Yohánɛs 8

Bíg sɔ́la Yésus mindígá ɓá byee á ndeŋg

1Yésus ɔ kɛ á ɔ́kolá ví tín ɛ́ Olíva. 2La miyɛ́ mí kítí, ɔ tímān á ndáá-ēcɛ́ŋ-Ɔlolómɛ̄, kaa ɓot bísɛ bí ŋgí sɔ́ ápah a lɛ, ɔ tɔ́ɔ̄ á sí, ɔ ɓōtlé lí yéglɛ. 3Váŋ nɛ́ ɓayí-mbéndá la ɓot bí Elōg-Falísái ɓá sɔ́la mindígá wa, nyɔ́ ɓá byee á ndeŋg la ɓɔ́ bú tɛ́ɛ́yɛ nyɛ á m̀mím á mɓógo. 4Bú lagá Yésus nɛ́: «Á Ŋ̀yéglɛ, nyɔ́ mindígá a byēlɓɛ́ á ndeŋg, 5ndí mbéndá Móse ɛg laga ɓɛ́hɛ nɛ́, nyíŋ nyaa ɓondígá ɓa nyɛɛ yɔ́ li ól la ŋgɔg. Wá ɔg laga láá é?» 6Bí ŋgí pɔ́t náŋ la miɔ́ŋɔ nɛ́ bí ám nyɛ́ á mbele yɛ́ɛ̄, á lí ɓɔŋ nɛ́ bí sɔm nyɛ́ njɔm nyí li sɔ́mánɛ lí nyɛ. Váŋ nɛ́ Yésus a úlɓan, ɔ ɓōtlé lí cii á sí la ɔnu-ví-wɔ. 7Kasig bí váŋghɛ́ɛ nyɛ́ la mbihi, ɔ tɛ́lɛ, ɔ lága ɓɔ nɛ́: «Á elɔŋ yáná ɓɛ́nɛ bísɛ, nyɔ́ la nyɔ́ a ŋga yí nɛ́ a ɓáág ŋgí lí ɓɔŋ lí áɓē, a ɓɛ́ mut ɔsú á lí úm lí nyɔ́ mindígá ŋgɔg.» 8La nyɛ́ ɔ úlɓan sīg-pɛ, ɔ ɓōtlé lí cii á sí. 9Ɛnɛ́ ɓá ámblé bíŋ biɓaŋgá bí Yésus, bú ɓōtlé lí kɛ wa ámbúh nyɔ́ŋɔ́, li ɓotle la ɓacɛ́ŋ, Yésus ɔ yéglé elɔŋ la nyɔ́ mindígá a ɓɛ́ɛ́ a ŋgí tɛ́ɛ́ váŋ. 10Váŋ nɛ́ a tɛ́lɛ, ɔ bíhī nyɛ nɛ́: «Á míndīgá, ɓot ɓá sɔ́la wa bí lɛ́ hɔ́ véé é? Mut tɔ wa āh kɔ́ghɛ ɓé wa é?» 11Mindígá ɔ pélē nɛ: «Tɔ mut á Ɛtáŋɛ.» La Yésus ɔ yó nyɛ nɛ́: «Tɔ mág mi ŋgá kɔ́ghɛ ɓé wa, kɛnɛ́g ndí ɔh ɓɔŋɔ́g ɓé pɛ aɓé.»

Yésus a lɛ mípūū mí ɓot bí ŋkɔŋ-á-sí

12Ámbúh náŋ, Yésus ɔ laga sīg-pɛ jéŋ límut nɛ́: «Ma nɛ́ mi lɛ mípūū mí ɓot bí ŋkɔŋ-á-sí Nyɔ́ la nyɔ́ a ŋga ōŋ ma a ŋgá kɛ ɓé lí wɛɛhɛnɛ á lívito, ag ɓɛ́la mipúú mí ŋga tíi eniŋ.» 13Ɓɔɔ́n bí Élōg-Falísái bú yó hɔ́ nyɛ nɛ́: «Ɔg tíi mbóŋ yɔ́ɔ wā-mɛ̄n, nyíŋ mbóŋ yɔ́ɔ ɛ̄h tɛ́ɛ́ ɓé!» 14La Yésus ɔ pélē ɓɔ nɛ́: «La mbálɛ, mag tíi mbóŋ yáma mā-mɛ̄n, ndí mbóŋ yáma ɛ tɛ́ɛ, ányúū nɛ mag yí véé mi ŋga sɔ́léne la ápah mi ŋga kɛ̄; ndí ɓɛ́nɛ, miní ŋgá yí ɓé véé ma sɔ́léne tɔ ápah mi ŋga kɛ̄. 15Miníg kááhɛ á nyaa nyí ɓot-bí-bínam, ndí ma, mi ŋgá kááhɛ ɓé ma tɔ mut. 16Ndí, kí yá pám nɛ mi kááhɛ́ɛ, mag kááhɛ á nyaa ɛ tɛ́ɛ́, ányúū nɛ mi sē ɓé ma mā-ntámɛ́, mut a óm ma a lɛ̄ la ma. 17Á mbéndá yaná ɓɛ́nɛ-mɛ̄n, yá ciiɓɛ́ nɛ mbóŋ nyí ɓot bíɓáa bí ŋga tíi ɛ lɛ́ mbálɛ. 18Mag tíi mbóŋ yáma mā-mɛ̄n, nlemlem kaa Etāa nyɔ́ a óm ma a ŋga tíi yɔ.» 19Ɓɔɔ́n bí Élōg-Falísái bú bíhī nyɛ nɛ́: «Ɛsɔ́ŋɛ́ a lɛ véé é?» Yésus ɔ pélē ɓɔ nɛ́: «Ákaa miní ŋgá yí ɓé ma, jɔ́ nɛ́ miní ŋgá yí ɓé ki Etāa! Ki ɓɔŋ nɛ́ miní ŋga yí ma, kí miní ŋga yí ki Etāa.» 20Yésus a pɔ́tɔ́ɔ́ bíŋ biɓaŋgá, eceg a ŋgí yéglɛ á ndáá-ēcɛ́ŋ-Ɔlolómɛ̄, á voóm bí ŋga nāŋʼye joó nɛ mikaale. Mut tɔ wa ah byeléé ɓé nyɛ ányúū nɛ ŋgɛ́ŋ yɛ́ɛ̄ ɛ ɓɛ́ɛ́ ŋgí lí kɔlan.

Yésus ag lɛgɛ mikɛ mɛ́ɛ́

21Yésus ɔ lága sīg-pɛ jéŋ limut nɛ́: «Mag kɛ, miníg kɛ ma lí somo, ndí miníg kɛ li wú átē a aɓé wáná. Miní ŋgá la ɓé lí kɛ ápah mi ŋga kɛ̄.» 22Váŋ nɛ́ ɓákanʼyɛ bí Élōg-Yúda ɓá lagá nɛ́: «Ɓaá, a byɛ́ɛ́ kóó li nítɓan é? Ányúū nɛ ag laga nɛ́: ‹miní ŋgá la ɓé lí kɛ ápah mi ŋga kɛ̄›.» 23La Yésus ɔ pélē ɓɔ nɛ́: «Miní lɛ́ ɓot bí nyí sí, má mi lɛ mut a lóō. Ɓɛ́nɛ miní lɛ́ ɓot bí nyú ŋkɔŋ-á-sí, ndí ma, mi sē ɓé ma mut a nyú ŋkɔŋ-á-sí 24Jɔ́ hɔ́ nɛ́ ma lága ɓɛ́nɛ nɛ́, miníg kɛ li wú átē a miɓé máná. La mbálɛ, kíyáɓɛ́nɛ manáh yéɓe ɓé nɛ má Mi Lɛ, miníg kɛ li wú átē a miɓé máná.» 25La ɓɔ́ bú bíhī nyɛ nɛ́: «Wá hɔ́ nɛ ɔ lɛ nzáá é?» Yésus ɔ pélē ɓɔ nɛ́: «Jéŋ jam nɛ́ mi ŋga lága ɓɛ́nɛ li ɓotle á bíɓotlé. 26Ányúū yaná, mi byɛ́ɛ́ ŋgandag á lí kwɛl la á lí kááhɛ; ndí mut a óm ma a lɛ mbálɛ, la ki nɛ́ yé ma ámblé á yóg yɛ́ɛ̄, yɔ́ nɛ́ mi ŋga lága ɓot bí ŋkɔŋ-á-sí» 27Ndí ɓɔ́ bíh sɔ́ŋtánɛɛ ɓé nɛ a ŋgí kwɛlɛ ɓɔ́ líkɔlɓan la Ɛsáŋɛ́. 28Yésus ɔ lága hɔ́ ɓɔ́ nɛ́: «Eceg miní ŋga kɛ́ li ɓétɛ lí Mɔɔ́n Mut á lóō, váŋ miníg kɛ li yí nɛ́ má Mi Lɛ, la ki nɛ́ mi ŋgá ɓɔŋ ɓé ma jam tɔ já la mā-mɛ̄n; mag laga ja yé Etāa a yéglɛ́ ma. 29Nyɔ́ a óm ma a lɛ́ la ma; āh yíg ɓé ma esɔ́sɔ́l, ányúū nɛ eceg sig mag ɓɔŋ ja yé ɛ́ ŋga nyɛ́ɛle nyɛ́.» 30Kasig a ɓɛ́ɛ́ a ŋgí pɔ́tɔg náŋ, ŋgandag ɓot yú yéɓé la nyɛ́.

Kundɛ-ɓōt la miyɔ́ŋ

31Yésus ɔ laga hɔ́ ɓɔ́ɔ̄n bí Élōg-Yúda ɓá bí yéɓyéé la nyɛ nɛ́: «Kíyáɓɛ́nɛ maná tiŋɓé á bíɓaŋgá byáma, ɛnɛ miní lɛ́ kɔɔ ɓayége ɓáma. 32Miníg kɛ li yí lí mbálɛ, mbálɛ ki ɛ yáanɛ́ ɓɛ́nɛ kundɛ-ɓōt.» 33La ɓɔ́ bú tímānɛ̄ nyɛ nɛ́: «Bi lɛ mbota nyí Áblaháam, m̀ɓá-mɓá bi ɓáág ŋgí lí yáan lí miyɔ́ŋ mí tɔ mut; nɛ láá hɔ́ ɔ ŋgɔ lága ɓɛ́hɛ nɛ́ biíg kɛ li yaan lí kundɛ-ɓōt é?» 34Yésus ɔ pélē ɓɔ nɛ́: «La mbálɛ-mbálɛ, mag laga ɓɛ́nɛ nɛ́, nyɔ́ la nyɔ́ a ŋga ɓɔ̄ŋ aɓé a lɛ ǹdimí á áɓē. 35Ŋyɔ́ŋ á ŋgá tígle ɓé á m̀biya, ndí mɔɔ́n a m̀biya, nyɛ́ ag wúēle ja á m̀biya. 36La náŋ, kíyáɓɛ́nɛ Mɔɔ́n Mut nɛ́ a yáanɛ́ ɓɛ́nɛ kundɛ-ɓōt, miníg ɓɛ́ kɔɔ kundɛ-ɓōt. 37Mag yí nɛ́ miní lɛ́ mbota nyí Áblaháam, ndí miníg somo ma lí ólhánɛ, ányúū nɛ eɓaŋgá yáma ɛ́ ŋgá siiɓan ɓé ɓɛ́nɛ. 38Má, mag laga yé ma ɛ́n á ŋgwáāg Etāa, ɓɛ́nɛ ki miníg ɓɔŋ yé maná ámblé á yóg ɛsɔ́ŋɛ́ wāná.» 39La ɓɔ́ bú búmblán la nyɛ́ nɛ́: «Áblaháam nɛ́ a lɛ etāa wahá.» Yésus aá la ɓɔ nɛ́: «Kíyáɓɛ́nɛ miní lɛ́ ɓɔ́ɔ̄n bí Áblaháam, ɓɔŋán hɔ́ mísɔ̄n mí Áblaháam. 40Nyí vɔ́ŋɔ́ɔ, miníg somo ma lí ólhánɛ, ányúū nɛ ma laga ɓɛ́nɛ mbálɛ nyí ma ámblé á yóg Ɔlolómɛ̄. Jéŋ, Áblaháam āh ɓɔŋ ɓé jɔ. 41Ndí ɓɛ́nɛ, miníg ɓɔŋ misɔ́n mí ɛ́sɔ̄ŋɛ́ wāná.» Ɓɔ́g bú pélē nyɛ nɛ́: «Ɓɛ́hɛ ɓáh byááye ɓé ɓɛ́hɛ á ŋkaŋ á ndeŋg, bí byɛ́ɛ́ ja Etāa wa, Ɔlolómɛ̄.» 42Yésus aá la ɓɔ nɛ́: «Ki ɓɔŋ nɛ́ Ɔlolómɛ̄ a ɓɛ́ɛ́g ɛsɔ́ŋɛ́ wāná, ki maná dīŋ ma, átɔm nɛ́ ma pámléné á átē a Ɔlolómɛ̄ li sɔ́ vá, māh sɔ́ ɓé ma la mā-mɛn, Nyɛ́ nɛ́ a óm ma. 43Ányúū yéé miní ŋgá ámble ɓé ŋkwɛl wáma é? Ányúū nɛ miní ŋgá la ɓé lí ámble lí bíɓaŋgá byáma. 44Ɛsɔ́ŋɛ́ wāná nɛ ǹsɔhɔ, nsom wɛ́ɛ́ nɛ miní byɛ́ɛ́ kóó li ɓɔŋ. Li ɓotle á ɔ́kolpáŋá, a tīŋɓéné á lí ólhánɛ lí mut-a-binam; áh tɔɓene ɓé á mbálɛ, ányúū nɛ mbálɛ ɛ sē ɓé la nyɛ. Eceg a ŋga ɓāŋ minaa, náŋ nɛ́ a lɛ líɓɛ́ɛg jɛ́ɛ́, ányúū nɛ a lɛ mut-a-minaa, ɛsáŋɛ́ a minaa. 45Ndí ma, kaa mi ŋga laga mbálɛ, jɔ́ nɛ́ miní ŋgá yéɓe ɓé la ma. 46Nzáá á átē wāná, a lɛ nɛ́ a étɛ́ nɛ́ ma ɓɔ̄ŋ áɓē é? Ndí, kíyáɓɛ́nɛ mbálɛ nɛ́ mi ŋga pɔ́t, ányúū yéé miní ŋgá yéɓe ɓé la ma é? 47Nyɔ́ la nyɔ́ a lɛ nyɔ́ a Ɔlolómɛ̄, ag ámblé biɓaŋgá bí Ɔlolómɛ̄. Kasig miní sē ɓé ɓá bí Ɔlolómɛ̄, jɔ́ nɛ́ miní ŋgá ámble ɓé ma.» 48Ɓɔɔ́n bí Élōg-Yúda bú pélē nyɛ nɛ́: «Ɓaá, bih byɛ́ɛ́ ɓé kundɛ li laga nɛ́ ɔ lɛ mɔ́ɔ̄n Samália, ndí wu ɓɛ́la ki m̀búl m̀ɓé é?» 49Yésus ɔ tímānɛ̄ ɓɔ nɛ́: «Kɛ́m, mih byɛ́ɛ́ ɓé ma m̀búl m̀ɓé, Etāa nɛ́ mi ŋga dítɛ, ndí ɓɛ́nɛ, miníg yaŋa ma! 50Mih byɛ́ɛ́ ɓé nɛ́ mi sómó lípēm jama mā-mɛ̄n; ndí, Mut ntám a lɛ nyɔ́ a ŋga sómo lipém jáma, ndí ag kááhɛ ki. 51La mbálɛ-mbálɛ, mag laga ɓɛ́nɛ nɛ́, kíyáɓɛ́nɛ mut a náŋɛ bíɓaŋgá byáma, m̀ɓá a ŋgá kɛ ɓé lí wú.» 52Váŋ hɔ́ nɛ ɓɔɔ́n bí Élōg-Yúda ɓá lága nyɛ nɛ́: «Biíg yí vɔ́ŋɔ́ɔ nɛ́ ɔ byɛ́ɛ́ m̀búl m̀ɓé! Áblaháam a wúēē, nlemlem la ɓapɔ́tle-bí-Ɔ́lolómɛ̄, ndí wa ɔg laga nɛ́: ‹Kíyáɓɛ́nɛ mut a náŋɛ bíɓaŋgá byáma, m̀ɓá a ŋgá kɛ ɓé lí wú.› 53Ɓaá, ɔg loo etāa wahá Áblaháam la ɓapɔ́tle-bí-Ɔ́lolómɛ̄ ɓá bí wúēē é? Wa, ɔg ɔ́ŋɔ́ yágá nɛ ɔ lɛ nzáá é?» 54Yésus ɔ pélē ɓɔ́ nɛ́: «Kí ɓɔŋ nɛ́ mag tíi mā-mɛ̄n lipém, kí jéŋ lipém líh byɛ́ɛ́ ɓé ádit; ndí, Etāa nɛ́ a ŋga tíi ma jéŋ lipém, nyɛ́ nɛ́ miní ŋga kātɓan nɛ́ a lɛ Ɔ́lolómɛ̄ wāná. 55Ɓɛ́nɛ miní ŋgá yí ɓé nyɛ̄, ndí ma, mag yí nyɛ́. Kíyáɓɛ́nɛ ma lágá ɓɛ́nɛ nɛ́ mi ŋgá yí ɓé ma nyɛ́, ɛnɛ mi lɛ́ mut-a-minaa kaa ɓɛ́nɛ; ndí ma mag yí nyɛ́, jɔ́ nɛ́ mi ŋga náŋɛ biɓaŋgá byɛ́ɛ́. 56Áblaháam ɛsɔ́ŋɛ́ wāná a kɔ̄n mívag la mí miɔ́ŋɔ nɛ́ a ɛ́n ɔlɔ́ vama ví mísɔ̄, la náŋ a ɛ́n víŋ ɔlɔ́, ɔ yál la mivag.» 57Váŋ nɛ́ ɓɔ́ɔ̄n bí Élōg-Yúda ɓá laga nyɛ nɛ́: «Ɔh mpámág ɓé tɔ muúmítáan mí mímbú ndí ɔg sɛgɓan nɛ́ wa ɛ́n Áblaháam!» 58Yésus ɔ pélē ɓɔ nɛ́: «La mbálɛ-mbálɛ, mag laga ɓɛ́nɛ nɛ́, sɔ́kágánɛ́ Áblaháam ag ɓɛ́, kí má Mí Lɛ.» 59Váŋ nɛ́ bí kɔ̄tɔ́ɔ́ ŋgɔg, bú ɓōtlé nyɛ yɔ́ li waŋgɛ; La Yésus ɔ yííɓan, ɔ ɓógo á ndáá-ēcɛ́ŋ-Ɔlolómɛ̄.

Currently Selected:

Yohánɛs 8: NTB

Highlight

Copy