Levitiko 11
11
Enama ni epallame ddaweellihiwa ni ddooripihiwa
(Deu 14.3-21)
1Apwiya yaallota ni Mose ni Aroni wi 2yallote ni Aisraele wi, “Enama munaakhullelliweenyu oddicha variyari va enama ddittheddene dda va ellapo yavatthi tti nndda. 3Enama ddittheddene ddookhalla ni akokotokwa ookawaneya nave ddoojikulla sika munnaakhullelliweenyu oddicha. 4-6Koma ddimodda mwa enama variyari va enama ddoojikulla apaalle dda enama dda manyallo ookawaneyannddo, muhiddicheke ekamira,* epilla ni wallullu. Ddenndda tti ddooripihiwa wa nyuwaano kaambiiwa naari ddijikullaka manyallwiiwa tti oohikawaneya. 7Nave ekumba tti yooripihiwa wa nyuwaano kaambiiwa naari manyallwiiwa eri ookawaneya khenajikulla. 8Enama ddenndda muhiddicheke nave ddakhwa muhiddittannye. Ddenndda tti ddooripihiwa wa nyuwaano.”
9Ddookumi ddookhalla m'maaddini munaakhullelliweenyu oddicha tti ddittheddene ddookhalla ni miiwa ddoosambilella owaaka makarumbasa. 10Koma ddittheddene ddookhalla m'maaddini dduullupalli apaalle dding'onong'ono ddoohikhalla ni miiwa ddoosambilella owaaka makarumbasa, tti ddooripihiwa wa nyuwaano. 11Ddennddo tti ddooripihiwa wa nyuwaano nave muhiddicheke. Ddakhwa ddikhalleve ddooripihiwa wa nyuwaano. 12Ddittheddene ddookhalla m'maaddini ddoohikhalla ni miiwa ddoosambilella ni makarumbasa tti ddooripihiwa wa nyuwaano.
13“Nave epallame munaaddeesekeenyu ddooripihiwa, ddawi muhiddicheke vawi tti ddooripihiwa wa nyuwaano tti mpungu, ephangwi, nakhuku,#11.13-19: Odduwanyeya wa epallame ddimodda dda mu mavesi 13-19 tti wookatamiha. 14neekhwaambe, orive mutundu wa kuukuru, 15orive mutundu wa anakhuku, 16enthiwatiwa, eddiiddi, akakowa, orive mutundu wa neekhwaambe, 17maarwe, echiswankhono, namame, 18sekhwe, kuukuru amanyaka, ephangwi dda mutundu mung'onong'ono, 19nasekwa, makokoko ni amullema. 20Ddoovava ddittheddene nnddo ddihiri epallame nave nnddo ddiri ni meto misese tti ddooripihiwa wa nyuwaano. 21Koma variyari va ddoovava dda meto misese, munaakhullelliwa oddicha ddennddove ddiri ni minyonga. 22Va ddennddo muchekevo orive mutundu wa nazombe, asankha a mitundu ddittheddene, asondollo a mitundu ddittheddene ni middope dda mitundu ddittheddene. 23Koma va ddoovava ddimodda ddittheddene dda meto misese tti ddooripihiwa wa nyuwaano.
24“Vano arive muthu ooddittannya aneeroripihiwa nave arive muthu ooddittannya ddikhwille akhalleke ooripihiwa ophiyera misikuwa. 25Arive muthu atukhulla erive echiwalo ya enama ddookhwannddo, achape ddoowara ddaye komave aneerokhalla ooripihiwa ophiyera misikuwa. 26Erive enama yookhalla ni manyallo koma oohikawaneya apaallettho yoohijikulla, yeeyo tti yooripihiwa wa nyuwaano nave arive muthu ooyittannya ekhwille aneerokhalla ooripihiwa. 27Variyari va enama dda meto misese, enama ddookhalla ni eyaalla omanyalloni, tti ddooripihiwa wa nyuwaano nave arive muthu ooddittannya ddikhwille akhalla ooripihiwa ophiyera misikuwa. 28Nave muthu anatukhulla enamanndda ddikhwille, achapeke ddoowara ddaye komave aneerokhalla ooripihiwa ophiyera misikuwa. Ddenndda tti ddooripihiwa wa nyuwaano. 29Vano ddawaapadda ddittheddene ddiri ddooripihiwa wa nyuwaano tti nikoongwe, muthoro, orive mutundu wa mung'azi, 30nikootwa, ephenembe, neemara, neekwangwa ni neetiyambe. 31Ddenndda tti ddooripihiwa wa nyuwaano variyari va ddawaapadda ddittheddene. Arive muthu ooddittannya ddenndda ddikhwille aneerokhalla ooripihiwa ophiyera misikuwa. 32Nave enama ddenndda ddakhwa nave ddamorella va erive ello, ellweeyo eneerokhalla yooripihiwa, khaya tti yamuteekho, yeekuwo, yanttapara, yeechiguduli apaalle erive echipangizo yoopharihella orive mutteko. Ellweeyo eyiruweye m'maaddini koma eneerokhallave yooripihiwa ophiyera misikuwa. Vatulli viwa eneerokhalla yaweellihiwa. 33Vano erive enama ya ddenndda yamorella mwiipallini, ddittheddene ddiri mwemonnddo ddineerokhalla ddooripihiwa nave epalleeyo muyipwese. 34Maaddi a mwiipallinimmo yiithelleya va erive yoocha yawaakhullelliwa, yoocheeyo eneerokhalla yooripihiwa. Erive yoowirya yawaakhullelliwa yamwiipallini mwemmo eneerokhalla yooripihiwa. 35Erive echiwalo ya enama yookhwa yamorella va erive ello, ellweeyo eneerokhalla yooripihiwa, khaya tti ufuni apaalle embawula, ddittheddenennddo muddipwese vawi tti ddooripihiwa nave ddineerokhalla ddooripihiwa wa nyuwaano. 36Koma enama yookhweeyo yamorella va neetuutu apaalle ehime ddineerokhalla ddaweellihiwa koma erive ello yoottannya enama yookhweeyo eneerokhalla yooripihiwa. 37Erive echiwalo ya enama ddookhwannddo yamorella va mmiddo oyo athu enaakiiwa yaalle, mmiddooyo oneerokhallave waweella. 38Koma mmiddooyo wakhalla wawoollowa ni maaddi nave erive echiwalo ya enama yookhwa yamorella va mmiddooyo, oneerokhalla wooripihiwa wa nyuwaano.
39“Muthu attannya enama yookhwa, eyo eri yawaakhullelliwa ocha, muthooyo aneerokhalla ooripihiwa ophiyera misikuwa. 40Nave muthu acha enameeyo achape ddoowara ddaye koma akhalle ooripihiwave ophiyera misikuwa. Nayeenettho oyo anaatukhulle enama yookhweeyo achape ddoowara ddaye koma aneerokhalla ooripihiwa ophiyera misikuwa.
41“Erive ello yawaapadda, muhiyicheke. 42Erive ello yawaapadda ni emirima navettho erive ello ya meto misese apaalle ya meto ddinchichi, muhiyicheke vawi tti yooripihiwa wa nyuwaano. 43Muhiiripihe ni erive yawaapadda, muhiiripihena. 44#Lev 19.2; 1 Pet 1.16Mi tti Apwiya Mullukwaanyu. Vano muddeellihe nave mukhalle aweella vawi mi tti aweella. Muhiiripihe ni erive ello yawaapadda. 45Vawi mi tti Apwiya oyo yuukhumihalleni mu ellapo ya Iguputo wi kikhalle Mullukwaanyu. Vano mukhalle aweella vawi mi tti aweella.” 46Nenno tti lamulo noollota dda enama, epallame, erive yookhalla m'maaddini ni erive ello yawaapadda, 47wi muhiyaniheke ddeko ddooripihiwa ni ddaweellihiwa navettho va ddookumi munaakhullelliweenyu oddicha ni nnddo muhinaakhullelliweenyu oddicha.
Currently Selected:
Levitiko 11: MW2019
Highlight
Share
Copy
Want to have your highlights saved across all your devices? Sign up or sign in
The Bible in Elhomwe © The Bible Society of Malawi, 2019.