaakhupaarella anamwanaayo. 11Yakobo aallota ni Yosefe wi, “Ngaaganizera wi ttuuwoonattho weyaano koma vano Mulluku ohaakhullella wi kiwoone vamoddattho ni anaaweene.” 12Vano Yosefe ahaavenyihavo anamwanaayo vametoni va Yakobo nave aamukokhorella.

13Yosefe ahaaphareella anamwanaayo, Efuremu aamuhiya wuunyotthoni wa Yakobo nave Manase o nnattanatta naye. 14Koma Yakobo aavirikaniha matta atthinddaanyera nnattanatta naye va muru va Efuremu oyo aari mung'onong'ono nave nnatta noonyotthwaaye aanitthinddaanyera va muru va Manase oyo aari muullupalli. 15Nave aamudalisa Yosefe#48.15 Yosefe: Voomudalisani Efuremu ni Manase, Yakobo amudalisa Yosefe. voollotani wi,

“Mullukwaaka oyo makhollwaaka Abrahamu ni Isaki yamurumeyelliiwa,

Mulluku oyo akihoollelle mu okumaaka muttheene ophiyera ollello,

16oyottho tti mungelo akoopollille o ddawoononga ddittheddene, aadalisettho!

Oyeella mwa asombwe eellaalla,

nnddina naka ni manddina a makhollwaaka Abrahamu ni Isaki,

evuwihiwe va enthawi ddittheddene!

Ekhalle ni edduullu ddinchichi va ellapo yavatthi,

nave ekhalle mutundu muullupalli va ellapo yavatthi!”

17Yosefe oonille wi attiitthinnya etthinnddaanyere nnattanatta niwa vamuruni va Efuremu, khaahakallallille. Nave aakusa muwono wa attiitthinnya owuvenyihavo vamuru va Efuremu, awuhiya vamuru va Manase. 18Ahaalleella attiitthinnya wi, “Muheere ddiiddo attiitthi. Muullupalli tti olla, sika nnattanatta nanyu nikhalle va yoolla.” 19Koma Yakobo attiitthinnyaayo aakhoota wi, “Kinnadduwella kineereemi, mwanaka. Edduullu dda Manase ddinaakhallettho mitundu ddinchichi komave mung'onong'onwaayoolla aneerovuwa omukhwaranya olliye nave edduullu ddaye ddinaakhalle mitundu ddinchichi dda athu.”

20 # Ahe 11.21 Sika ahaadalisa nllapo nenno voollotani wi, “Aisraele enaaromolleke manddinaanyu voodalisani. Eneerekollota wi, ‘Mulluku uudaliseni nyuwaano wonanko Efuremu ni Manase.’ ” Sika Yakobo aamuhiya Efuremu vahoollo va Manase.

21Vatulli viwa Yakobo aamulleella Yosefe wi, “Onnoonathi wi kiri vakhuviru okhwa koma Mulluku akhalla ni weyaano nave aneerewuuhokollosella o ellapo ya makhollwaawo. 22Navettho weyaano, ohiri asinno, kinuuvaha Shekemu, echigawo elle kaakhilleemi ni nsupada naka ni muuraaka ovenyera wa Aamori.”

Currently Selected:

Genesis 48: MW2019

Highlight

Copy