Lukas 1
1
Ma macaaca ana
1Tiyawfil, guula aɗaw masa ya waya elehey.
Ndana hay gaa ac ke ŋgə vaw ta mavində jene hay masa ke ŋgey da varandaw fana. 2Ec ke vindek labara masa andaw ta cəna da vara ndah mawala jeŋ ana eve ndey teceŋ dəga dapa mezler te mezlər te Yesu. Ndah ana sə, ac ndah mabəzada ma ta Zlavay. 3Mafay ana, ya ka yah cəv ta masəna ma ana mambəla ana dəga dapa mezlerey ana. Yey may, ke wefiyey mabay ta mavindakaɗ labara masa cəv mava ta mavindiya kad kaa Tiyawfil, nda mazlakava masa ya waya elehey. 4Ya vindakaɗ ara nesey, afa ka da səna ma masa aca sasərakakaɗay sə, ŋgesey ma metehwe ana.
Maslaf meheyə ta Zaŋ Baatis
5Dapa masa Herawt e ŋgə bay da yaŋ vavara te Zudey, nda maŋga kwakwas ta Zlav ɓa mezel Zakaray. Aŋga deveŋ ndaakwas hay masa ece zelec: «Gəva ta Abiya.» Ŋgwaza mezel Elizebet, aŋga dapa tərsam ta Harawna, nda mazlakava ta ndah maŋga kwakwas ta Zlav zleezle. 6Zakaray ac va ŋgwaza cuweeney, ac ndah maŋga jə mambəla ana fa yam te ndey ta Zlavay, aca cəp ma majawa ta Zlavay mambəla ana. Asaya, aca nah yaŋ kad pə ma majawa ta Zlav fakwanay eve cəvey ana. 7Amaa wut tec aabay, afa Elizebet aŋga dəlaya Ac cuweeney marndaw hay cay.
8Pas ɓa, Zakaray e ŋgə mezlər kad Zlavay dapa Way ta kwakwas, afa mezlərey ana pəsaŋga ana ŋgesey, maŋgiya sə, gəva ta Abiya hay. 9E ŋgə mezlər dapa way ana faŋga sə, afa ndah maŋga kwakwas ta Zlav fakwanay ac ka kazl siyakw da yaŋ ana, ka ta kəsiya ara ma tec majawa te gweɗey. Mezlər tata ana sə, te mesehw pa Way ta kwakwas ta Bay Mazlakava, a da ndal təbekw hay ke te ŋgengəzey. 10Dapa masa Zakaray a ndal təbekw hay te meŋgeŋgəzey sə, ndana hay fakwan da vəda aca cə mbahw. 11Faŋga faŋga ana, maskəla ta Bay Mazlakava ka ŋguzdan vaw, aŋga mazlaca jaka luwa ta zam ta slam te meŋgeŋgez təbekw hay. 12Masa Zakaray a ta wala sə, ka dəŋgazlan leŋgesl avəda, ka ŋgana zidaw mabay. 13Amaa maskəla ana ka gwaɗa, gege: «Ke ŋgə zidaw bay Zakaray, afa Zlav ka cəna mbahw takaa. Elizebet ŋgwazak a ta hayakaa wat mawal, ka ta pafa mezel Zaŋ. 14Ke te wesl mabay, ndana hay gaa ec te wesl mafay te meheyə ta wat ana. 15Wat ana, a ta njah ka nda maŋga mezlər mazlakava ta Bay Mazlakava. A ta sə wuzam aabay, kwa jə maɓəsla ana sə, a ta siya aabay. A nəhata eve Mesfen Mavəna dəga da hwaɗ ta mamaŋ. 16E te vehekec wudeh te Isreyel mabay kad vara Bay Mazlakava, Zlav teceŋ. 17E te dey fəma fa yam te ndey ta Zlavay eve leŋgesl va gədaŋ mazlakava ta Eli, ke te vehekec rav ta papa te wude hey kad vara wudeh teceŋ. E te hwedec ndah maŋgaŋgəra nda ka ta wulak yaŋ ara ndah maŋga jene eve cəvey ana, afa e de ləmedec tərsam maləmada ana kad Bay Mazlakava.»
18Zakaray ka gwaɗa maskəla sə, gege: «Ya da səniya masa jeŋ ana a ta ŋgata sə, fe mey? Afa ya marndaw cay, ŋgwaz aɗaw, aŋga ava mavay gaa cay may.» 19Maskəla sə, ka vahan, gege: «Yey Gebəriyel, nda mezlec fəma ta Zlavay ka ta ŋgana mezlərey, ya mazləra ka ta gwaɗakaa va ka ta ŋguzdakaɗ Labara mambəla ana nesey. 20Amaa ma aɗaw masa ya ta gwaɗakaa nesey sə, a ta ŋgata pas masa Zlav ta waya ara ya ta gwaɗakaa, amaa ka ka kəsaw aabay. Mafay ana, təlam nesey, ka ta tərata ka ɓaɓa, ka ta zlafa megweɗ bay kasl pa pas masa jeŋ ana ta ŋgata.»
21Dapa masa Zakaray aŋga dapa way ta kwakwas sə, ndah da vəda ac ka ɓəlaw, ec ke rəzlec mabay, afa ke njehek da way ana elehey. 22Medek ta Zakaray kad a vəda, a zlafa megweɗ sabay. Dapa ŋgesey ana, ndana hay ac ka səna avəda Zlav ka ŋguzdana jene dapa way ta kwakwas tata. A zlafa megweɗ sabay, e gweɗec sə, say ava ha.
23Masa Zakaray ka ndəvda pas te mezlər tata cay sə, ka data kad a wunam. 24Ava dəɓa ana, Elizebet ŋgwaza sə, ka ŋgata ava hwaɗ. Kiya zlam aŋga manjaha da way da way, a raɓda hwaɗ tata ana. Ke gweɗ da yaŋ aŋga ana, gege: 25«Mawala, jə masa Bay Mazlakava ta ŋgiya mafay taaɗaw. Ka wal makəsawa hwar dapa ndey taaɗaw avəda, fa yam te ndey ta ndana hay.»
Maslaf meheyə te Yesu
26Masa Elizebet aŋga ava hwaɗ kiya makwa sə, Zlav ke zlərek maskəla tata Gebəriyel kad Nezeret dapa vavara te Gelile, 27e zlərek sə, kad vara dem dahəla ɓa meseɓ te Zezef. Zezef ana sə, aŋga tərsam ta bay Deevet zleezle. Mezel te dem ana, Maaray. 28Maskəla ana ke sehwey kad vara vaw, ka gwaɗa, gege: «Ya gwaɗafakaa Maaray, kaa, masa Zlav ka walakaa elehey, Bay Mazlakava aŋga ava kaa.» 29Maaray a cəna ma ana nesey sə, ka dəŋgazlan yaŋ mabay, ka wulakaw, gege: «Megweɗ fa vaw ana ara nesey sə, a wal megweɗ gwagumaw?» 30Maskəla sə, ka gwaɗa, gege: «Maaray, ka ŋgə zidaw bay, afa Zlav ka ŋgafakaa metekweney. 31Wala ke te ŋgə ava hwaɗ, ke te heyek wat mawal, ka ta pafa mezel Yesu. 32A ta njah ka nda mazlakava, ac ta zaliya Wut ta Zlav da Wudam. Bay Mazlakava Zlavay a ta van gwadadakw bay Deevet papaŋ ta papaŋ. 33A ta ŋgə bay katar da yaŋ hwaɗ ta way ta Zakwab, bay tata ana e te meɗ aabay.» 34Maaray sə, ka gwaɗa maskəla sə, gege: «Jeŋ ana e te ŋgə meemey, afa ya sən mawal bay heley?» 35Maskəla sə, ka vahan, gege: «Mesfen Mavəna e te dek kad a yaŋ kaa, gədaŋ mazlakava ta Zlav da Wudam, a ta bərɗakaa eve meezeŋ tata. Mafay ana wat masa e te heyek nesey sə, a ta njah mavəna, ac ta zaliya Wut ta Zlavay. 36Wala, dəmakw Elizebet, aŋga ava hwaɗ təlam nesey, kwa aŋga marŋgwaz cay. E te heyek wat mawal. Ndana hay ac ka pafa dəlay, amaa təlam nesey, aŋga ava hwaɗ kiya makwa, 37afa jene masa a fəna gədaŋ ta Zlavay sə, aabay.» 38Ava dəɓa ana, Maaray ka gwaɗa, gege: «Ya nda maŋga mezlər ta Bay Mazlakava. A lada jeŋ ana hay fakwan de ŋgey ara ke te gweɗiyey.» Maskəla sə, ka gərda.
Maaray ke dey ka ta wuzaɗ Elizebet
39Dapa pas ana hay ŋgesey, Maaray ke dey ava mavas vaw kad pa wunam dapa wudam ɓa te berne te Zudey. 40Dapa mahusa tata, ke sehw a way ta Zakaray ka ta gwaɗafa Elizebet. 41Masa Elizebet a cəna megweɗ fa vaw ta Maaray sə, zef, wat da hwaɗ tata, ka ɓəla vaw. A faŋga ana, Mesfen Mavəna ka nəha Elizebet. 42Mafay ana, Elizebet ka gwaɗa Maaray ava gədaŋ, gege: «Mapəsma ta Zlavay aŋga da yaŋ kaa, ka fəna da yaŋ ŋgwazah dərziya fakwanay. Asaya, mapəsma ta Zlavay ana, aŋga da yaŋ wat masa ke te heyekey! 43Ya waawa, masa mamaŋ ta Bay aɗaw Mazlakava e dek kad way aɗaw ara nesey? 44Ya da səniya ka mamaŋ ta Bay aɗaw Mazlakava sə, afa dapa masa ya cəna megweɗ fa vaw takaa sə, wat da hwaɗ aɗaw ka ɓəla vaw eve mewesley. 45Mapəsma ta Bay Mazlakava ɓa da yaŋ kaa, afa ka ka kəs ma tata masa aŋga ta gwaɗakaa da yaŋ jə masa a ta ŋgata.»
46Ava dəɓa ana, Maaray ke gweɗ, gege:
«Mesfeney aɗaw, da hahəm Bay Mazlakava.
47Rav aɗaw aŋga manəha eve mewesley,
mafay ta Zlav nda membəliyey.
48Afa ka pafa ndey nda maŋga mezlər tata makwaɗma sə, mambəla ana.
Aŋga, e zler dəga ta pəsna
ndana hay fakwanay ec te gweɗ da yaŋ yey,
gege: “Aŋga dapa mambivaw”.
49Afa Zlav masa aŋga ava gədaŋ mabay, ke ŋgiyey jə mambəla ana.
Mezel tata sə, Zlav Mavəna.
50Mambəla ana tata e ŋgə sə, kad yaŋ ndah melel fətiya hayafa wat hayafa wat.
51Ke ŋguzdek gədaŋ tata te meŋgə mezlər mazlakava,
ke wezlŋgerecen yaŋ ta maslahəɓa hay.
52Ke bəreŋgec bay hay maŋga bay da yaŋ ndana hay ava gədaŋ,
fa gwadadakw ta bay tec avəda.
Ke peɗec ndah makwaɗma ka ndah mazlakava.
53Ndah masa may e kəɗeceŋ sə, ke vec zleley,
ndah eve zleley sə, ke vehdec ava ha dahəŋga.
54Ke dekey ke te jənec Isreyel, ndah maŋga mezlər tata,
ava masənafa mambəla ana tata.
55Ara masa aŋga te gweɗec kad papaŋ ta papaŋ tandakwa hay,
kad Abəraham va tərsam tata hay katar.»
56Maaray ka njah da way te Elizebet ke ŋgə mbala kiya mahkar. Ava dəɓa ana, ka data kad a wunam.
Mehey va maŋgal ŋgwal ta Zaŋ Baatis
57Kiya te mehey te Elizebet ka husakata cay, ke heyek wat mawal. 58Maslavda va tərsam tata hay, ac ka cəna masa Bay Mazlakava ka ŋgana mambəla ana kad Elizebet, ec ke wesley fa slam ana. 59Manah cahkar, ava dəɓa te meheyə ta wat ana, maslavda va tərsam tata hay sə, ec ke dey kad pa meŋgə kwakwas ta maŋgal ŋgwal ta wat ana va mapafa mezel tata. Ac ka wal mapafa mezel Zakaray ara ta papaŋ. 60Amaa mamaŋ gege: «Away, ara na bay, mezel tata sə, Zaŋ.» 61Ac ka vahan, gege: «Mezel ta ndana ara na dapa tərsam takwar ɓa geyey?» 62Ac ka nəkafa Zakaray papaŋ, ava ha aca ra səna a wal mapafa mezel ta wat ana mey? 63Zakaray ke nəkefec hap macacəɗa kaslparaha ke te vində mezel ta wat ana. Ka vindaw, gege: «Mezel tata Zaŋ.» Ndana hay fakwanay ec ke rəzlec fe mezeley ana. 64Faŋga faŋga ana sə, Zakaray ka zlar megweɗ saya ava ma tata, aŋga ara ɓaɓa sabay. Ka hahəm Zlavay ava gədaŋ. 65Ma ana, ke ŋgec zidaw mabay kad maslavda tata hay fakwanay. Ndah dapa wudam ta vavara te Zudey fakwanay ac ka gwaɗ ma ana. 66Ndana hay fakwanay macəna ma ana, ac ka wulakaw, gege: «Wat ana nesey sə, e te tər ka nda melemey?» Ece gweɗ ara nesey sə, afa gədaŋ ta Bay Mazlakava aŋga da yaŋ wat ana.
Zakaray a hahəm Zlavay
67Ava dəɓa ana, Mesfen Mavəna ke dek a yaŋ Zakaray, papaŋ ta wat ana. Ka zlar mabəzad ma ara nda mehwedek ma ke gweɗ, gege:
68«Mahahəmakwa Bay Mazlakava, Zlav te Isreyel,
afa ke jənec ndah tata, ke mbəlec avəda.
69Ka zlərandakwa bigula ka ta mbəlandakwa.
Nda ana sə, aŋga da hwaɗ ta way ta gwalay Deevet,
Nda maŋga mezlər tata zleezle.
70 Zlavay ka gwaɗandakwa dəga zleezle jaka pa ma ta ndah mehwedek ma tata mavəna.
71Ka gwaɗandakwa, a ta pəlandakwa avəda
dapa ha ta maslagəra tandakwa hay,
va dapa ha ta ndah masa aca walandakwa fe ndey bay.
72Ke ŋguzdek mawal vaw tata
kad papaŋ ta papaŋ tandakwa hay,
ka sənafa majaw ma tata mavəna ava andakwa.
73Dapa majaw ma ana sə, Zlav ka gwaɗa
kad Abəraham, papaŋ ta papaŋ tandakwa zleezle, gege:
74“Ava dəɓa ta mapəraslakandakwa dapa ha ta maslagəra tandakwa hay sə,
andə da kəɗakwa ha kad aŋga ava zidaw sabay.
75Anda da njahakwa dapa meŋgə metekwen fa nda va meŋgə jene eve cəvey ana,
fa yam te ndey tata dapa manjah tandakwa fakwanay.”
76Kaa may, wat aɗaw,
ka tərata ka nda mehwedek ma ta Zlav da Wudam,
afa ke te dey fəma fa yam te ndey ta Bay Mazlakava
ka ta ləmadan cəv tata hay.
77Ke te ŋguzdecen kad ndah ta Zlavay,
Zlavay ana sə, e te mbəlec avəda,
jaka pe mepəlecen mebər teceŋ hay.
78Bay tandakwa Zlavay e te mbəlec avəda sə,
afa aŋga nda maŋga mezlər mambəla ana.
Mbalay mambəla ana tata,
ka zlərandakwa bat masa e dek da wudam ara pas te beŋgeɗek vaw.
79Ke ŋguzdek vaw kad ndah masa
ac manjaha dapa ləvaŋ va meezeŋ ta maməcay,
afa a da padandakwaɗ ma dapa cəv te metehey.»
Manjah ta Zaŋ Baatis dapa wat
80Ta wat ana sə, ke gəley, ka ŋgat leŋgesl fəma fəma. Ava dəɓa ana, ke dey ka ta njah pə yaŋ ta səɓak kasl pa pas ta maŋguzad vaw tata kad ndah te Isreyel hay.
Currently Selected:
Lukas 1: CUVnt
Highlight
Share
Copy
Want to have your highlights saved across all your devices? Sign up or sign in
© 2022 CABTAL
Lukas 1
1
Ma macaaca ana
1Tiyawfil, guula aɗaw masa ya waya elehey.
Ndana hay gaa ac ke ŋgə vaw ta mavində jene hay masa ke ŋgey da varandaw fana. 2Ec ke vindek labara masa andaw ta cəna da vara ndah mawala jeŋ ana eve ndey teceŋ dəga dapa mezler te mezlər te Yesu. Ndah ana sə, ac ndah mabəzada ma ta Zlavay. 3Mafay ana, ya ka yah cəv ta masəna ma ana mambəla ana dəga dapa mezlerey ana. Yey may, ke wefiyey mabay ta mavindakaɗ labara masa cəv mava ta mavindiya kad kaa Tiyawfil, nda mazlakava masa ya waya elehey. 4Ya vindakaɗ ara nesey, afa ka da səna ma masa aca sasərakakaɗay sə, ŋgesey ma metehwe ana.
Maslaf meheyə ta Zaŋ Baatis
5Dapa masa Herawt e ŋgə bay da yaŋ vavara te Zudey, nda maŋga kwakwas ta Zlav ɓa mezel Zakaray. Aŋga deveŋ ndaakwas hay masa ece zelec: «Gəva ta Abiya.» Ŋgwaza mezel Elizebet, aŋga dapa tərsam ta Harawna, nda mazlakava ta ndah maŋga kwakwas ta Zlav zleezle. 6Zakaray ac va ŋgwaza cuweeney, ac ndah maŋga jə mambəla ana fa yam te ndey ta Zlavay, aca cəp ma majawa ta Zlavay mambəla ana. Asaya, aca nah yaŋ kad pə ma majawa ta Zlav fakwanay eve cəvey ana. 7Amaa wut tec aabay, afa Elizebet aŋga dəlaya Ac cuweeney marndaw hay cay.
8Pas ɓa, Zakaray e ŋgə mezlər kad Zlavay dapa Way ta kwakwas, afa mezlərey ana pəsaŋga ana ŋgesey, maŋgiya sə, gəva ta Abiya hay. 9E ŋgə mezlər dapa way ana faŋga sə, afa ndah maŋga kwakwas ta Zlav fakwanay ac ka kazl siyakw da yaŋ ana, ka ta kəsiya ara ma tec majawa te gweɗey. Mezlər tata ana sə, te mesehw pa Way ta kwakwas ta Bay Mazlakava, a da ndal təbekw hay ke te ŋgengəzey. 10Dapa masa Zakaray a ndal təbekw hay te meŋgeŋgəzey sə, ndana hay fakwan da vəda aca cə mbahw. 11Faŋga faŋga ana, maskəla ta Bay Mazlakava ka ŋguzdan vaw, aŋga mazlaca jaka luwa ta zam ta slam te meŋgeŋgez təbekw hay. 12Masa Zakaray a ta wala sə, ka dəŋgazlan leŋgesl avəda, ka ŋgana zidaw mabay. 13Amaa maskəla ana ka gwaɗa, gege: «Ke ŋgə zidaw bay Zakaray, afa Zlav ka cəna mbahw takaa. Elizebet ŋgwazak a ta hayakaa wat mawal, ka ta pafa mezel Zaŋ. 14Ke te wesl mabay, ndana hay gaa ec te wesl mafay te meheyə ta wat ana. 15Wat ana, a ta njah ka nda maŋga mezlər mazlakava ta Bay Mazlakava. A ta sə wuzam aabay, kwa jə maɓəsla ana sə, a ta siya aabay. A nəhata eve Mesfen Mavəna dəga da hwaɗ ta mamaŋ. 16E te vehekec wudeh te Isreyel mabay kad vara Bay Mazlakava, Zlav teceŋ. 17E te dey fəma fa yam te ndey ta Zlavay eve leŋgesl va gədaŋ mazlakava ta Eli, ke te vehekec rav ta papa te wude hey kad vara wudeh teceŋ. E te hwedec ndah maŋgaŋgəra nda ka ta wulak yaŋ ara ndah maŋga jene eve cəvey ana, afa e de ləmedec tərsam maləmada ana kad Bay Mazlakava.»
18Zakaray ka gwaɗa maskəla sə, gege: «Ya da səniya masa jeŋ ana a ta ŋgata sə, fe mey? Afa ya marndaw cay, ŋgwaz aɗaw, aŋga ava mavay gaa cay may.» 19Maskəla sə, ka vahan, gege: «Yey Gebəriyel, nda mezlec fəma ta Zlavay ka ta ŋgana mezlərey, ya mazləra ka ta gwaɗakaa va ka ta ŋguzdakaɗ Labara mambəla ana nesey. 20Amaa ma aɗaw masa ya ta gwaɗakaa nesey sə, a ta ŋgata pas masa Zlav ta waya ara ya ta gwaɗakaa, amaa ka ka kəsaw aabay. Mafay ana, təlam nesey, ka ta tərata ka ɓaɓa, ka ta zlafa megweɗ bay kasl pa pas masa jeŋ ana ta ŋgata.»
21Dapa masa Zakaray aŋga dapa way ta kwakwas sə, ndah da vəda ac ka ɓəlaw, ec ke rəzlec mabay, afa ke njehek da way ana elehey. 22Medek ta Zakaray kad a vəda, a zlafa megweɗ sabay. Dapa ŋgesey ana, ndana hay ac ka səna avəda Zlav ka ŋguzdana jene dapa way ta kwakwas tata. A zlafa megweɗ sabay, e gweɗec sə, say ava ha.
23Masa Zakaray ka ndəvda pas te mezlər tata cay sə, ka data kad a wunam. 24Ava dəɓa ana, Elizebet ŋgwaza sə, ka ŋgata ava hwaɗ. Kiya zlam aŋga manjaha da way da way, a raɓda hwaɗ tata ana. Ke gweɗ da yaŋ aŋga ana, gege: 25«Mawala, jə masa Bay Mazlakava ta ŋgiya mafay taaɗaw. Ka wal makəsawa hwar dapa ndey taaɗaw avəda, fa yam te ndey ta ndana hay.»
Maslaf meheyə te Yesu
26Masa Elizebet aŋga ava hwaɗ kiya makwa sə, Zlav ke zlərek maskəla tata Gebəriyel kad Nezeret dapa vavara te Gelile, 27e zlərek sə, kad vara dem dahəla ɓa meseɓ te Zezef. Zezef ana sə, aŋga tərsam ta bay Deevet zleezle. Mezel te dem ana, Maaray. 28Maskəla ana ke sehwey kad vara vaw, ka gwaɗa, gege: «Ya gwaɗafakaa Maaray, kaa, masa Zlav ka walakaa elehey, Bay Mazlakava aŋga ava kaa.» 29Maaray a cəna ma ana nesey sə, ka dəŋgazlan yaŋ mabay, ka wulakaw, gege: «Megweɗ fa vaw ana ara nesey sə, a wal megweɗ gwagumaw?» 30Maskəla sə, ka gwaɗa, gege: «Maaray, ka ŋgə zidaw bay, afa Zlav ka ŋgafakaa metekweney. 31Wala ke te ŋgə ava hwaɗ, ke te heyek wat mawal, ka ta pafa mezel Yesu. 32A ta njah ka nda mazlakava, ac ta zaliya Wut ta Zlav da Wudam. Bay Mazlakava Zlavay a ta van gwadadakw bay Deevet papaŋ ta papaŋ. 33A ta ŋgə bay katar da yaŋ hwaɗ ta way ta Zakwab, bay tata ana e te meɗ aabay.» 34Maaray sə, ka gwaɗa maskəla sə, gege: «Jeŋ ana e te ŋgə meemey, afa ya sən mawal bay heley?» 35Maskəla sə, ka vahan, gege: «Mesfen Mavəna e te dek kad a yaŋ kaa, gədaŋ mazlakava ta Zlav da Wudam, a ta bərɗakaa eve meezeŋ tata. Mafay ana wat masa e te heyek nesey sə, a ta njah mavəna, ac ta zaliya Wut ta Zlavay. 36Wala, dəmakw Elizebet, aŋga ava hwaɗ təlam nesey, kwa aŋga marŋgwaz cay. E te heyek wat mawal. Ndana hay ac ka pafa dəlay, amaa təlam nesey, aŋga ava hwaɗ kiya makwa, 37afa jene masa a fəna gədaŋ ta Zlavay sə, aabay.» 38Ava dəɓa ana, Maaray ka gwaɗa, gege: «Ya nda maŋga mezlər ta Bay Mazlakava. A lada jeŋ ana hay fakwan de ŋgey ara ke te gweɗiyey.» Maskəla sə, ka gərda.
Maaray ke dey ka ta wuzaɗ Elizebet
39Dapa pas ana hay ŋgesey, Maaray ke dey ava mavas vaw kad pa wunam dapa wudam ɓa te berne te Zudey. 40Dapa mahusa tata, ke sehw a way ta Zakaray ka ta gwaɗafa Elizebet. 41Masa Elizebet a cəna megweɗ fa vaw ta Maaray sə, zef, wat da hwaɗ tata, ka ɓəla vaw. A faŋga ana, Mesfen Mavəna ka nəha Elizebet. 42Mafay ana, Elizebet ka gwaɗa Maaray ava gədaŋ, gege: «Mapəsma ta Zlavay aŋga da yaŋ kaa, ka fəna da yaŋ ŋgwazah dərziya fakwanay. Asaya, mapəsma ta Zlavay ana, aŋga da yaŋ wat masa ke te heyekey! 43Ya waawa, masa mamaŋ ta Bay aɗaw Mazlakava e dek kad way aɗaw ara nesey? 44Ya da səniya ka mamaŋ ta Bay aɗaw Mazlakava sə, afa dapa masa ya cəna megweɗ fa vaw takaa sə, wat da hwaɗ aɗaw ka ɓəla vaw eve mewesley. 45Mapəsma ta Bay Mazlakava ɓa da yaŋ kaa, afa ka ka kəs ma tata masa aŋga ta gwaɗakaa da yaŋ jə masa a ta ŋgata.»
46Ava dəɓa ana, Maaray ke gweɗ, gege:
«Mesfeney aɗaw, da hahəm Bay Mazlakava.
47Rav aɗaw aŋga manəha eve mewesley,
mafay ta Zlav nda membəliyey.
48Afa ka pafa ndey nda maŋga mezlər tata makwaɗma sə, mambəla ana.
Aŋga, e zler dəga ta pəsna
ndana hay fakwanay ec te gweɗ da yaŋ yey,
gege: “Aŋga dapa mambivaw”.
49Afa Zlav masa aŋga ava gədaŋ mabay, ke ŋgiyey jə mambəla ana.
Mezel tata sə, Zlav Mavəna.
50Mambəla ana tata e ŋgə sə, kad yaŋ ndah melel fətiya hayafa wat hayafa wat.
51Ke ŋguzdek gədaŋ tata te meŋgə mezlər mazlakava,
ke wezlŋgerecen yaŋ ta maslahəɓa hay.
52Ke bəreŋgec bay hay maŋga bay da yaŋ ndana hay ava gədaŋ,
fa gwadadakw ta bay tec avəda.
Ke peɗec ndah makwaɗma ka ndah mazlakava.
53Ndah masa may e kəɗeceŋ sə, ke vec zleley,
ndah eve zleley sə, ke vehdec ava ha dahəŋga.
54Ke dekey ke te jənec Isreyel, ndah maŋga mezlər tata,
ava masənafa mambəla ana tata.
55Ara masa aŋga te gweɗec kad papaŋ ta papaŋ tandakwa hay,
kad Abəraham va tərsam tata hay katar.»
56Maaray ka njah da way te Elizebet ke ŋgə mbala kiya mahkar. Ava dəɓa ana, ka data kad a wunam.
Mehey va maŋgal ŋgwal ta Zaŋ Baatis
57Kiya te mehey te Elizebet ka husakata cay, ke heyek wat mawal. 58Maslavda va tərsam tata hay, ac ka cəna masa Bay Mazlakava ka ŋgana mambəla ana kad Elizebet, ec ke wesley fa slam ana. 59Manah cahkar, ava dəɓa te meheyə ta wat ana, maslavda va tərsam tata hay sə, ec ke dey kad pa meŋgə kwakwas ta maŋgal ŋgwal ta wat ana va mapafa mezel tata. Ac ka wal mapafa mezel Zakaray ara ta papaŋ. 60Amaa mamaŋ gege: «Away, ara na bay, mezel tata sə, Zaŋ.» 61Ac ka vahan, gege: «Mezel ta ndana ara na dapa tərsam takwar ɓa geyey?» 62Ac ka nəkafa Zakaray papaŋ, ava ha aca ra səna a wal mapafa mezel ta wat ana mey? 63Zakaray ke nəkefec hap macacəɗa kaslparaha ke te vində mezel ta wat ana. Ka vindaw, gege: «Mezel tata Zaŋ.» Ndana hay fakwanay ec ke rəzlec fe mezeley ana. 64Faŋga faŋga ana sə, Zakaray ka zlar megweɗ saya ava ma tata, aŋga ara ɓaɓa sabay. Ka hahəm Zlavay ava gədaŋ. 65Ma ana, ke ŋgec zidaw mabay kad maslavda tata hay fakwanay. Ndah dapa wudam ta vavara te Zudey fakwanay ac ka gwaɗ ma ana. 66Ndana hay fakwanay macəna ma ana, ac ka wulakaw, gege: «Wat ana nesey sə, e te tər ka nda melemey?» Ece gweɗ ara nesey sə, afa gədaŋ ta Bay Mazlakava aŋga da yaŋ wat ana.
Zakaray a hahəm Zlavay
67Ava dəɓa ana, Mesfen Mavəna ke dek a yaŋ Zakaray, papaŋ ta wat ana. Ka zlar mabəzad ma ara nda mehwedek ma ke gweɗ, gege:
68«Mahahəmakwa Bay Mazlakava, Zlav te Isreyel,
afa ke jənec ndah tata, ke mbəlec avəda.
69Ka zlərandakwa bigula ka ta mbəlandakwa.
Nda ana sə, aŋga da hwaɗ ta way ta gwalay Deevet,
Nda maŋga mezlər tata zleezle.
70 Zlavay ka gwaɗandakwa dəga zleezle jaka pa ma ta ndah mehwedek ma tata mavəna.
71Ka gwaɗandakwa, a ta pəlandakwa avəda
dapa ha ta maslagəra tandakwa hay,
va dapa ha ta ndah masa aca walandakwa fe ndey bay.
72Ke ŋguzdek mawal vaw tata
kad papaŋ ta papaŋ tandakwa hay,
ka sənafa majaw ma tata mavəna ava andakwa.
73Dapa majaw ma ana sə, Zlav ka gwaɗa
kad Abəraham, papaŋ ta papaŋ tandakwa zleezle, gege:
74“Ava dəɓa ta mapəraslakandakwa dapa ha ta maslagəra tandakwa hay sə,
andə da kəɗakwa ha kad aŋga ava zidaw sabay.
75Anda da njahakwa dapa meŋgə metekwen fa nda va meŋgə jene eve cəvey ana,
fa yam te ndey tata dapa manjah tandakwa fakwanay.”
76Kaa may, wat aɗaw,
ka tərata ka nda mehwedek ma ta Zlav da Wudam,
afa ke te dey fəma fa yam te ndey ta Bay Mazlakava
ka ta ləmadan cəv tata hay.
77Ke te ŋguzdecen kad ndah ta Zlavay,
Zlavay ana sə, e te mbəlec avəda,
jaka pe mepəlecen mebər teceŋ hay.
78Bay tandakwa Zlavay e te mbəlec avəda sə,
afa aŋga nda maŋga mezlər mambəla ana.
Mbalay mambəla ana tata,
ka zlərandakwa bat masa e dek da wudam ara pas te beŋgeɗek vaw.
79Ke ŋguzdek vaw kad ndah masa
ac manjaha dapa ləvaŋ va meezeŋ ta maməcay,
afa a da padandakwaɗ ma dapa cəv te metehey.»
Manjah ta Zaŋ Baatis dapa wat
80Ta wat ana sə, ke gəley, ka ŋgat leŋgesl fəma fəma. Ava dəɓa ana, ke dey ka ta njah pə yaŋ ta səɓak kasl pa pas ta maŋguzad vaw tata kad ndah te Isreyel hay.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2022 CABTAL